ਉੱਘੇ ਪੰਜਾਬੀ ਵਿਦਵਾਨ ਤੇ ਗੁਰੂ ਨਾਨਕ ਨੈਸ਼ਨਲ ਕਾਲਿਜ ਦੇ ਸਾਬਕਾ ਪ੍ਰਿੰਸੀਪਲ ਡਾਃ ਜਸਪਾਲ ਸਿੰਘ ਨਕੋਦਰ ਸੁਰਗਵਾਸ
ਲੁਧਿਆਣਾਃ 22 ਜੂਨ 2022 - ਉੱਘੇ ਪੰਜਾਬੀ ਵਿਦਵਾਨ ਤੇ ਗੁਰੂ ਨਾਨਕ ਨੈਸ਼ਨਲ ਕਾਲਿਜ ਨਕੋਦਰ ਦੇ ਸਾਬਕਾ ਪ੍ਰਿੰਸੀਪਲ ਡਾਃ ਜਸਪਾਲ ਸਿੰਘ ਅੱਜ ਜਲੰਧਰ ਵਿੱਚ ਸੁਰਗਵਾਸ ਹੋ ਗਏ ਹਨ।
ਇਹ ਸੂਚਨਾ ਉਨ੍ਹਾਂ ਦੀ ਜੀਵਨ ਸਾਥਣ ਕੰਵਲਜੀਤ ਕੌਰ ਨੇ ਦੇਂਦਿਆਂ ਦੱਸਿਆ ਹੈ ਕਿ ਉਨ੍ਹਾਂ ਦਾ ਅੰਤਿਮ ਸੰਸਕਾਰ 23 ਜੂਨ ਨੂੰ ਬਾਅਦ ਦੁਪਹਿਰ ਇੱਕ ਵਜੇ ਗੁਰੂ ਤੇਗ ਬਹਾਦਰ ਨਗਰ ਜਲੰਧਰ (ਨੇੜੇ ਗੁਰੂ ਤੇਗ ਬਹਾਦਰ ਸਾਹਿਬ ਗੁਰਦਵਾਰਾ)ਸ਼ਮਸ਼ਾਨ ਘਾਟ ਵਿੱਚ ਹੋਵੇਗਾ।
ਡਾਃ ਜਸਪਾਲ ਸਿੰਘ ਨਕੋਦਰ ਤੋਂ ਕੁਝ ਸਾਲ ਪਹਿਲਾਂ ਹੀ ਸੇਵਾ ਮੁਕਤ ਹੋ ਕੇ ਅਰਬਨ ਅਸਟੇਟ ਜਲੰਧਰ ਚ ਵੱਸ ਰਿਹਾ ਸੀ।
ਡਾਃ ਜਸਪਾਲ ਸਿੰਘ ਨੂੰ ਸ਼ਰਧਾਂਜਲੀ ਭੇਂਟ ਕਰਦਿਆਂ ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਦੇ ਚੇਅਰਮੈਨ ਪ੍ਰੋਃ ਗੁਰਭਜਨ ਸਿੰਘ ਗਿੱਲ ਨੇ ਕਿਹਾ ਹੈ ਕਿ ਜਸਪਾਲ ਪੰਜਾਬੀ ਯੂਨੀਵਰਸਿਟੀ ਦੇ ਵਿਦਿਆਰਥੀ ਕਾਲ ਤੋਂ ਹੁਣ ਤੀਕ ਜਿਵੇਂ ਪਿਆਰ ਮੁਹੱਬਤ ਤੇ ਗਿਆਨ ਆਧਾਰਿਤ ਸਾਂਝ ਤੇ ਭਰੱਪਣ ਦੀ ਜ਼ਿੰਦਗੀ ਗੁਜ਼ਾਰੀ, ਉਸ ਸਦਕਾ ਉਹ ਸਾਡੇ ਮਿੱਤਰ ਦਾਇਰੇ ਵਿੱਚ ਹਰਮਨ ਪਿਆਰਾ ਵੀਰ ਸੀ।