ਮਿੰਨੀ ਕਹਾਣੀ:- ਬੇਬੇ ਕੋਈ ਭੂਤ ਨਈਂ ਹੁੰਦੇ..
ਜਸਪਾਲ ਦਾ ਮੁੰਡਾ ਜੋਬਨ ਖੇਡਦਾ-ਖੇਡਦਾ ਹੋਇਆ ਪਿੰਡ ਦੀਆਂ ਮੜੀਆਂ( ਸ਼ਮਸ਼ਾਨ ਘਾਟ)ਜਾ ਵੜਿਆ, ਤਾਂ ਪਿੰਡ ਦੀਆਂ ਇੱਕ-ਦੋ ਜ਼ਨਾਨੀਆਂ ਨੇ ਕੰਮਾਂ- ਕਾਰਾਂ ਤੇ ਜਾਂਦਿਆ ਤੇ ਵਾਪਸੀ ਵੇਲੇ, ਜਸਪਾਲ ਦੇ ਘਰ ਵਾਲੀ ਨਸੀਬ ਕੌਰ ਨੂੰ ਦੱਸਿਆ। ਕਿ ਨਸੀਬੋ ਤੇਰੇ ਮੁੰਡੇ ਨੂੰ ਸਮਝਾ ਲੈ ਕੁੱਝ..? ਅੱਜ ਸਿਖਰ ਦੁਪਿਹਰ ਵੇਲੇ ਪਿੰਡ ਦੀਆਂ ਮੜੀਆਂ ਕੋਲੇ ਖੇਡ ਰਿਹਾ ਸੀ। ਵੇਖਲਾ ਨਸੀਬੋ ਤੈਨੂੰ ਪਤਾ ਹੀ ਹੈ ਕਿ ਪਿਛਲੀ ਵਾਰ ਕਰਤਾਰੋ ਦੇ ਮੁੰਡੇ ਦਾ ਕੀ ਹਾਲ ਹੋਇਆ ਸੀ। ਤੇਰੇ ਨਾਲ ਮੋਹ ਹੈ ਸਾਡਾ, ਤਾਂ ਹੀ ਤੈਨੂੰ ਦੱਸ ਰਹੀ ਆਂ, ਏਨਾ ਕਹਿ ਕੇ ਬਲਵੀਰੋ ਤੁਰਦੀ ਬਣੀ, ਜਾਂਦੀ-ਜਾਂਦੀ ਆਖ ਰਹੀ ਸੀ,
ਨਸੀਬੋ ਨਾਲੇ ਇਹ ਮਰੇ ਹੋਏ ਕਿਸਦੇ ਮਿਤ ਹੁੰਦੇ ਆ, ਸਮਝਾ ਲਈ ਆਪਣੇ ਮੁੰਡੇ ਨੂੰ, ਕਿ ਉਹ ਮੜੀਆਂ ਵੱਲ ਨਾ ਜਾਵੇ। ਸ਼ਾਮੀ ਜਦੋਂ ਜੋਬਨ ਘਰੇ ਆਇਆ ਤਾਂ ਨਸੀਬੋ ਨੇ ਡੰਡਾ ਚੁੱਕਿਆ ਤੇ ਦੋ ਚਾਰ ਆਪਣੇ ਮੁੰਡੇ ਦੀ ਪਿੱਠ ਤੇ ਜੜਦਿਆ ਕਿਹਾ, ਕੰਜ਼ਰਾ ਅੱਜ ਵੀ ਜਾਏਗਾ,ਅੱਜ ਵੀ ਜਾਵੇਂਗਾ, ਜੋਬਨ ਬੋਲਿਆ, ਬੇਬੇ ਕਿੱਥੇ, ਬੇਬੇ ਕਿੱਥੇ, ਪਿੰਡ ਦੀਆਂ ਮੜੀਆਂ ਕੋਲ ਖੇਡਣ ਲਈ, ਉੱਥੇ ਤੇਰਾ ਕੀ ਦੱਬਿਆ,
ਕਿਉ ਤੂੰ ਉੱਥੇ ਜਾ ਕੇ ਖੇਡਦਾ..? ਕਿਹੜੇ ਮਰਿਆਂ ਨੂੰ ਉੱਥੇ ਜਾਕੇ ਰੋਣ ਲਈ ਜਾਂਦਾ ਤੂੰ , ਉੱਥੇ ਕੀ ਹੈ ਬੇਬੇ ਜੋਬਨ ਬੋਲਿਆ...... ਤੇਰੇ ਮਰਿਆਂ ਦਾ ਸਿਰ, ਹੋਰ ਉਥੇ ਕੀ ਹੋਣਾ.. ਨਸੀਬੋ ਬੋਲੀ.l
ਬੇਬੇ ਤੂੰ ਆਪੇ ਤਾਂ ਕਹਿ ਰਹੀ ਸੀ, ਕੱਲ ਜਨਾਨੀਆਂ ਕੋਲ ਖੜੀ.। ਕੀ ਰੱਬ ਵੀ ਲਿਜਾਣ ਵੇਲੇ ਉਮਰਾਂ ਨਹੀਂ ਵੇਖਦਾ, ਕੀ ਬੰਦੇ ਮਰ ਕੇ ਰੱਬ ਕੋਲ ਨਹੀਂ ਜਾਂਦੇ, ਜੋਬਨ ਨੇ ਪੁੱਛਿਆ...? ਨਸੀਬੋ ਬੋਲੀ ਨਹੀਂ ਜਾਂਦੇ, ਮਰ ਕੇ ਕਈ ਭੂਤ ਬਣ ਜਾਂਦੇ ਨੇ,
ਜੋਬਨ ਨੇ ਪੁੱਛਿਆ, ਸੱਚੀ ਬੇਬੇ ਨਾਲੇ ਉੱਚੀ ਉੱਚੀ ਹੱਸ ਰਿਹਾ ਸੀ। ਨਸੀਬੋ ਬੋਲੀ ਤੇਰਾ ਹਾਸਾ ਤਾਂ ਮੈਂ ਹੁਣੇ ਕੱਢਦੀ ਆ, ਤੇਰੇ ਤੋੜਦੀ ਆ ਦੰਦ, ਆਹੋ ਭੂਤ ਬਣ ਜਾਂਦੇ ਨੇ, ਫਿਰ ਤਾਂ ਬੇਬੇ ਆਪਾਂ ਵੀ ਭੂਤ ਹੋਏ। ਉਹ ਮਰੇ ਹੋਏ, ਆਪਾਂ ਜਿਉਂਦੇ, ਨਸੀਬੋ ਕਹਿੰਦੀ ਠਹਿਰ ਜਾ ਤੈਨੂੰ ਦੱਸਦੀ ਆਂ, ਨਸੀਬੋ ਡੰਡਾ ਲੈ ਕੇ ਪਿੱਛੇ ਭੱਜੀ ਤੇ ਜੋਬਨ ਛਾਲਾ ਮਾਰਦਾ ਹੋਇਆ। ਦੂਸਰੀ ਵੀਹੀ ਵੜ ਗਿਆ, ਨਾਲੇ ਉੱਚੀ ਉੱਚੀ ਕਹਿ ਰਿਹਾ ਸੀ। ਬੇਬੇ ਕੋਈ ਭੂਤ ਨਹੀਂ ਹੁੰਦੇ, ਇਹ ਤਾਂ ਸਾਡਾ ਭਰਮ ਹੈ। ਜਿਸ ਤੋਂ ਅਸੀਂ ਬਾਹਰ ਨਹੀਂ ਨਿਕਲ ਪਾਉਂਦੇ, ਜੇ ਬੰਦੇ ਮਰ ਕੇ ਭੂਤ ਬਣ ਜਾਂਦੇ ਨੇ, ਤਾਂ ਫਿਰ ਅਸੀਂ ਭੂਤਾਂ ਦੀਆਂ ਜਾਇਦਾਤਾਂ ਘਰ-ਬਾਰ ਕਿਉਂ ਵਰਤਦੇ ਹਾਂ। ਕੋਈ ਭੂਤ ਨਹੀਂ ਹੁੰਦੇ, ਸਾਡਾ ਵਹਿਮ ਆ। ਨਸੀਬੋ ਵੀ ਹੱਸਦੀ ਹੋਈ ਘਰ ਵੱਲ ਨੂੰ ਫਿਰ ਆ ਗਈ, ਕੋਈ ਨਾ ਘਰੇ ਆਈ ਤੈਨੂੰ ਦੱਸੂਗੀ।
ਲਿਖ਼ਤ :- ਗੁਰਪ੍ਰੀਤ ਸਿੰਘ ਜਖਵਾਲੀ।
ਮੋਬਾਇਲ:-98550 36444
-
ਗੁਰਪ੍ਰੀਤ ਸਿੰਘ ਜਖਵਾਲੀ।, writer
jakhwali89@gmail.com
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.