ਰਕੋਸਾ’ ਨੇ ਆਪਣੀ ਪਲੇਠੀ ‘ਐਲੁਮਨੀ ਮੀਟ’ ਵਿਚ ਆਪਣੇ ਪੱਥ-ਪ੍ਰਦਸ਼ਕਾਂ ਪ੍ਰੋ. ਰਣਜੀਤ ਸਿੰਘ ਅਤੇ ਪ੍ਰੋ. ਬਰਿਜ ਮੋਹਨ ਕਪਲਿਸ਼ ਨੂੰ ਸਨਮਾਨਤ ਕੀਤਾ
ਫਗਵਾੜਾ,13 ਫਰਵਰੀ,2023- ਰਾਮਗੜ੍ਹੀਆ ਕਾਲਜ ਓਲਡ ਸਟੂਡੈਂਟਸ ਐਸੋਸੀਏਸ਼ਨ(‘ਰਕੋਸਾ’),ਫਗਵਾੜਾ ਦੀ ਪਲੇਠੀ ‘ਐਲੁਮਨੀ ਮੀਟ’ ਬੀਤੀ ਰਾਤ ਇਕ ਸਥਾਨਕ ਹੋਟਲ ਵਿਚ ਹੋਈ।
ਇਸ ਜਨਰਲ ਬਾਡੀ ਮੀਟਿੰਗ ਦੀ ਪ੍ਰਧਾਨਗੀ ਐਸ.ਪੀ.ਸੇਠੀ(ਫਾਈਨ ਸਵਿਚਜ਼) ਨੇ ਕੀਤੀ।
ਇਸ ਦੌਰਾਨ ਇਕ ਪ੍ਰਭਾਵਸ਼ਾਲੀ ਸਮਾਗਮ ਵਿਚ ਕਾਲਜ ਦੇ ਪੁਰਾਣੇ ਵਿਦਿਆਰਥੀਆਂ ਨੇ ਆਪਣੇ ਪੱਥ-ਪ੍ਰਦਸ਼ਕਾਂ 93 ਸਾਲਾ ਸੇਵਾ-ਮੁਕਤ ਅੰਗਰੇਜ਼ੀ ਦੇ ਪ੍ਰੋਫੈਸਰ ਅਤੇ ਕਾਲਜ ਦੇ ਸਾਬਕਾ ਪ੍ਰਿੰਸੀਪਲ ਸ.ਰਣਜੀਤ ਸਿੰਘ ਅਤੇ 84 ਸਾਲਾ ਸੇਵਾ ਮੁਕਤ ਗਣਿਤ ਦੇ ਪ੍ਰੋਫੈਸਰ ਸ਼੍ਰੀ ਬਰਿਜ ਮੋਹਨ ਕਪਲਿਸ਼ ਦਾ ਸ਼ੁਕਰੀਆ ਅਦਾ ਕਰਨ ਹਿਤ ਉਹਨਾਂ ਨੂੰ ਸਨਮਾਨਤ ਕੀਤਾ।
ਇਹ ਜਾਣਕਾਰੀ ਅਜ ਇਥੇ ਦਿੰਦਿਆਂ ‘ਰਕੋਸਾ’ ਦੇ ਜਨਰਲ ਸਕਤਰ ਸ. ਸਰਬਜੀਤ ਸਿੰਘ ਭੱਟੀ,ਸੇਵਾ ਮੁਕਤ,ਐਸ.ਐਸ.ਪੀ.(ਆਈ.ਬੀ.) ਨੇ ਦਸਿਆ ਕਿ ਸਨਮਾਨ ਵਜੋਂ ਦੋਨਾਂ ਵਿਦਿਅਕ ਹਸਤੀਆਂ ਨੂੰ ਮਮੈਂਟੋ,ਸ਼ਾਲ ਅਤੇ ਫੁਲਾਂ ਦੇ ਗੁਲਦਸਤੇ ਭੇਟ ਕੀਤੇ ਗਏ।
ਇਸ ਮੌਕੇ ਪ੍ਰੋ. ਰਣਜੀਤ ਸਿੰਘ ਬਾਰੇ ਜਾਣਕਾਰੀ ਪ੍ਰੋ. ਜਸਵੰਤ ਸਿੰਘ ਗੰਡਮ ਅਤੇ ਪ੍ਰੋ. ਬਰਿਜ ਮੋਹਨ ਕਪਲਿਸ਼ ਬਾਰੇ ਜਾਣਕਾਰੀ ਪ੍ਰੋ. ਅਸ਼ੋਕ ਚੱਢਾ ਨੇ ਦਿਤੀ।
ਪ੍ਰੋ. ਰਣਜੀਤ ਸਿੰਘ ਨੇ ਆਪਣੇ ਪੁਰਾਣੇ ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਦਿਆਂ ਉਹਨਾਂ ਨੂੰ ਹਰ ਅਵਸਥਾ ਵਿਚ ‘ਨੌਜਵਾਨ’ ਰਹਿਣ ਅਤੇ ਮੁਹਬਤ ਕਰਨ ਦਾ ਸੰਦੇਸ਼ ਦਿਤਾ।ਉਹਨਾਂ ਨੇ ਰਾਮਗੜ੍ਹੀਆ ਸੰਸਥਾਵਾਂ ਦੇ ਬਾਨੀ ਪ੍ਰਧਾਨ ਸ. ਮੋਹਨ ਸਿੰਘ ਹਦੀਆਬਾਦੀ ਦੀ ਦੂਰ-ਦ੍ਰਿਸ਼ਟੀ ਦੀ ਭਰਪੂਰ ਪ੍ਰਸ਼ੰਸਾ ਕੀਤੀ।
ਸਮਾਗਮ ਵਿਚ ਸ. ਮੋਹਨ ਸਿੰਘ ਹਦੀਆਬਾਦੀ ਅਤੇ ਸ. ਮੇਲਾ ਸਿੰਘ ਭੋਗਲ ਸਮੇਤ ਰਾਮਗੜ੍ਹੀਆ ਵਿਦਿਅਕ ਕੌਂਸਲ ਦੇ ਸਾਬਕਾ ਪ੍ਰਧਾਨਾਂ ਨੂੰ ਸ਼ਰਧਾਂਜਲੀ ਦਿਤੀ ਗਈ।
ਸਮਾਗਮ ਵਿਚ ‘ਰਕੋਸਾ’ ਦੇ ਸੰਵਿਧਾਨ ਨੂੰ ਵੀ ਰਿਲੀਜ਼ ਕੀਤਾ ਗਿਆ।ਸੇਵਾ ਮੁਕਤ ਆਈ.ਏ.ਐਸ. ਅਧਿਕਾਰੀ ਸ. ਬਲਬੀਰ ਸਿੰਘ ਸੂਦਨ,ਸਾਬਕਾ ਗ੍ਰਹਿ ਸਕਤਰ,ਪੰਜਾਬ ਵਲੋਂ ਤਿਆਰ ਕੀਤੇ ਗਏ ਸੰਵਿਧਾਨ ਨੂੰ ਪੰਜਾਬ ਦੇ ਸਾਬਕਾ ਵਧੀਕ ਮੁਖ ਸਕਤਰ ਆਰ.ਪੀ.ਐਸ. ਪਵਾਰ(ਸੇਵਾ ਮੁਕਤ ਆਈ.ਏ.ਐਸ.) ਨੇ ਰਿਲੀਜ਼ ਕੀਤਾ।
ਬਲਬੀਰ ਸੂਦਨ ਨੇ ਸੰਸਥਾ ਦੇ ਮਨੋਰਥ ਅਤੇ ਭਵਿਖੀ ਕਾਰਜਾਂ ਉਪਰ ਚਾਨਣਾ ਪਾਇਆ।
ਸਮਾਗਮ ਨੂੰ ਉਘੇ ਸਮਾਜ ਸੇਵੀ ਅਤੇ ਉਦਯੋਗਪਤੀ ਸ਼੍ਰੀ ਕੇ.ਕੇ. ਸਰਦਾਨਾਂ,ਐਮ.ਡੀ.ਸੁਖਜੀਤ ਸਟਾਰਚ ਐਂਡ ਕੈਮੀਕਲਜ਼ ਲਿਮਿਟਡ, ਨੇ ਵੀ ਸੰਬੋਧਨ ਕੀਤਾ।
ਪ੍ਰਧਾਨ ਐਸ.ਪੀ.ਸੇਠੀ ਨੇ ਸਭ ਨੂੰ ਜੀ ਆਇਆਂ ਕਿਹਾ ਅਤੇ ਪ੍ਰੋ. ਜਸਵੰਤ ਸਿੰਘ ਗੰਡਮ ਨੇ ਸਭ ਦਾ ਧੰਨਵਾਦ ਕੀਤਾ।
ਸਥਾਨਕ ਅਤੇ ਬਦੇਸ਼ਾਂ ਵਿਚ ਵਸਦੇ ਕਾਲਜ ਦੇ ਪੁਰਾਣੇ ਵਿਦਿਆਰਥੀਆਂ,ਜਿਹਨਾਂ ਨੇ ਆਪਣੇ ਆਪਣੇ ਖੇਤਰ ਵਿਚ ਮਲਾਂ ਮਾਰੀਆਂ ਹਨ,ਨੂੰ ਵੀ ਸਨਮਾਨਤ ਕੀਤਾ ਗਿਆ।ਇਹਨਾਂ ਵਿਚ ਸਰਬ ਸ਼੍ਰੀ ਆਰ.ਪੀ.ਐਸ.ਪਵਾਰ, ਬਲਬੀਰ ਸਿੰਘ ਸੂਦਨ ਅਤੇ ਸਰਬਜੀਤ ਸਿੰਘ ਭੱਟੀ ਤੋਂ ਇਲਾਵਾ ਪੰਜਾਬ ਦੇ ਸਾਬਕਾ ਮੰਤਰੀ ਸਰਵਣ ਸਿੰਘ ਫਿਲ਼ੌਰ,ਸੰਤ ਬਾਬਾ ਭਾਗ ਸਿੰਘ ਯੂਨੀਵਰਸਿਟੀ,ਖਿਆਲਾ ਦੇ ਉਪ-ਕੁਲਪਤੀ ਡਾ.ਧਰਮਜੀਤ ਸਿੰਘ,ਸੇਵਾ ਮੁਕਤ ਆਈ.ਪੀ.ਐਸ ਅਧਿਕਾਰੀ ਐਸ.ਆਰ.ਦਾਰਾਪੁਰੀ,ਪੰਜਾਬੀ ਲੇਖਕ ਪ੍ਰੋ.ਜਸਵੰਤ ਸਿੰਘ ਗੰਢਮ,ਪ੍ਰੋ.ਅਸ਼ੋਕ ਚਢਾ,ਜਗਦੀਸ਼ ਮਹੇ ਸ਼ਾਮਲ ਹਨ।
ਐਨ.ਆਰ.ਆਈ. ਨਰਿੰਦਰਜੀਤ ਸਿੰਘ ਦੇਹਲ(ਵੈਨਕੂਵਰ,ਕੈਨੇਡਾ),ਜਿਹਨਾਂ ਨੇ ‘ਰਕੋਸਾ’ ਨੂੰ ਇਕ ਲਖ ਰੁਪਿਆ ਭੇਜਿਆ,ਦਾ ਸਨਮਾਨ ਚਿੰਨ੍ਹ ਪ੍ਰੋ. ਅਸ਼ੋਕ ਚਢਾ ਨੇ ਪ੍ਰਾਪਤ ਕੀਤਾ।ਇਸੇ ਤਰ੍ਹਾਂ ਹੋਰ ਐਨ.ਆਰ.ਆਈਜ਼ ਹਰਿੰਦਰਜੀਤ ਸਿੰਘ ਤਖੜ,ਵਿਨੋਦ ਓਹਰੀ ਅਤੇ ਯਸ਼ਪਾਲ ਸ਼ਰਮਾ(ਟੌਰੌਂਟੋ,ਕੈਨੇਡਾ) ਦੇ ਸਨਮਾਨ ਚਿੰਨ੍ਹ ਕ੍ਰਮਵਾਰ ਸਰਬਜੀਤ ਸਿੰਘ ਭੱਟੀ ਅਤੇ ਪ੍ਰੋ. ਚੱਢਾ ਨੇ ਪ੍ਰਾਪਤ ਕੀਤੇ।
ਰਾਮਗੜ੍ਹੀਆ ਐਜੂਕੇਸ਼ਨਲ ਕੌਂਸਲ ਦੀ ਚੇਅਰਪਰਸਨ ਸ਼੍ਰੀਮਤੀ ਮਨਪ੍ਰੀਤ ਕੌਰ ਭੋਗਲ,ਜੋ ਕੁਝ ਕਾਰਨਾਂ ਕਰਕੇ ਸਮਾਗਮ ਵਿਚ ਨਹੀਂ ਆ ਸਕੇ,ਦਾ ਸਨਮਾਨ ਸ਼੍ਰੀ ਪਰੇਮ ਪਾਲ ਪੱਬੀ ਨੇ ਪ੍ਰਾਪਤ ਕੀਤਾ।ਕਾਲਜ ਦੇ ਪ੍ਰਿੰਸੀਪਲ ਡਾ.ਮਨਜੀਤ ਸਿੰਘ ਨੂੰ ਵੀ ਸਨਮਾਨਤ ਕੀਤਾ ਗਿਆ।
ਸ.ਗਿਆਨ ਸਿੰਘ,ਸ਼੍ਰੀ ਦਲਵਿੰਦਰ ਜੱਸਲ,ਸ. ਸਰਬਜੀਤ ਸਿੰਘ ਭੱਟੀ ਅਤੇ ਸ਼੍ਰੀ ਸਰਵਣ ਕਟਾਰੀਆ ਨੇ ਗੀਤ ਗਾ ਕੇ ਸਮਾਂ ਬੰਨ੍ਹ ਦਿਤਾ।ਕਈਆਂ ਨੇ ਭੰਗੜਾ ਵੀ ਪਾਇਆ ਅਤੇ ਕੁਝ ਨੇ ਆਪਣੇ ਜਵਾਨੀ ਵੇਲੇ ਦੇ ਪਿਆਰ ਦੇ ਕਿਸੇ ਵੀ ਸੁਣਾਏ।ਸ਼ੇਅਰੋ-ਸ਼ਾਇਰੀ ਵੀ ਖੂਬ ਹੋਈ।
ਸਮਾਗਮ ਸਭ ਨੂੰ ਬੀਤੇ ਦੇ ਸੁਹਾਣੇ ਸਫਰ ‘ਤੇ ਲੈ ਗਿਆ।ਸਤਰਾਂ ਨੂੰ ਪਾਰ ਕਰ ਚੁਕੇ ਜਾਂ ਸਤਰਾਂ ਨੂੰ ਢੁਕੇ ਪੁਰਾਣੇ ਵਿਦਿਆਰਥੀ ਇਕ ਵੇਰਾਂ ਤਾਂ ਆਪਣੀ ਭਰ ਜਵਾਨੀ ਦੀ ਰੰਗਲੀ ਸਵੇਰ ਦੇ ਸੁਪਨਮਈ ਸੰਸਾਰ ਦੀ ਸੈਰ ਤੇ ਨਿਕਲ ਪਏ!
ਹੋਰਨਾਂ ਤੋਂ ਇਲਾਵਾ ਸਮਾਗਮ ਵਿਚ ਪੰਜਾਬ ਦੇ ਸਾਬਕਾ ਵਧੀਕ ਕਮਿਸ਼ਨਰ ਐਕਸਾਈਜ਼ ਐਂਡ ਟੈਕਸੇਸ਼ਨ ਸੀ.ਆਰ.ਦਰਭੰਗਾ,ਫਗਵਾੜਾ ਨਗਰ ਸੁਧਾਰ ਟਰਸਟ ਦੇ ਚੈਅਰਮੈਨ ਕਸ਼ਮੀਰ ਸਿੰਘ ਮਲ਼੍ਹੀ,ਸੇਵਾ ਮੁਕਤ ਕਰਨਲ ਵਰਿੰਦਰ ਮੋਹਨ ਜੋਨੇਜਾ,ਸਮਾਜ ਸੇਵੀ ਇੰਦਰਪਾਲ ਖੁਰਾਨਾਂ,ਸਾਬਕਾ ਰਾਸ਼ਟਰੀ ਕੁਸ਼ਤੀ ਕੋਚ ਪੀ.ਆਰ.ਸੋਂਧੀ,ਪ੍ਰੋ.ਸੀਤਲ ਸਿੰਘ,ਗੁਰਦਿਆਲ ਸਿੰਘ,ਡਾ.ਸੁਰਿੰਦਰ ਸੁਮਨ,ਰਾਮ ਲੁਭਾਇਆ,ਮਲਕੀਤ ਸਿੰਘ ਰਘਬੋਤਰਾ,ਅਵਤਾਰ ਸਿੰਘ ਪਾਬਲਾ,ਮੁਖਿੰਦਰ ਸਿੰਘ ਵੀ ਸ਼ਾਮਲ ਸਨ।
ਮੰਚ ਸੰਚਾਲਨ ਸਰਬਜੀਤ ਭੱਟੀ ਅਤੇ ਪ੍ਰੋ. ਜਸਵੰਤ ਗੰਡਮ ਨੇ ਬਾ-ਖੂਬੀ ਕੀਤਾ।
ਭੱਟੀ ਨੇ ਸੁਖਵਿੰਦਰ ਅਮ੍ਰਿਤ ਦੀ ਗਜ਼ਲ ਗਾਈ ਜਿਸ ਦੇ ਇਕ ਸ਼ੇਅਰ-
‘ਅਸੀਂ ਟਾਹਣੀਆਂ ਦੇ ਗਲ ਨਾਲ ਲਗ ਲਗ ਰੋਏ,
ਇਕ ਫੁੱਲ ਸਾਡੇ ਪੈਰਾਂ ਤੋਂ ਮਧੋਲ ਹੋ ਗਿਆ’
ਨੇ ਬੜੀ ਵਾਹਵਾ ਖੱਟੀ।