ਸਾਬਕਾ ਰਾਸ਼ਟਰਪਤੀ ਮਰਹੂਮ ਗਿਆਨੀ ਜੈਲ ਸਿੰਘ ਦੇ ਪਰਿਵਾਰ ਨੂੰ ਸਦਮਾ, ਜ਼ੈਲ ਸਿੰਘ ਦੀ ਬੇਟੀ ਡਾਕਟਰ ਮਨਜੀਤ ਕੌਰ ਦਾ ਦੇਹਾਂਤ
ਦੀਪਕ ਗਰਗ
ਕੋਟਕਪੂਰਾ 28 ਫਰਵਰੀ 2022 - ਨਜਦੀਕੀ ਪਿੰਡ ਸੰਧਵਾਂ ਦੇ ਮੂਲ ਨਿਵਾਸੀ ਸਾਬਕਾ ਰਾਸ਼ਟਰਪਤੀ ਮਰਹੂਮ ਗਿਆਨੀ ਜੈਲ ਸਿੰਘ ਦੇ ਪਰਿਵਾਰ ਨੂੰ ਉਸ ਵੇਲੇ ਵੱਡਾ ਸਦਮਾ ਲੱਗਾ ਜਦੋਂ ਗਿਆਨੀ ਜੀ ਦੀ ਧੀ ਡਾਕਟਰ ਮਨਜੀਤ ਕੌਰ ਪੱਤਨੀ ਸਰਦਾਰ ਨਰੇਂਦਰ ਸਿੰਘ 24 ਫਰਵਰੀ ਦਿਨ ਵੀਰਵਾਰ ਨੂੰ ਗੁਰੂ ਚਰਨਾਂ ਵਿੱਚ ਜਾ ਵਿਰਾਜੇ ਹਨ।
ਡਾ. ਮਨਜੀਤ ਕੌਰ ਲੁਧਿਆਣਾ ਦੇ ਸਿਵਲ ਹਸਪਤਾਲ ਸਣੇ ਵੱਖ-ਵੱਖ ਥਾਵਾਂ ’ਤੇ ਸੀਨੀਅਰ ਮੈਡੀਕਲ ਅਫ਼ਸਰ ਵਜੋਂ ਸੇਵਾਵਾਂ ਨਿਭਾਉਂਦੇ ਰਹੇ ਹਨ। ਉਨ੍ਹਾਂ ਦੇ ਸਸਕਾਰ ਮੌਕੇ ਵੱਖ-ਵੱਖ ਵਰਗਾਂ ਦੇ ਪ੍ਰਤੀਨਿਧਾਂ ਨੇ ਸ਼ਾਮਲ ਹੋ ਕੇ ਪਰਿਵਾਰਕ ਮੈਂਬਰਾਂ ਨਾਲ ਦੁੱਖ ਵੰਡਾਇਆ।
ਪਰਿਵਾਰਕ ਮੈਂਬਰਾਂ ਅਨੁਸਾਰ ਮਨਜੀਤ ਕੌਰ ਨਮਿਤ ਸਹਿਜ ਪਾਠ ਦੇ ਭੋਗ ਉਪਰਾਂਤ ਕੀਰਤਨ ਅਤੇ ਅੰਤਿਮ ਅਰਦਾਸ 6 ਮਾਰਚ 2022 ਨੂੰ ਬਾਬਾ ਗੁਰਮੁੱਖ ਸਿੰਘ ਹਾਲ, ਰਾਮਗੜ੍ਹੀਆ ਗੁਰਦੁਆਰਾ ਮਿਲਰਗੰਜ ਲੁਧਿਆਣਾ ਵਿੱਖੇ ਦੁਪਹਿਰ 12 ਤੋਂ 2 ਵਜੇ ਤੱਕ ਹੋਵੇਗੀ ।
ਡਾ. ਮਨਜੀਤ ਕੌਰ, ਅਜੀਤ ਅਖਬਾਰ ਗਰੁੱਪ ਦੇ ਟ੍ਰਸਟੀ ਐਸ ਐਸ ਵਿਰਦੀ ਅਤੇ ਸਾਬਕਾ ਆਈ ਏ ਐਸ ਅਤੇ ਸੀਨੀਅਰ ਬੀ ਜੇ ਪੀ ਆਗੂ ਐਸ ਐਸ ਚੰਨੀ ਦੇ ਵੀ ਨਜ਼ਦੀਕੀ ਰਿਸ਼ਤੇਦਾਰ ਸਨ । ਇਸੇ ਤਰ੍ਹਾਂ ਕੋਟਕਪੂਰਾ ਤੋਂ ਆਪ ਐਮ ਐਲ ਏ ਕੁਲਤਾਰ ਸੰਧਵਾਂ ਵੀ ਗਿਆਨੀ ਜ਼ੈਲ ਸਿੰਘ ਪਰਿਵਾਰ ਨਾਲ ਹੀ ਸਬੰਧਿਤ ਹਨ.