ਕਾਮਰੇਡ ਤੇਜਾ ਸਿੰਘ ਸੁਤੰਤਰ ਦੀ ਬਰਸੀ 'ਤੇ ਹਜ਼ਾਰਾਂ ਲੋਕ ਪਿੰਡ ਅਲੂਣਾ ਪੁੱਜੇ
ਸੁਤੰਤਰ ਜੀ ਦੀ ਸੋਚ ਤੇ ਚਲਦਿਆਂ ਅੱਜ ਫਿਰਕਾ ਪ੍ਰਸਤ ਤਾਕਤਾਂ ਨੂੰ ਭਾਜ ਦੇਣ ਦੀ ਲੋੜ--ਬੰਤ ਸਿੰਘ ਬਰਾੜ
ਰੋਹਿਤ ਗੁਪਤਾ
ਗੁਰਦਾਸਪੁਰ 14 ਅਪ੍ਰੈਲ 2025- ਹਰ ਸਾਲ ਦੀ ਤਰਾਂ ਤੇਜਾ ਸਿੰਘ ਸੁਤੰਤਰ (1901 ਤੋਂ 1973) ਨੂੰ ਉਹਨਾਂ ਦੀ ਬਰਸੀ ਮੌਕੇ ਪਿੰਡ ਅਲੂਣਾ ਵਿਖੇ ਲੋਕ ਵੱਡਾ ਇਕੱਠ ਕਰਕੇ ਉਹਨਾਂ ਵੱਲੋਂ ਪਾਈਆਂ ਇਨਕਲਾਬੀ ਪੈੜਾਂ ਦਾ ਚੇਤਾ ਕਰਦੇ ਹਨ। ਇਸ ਵਾਰ ਵੀ ਵੱਡੀ ਗਿਣਤੀ ਵਿੱਚ ਲੋਕ ਪਿੰਡ ਅਲੂਣਾ ਪੁੱਜੇ। ਇਸ ਸ਼ਰਧਾਂਜਲੀ ਸਮਾਗਮ ਦੀ ਪ੍ਰਧਾਨਗੀ ਜਨਤਕ ਜਥੇਬੰਦੀਆਂ ਵੱਲੋਂ ਸਾਂਝੇ ਤੌਰ ਤੇ ਗੁਲਜਾਰ ਸਿੰਘ ਬਸੰਤਕੋਟ ਹਰਜੀਤ ਸਿੰਘ ਕਾਹਲੋ, ਸੂਬਾ ਸੀਪੀਆਈ ਆਗੂ ਬੰਤ ਸਿੰਘ ਬਰਾੜ ਅਤੇ ਪ੍ਰਿੰਸੀਪਾਲ ਸਿੰਘ ਮਾੜੀ ਮੇਘਾ, ਪਲਵਿੰਦਰ ਸਿੰਘ ਕਿਲਾ ਨੱਥੂ ਸਿੰਘ, ਅਸ਼ਵਨੀ ਕੁਮਾਰ ਲਖਣ ਕਲਾਂ, ਜਗਜੀਤ ਸਿੰਘ ਅਲੂਣਾ, ਰਾਜ ਗੁਰਵਿੰਦਰ ਸਿੰਘ ਲਾਡੀ ਘੁਮਾਣ ਆਦਿ ਨੇ ਕੀਤੀ ਇਸ ਮੌਕੇ ਪ੍ਰਧਾਨਗੀ ਮੰਡਲ ਤੋਂ ਬਿਨਾਂ ਮੱਖਣ ਸਿੰਘ ਕੁਹਾੜ ਸਤਬੀਰ ਸਿੰਘ ਸੁਲਤਾਨੀ ਸੁੱਚਾ ਸਿੰਘ ਛੋਟੇਪੁਰ ਬਲਬੀਰ ਸਿੰਘ ਕੱਤੋਵਾਲ ਆਦਿ ਨੇ ਵੀ ਸੰਬੋਧਨ ਕੀਤਾ ਅਤੇ ਸੁਤੰਤਰ ਜੀ ਦੇ ਨਾਲ ਨਾਲ ਉਹਨਾਂ ਦੇ ਭਰਾ ਮੇਦਨ ਸਿੰਘ ਮੇਦਨ ਨੂੰ ਵੀ ਯਾਦ ਕੀਤਾ ਗਿਆ। ਬੰਤ ਸਿੰਘ ਬਾ੍ੜਾ ਹੋਰਾਂ ਆਖਿਆ ਕਿ ਤੇਜਾ ਸਿੰਘ ਸਤੰਤਰ ਇਕ ਮਹਾਨ ਇਨਕਲਾਬੀ ਯੋਧਾ ਸੀ ਉਹ ਭਾਰਤ ਵਿੱਚ ਸਮਾਜਵਾਦੀ ਪ੍ਰਬੰਧ ਦੀ ਸਥਾਪਨਾ ਲਈ ਲੜ ਰਿਹਾ ਸੀ ।ਪਹਿਲਾਂ ਅੰਗਰੇਜ਼ਾਂ ਦੇ ਖਿਲਾਫ ਲੜਦਾ ਰਿਹਾ ਤੇ ਫਿਰ ਭਾਰਤੀ ਹਾਕਮਾਂ ਦੇ ਵਿਰੁੱਧ। ਜੇ ਉਹ ਅੱਜ ਜਿਉਂਦਾ ਹੁੰਦਾ ਤਾਂ ਉਸ ਨੇ ਭਾਰਤੀ ਜਨਤਾ ਪਾਰਟੀ ਤੇ ਆਰਐਸਐਸ ਦੀਆਂ ਫਿਰਕਾਪਰਸਤ ਅਤੇ ਘੱਟ ਗਿਣਤੀ ਖਾਸ ਕਰ ਮੁਸਲਮਾਨ ਵਿਰੋਧੀ ਨੀਤੀਆਂ ਵਿਰੁੱਧ ਲੜਨਾ ਸੀ।
ਉਹਨਾਂ ਕਿਹਾ ਕਿ ਇਹ ਕੰਮ ਹੁਣ ਸਾਨੂੰ ਕਰਨਾ ਹੋਵੇਗਾ ।ਲੋਕਾਂ ਨੂੰ ਆਪਸ ਵਿੱਚ ਪਾੜ ਕੇ ਪਹਿਲਾਂ ਅੰਗਰੇਜ਼ ਰਾਜ ਕਰਦੇ ਸੀ ਹੁਣ ਭਾਰਤੀ ਜਨਤਾ ਪਾਰਟੀ ਉਸੇ ਲੀਹ ਤੇ ਚਲ ਰਹੀ ਹੈ। ਮਾੜੀ ਮੇਘਾ ਹੋਰਾਂ ਵਕਫ ਸੋਧ ਕਨੂੰਨ ਦਾ ਸਖਤ ਵਿਰੋਧ ਕੀਤਾ ਤੇ ਇਸ ਨੂੰ ਘੱਟ ਗਿਣਤੀ ਧਰਮਾਂ ਵਿੱਚ ਸਿਧੀ ਦਖਲ ਅੰਦਾਜੀ ਆਖਿਆ ।ਬੁਲਾਰਿਆਂ ਨੇ ਪੰਜਾਬ ਦੀ ਮਾਨ ਸਰਕਾਰ ਤੇ ਮੋਦੀ ਸਰਕਾਰ ਦੀ ਮਜ਼ਦੂਰ ਕਿਸਾਨ ਤੇ ਲੋਕ ਵਿਰੋਧੀ ਨੀਤੀ ਦੀ ਸਖਤ ਆਲੋਚਨਾ ਕਰਦਿਆਂ ਇੱਕ ਮੁੱਠ ਹੋ ਕੇ ਇਸ ਵਿਰੁੱਧ ਲੜਨ ਦਾ ਅਹਿਦ ਕੀਤਾ ।ਇਸ ਮੌਕੇ ਮੱਖਣ ਸਿੰਘ ਕੁਹਾੜ ਦੇ ਨਵੇਂ ਜਮਾਨੇ ਵਿੱਚ ਸੁਤੰਤਰ ਜੀ ਬਾਰੇ ਛਪੇ ਲੇਖ ਦੀਆਂ ਕਾਪੀਆਂ ਵੀ ਵੰਡੀਆਂ ਗਈਆਂ। ਰਾਣਾ ਸੋਢੀ ਕਲਾ ਮੰਚ ਲਾਂਬੜਾ ਹੋਰਾਂ ਵੱਲੋਂ ਇਨਕਲਾਬੀ ਨਾਟਕ ਪੇਸ਼ ਕੀਤੇ ਗਏ। ਲੰਗਰ ਵੀ ਅਤੁੱਟ ਵਰਤਿਆ ਅਤੇ ਬਾਅਦ ਵਿੱਚ ਕਬੱਡੀ ਮੈਚ ਵੀ ਹੋਏ। ਸਟੇਜ ਦੀ ਕਾਰਵਾਈ ਬਲਬੀਰ ਸਿੰਘ ਬਾਜਵਾ ਹੋਰਾਂ ਬਾਖੂਬ ਨਿਭਾਈ।