ਸਕਾਰਾਤਮਕ ਸੋਚ ਭਾਵ ਚੰਗੀ ਸੋਚ ਨੂੰ ਆਪਣੇ ਜੀਵਨ ਵਿੱਚ ਉਤਾਰ ਕੇ ਹੀ ਅਸੀਂ ਆਪਣੀ ਜ਼ਿੰਦਗੀ ਨੂੰ ਖੁਸ਼ਹਾਲ ਬਣਾ ਸਕਦੇ ਹਾਂ। ਕਿਉਂਕਿ ਸਾਡੀ ਸੋਚ ਦੁਆਲੇ ਸਾਡੇ ਜੀਵਨ ਦਾ ਪੂਰਾ ਚੱਕਰ ਘੁੰਮਦਾ ਹੈ। ਸੋਚੋ ਜੇਕਰ ਤੁਸੀਂ ਆਪਣੇ ਆਪ ਨੂੰ ਇਹੀ ਕਹੀ ਜਾਓਗੇ ਕਿ ਮੈਂ ਇਹ ਨਹੀਂ ਕਰ ਸਕਦਾ ਤਾਂ ਤੁਹਾਡਾ ਮਨ ਤੁਹਾਨੂੰ ਉਹੋ ਜਿਹੇ ਹੀ ਵਿਚਾਰ ਦੇਣਾ ਸ਼ੁਰੂ ਕਰ ਦੇਵੇਗਾ ਅਤੇ ਇਹਨਾ ਵਿਚਾਰਾਂ ਨੂੰ ਤੁਹਾਡਾ ਮਨ ਅਸਲੀਅਤ ਵਿੱਚ ਸੱਚ ਮੰਨ ਲਵੇਗਾ ਅਤੇ ਤੁਹਾਡੇ ਮਨ ਦੀ ਜਿੱਤ ਹੋ ਜਾਵੇਗੀ। ਕਿਉਂਕਿ ਮਨੋਵਿਗਿਆਨ ਕਹਿੰਦਾ ਹੈ ਕਿ ਜਿਵੇੰ ਦੇ ਵਿਚਾਰ ਤੁਸੀਂ ਆਪਣੇ ਮਨ ਨੂੰ ਦਿੰਦੇ ਹੋ ਤੁਹਾਡਾ ਦਿਮਾਗ ਉਸ ਤਰ੍ਹਾਂ ਹੀ ਸੋਚਣਾ ਸ਼ੁਰੂ ਕਰ ਦਿੰਦਾ ਹੈ। ਜੇਕਰ ਤੁਸੀਂ ਆਪਣੇ ਮਨ ਨੂੰ ਭੈੜੇ ਵਿਚਾਰ ਹੀ ਦੇਵੋਗੇ ਤਾਂ ਇਹ ਉਸ ਤਰ੍ਹਾਂ ਦਾ ਹੀ ਤੁਹਾਨੂੰ ਬਣਾ ਦੇਵੇਗਾ ਅਤੇ ਤੁਸੀਂ ਆਪਣੀ ਜ਼ਿੰਦਗੀ ਨੂੰ ਨਿਰਾਸ਼ਾ ਭਰਿਆ ਬਣਾ ਲਵੋਗੇ।
ਜੇਕਰ ਇਸ ਦੀ ਜਗ੍ਹਾ ਤੇ ਤੁਸੀਂ ਆਪਣੇ ਮਨ ਨੂੰ ਚੰਗੇ ਵਿਚਾਰ ਦਿੰਦੇ ਹੋ ਤਾਂ ਇਹ ਤੁਹਾਡੀ ਜ਼ਿੰਦਗੀ ਨੂੰ ਖੁਸ਼ਹਾਲ ਬਣਾ ਦੇਵੇਗਾ। ਇਸ ਲਈ ਕੋਸ਼ਿਸ਼ ਹਮੇਸ਼ਾਂ ਇਹ ਕਰੋ ਕਿ ਕਦੇ ਵੀ ਨਕਾਰਾਤਮਕ ਵਿਚਾਰ ਤੁਹਾਡੇ ਮਨ ਵਿੱਚ ਆਉਣ ਹੀ ਨਾ। ਹਮੇਸ਼ਾਂ ਚੰਗੇ ਵਿਚਾਰਾਂ ਨੂੰ ਹੀ ਆਪਣੇ ਮਨ ਵਿੱਚ ਜਗ੍ਹਾ ਦੇਵੋ ਤਾਂ ਜੋ ਇਹ ਚੰਗੇ ਵਿਚਾਰ ਤੁਹਾਡੇ ਮਨ ਤੇ ਗਹਿਰਾ ਪ੍ਰਭਾਵ ਪਾਉਣ ਤਾਂ ਕਿ ਤੁਹਾਡੀ ਜ਼ਿੰਦਗੀ ਵਿੱਚ ਹਮੇਸ਼ਾ ਖੁਸ਼ਹਾਲੀ ਬਣੀ ਰਹੇ। ਕਿਉਂਕਿ ਤੁਸੀਂ ਆਪਣੇ ਮਨ ਨੂੰ ਭਾਵੇਂ ਬੁਰੇ ਵਿਚਾਰ ਦਿੰਦੇ ਹੋ ਭਾਵੇਂ ਚੰਗੇ ਤੁਹਾਡਾ ਮਨ ਉਹਨਾਂ ਨੂੰ ਸੱਚ ਹੀ ਮੰਨਦਾ ਹੈ ਭਾਵੇਂ ਉਹਨਾਂ ਦੀ ਅਸਲੀਅਤ ਕੁੱਝ ਵੀ ਨਾ ਹੋਵੇ। ਕਿਉਂਕਿ ਜਦੋਂ ਤੁਸੀਂ ਕੋਈ ਵੀ ਵਿਚਾਰ ਨੂੰ ਆਪਣੇ ਮਨ ਵਿੱਚ ਦੁਹਰਾਉਂਦੇ ਰਹਿੰਦੇ ਹੋ ਤਾਂ ਇੱਕ ਦਿਨ ਤੁਹਾਡਾ ਚੇਤਨ ਮਨ ਇਹਨਾਂ ਨੂੰ ਸੱਚ ਮੰਨਣ ਲੱਗ ਪਵੇਗਾ ਅਤੇ ਉਹ ਚੀਜ਼ਾਂ ਤੁਹਾਡੀ ਜ਼ਿੰਦਗੀ ਵਿੱਚ ਆ ਜਾਣਗੀਆਂ।
ਇਸ ਦਾ ਮਤਲਬ ਇਹ ਬਿਲਕੁੱਲ ਵੀ ਨਹੀਂ ਕਿ ਕਦੇ ਭੈੜੇ ਵਿਚਾਰ ਤੁਹਾਨੂੰ ਆਉਣਗੇ ਨਹੀਂ ਜਾ ਤੁਹਾਨੂੰ ਤੰਗ ਨਹੀਂ ਕਰਨਗੇ। ਉਹਨਾਂ ਨੂੰ ਆਉਣ ਦਿਉ ਅਤੇ ਉਹਨਾਂ ਦਾ ਟਾਕਰਾ ਚੰਗੇ ਵਿਚਾਰਾਂ ਨਾਲ ਕਰੋ ਤਾਂ ਕਿ ਤੁਹਾਨੂੰ ਉਹੋ ਜਿਹੀ ਜ਼ਿੰਦਗੀ ਮਿਲ ਸਕੇ ਜਿਹੋ ਜਿਹੀ ਜ਼ਿੰਦਗੀ ਤੁਸੀਂ ਚਾਹੁੰਦੇ ਹੋ। ਇਸ ਦੇ ਲਈ ਤੁਹਾਨੂੰ ਇੱਕ ਕੰਮ ਹੋਰ ਕਰਨਾ ਹੋਵੇਗਾ। ਤੁਹਾਨੂੰ ਆਪਣੀ ਜਿੰਦਗੀ ਵਿੱਚ ਸਕਾਰਾਤਮਕ ਸੋਚ ਵਾਲੇ ਲੋਕਾਂ ਨੂੰ ਰੱਖਣਾ ਹੋਵੇਗਾ ਅਤੇ ਨਕਾਰਾਤਮਕ ਸੋਚ ਵਾਲੇ ਲੋਕਾਂ ਨੂੰ ਬਾਹਰ ਕੱਢਣਾ ਹੋਵੇਗਾ, ਅਗਰ ਨਕਾਰਾਤਮਕ ਸੋਚ ਵਾਲੇ ਲੋਕ ਤੁਹਾਨੂੰ ਮਿਲਦੇ ਵੀ ਹਨ ਤਾਂ ਉਹਨਾਂ ਦੁਆਰਾ ਕਹੀਆਂ ਜਾਣ ਵਾਲੀਆਂ ਗੱਲਾਂ ਨੂੰ ਸੁਨਣ ਤੋਂ ਬਾਅਦ ਉਹਨਾਂ ਨੂੰ ਮੰਨੋ ਨਾ ਅਤੇ ਨਾ ਹੀ ਉਹਨਾਂ ਬਾਰੇ ਦੁਬਾਰਾ ਸੋਚੋ। ਇਸ ਤਰੀਕੇ ਨਾਲ ਤੁਸੀਂ ਆਪਣੀ ਜ਼ਿੰਦਗੀ ਨੂੰ ਇੱਕ ਅਲੱਗ ਪੱਧਰ ਤੇ ਲਿਜਾ ਸਕਦੇ ਹੋ।
ਜਿਨ੍ਹਾਂ ਲੋਕਾਂ ਨੂੰ ਮਿਲ ਕਿ ਤੁਹਾਨੂੰ ਖੁਸ਼ੀ ਅਤੇ ਤਾਜ਼ਗੀ ਮਿਲੇ ਇਹੋ ਜਿਹੇ ਲੋਕਾਂ ਨੂੰ ਸਮੇਂ ਵਿੱਚੋਂ ਸਮਾਂ ਕੱਢ ਕੇ ਮਿਲੋ ਅਤੇ ਉਹਨਾਂ ਨਾਲ ਵਿਚਾਰਾਂ ਦਾ ਆਦਾਨ ਪ੍ਰਦਾਨ ਕਰੋ ਤਾਂ ਕਿ ਤੁਸੀਂ ਆਪਣੇ ਵਿਚਾਰਾਂ ਤੇ ਹੋਰ ਨਿਯੰਤਰਨ ਕਰਕੇ ਆਪਣੇ ਵਿਚਾਰਾਂ ਦੇ ਪੱਧਰ ਨੂੰ ਉੱਚ ਦਰਜੇ ਦਾ ਬਣਾ ਸਕੋ। ਕਿਸੇ ਸਿਆਣੇ ਨੇ ਠੀਕ ਹੀ ਕਿਹਾ ਹੈ ਕਿ ਜੈਸੀ ਸੰਗਤ ਵੈਸੀ ਰੰਗਤ ਇਹ ਗੱਲ ਉੱਪਰ ਲਿਖੇ ਵਿਚਾਰਾਂ ਤੇ ਸੌ ਫੀਸਦੀ ਢੁੱਕਦੀ ਹੈ। ਸੋ ਇਹਨਾਂ ਗੱਲਾਂ ਤੇ ਅਮਲ ਕਰਕੇ ਤੁਸੀਂ ਆਪਣੀ ਅਤੇ ਆਪਣੇ ਆਲੇ ਦੁਆਲੇ ਰਹਿਣ ਵਾਲੇ ਲੋਕਾਂ ਦੀ ਜ਼ਿੰਦਗੀ ਨੂੰ ਖੁਸ਼ਹਾਲ ਬਣਾ ਸਕਦੇ ਹੋ।
-
ਬਲਜੀਤ ਸਿੰਘ ਕਚੂਰਾ, ਲੇਖਕ
******
9465405597
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.