ਐਚਐਮਈਐਲ ਗੁਰੂ ਗੋਬਿੰਦ ਸਿੰਘ ਰਿਫਾਈਨਰੀ ਵੱਲੋਂ ਮਹਿਲਾ ਸਸ਼ਕਤੀਕਰਨ ਨੂੰ ਉਤਸ਼ਾਹ ਦੇਣ ਲਈ ਚੇਤਨਾ ਮੁਹਿੰਮ
ਅਸ਼ੋਕ ਵਰਮਾ
ਬਠਿੰਡਾ,13 ਅਪ੍ਰੈਲ : ਮਹਿਲਾ ਸਸ਼ਕਤੀਕਰਨ ਨੂੰ ਉਤਸ਼ਾਹਤ ਕਰਨ ਦੀ ਆਪਣੀ ਵਚਨਬੱਧਤਾ ਨੂੰ ਦੁਹਰਾਉਂਦਿਆਂ, ਐਚਐਮਈਐਲ ਗੁਰੂ ਗੋਬਿੰਦ ਸਿੰਘ ਰਿਫਾਈਨਰੀ ਨੇ ਤਲਵੰਡੀ ਸਾਬੋ 'ਚ ਤਖ਼ਤ ਸ਼੍ਰੀ ਦਮਦਮਾ ਸਾਹਿਬ ਵਿਖੇ ਵੈਸਾਖੀ ਮੇਲੇ ਦੌਰਾਨ ਸੀਐਸਆਰ ਪਹਿਲ ਅਧੀਨ ਸ਼ੁਰੂ ਕੀਤੇ ਸੈਲਫ-ਹੈਲਪ ਗਰੁੱਪਾਂ ਦੇ ਉਤਪਾਦਾਂ ਦੀ ਪ੍ਰਦਰਸ਼ਨੀ ਲਗਵਾਈ। ਇਹ ਉਪਰਾਲਾ ਸੈਲਫ-ਹੈਲਪ ਗਰੁੱਪਾਂ ਦੀਆਂ ਮਹਿਲਾਵਾਂ ਵਲੋਂ ਤਿਆਰ ਕੀਤੇ ਉਤਪਾਦਾਂ ਨੂੰ ਨਾ ਸਿਰਫ਼ ਇੱਕ ਯੋਗ ਮੰਚ ਪ੍ਰਦਾਨ ਕਰਨ ਲਈ ਸੀ, ਬਲਕਿ ਇਹ ਉਨ੍ਹਾਂ ਮਹਿਲਾਵਾਂ ਵਿੱਚ ਆਤਮ-ਵਿਸ਼ਵਾਸ ਉਤਪੰਨ ਕਰਨਾ ਤੇ ਉਨ੍ਹਾਂ ਨੂੰ ਹੋਰ ਹੌਸਲਾ ਦੇਣਾ ਵੀ ਸੀ, ਤਾਂ ਜੋ ਉਹ ਭਵਿੱਖ ਵਿੱਚ ਹੋਰ ਉਤਸ਼ਾਹ ਨਾਲ ਸੈਲਫ-ਹੈਲਪ ਗਰੁੱਪਾਂ ਨਾਲ ਜੁੜ ਕੇ ਆਤਮ-ਨਿਰਭਰਤਾ ਦੀ ਮਿਸਾਲ ਬਣ ਸਕਣ।
ਇਸ ਮੌਕੇ ਤੇ, ਐਚਐਮਈਐਲ ਦੀ ਸੀਐਸਆਰ ਟੀਮ ਅਤੇ ਪਾਰਟਨਰ ਏਜੰਸੀ ਦੇ ਸਹਿਯੋਗ ਨਾਲ, ਪਿੰਡ ਮਲਕਾਣਾ ਦੇ "ਵਾਹਿਗੁਰੂ ਸੈਲਫ-ਹੈਲਪ ਗਰੁੱਪ" ਨੇ ਬੇਕਰੀ ਉਤਪਾਦ, ਪਿੰਡ ਪੱਕਾ ਕਲਾ ਦੇ "ਸੀਰਤ ਸੈਲਫ-ਹੈਲਪ ਗਰੁੱਪ" ਨੇ ਲੈਦਰ ਬੈਗ, ਪਿੰਡ ਕਮਾਲੂ ਦੇ "ਗਿਆਨ ਸੈਲਫ-ਹੈਲਪ ਗਰੁੱਪ" ਨੇ ਵੱਖ-ਵੱਖ ਤਰ੍ਹਾਂ ਦੇ ਬੈਗ, ਪਿੰਡ ਤਰਖਾਣਵਾਲਾ ਦੇ "ਸ਼੍ਰੀ ਗੁਰੂ ਗੋਬਿੰਦ ਸਿੰਘ ਸੈਲਫ-ਹੈਲਪ ਗਰੁੱਪ" ਨੇ ਸਰੋਂ ਦਾ ਤੇਲ, ਪਿੰਡ ਪੱਕਾ ਕਲਾ ਦੇ "ਖਾਲਸਾ ਸੈਲਫ-ਹੈਲਪ ਗਰੁੱਪ" ਨੇ ਆਚਾਰ, "ਆਦਰਸ਼ ਸੈਲਫ-ਹੈਲਪ ਗਰੁੱਪ" ਨੇ ਧਾਰਮਿਕ ਚਿੰਨ੍ਹ ਤੇ ਟਰੈਕ ਬੌਟਮ, "ਜੰਡਸਰ ਸੈਲਫ-ਹੈਲਪ ਗਰੁੱਪ" ਨੇ ਅਗਰਬੱਤੀ ਅਤੇ "ਨਾਭਾ ਫਾਊਂਡੇਸ਼ਨ" ਵਲੋਂ ਐਚਐਮਈਐਲ ਦੇ ਸਹਿਯੋਗ ਨਾਲ ਚਲਾਏ ਜਾ ਰਹੇ "ਫੁਲਕਾਰੀ ਪ੍ਰੋਜੈਕਟ" ਹੇਠ ਮਹਿਲਾਵਾਂ ਵਲੋਂ ਤਿਆਰ ਕੀਤੇ "ਫੁਲਕਾਰੀ ਉਤਪਾਦ" ਦੇ ਸਟਾਲ ਲਗਾਏ। ਇਹ ਸਟਾਲ 11 ਅਪਰੈਲ ਤੋਂ ਸ਼ੁਰੂ ਹੋ ਕੇ 14 ਅਪਰੈਲ ਤੱਕ ਚੱਲਣਗੇ ਅਤੇ ਵੈਸਾਖੀ ਮੇਲੇ ਵਿੱਚ ਆਏ ਹੋਏ ਲੋਕਾਂ ਨੂੰ ਇਨ੍ਹਾਂ ਮਹਿਲਾਵਾਂ ਦੀ ਮੇਹਨਤ, ਕੁਸ਼ਲਤਾ ਅਤੇ ਆਤਮ-ਨਿਰਭਰਤਾ ਦੀ ਤਸਦੀਕ ਕਰਨ ਦਾ ਮੌਕਾ ਦੇਣਗੇ।
ਮਹਿਲਾਵਾਂ ਹੋ ਰਹੀਆਂ ਆਤਮ-ਨਿਰਭਰ
ਮਹਿਲਾ ਸਸ਼ਕਤੀਕਰਨ ਨੂੰ ਹੋਰ ਮਜ਼ਬੂਤ ਬਣਾਉਣ ਲਈ, ਰਿਫਾਈਨਰੀ ਨੇ ਆਪਣੇ ਸੀਐਸਆਰ ਉਪਰਾਲੇ ਤਹਿਤ ਆਪਣੇ ਆਲੇ-ਦੁਆਲੇ 59 ਪਿੰਡਾਂ ਵਿੱਚ 600 ਤੋਂ ਵੱਧ "ਸੈਲਫ-ਹੈਲਪ ਗਰੁੱਪ" ਚਲਾਏ ਹਨ, ਜਿਨ੍ਹਾਂ ਵਿੱਚ 7 ਹਜ਼ਾਰ ਤੋਂ ਵੱਧ ਮਹਿਲਾਵਾਂ ਜੁੜ ਚੁੱਕੀਆਂ ਹਨ। ਇਨ੍ਹਾਂ ਮਹਿਲਾਵਾਂ ਨੂੰ 167 ਉੱਦਯੋਗਕ ਉਪਰਾਲੇ (ਇੰਟਰਪ੍ਰਾਈਜ਼) ਵੀ ਮੁਹੱਈਆ ਕਰਵਾਏ ਗਏ ਹਨ। ਅੱਜ ਇਹ ਗ੍ਰਾਮੀਣ ਮਹਿਲਾਵਾਂ, ਜੋ ਪਹਿਲਾਂ ਘਰ ਦੇ ਕੰਮ-ਕਾਜ ਤੱਕ ਸੀਮਤ ਸੀ, ਹੁਣ ਫੁਲਕਾਰੀ, ਲੈਦਰ ਬੈਗ, ਸਕੂਲ ਯੂਨੀਫਾਰਮ, ਸੈਨੇਟਰੀ ਪੈਡ, ਚਿਪਸ, ਸਰੋਂ ਦਾ ਤੇਲ, ਆਚਾਰ, ਆਰ.ਓ. ਯੂਨਿਟ, ਲੋਅਰ, ਕਾਪੀਆਂ, ਸਕੂਲ ਬੈਗ, ਲੈਪਟੌਪ ਬੈਗ ਤਿਆਰ ਕਰ ਕੇ ਆਪਣੀ ਰੋਜ਼ੀ-ਰੋਟੀ ਕਮਾ ਰਹੀਆਂ ਹਨ।