ਫਰੀਦਕੋਟ ਦੇ ਜ਼ਿਲ੍ਹਾ ਪੁਲਿਸ ਮੁਖੀ ਘੁਗਿਆਣਾ ਵਿਖੇ ਸਨਮਾਨਿਤ
ਫਰੀਦਕੋਟ, 4 ਜਨਵਰੀ 2022 - ਪੰਜਾਬੀ ਦੇ ਪ੍ਰਸਿੱਧ ਲੇਖਕ ਤੇ ਪੰਜਾਬ ਸਰਕਾਰ ਦੀ ਆਰਟਸ ਕੌਂਸਲ ਚੰਡੀਗੜ੍ਹ ਦੇ ਮੀਡੀਆ ਅਧਿਕਾਰੀ ਨਿੰਦਰ ਘੁਗਿਆਣਵੀ ਵਲੋਂ ਆਪਣੇ ਪਿਤਾ ਸਵ: ਰੌਸ਼ਨ ਲਾਲ ਦੀ ਯਾਦ ਵਿਚ ਸਥਾਪਿਤ ਕੀਤਾ ਗਿਆ ਯਾਦਗਾਰੀ ਪੁਰਸਕਾਰ ਜਿਲਾ ਫਰੀਦਕੋਟ ਦੇ ਪੁਲਿਸ ਮੁਖੀ ਰਾਮਪਾਲ ਸਿੰਘ ਸੰਧੂ ਆਈ ਪੀ ਐਸ ਨੂੰ ਪਿੰਡ ਵਿਖੇ ਆਯੋਜਿਤ ਇਕ ਵਿਸ਼ੇਸ਼ ਸਮਾਗਮ ਸਮੇਂ ਭੇਟ ਕੀਤਾ ਗਿਆ।
ਇਸ ਮੌਕੇ ਆਏ ਸਰੋਤਿਆਂ ਤੇ ਮਹਿਮਾਨਾਂ ਨੂੰ ਜੀਓ ਆਇਆਂ ਆਖਦਿਆਂ ਨਿੰਦਰ ਘੁਗਿਆਣਵੀ ਨੇ ਦੱਸਿਆ ਕਿ ਮਰਹੂਮ ਪਿਤਾ ਜੀ ਦੀ ਯਾਦ ਨੂੰ ਤਾਜਾ ਰੱਖਣ ਲਈ ਇਹ ਉਪਰਾਲਾ ਕੀਤਾ ਗਿਆ ਹੈ ਤੇ ਇਸ ਤੋਂ ਪਹਿਲਾਂ ਇਹ ਪੁਰਸਕਾਰ ਸ਼੍ਰੀ ਰਵੀ ਭਗਤ ਆਈ ਏ ਐਸ ਨੂੰ ਭੇਟ ਕੀਤਾ ਜਾ ਚੁੱਕਾ ਹੈ। ਸਮੂਹ ਨਗਰ ਤੇ ਪੰਚਾਇਤ ਸਮੇਤ ਗੁਰਦਵਾਰਾ ਕਮੇਟੀ ਵੱਲੋਂ ਵੀ ਐਸ ਐਸ ਪੀ ਦਾ ਸਵਾਗਤ ਕੀਤਾ ਗਿਆ।
ਘੁਗਿਆਣਵੀ ਪਰਿਵਾਰ ਤਰਫੋਂ ਐਸ ਐਸ ਪੀ ਨੂੰ ਫੁਲਕਾਰੀ,ਸਨਮਾਨ ਪੱਤਰ ਤੇ ਸਾਹਿਤਕ ਪੁਸਤਕਾਂ ਭੇਟ ਕੀਤੀਆਂ ਗਈਆਂ। ਆਪਣੇ ਸੰਬੋਧਨ ਵਿਚ ਐਸ ਐਸ ਪੀ ਰਾਜਪਾਲ ਸਿੰਘ ਸੰਧੂ ਨੇ ਆਪਣੇ ਬਚਪਨ ਤੇ ਪਿੰਡਾਂ ਦੀਆਂ ਯਾਦਾਂ ਤਾਜਾ ਕੀਤੀਆਂ। ਉਨਾਂ ਨੇ ਪਿੰਡ ਘੁਗਿਆਣਾ ਨਗਰ ਨਿਵਾਸੀਆਂ ਦੀ ਏਕੇ ਤੇ ਭਾਈਚਾਰਕ ਸਾਂਝ ਦੀ ਸਿਫਤ ਵੀ ਕੀਤੀ। ਇਸ ਸਮਾਰੋਹ ਵਿਚ ਸਰਪੰਚ ਬਲਵੰਤ ਸਿੰਘ, ਸਾਬਕਾ ਸਰਪੰਚ ਬਲਦੇਵ ਸਿੰਘ, ਸੁਖਬੀਰ ਮਰਾੜ, ਦਿਆਲ ਚੰਦ, ਇੰਸਪੈਕਟਰ ਅਮਰਿੰਦਰ ਸਿੰਘ, ਬਲਦੇਵ ਰਾਜ ਹਾਂਡਾ, ਸੁਰਿੰਦਰ ਕੱਕੜ ਤੇ ਟਰਾਂਸਪੋਰਟ ਅਮਰਜੀਤ ਸਿੰਘ ਵੀ ਹਾਜਰ ਸਨ।