ਜ਼ਿਲ੍ਹਾ ਭਾਸ਼ਾ ਦਫ਼ਤਰ, ਪਠਾਨਕੋਟ ਵੱਲੋਂ ਜ਼ਿਲ੍ਹਾ ਪੱਧਰੀ ਸਾਹਿਤ ਸਿਰਜਣ ਤੇ ਕਵਿਤਾ ਗਾਇਨ ਮੁਕਾਬਲੇ
---- ਕਵਿਤਾ ਰਚਨਾ ਮੁਕਾਬਲੇ ਵਿੱਚ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਮਮੂਨ ਦੀ ਸਵਿੱਤਰੀ ਨੇ ਪ੍ਰਾਪਤ ਕੀਤਾ ਪਹਿਲਾਂ ਸਥਾਨ
ਪਠਾਨਕੋਟ, 1 ਅਗਸਤ 2024 - ਡਾਇਰੈਕਟਰ ਭਾਸ਼ਾ ਵਿਭਾਗ, ਪੰਜਾਬ ਜੀ ਦੀ ਰਹਿਨੁਮਾਈ ਅਧੀਨ ਜ਼ਿਲ੍ਹਾ ਭਾਸ਼ਾ ਦਫ਼ਤਰ, ਪਠਾਨਕੋਟ ਵੱਲੋਂ ਜ਼ਿਲ੍ਹਾ ਪੱਧਰੀ ਸਾਹਿਤ ਸਿਰਜਣ ਤੇ ਕਵਿਤਾ ਗਾਇਨ ਮੁਕਾਬਲੇ ਐੱਸ ਐੱਮ ਡੀ ਆਰ ਐੱਸ ਡੀ ਕਾਲਜ ਆਫ ਐਜੂਕੇਸ਼ਨ, ਪਠਾਨਕੋਟ ਵਿਖੇ ਕਰਵਾਏ ਗਏ, ਜਿਸ ਵਿੱਚ ਜ਼ਿਲ੍ਹਾ ਭਰ ਦੇ ਵਿਦਿਆਰਥੀਆਂ ਨੇ ਭਾਗ ਲਿਆ।
ਜ਼ਿਲ੍ਹਾ ਭਾਸ਼ਾ ਅਫ਼ਸਰ,ਪਠਾਨਕੋਟ ਡਾ. ਸੁਰੇਸ਼ ਮਹਿਤਾ ਦੀ ਅਗਵਾਈ ਵਿੱਚ ਹੋਏ ਇਸ ਸਮਾਗਮ ਵਿੱਚ ਕਵਿਤਾ ਰਚਨਾ, ਕਹਾਣੀ ਰਚਨਾ, ਲੇਖ ਰਚਨਾ ਤੇ ਕਵਿਤਾ ਗਾਇਨ ਮੁਕਾਬਲਿਆਂ ਵਿੱਚ ਵਿਦਿਆਰਥੀਆਂ ਦੀ ਰਚਨਾਤਮਿਕਤਾ ਤੇ ਸਿਰਜਣਾਤਮਕਤਾ ਨੂੰ ਜੱਜਾਂ ਵੱਲੋਂ ਪਰਖਿਆ ਗਿਆ। ਕਮਾਲ ਦੀ ਗੱਲ ਇਹ ਰਹੀ ਕਿ ਹਰ ਮੁਕਾਬਲੇ ਵਿੱਚ ਮੈਟ੍ਰਿਕ ਪੱਧਰ ਦੇ ਵਿਦਿਆਰਥੀਆਂ ਵੱਲੋਂ ਕਮਾਲ ਕਰ ਦਿਖਾਇਆ। ਵਿਦਿਆਰਥੀਆਂ ਵਿਚਲਾ ਉਤਸ਼ਾਹ ਤੇ ਆਪਣੇ ਅੰਦਰ ਛੁਪੀ ਪ੍ਰਤਿਭਾ ਨੂੰ ਦਿਖਾਉਣ ਦੀ ਚਾਹ ਦੇਖਿਆਂ ਹੀ ਬਣਦੀ ਸੀ। ਵਿਦਿਆਰਥੀਆਂ ਨੂੰ ਸਾਹਿਤ ਸਿਰਜਣਾ ਲਈ ਮੌਕੇ ’ਤੇ ਹੀ ਵਿਸ਼ੇ ਦਿੱਤੇ ਗਏ ਜਿਸ ’ਤੇ ਉਹਨਾਂ ਵੱਲੋਂ ਸਾਹਿਤ ਸਿਰਜਣਾ ਕੀਤੀ ਗਈ। ਵਿਦਿਆਰਥੀਆਂ ਦੀ ਪ੍ਰਤਿਭਾ ਨੂੰ ਦੇਖ ਕੇ ਜੱਜ ਸਾਹਿਬਾਨ ਵੀ ਹੈਰਾਨ ਰਹਿ ਗਏ।
ਸਭ ਤੋਂ ਪਹਿਲਾਂ ਕਾਲਜ ਦੇ ਪ੍ਰਿੰਸੀਪਲ ਡਾ. ਮੀਨਾਕਸ਼ੀ ਵਿੱਗ ਨੇ ਆਏ ਹੋਏ ਮਹਿਮਾਨਾਂ ਤੇ ਵਿਦਿਆਰਥੀਆਂ ਨੂੰ ਕਾਲਜ ਦੇ ਵਿਹੜੇ ਵਿੱਚ ਪਹੁੰਚਣ ’ਤੇ ’ ਜੀ ਆਇਆਂ ਨੂੰ ’ ਕਿਹਾ। ਉਨ੍ਹਾਂ ਕਿਹਾ ਕਿ ਭਾਸ਼ਾ ਵਿਭਾਗ ਵੱਲੋਂ ਵਿਦਿਆਰਥੀਆਂ ਦੀ ਪ੍ਰਤਿਭਾ ਨੂੰ ਉਭਾਰਨ ਲਈ ਇਹ ਵਧੀਆ ਤੇ ਸ਼ਲਾਘਾਯੋਗ ਉਪਰਾਲਾ ਹੈ। ਵਾਈਸ ਪ੍ਰਿੰਸੀਪਲ ਪ੍ਰੋ. ਸੁਸ਼ਮਾ ਹੋਰਾਂ ਵੱਲੋਂ ਵੀ ਵਿਭਾਗ ਦੇ ਉਪਰਾਲੇ ’ਤੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ ਗਿਆ। ਜੱਜਾਂ ਦੀ ਭੂਮਿਕਾ ਸ਼ਾਇਰ ਦਵਿੰਦਰ ਅੱਤਰੀ,ਡਾ. ਸੰਦੀਪ ਕੌਰ,ਡਾ. ਪਵਨ ਕੁਮਾਰ ਤੇ ਪ੍ਰੋ. ਪੂਜਾ ਵੱਲੋਂ ਨਿਭਾਈ ਗਈ ਜਦ ਕਿ ਮੰਚ ਦਾ ਸੰਚਾਲਨ ਵਿਨੋਦ ਕੁਮਾਰ ਜੀ ਵੱਲੋਂ ਬਾਖੂਬੀ ਕੀਤਾ ਗਿਆ। ਕਵਿਤਾ ਰਚਨਾ ਮੁਕਾਬਲੇ ਵਿੱਚ ਸਵਿੱਤਰੀ, ਸ ਸ ਸ ਸ, ਮਮੂਨ ਨੇ ਪਹਿਲਾਂ, ਹਰਮੀਤ ਪਲਿਆਨ, ਸ ਸ ਸ ਸ ਮਲਿਕਪੁਰ ਨੇ ਦੂਜਾ ਤੇ ਹਰਸ਼ਨਾ ਦੇਵੀ, ਸ ਸ ਸ ਸ ਬਮਿਆਲ ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ।
ਕਹਾਣੀ ਰਚਨਾ ਵਿੱਚ ਪਹਿਲੇ ਸਥਾਨ ’ਤੇ ਮਾਨਸੀ, ਸ ਕੰ ਸ ਸ ਸ ਪਠਾਨਕੋਟ, ਦੁਜੇ ਸਥਾਨ ’ਤੇ ਗੌਤਮ ਸਿੰਘ ਮਨਹਾਸ ਸ ਸ ਸ ਸ, ਘਿਆਲਾ ਤੇ ਤੀਜੇ ਸਥਾਨ ’ਤੇ ਰੋਹਨ ਮਹਿਮੀ, ਸ ਹ ਹ ,ਗੁੜ੍ਹਾ ਕਲਾਂ ਰਿਹਾ। ਲੇਖ ਰਚਨਾ ਵਿੱਚ ਤਮੰਨਾ ਦੇਵੀ, ਸ ਹ ਸ,ਨਿਚਲੀ ਬੜੋਈ ਪਹਿਲੇ ਸਥਾਨ ’ਤੇ, ਜੋਤੀ ਸ ਸ ਸ ਸ , ਘੋਹ ਦੂਜੇ ਸਥਾਨ ’ਤੇ ਅਤੇ ਸ਼ਿਵਾਲਿਕਾ ,ਸੇਂਟ ਥਾਮਸ ਸ ਸ ਸ, ਪਠਾਨਕੋਟ ਤੀਜੇ ਸਥਾਨ ’ਤੇ ਰਹੀ। ਕਵਿਤਾ ਗਾਇਨ ਮੁਕਾਬਲੇ ਵਿੱਚ ਵੱਡੀ ਗਿਣਤੀ ਵਿੱਚ ਵਿਦਿਆਰਥੀਆਂ ਨੇ ਭਾਗ ਲਿਆ ,ਜਿਸ ਵਿੱਚ ਗੁਨਰੂਪ ਬਾਜਵਾ, ਕਰਾਇਸਟ ਦਾ ਕਿੰਗ ਕਾਨਵੇਂਟ ਸਕੂਲ, ਸੁਜਾਨਪੁਰ ਨੇ ਪਹਿਲਾ, ਕੇਜੀਆ ਨਾਹਰ, ਸੇਂਟ ਥਾਮਸ ਸ ਸ ਸ, ਪਠਾਨਕੋਟ ਨੇ ਦੂਜਾ ਤੇ ਮਾਨੀਆ,ਸ ਸ ਸ ਸ ,ਕੀੜੀ ਖ਼ੁਰਦ ਨੇ ਤੀਜਾ ਸਥਾਨ ਹਾਸਲ ਕੀਤਾ।
ਜੇਤੂ ਵਿਦਿਆਰਥੀਆਂ ਨੂੰ ਵਿਭਾਗੀ ਪੁਸਤਕਾਂ ਦੇ ਸੈੱਟ ਇਨਾਮ ਵਜੋਂ ਦਿੱਤੇ ਗਏ ਤੇ ਵਿਦਿਆਰਥੀਆਂ ਨੂੰ ਤਿਆਰ ਕਰਨ ਵਾਲੇ ਅਧਿਆਪਕਾਂ ਨੂੰ ਪ੍ਰਸੰਸਾ ਪੱਤਰ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਇਹਨਾਂ ਮੁਕਾਬਲਿਆਂ ਵਿੱਚੋਂ ਪਹਿਲੇ ਸਥਾਨ ’ਤੇ ਆਉਣ ਵਾਲੇ ਵਿਦਿਆਰਥੀਆਂ ਨੂੰ ਰਾਜ ਪੱਧਰੀ ਮੁਕਾਬਲਿਆਂ ਵਿੱਚ ਭਾਗ ਲੈਣ ਲਈ ਭੇਜਿਆ ਜਾਵੇਗਾ। ਇਹਨਾਂ ਸਮਾਗਮ ਵਿੱਚ ਦਫ਼ਤਰ ਦੇ ਕਰਮਚਾਰੀ ਸ੍ਰੀ ਰਾਜੇਸ਼ ਕੁਮਾਰ, ਖੋਜ ਅਫ਼ਸਰ, ਕਲਰਕ ਜੁਗਲ ਕਿਸ਼ੋਰ ਤੇ ਕਮਲ ਕਿਸ਼ੋਰ ਵੀ ਹਾਜ਼ਰ ਸਨ।