Babushahi Special: ਕੂੜੇ ਦੇ ਮੁਸ਼ਕ ਨਾਲ ਖੁਸ਼ਕ ਹੋਏ ਨੱਕ ਦੀ ਖੁਸ਼ਕੀ ਚੁੱਕਣ ਦੀ ਉਡੀਕ ’ਚ ਬਠਿੰਡਾ
ਅਸ਼ੋਕ ਵਰਮਾ
ਬਠਿੰਡਾ, 10 ਫਰਵਰੀ2022: ਸਾਫ ਸਫਾਈ ਦੇ ਮਾਮਲੇ ’ਚ ਕੀਤੀ ਜਾਂਦੀ ਰੈਂਕਿੰਗ ਦੌਰਾਨ ਅੱਵਲ ਆਉਣ ਵਾਲੇ ਬਠਿੰਡਾ ’ਚ ਸਵੱਛਤਾ ਮੁਹਿੰਮ ਨੂੰ ਗ੍ਰਹਿਣ ਲੱਗ ਗਿਆ ਹੈ। ਨਗਰ ਨਿਗਮ ਬਠਿੰਡਾ ਵੱਲੋਂ ਦਾਅਵਿਆਂ ਦੇ ਬਾਵਜੂਦ ਸ਼ਹਿਰ ‘ਚ ਕੂੜੇ ਕਰਕਟ ਦੇ ਢੇਰਾਂ ਨੂੰ ਘੱਟ ਨਹੀਂ ਕੀਤਾ ਜਾ ਸਕਿਆ ਹੈ। ਹੁਣ ਜਦੋਂ ਵੱਡੇ ਬਹੁਮੱਤ ਨਾਲ ਨਗਰ ਨਿਗਮ ਨੂੰ ਨੌਜਵਾਨ ਮੇਅਰ ਮਿਲਿਆ ਹੈ ਤਾਂ ਸ਼ਹਿਰ ਵਾਸੀਆਂ ਨੂੰ ਆਸ ਬੱਝੀ ਹੈ ਕਿ ਬਠਿੰਡਾ ਦੀਆਂ ਦਰਜਨਾਂ ਥਾਵਾਂ ਤੇ ਜਨਤਕ ਤੌਰ ਤੇ ਇਕੱਤਰ ਹੋਏ ਕੂੜੇ ਨੂੰ ਚੁਕਵਾਇਆ ਜਾ ਸਕੇਗਾ। ਪਿਛੇ ਜਿਹੇ ਨਗਰ ਨਿਗਮ ਦੇ ਸਫਾਈ ਸੇਵਕਾਂ ਅਤੇ ਟਿੱਪਰ ਚਾਲਕਾਂ ਦੀ ਹੜਤਾਲ ਕਾਰਨ ਸ਼ਹਿਰ ਵਿੱਚ ਅਜਿਹੇ ਕੂੜੇ ਦੇ ਢੇਰ ਲੱਗੇ ਕਿ ਮੁੜ ਸਫਾਈ ਪ੍ਰਬੰਧ ਲੀਹੇ ਨਹੀਂ ਲਿਆਂਦੇ ਜਾ ਸਕੇ ਹਨ। ਹੁਣ ਜਦੋਂ ਕੋਈ ਹੜਤਾਲ ਨਹੀਂ ਤਾਂ ਵੀ ਸ਼ਹਿਰ ਦੀਆਂ ਦਰਜਨਾਂ ਥਾਵਾਂ ਤੇ ਕੂੜਾ ਇਕੱਠਾ ਹੋਇਆ ਪਿਆ ਹੈ ਜਿਸ ਤੇ ਬਿਮਾਰੀ ਫੈਲਾਉਣ ਵਾਲੇ ਮੱਛਰਾਂ ਅਤੇ ਮੱਖੀਆਂ ਦੀ ਭਰਮਾਰ ਹੈ।
ਦੇਖਣ ’ਚ ਆਇਆ ਹੈ ਕਿ ਵੱਡੀ ਗਿਣਤੀ ਥਾਵਾਂ ਤਾਂ ਬਣੇ ਕੂੜਾ ਡੰਪਾਂ ਦੀ ਬਦਬੂ ਆਮ ਲੋਕਾਂ ਅਤੇ ਰਾਹਗੀਰਾਂ ਲਈ ਪ੍ਰੇਸ਼ਾਨੀ ਦਾ ਸਬੱਬ ਬਣੀ ਹੋਈ ਹੈ । ਲੋਕ ਮੰਗ ਕਰ ਰਹੇ ਹਨ ਕਿ ਨਵੇਂ ਮੇਅਰ ਇਸ ਮਾਮਲੇ ’ਚ ਦਖਲ ਦੇਣ ਅਤੇ ਕੂੜੇ ਦੇ ਢੇਰ ਪੜਾਅਵਾਰ ਢੰਗ ਨਾਲ ਖਤਮ ਕਰਵਾਉਣ ਲਈ ਢੁੱਕਵੇਂ ਕਦਮ ਚੁੱਕਣ। ਸ਼ਹਿਰ ਵਾਸੀਆਂ ਦਾ ਮੰਨਣਾ ਹੈ ਕਿ ਬਠਿੰਡਾ ਦੇ ਕਈ ਇਲਾਕਿਆਂ ‘ਚ ਸੀਵਰੇਜ਼ ਦੇ ਪਾਣੀ ਤੇ ਕੂੜੇ ਦੀ ਬਦੌਲਤ ਫੈਲੀ ਗੰਦਗੀ ਦੀ ਬਦਬੂ ਤੋਂ ਲੋਕਾਂ ਨੂੰ ਨਿਜਾਤ ਦਿਵਾਉਣ ‘ਚ ਨਗਰ ਨਿਗਮ ਫੇਲ੍ਹ ਰਿਹਾ ਹੈ। ਲੋਕ ਆਖਦੇ ਹਨ ਕਿ ਕਈ ਖੇਤਰਾਂ ‘ਚ ਤਾਂ ਸੜਕਾਂ ਲਾਗੇ ਹੀ ਡੰਪ ਬਣਾ ਰੱਖੇ ਹਨ ਜਿਸ ਕਾਰਨ ਆਮ ਲੋਕਾਂ ਦੀਆਂ ਮੁਸ਼ਕਲਾਂ ’ਚ ਬੇਹੱਦ ਵਾਧਾ ਹੋਇਆ ਹੈ। ਪਤਾ ਲੱਗਿਆ ਹੈ ਕਿ ਕਈ ਗਲੀਆਂ ਮੁਹੱਲੇ ਇਹੋ ਜਿਹੇ ਵੀ ਹਨ ਜਿੰਨ੍ਹਾਂ ’ਚ ਲਗਾਤਾਰ ਕਈ ਕਈ ਦਿਨ ਕੂੜਾ ਨਹੀਂ ਚੁੱਕਿਆ ਜਾ ਰਿਹਾ ਹੈ।
ਕਿਲਾ ਮੁਬਾਰਕ ਇਲਾਕੇ ਦੇ ਨਿਵਾਸੀ ਜਗਦੀਸ਼ ਕੁਮਾਰ ਦਾ ਕਹਿਣਾ ਸੀ ਕਿ ਪਾਸ਼ ਕਲੋਨੀਆਂ ਤੇ ਵੱਡੇ ਸਿਆਸੀ ਆਗੂਆਂ ਦੇ ਇਲਾਕਿਆਂ ਲਈ ਨਿਯਮ ਹੋਰ ਹਨ ਜਦੋਂਕਿ ਆਮ ਲੋਕਾਂ ਲਈ ਵੱਖਰੇ ਹਨ। ਉਨ੍ਹਾਂ ਕਿਹਾ ਕਿ ਬਠਿੰਡਾ ਜਿਆਦਾਤਰ ਵਾਰਡ ਅਜਿਹੇ ਹਨ ਜਿਨ੍ਹਾਂ ‘ਚ ਕੂੜੇ ਕਰਕਟ ਦੀ ਸਮੱਸਿਆ ਦਾ ਪਸਾਰਾ ਹੈ । ਉਨ੍ਹਾਂ ਕਿਹਾ ਕਿ ਬਦਬੂ ਕਾਰਨ ਤਾਂ ਨੱਕ ਢਕ ਕੇ ਲੰਘਣਾ ਵੀ ਔਖਾ ਹੋਇਆ ਪਿਆ ਹੈ । ਉਨ੍ਹਾਂ ਕਿਹਾ ਕਿ ਅਜਿਹੇ ਮਾਹੌਲ ਵਿੱਚ ਤੰਦਰੁਸਤ ਜਿੰਦਗੀ ਦੀ ਕਾਮਨਾ ਨਹੀਂ ਕੀਤੀ ਜਾ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਦਿਨਾਂ ਦੌਰਾਨ ਜੇਕਰ ਬਾਰਸ਼ ਹੁੰਦੀ ਤਾਂ ਸਥਿਤੀ ਹੋਰ ਵੀ ਖ਼ਰਾਬ ਹੋ ਸਕਦੀ ਹੈ ਕਿਉਂਕਿ ਪਲਾਸਟਿਕ ਦੇ ਲਿਫਾਫਿਆਂ ਆਦਿ ਨਾਲ ਸੀਵਰੇਜ ਜਾਮ ਹੋ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਦੇ ਸਿੱਟੇ ਵਜੋਂ ਸੜਕਾਂ ਅਤੇ ਗਲੀ ਮੁਹੱਲਿਆਂ ਵਿੱਚ ਗੰਦੇ ਪਾਣੀ ਦੇ ਛੱਪੜ ਲੱਗ ਜਾਂਦੇ ਹਨ ਜਿਸ ਕਰਕੇ ਆਮ ਜਨਜੀਵਨ ’ਚ ਭਾਰੀ ਵਿਘਨ ਪੈਂਦਾ ਹੈ।
ਪ੍ਰਬੰਧਾਂ ਦੀ ਫੂਕ ਨਿਕਲੀ
ਜਮਹੂਰੀ ਅਧਿਕਾਰ ਸਭਾ ਬਠਿੰੰਡਾ ਦੇ ਪ੍ਰਚਾਰ ਸਕੱਤਰ ਸਾਬਕਾ ਡਿਪਟੀ ਮੈਡੀਕਲ ਕਮਿਸ਼ਨਰ ਡਾਕਟਰ ਅਜੀਤਪਾਲ ਸਿੰਘ ਦਾ ਕਹਿਣਾ ਸੀ ਕਿ ਕੂੜੇ ਦੀ ਸਮੱਸਿਆ ਕਾਰਨ ਨਗਰ ਨਿਗਮ ਬਠਿੰਡਾ ਵੱਲੋਂ ਸ਼ਹਿਰ ਨੂੰ ਸਾਫ ਸੁਥਰਾ ਬਨਾਉਣ ਦੇ ਦਾਅਵਿਆਂ ਦੀ ਫੂਕ ਨਿਕਲ ਗਈ ਹੈ। ਕਈ ਇਲਾਕਿਆਂ ’ਚ ਕੂੜੇ ਦੀ ਸਮੱਸਿਆ ਹੈ ਤਾਂ ਕੁੱਝ ਮੁਹੱਲਿਆਂ ‘ਚ ਸੀਵਰੇਜ ਓਵਰਫਲੋ ਹੋ ਰਿਹਾ ਹੈ ਜਦੋਂਕਿ ਕਈ ਥਾਈਂ ਸੜਕਾਂ ਕੰਢੇ ਫੈਲੀ ਗੰਦਗੀ ਲੋਕ ਨਰਕ ਭੋਗਣ ਲਈ ਮਜਬੂਰ ਹਨ। ਉਨ੍ਹਾਂ ਕਿਹਾ ਕਿ ਖਿਲਰਿਆ ਕੂੜਾ ਬੀਮਾਰੀਆਂ ਫੈਲਾਉਂਦਾ ਹੈ ਜਿਸ ਨੂੰ ਨਵੇਂ ਮੇਅਰ ਵੱਲੋਂ ਨਿੱਜੀ ਦਖਲ ਰਾਹੀਂ ਬਿਨਾਂ ਦੇਰੀ ਦੇ ਚੁੱਕਿਆ ਜਾਣਾ ਯਕੀਨੀ ਬਨਾਉਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਤਿੰਨ ਵਾਰ ਸਫਾਈ ’ਚ ਪਹਿਲੇ ਨੰਬਰ ਤੇ ਆਉਣ ਵਾਲੇ ਬਠਿੰਡਾ ਲਈ ਇਹ ਕੂੜਾ ਨਮੋਸ਼ੀ ਦਾ ਸਬੱਬ ਹੈ।
ਨਗਰ ਨਿਗਮ ਦੇ ਦਾਅਵੇ ਖੋਖਲੇ
ਨਾਗਰਿਕ ਚੇਤਨਾ ਮੰਚ ਦੇ ਪ੍ਰਧਾਨ ਬੱਗਾ ਸਿੰਘ ਦਾ ਕਹਿਣਾ ਸੀ ਕਿ ਨਗਰ ਨਿਗਮ ਕੋਲ ਟਿੱਪਰ, ਟਰੈਕਟਰ ਟਰਾਲੀਆਂ, ਸਫਾਈ ਸੇਵਕ ਅਤੇ ਕੂੜਾ ਇਕੱਤਰ ਕਰਨ ਵਾਲੇ ਕਰਮਚਾਰੀ ਹਨ ਤਾਂ ਸ਼ਹਿਰ ਵਿੱਚੋਂ ਸੌ ਫੀਸਦੀ ਕੂੜਾ ਚੁਕਵਾਉਣ ’ਚ ਦੇਰ ਕਿਸ ਗੱਲ ਦੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਗੰਦਗੀ ਕਾਰਨ ਕੋਈ ਬਿਮਾਰੀ ਫੈਲਦੀ ਹੈ ਤਾਂ ਦੁਖੀ ਆਮ ਲੋਕ ਹੀ ਹੋਣਗੇ ਅਫਸਰਾਂ ਨੂੰ ਇਨ੍ਹਾਂ ਗੱਲਾਂ ਨਾਲ ਕੋਈ ਮਤਲਬ ਨਹੀਂ ਹੁੰਦਾ ਹੈ। ਸ਼ਹਿਰ ਨੂੰ ਸਾਫ ਸੁਥਰਾ ਬਨਾਉਣ ਦੀ ਮੰਗ ਕਰਦਿਆਂ ਮੰਚ ਆਗੂ ਨੇ ਕਿਹਾ ਕਿ ਨਗਰ ਨਿਗਮ ਸਫਾਈ ਦੇ ਖੋਖਲੇ ਦਾਅਵੇ ਕਰ ਰਿਹਾ ਹੈ ਜਦੋਂਕਿ ਸ਼ਹਿਰ ਦੀ ਬਦ ਤੋਂ ਬਦਤਰ ਹੋਈ ਸਥਿਤੀ ਨੂੰ ਸਹੀ ਕਰਵਾਇਆ ਜਾਣਾ ਚਾਹੀਦਾ ਹੈ।
ਸ਼ਹਿਰ ਦੀ ਸਫਾਈ ਤਰਜੀਹੀ ਏਜੰਡਾ
ਨਗਰ ਨਿਗਮ ਦੇ ਮੇਅਰ ਪਦਮਜੀਤ ਸਿੰਘ ਮਹਿਤਾ ਦਾ ਕਹਿਣਾ ਸੀ ਕਿ ਸ਼ਹਿਰ ਦੇ ਸਫਾਈ ਅਤੇ ਸੀਵਰੇਜ਼ ਪ੍ਰਬੰਧਾਂ ਨੂੰ ਲੀਹ ਤੇ ਲਿਆਉਣਾ ਉਨ੍ਹਾਂ ਦਾ ਤਰਜੀਹੀ ਏਜੰਡਾ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਦਿਨ ਪਹਿਲਾਂ ਹੀ ਅਹੁਦਾ ਸੰਭਾਲਿਆ ਹੈ ਇਸ ਲਈ ਸਥਿਤੀ ਦਾ ਜਾਇਜਾ ਲੈਣ ਉਪਰੰਤ ਸਫਾਈ ਕਰਮਚਾਰੀਆਂ ਦੀ ਕਈ ਦਿਨ ਰਹੀ ਹੜਤਾਲ ਕਾਰਨ ਸ਼ਹਿਰ ’ਚ ਇਕੱਠਾ ਕੂੜਾ ਪਹਿਲ ਦੇ ਅਧਾਰ ਤੇ ਚੁਕਵਾਇਆ ਜਾਏਗਾ। ਸ੍ਰੀ ਮਹਿਤਾ ਨੇ ਦਾਅਵਾ ਕੀਤਾ ਕਿ ਸ਼ਹਿਰ ਵਾਸੀਆਂ ਨੂੰ ਆਉਣ ਵਾਲੇ ਕੁੱਝ ਦਿਨਾਂ ਦੌਰਾਨ ਸਥਿਤੀ ਬਦਲੀ ਹੋਈ ਨਜ਼ਰ ਆਏਗੀ।