ਲੁਧਿਆਣਾ ਰੂਰਲ ਅਰਬਨ ਹੈਰਿਟੇਜ ਫੈਸਟਿਵਲ ਦੀ ਸ਼ਾਮ ਕਬੀਰ ਦੇ ਦੋਹਿਆਂ ਦੇ ਨਾਮ
ਲੁਧਿਆਣਾ, 5 ਅਪਰੈਲ: “ਐ ਜੀ ਰਾਮ ਨਾਮ ਦੀ ਲੂਟ ਹੈ…” ਅਤੇ “ਧੀਰੇ-ਧੀਰੇ ਰੇ ਮਨਾ, ਧੀਰੇ ਸਭ ਕੁਝ ਹੋਏ…” ਵਰਗੇ ਅਮਰ ਦੋਹਿਆਂ ਦੀ ਗੂੰਜ ਨਾਲ ਰੂਰਲ ਅਰਬਨ ਹੈਰਿਟੇਜ ਫੈਸਟਿਵਲ ਦੀ ਪਹਿਲੀ ਸ਼ਾਮ ਇੱਕ ਆਧਿਆਤਮਿਕ ਤਜਰਬੇ ’ਚ ਬਦਲ ਗਈ। ਪ੍ਰਸਿੱਧ ਕਲਾਕਾਰ ਮੁਕੇਸ਼ ਚੌਹਾਨ ਅਤੇ ਉਨ੍ਹਾਂ ਦੀ ਟੀਮ ਨੇ ਕਬੀਰ ਦੇ ਦੋਹਿਆਂ ਨੂੰ ਸੁਰਾਂ ਵਿੱਚ ਪਿਰੋ ਕੇ, ਲੁਧਿਆਣਾ ਦੇ ਦਰਸ਼ਕਾਂ ਨੂੰ ਭਾਰਤੀ ਸਭਿਆਚਾਰ ਅਤੇ ਸੰਤ ਪਰੰਪਰਾ ਨਾਲ ਜਾਣੂ ਕਰਵਾਇਆ।
ਕਬੀਰ ਦੇ ਦੋਹਿਆਂ ਦੀ ਸਾਦਗੀ ਅਤੇ ਗਹਿਰਾਈ ਨੇ ਸ਼੍ਰੋਤਾਵਾਂ ਨੂੰ ਆਤਮ-ਮੰਥਨ ਕਰਨ ’ਤੇ ਮਜਬੂਰ ਕਰ ਦਿੱਤਾ। “ਮੇਰਾ ਮੈਂ ਵਿੱਚ ਕੁਝ ਨਹੀਂ, ਜੋ ਕੁਝ ਹੈ ਸੋ ਤੇਰਾ…” ਵਰਗੇ ਦੋਹਿਆਂ ਰਾਹੀਂ ਕਲਾਕਾਰਾਂ ਨੇ ਤਿਆਗ, ਸਮਰਪਣ ਅਤੇ ਭਗਤੀ ਦਾ ਸੁਨੇਹਾ ਦਿੱਤਾ। ਦਰਸ਼ਕਾਂ ਨੇ ਪੂਰੇ ਭਾਵ ਨਾਲ ਇਸ ਪ੍ਰਸਤੁਤੀ ਦਾ ਆਨੰਦ ਮਾਣਿਆ ਅਤੇ ਕਬੀਰ ਵਾਣੀ ਦੇ ਗਿਆਨ ਦਾ ਰਸ ਪੀਆ।
ਅੱਜ ਹੋਵੇਗੀ ਸੂਫ਼ੀਆਨਾ ਸ਼ਾਮ - ਸੁਲਤਾਨਾ ਨੂਰਾਂ ਕਰਣਗੀਆਂ ਮੰਤਰਮੁਗਧ
ਫੈਸਟਿਵਲ ਦਾ ਦੂਜਾ ਦਿਨ ਇਕ ਹੋਰ ਸੰਗੀਤਮਈ ਆਧਿਆਤਮਿਕ ਯਾਤਰਾ ਲੈ ਕੇ ਆ ਰਿਹਾ ਹੈ। ਅੱਜ ਸ਼ਾਮ ਨੂੰ ਪ੍ਰਸਿੱਧ ਸੂਫ਼ੀ ਗਾਇਕਾ ਸੁਲਤਾਨਾ ਨੂਰਾਂ ਆਪਣੀ ਜਾਦੂਈ ਆਵਾਜ਼ ਨਾਲ ਲੁਧਿਆਣਾ ਵਾਸੀਆਂ ਨੂੰ ਸੂਫ਼ੀ ਸੰਗੀਤ ਦੀ ਰੂਹਾਨੀ ਤ੍ਰਿਪਤੀ ਮਹਿਸੂਸ ਕਰਵਾਉਣਗੀਆਂ। ਉਨ੍ਹਾਂ ਦੀ ਪ੍ਰਸਤੁਤੀ ਵਿੱਚ “ਕਲੰਦਰ”, “ਦਮਾਦਮ ਮਸਤ ਕਲੰਦਰ” ਵਰਗੇ ਲੋਕਪ੍ਰਿਅ ਸੂਫ਼ੀ ਗੀਤਾਂ ਦੀ ਗੂੰਜ ਸੁਣਾਈ ਦੇਵੇਗੀ।
ਫੈਸਟਿਵਲ ਦੇ ਆਯੋਜਕ ਸੁਨੀਲ ਵਰਮਾ ਅਤੇ ਵਰੁਣ ਵਰਮਾ ਨੇ ਵਿਸ਼ੇਸ਼ ਰੂਪ ਵਿੱਚ ਲੋਕਾਂ ਨੂੰ ਇਸ ਸੰਸਕ੍ਰਿਤਿਕ ਸਮਾਗਮ ਦਾ ਹਿੱਸਾ ਬਣਨ ਦੀ ਅਪੀਲ ਕੀਤੀ ਹੈ, ਤਾਂ ਜੋ ਭਾਰਤੀ ਸੰਗੀਤ ਅਤੇ ਆਧਿਆਤਮਿਕ ਵਿਰਾਸਤ ਨੂੰ ਹੋਰ ਵੀ ਵਧਾਇਆ ਜਾ ਸਕੇ। ਗੌਰਤਲਬ ਹੈ ਕਿ ਰੂਹ ਫੈਸਟਿਵਲ 13 ਅਪਰੈਲ ਤੱਕ ਜਾਰੀ ਰਹੇਗਾ।