ਗੁਰਚਰਨ ਰਾਮਪੁਰੀ ਪੁਰਸਕਾਰ ਇਸ ਵਾਰ ਬੀਬਾ ਬਲਵੰਤ ਨੂੰ ਮਿਲੇਗਾ
ਰੋਹਿਤ ਗੁਪਤਾ,ਬਾਬੂਸ਼ਾਹੀ ਨੈਟਵਰਕ
ਗੁਰਦਾਸਪੁਰ 10 ਅਕਤੂਬਰ 2022- ਪੰਜਾਬੀ ਲਿਖਾਰੀ ਸਭਾ, ਰਾਮਪੁਰਾ ਜ਼ਿਲ੍ਹਾ ਲੁਧਿਆਣਾ ਵੱਲੋਂ ਇਸ ਵਾਰ ਦਾ ਗੁਰਚਰਨ ਰਾਮਪੁਰੀ ਪੁਰਸਕਾਰ ਬਹੁਮੁਖੀ ਸ਼ਖ਼ਸੀਅਤ ਬੀਬਾ ਬਲਵੰਤ ਨੂੰ ਦਿੱਤਾ ਜਾ ਰਿਹਾ ਹੈ । ਇਹ ਪੁਰਸਕਾਰ 6 ਨਵੰਬਰ ਐਤਵਾਰ ਨੂੰ ਰਾਮਪੁਰ ਵਿੱਚ ਇੱਕ ਸਮਾਗਮ ਦੌਰਾਨ ਬੀਬਾ ਬਲਵੰਤ ਨੂੰ ਭੇਂਟ ਕੀਤਾ ਜਾਵੇਗਾ । ਦੱਸਣਯੋਗ ਹੈ ਕਿ ਗੁਰਦਾਸਪੁਰ ਨਾਲ ਸਬੰਧਿਤ ਬੀਬਾ ਬਲਵੰਤ ਸ਼ਾਇਰੀ, ਫ਼ੋਟੋਗਰਾਫੀ, ਚਿੱਤਰਕਾਰੀ, ਫ਼ਿਲਮ ਅਤੇ ਰੰਗ ਮੰਚ ਅਦਾਕਾਰੀ ਵਿੱਚ ਜਾਣਿਆ ਪਛਾਣਿਆ ਨਾਮ ਹੈ । ਉਨ੍ਹਾਂ ਦੀਆਂ ਲਿਖੀਆਂ 7 ਕਿਤਾਬਾਂ ਪ੍ਰਕਾਸ਼ਿਤ ਹੋ ਚੁੱਕੀਆਂ ਹਨ । ਇਨ੍ਹਾਂ ਵਿੱਚੋਂ ਕੁਝ ਪੁਸਤਕਾਂ ਦਾ ਅੰਗਰੇਜ਼ੀ ਅਤੇ ਹਿੰਦੀ ਵਿੱਚ ਤਰਜਮਾ ਵੀ ਹੋ ਚੁੱਕਿਆ ਹੈ । ਬੀਬਾ ਬਲਵੰਤ ਦੀਆਂ ਬੀਤੇ 50 ਸਾਲਾਂ ਦੀਆਂ ਰਚਨਾਵਾਂ ਨੂੰ ਪਾਕਿਸਤਾਨ ਵਿੱਚ ਉਰਦੂ ਲਿਪੀ ਵਿੱਚ ਸੰਕਲਿਤ ਕਰ ਕੇ “ਸਹਿਜ ਸੁਖਨ” ਨਾਮ ਹੇਠ ਪ੍ਰਕਾਸ਼ਿਤ ਕੀਤਾ ਜਾ ਚੁੱਕਿਆ ਹੈ ।