ਕਲਯੁਗੀ ਮਾਂ ਦਾ ਕਾਰਾ: ਨਾਜਾਇਜ਼ ਸੰਬੰਧਾਂ ਕਾਰਨ ਆਸ਼ਿਕ ਨਾਲ ਮਿਲ ਕੇ 14 ਸਾਲ ਦੇ ਪੁੱਤ ਨੂੰ ਮਾਰ ਕੇ ਜ਼ਮੀਨ 'ਚ ਦੱਬਿਆ
- 12 ਸਾਲ ਬਾਅਦ ਹੋਇਆ ਖੁਲਾਸਾ , ਦੋਵੇਂ ਪੁਲਿਸ ਨੇ ਕੀਤੇ ਗ੍ਰਿਫ਼ਤਾਰ
ਰੋਹਿਤ ਗੁਪਤਾ
ਗੁਰਦਾਸਪੁਰ, 5 ਅਗਸਤ 2025 - ਮਾਂ ਵਲੋ ਪੁੱਤ ਦਾ ਕਤਲ ਕਰਨ ਦੀ ਰੌਂਗਟੇ ਖੜੇ ਕਰਨ ਵਾਲੀ ਵਾਰਦਾਤ ਦਾ ਖੁਲਾਸਾ 12 ਸਾਲ ਬਾਅਦ ਹੋਇਆ ਹੈ । ਦੋਸ਼ੀ ਔਰਤ ਅਤੇ 12 ਸਾਲ ਪਹਿਲਾਂ ਕਤਲ ਦੀ ਵਾਰਦਾਤ ਨੂੰ ਅੰਜਾਮ ਦੇਣ ਵਿੱਚ ਉਸ ਦਾ ਸਾਥ ਦੇਣ ਵਾਲੇ ਉਸ ਦੇ ਆਸ਼ਿਕ ਨੂੰ ਵੀ ਪੁਲਿਸ ਨੇ ਕੀਤਾ ਗ੍ਰਿਫਤਾਰ ਕਰ ਲਿਆ ਹੈ।
ਮਾਮਲਾ ਜਿਲਾ ਗੁਰਦਾਸਪੁਰ ਦੇ ਕਸਬਾ ਸ਼੍ਰੀ ਹਰਗੋਬਿੰਦਪੁਰ ਦਾ ਹੈ ਜਿੱਥੇ ਪਿਛਲੇ ਕਰੀਬ 11 ਸਾਲ ਤੋ ਇੱਕ ਕੇਸ ਚ ਭਗੌੜੇ ਸਤਨਾਮ ਸਿੰਘ ਅਤੇ ਰਣਜੀਤ ਕੌਰ ਪੁਲਿਸ ਨੂੰ ਪਿਛਲੇ ਕਰੀਬ 11 ਸਾਲ ਤੋ ਲੋੜੀਦਾ ਸੀ ।ਪੁਲਿਸ ਥਾਣਾ ਹਰਗੋਬਿੰਦਪੁਰ ਦੇ ਥਾਣਾ ਇੰਚਾਰਜ ਅਤੇ ਡੀ ਐਸ ਪੀ ਹਰੀਸ਼ ਕੁਮਾਰ ਨੇ ਦੱਸਿਆ ਕਿ ਉਹਨਾਂ ਦੋਵਾਂ ਦੇ ਨਾਜਾਇਜ਼ ਸਬੰਧ ਸੀ ਅਤੇ ਰਣਜੀਤ ਕੌਰ ਆਪਣੇ 14 ਸਾਲ ਦੇ ਬੇਟੇ ਸੰਦੀਪ ਸਿੰਘ ਨੂੰ ਜ਼ਬਰਦਸਤੀ ਆਪਣੇ ਨਾਲ ਲੈਕੇ ਸਤਨਾਮ ਸਿੰਘ ਨਾਲ ਫ਼ਰਾਰ ਹੋ ਗਈ ਸੀ ਅਤੇ ਪਿਛਲੇ 11 ਸਾਲ ਤੋ ਫ਼ਰਾਰ ਸਨ ਅਤੇ ਹੁਣ ਜਦ ਸਤਨਾਮ ਸਿੰਘ ਨੂੰ ਉਹਨਾਂ ਕਾਬੂ ਕੀਤਾ ਤਾਂ ਰਣਜੀਤ ਕੌਰ ਵੀ ਉਸ ਨਾਲ ਗ੍ਰਿਫਤਾਰ ਕੀਤਾ ਗਿਆ ਅਤੇ ਜਦ ਦੋਵਾਂ ਨੂੰ ਪੁੱਛਗਿੱਛ ਕੀਤੀ ਗਈ ਤਾਂ ਉਹਨਾਂ ਦੱਸਿਆ ਕਿ ਉਹਨਾਂ ਸੰਦੀਪ ਸਿੰਘ ਦੀ ਸਾਲ 2014 ਚ ਹੀ ਗਲਾ ਘੋਟ ਕੇ ਹੱਤਿਆ ਕਰ ਦਿੱਤੀ ਸੀ ਅਤੇ ਉਸ ਬੱਚੇ ਦੀ ਲਾਸ਼ ਰਣਜੀਤ ਕੌਰ ਦੇ ਘਰ ਦੇ ਵਿਹੜੇ ਚ ਹੀ ਦੱਬ ਦਿੱਤੀ ਸੀ ਅਤੇ ਖੁਦ ਦੋਵੇ ਪੰਜਾਬ ਤੋ ਫ਼ਰਾਰ ਹੋ ਆਗਰਾ ਚਲੇ ਗਏ ਅਤੇ ਪਹਿਲਾਂ ਤਾਂ ਕਈ ਸਾਲ ਸੂਬੇ ਤੋ ਬਾਹਰ ਰਹੇ ਅਤੇ ਹੁਣ ਕੁਝ ਸਮੇਂ ਤੋਂ ਜਲੰਧਰ ਇਕੱਠੇ ਰਹਿ ਰਹੇ ਸਨ।
ਹੁਣ ਪੁਲਿਸ ਵਲੋ ਇਸ ਅੰਨ੍ਹੇ ਕਤਲ ਦੀ ਵਾਰਦਾਤ ਦੀ ਗੁੱਥੀ ਸੁਲਝਾਇਆ ਗਿਆ ਹੈ ਅਤੇ ਪੁਲਿਸ ਵਲੋ ਦੋਸ਼ੀਆ ਨਾਲ ਉਸ ਥਾਂ ਦੀ ਵੀ ਸ਼ਨਾਖ਼ਤ ਕੀਤੀ ਗਈ ਜਿੱਥੇ ਮਾ ਨੇ ਆਪਣੇ ਪੁੱਤ ਨੂੰ ਕਤਲ ਕਰ ਦੱਬਿਆ ਸੀ ਅਤੇ ਪੁਲਿਸ ਵਲੋ ਮ੍ਰਿਤਕ ਦਾ ਪਿੰਜਰ ਕੱਢ ਕੇ ਅਗਲੀ ਕਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ ।