ਹੁਣੇ ਹੁਣੇ ਇੱਕ ਹੋਰ ਪੈਲੀ ਨੂੰ ਲੱਗੀ ਅੱਗ, ਦੋ ਏਕੜ ਫਸਲ ਅਤੇ ਸਾਢੇ ਚਾਰ ਏਕੜ ਨਾੜ ਸੜਕੇ ਹੋਇਆ ਸਵਾਹ
- ਪਿੰਡ ਦੇ ਲੋਕਾਂ ਨੇ ਟਰੈਕਟਰ ਨਾਲ ਵਾਹ ਵਾਹ ਕੇ ਬਚਾਈ ਬਾਕੀ ਫਸਲ ਤੇ ਨਾੜ
ਰਿਪੋਰਟਰ _ਰੋਹਿਤ ਗੁਪਤਾ
ਗੁਰਦਾਸਪੁਰ, 22 ਅਪ੍ਰੈਲ 2025 - ਦੇਰ ਸ਼ਾਮ ਗੁਰਦਾਸਪੁਰ_ਕਰਤਾਰਪੁਰ ਕੋਰੀਡੋਰ ਰੋਡ ਤੇ ਪਿੰਡ ਖੋਖੜ ਵਿਖੇ ਨਾੜ ਤੋਂ ਸ਼ੁਰੂ ਹੋਈ ਅੱਗ ਭੜਕ ਗਈ ਅਤੇ ਦੇਖਦੇ ਹੀ ਦੇਖਦੇ ਉਸਨੇ ਨੇੜੇ ਖੜੀ ਕਣਕ ਦੀ ਪੂਰੀ ਤਰਹਾਂ ਨਾਲ ਪੱਕੀ ਫਸਲ ਨੂੰ ਵੀ ਚਪੇਟ ਵਿੱਚ ਲੈ ਲਿਆ । ਹਾਲਾਂਕਿ ਅੱਗ ਦੇ ਕਾਰਨਾਂ ਦਾ ਤਾਂ ਪਤਾ ਨਹੀਂ ਲੱਗਿਆ ਪਰ ਪਿੰਡ੍ਰ ਵਿਚ ਜਿਹਨੂੰ ਜਿਹਨੂੰ ਪਤਾ ਲੱਗਦਾ ਗਿਆ ਉਹ ਖੇਤਾਂ ਵੱਲ ਦੌੜਦਾ ਗਿਆ।
ਕਿਸੇ ਨੇ ਬਾਲਟੀਆਂ ਭਰ ਭਰ ਲਿਆਉਣੀਆਂ ਸ਼ੁਰੂ ਕਰ ਦਿੱਤੀਆਂ ਤੇ ਕੋਈ ਟਰੈਕਟਰ ਪਿੱਛੇ ਹੱਲ ਤੇ ਕੋਈ ਤਵੇ ਪਾ ਕੇ ਲੈ ਆਇਆ ਤੇ ਅੱਗ ਦੇ ਵਿੱਚ ਵੜ ਕੇ ਵਾਹੁਣਾ ਸ਼ੁਰੂ ਕਰ ਦਿੱਤਾ। ਕੁਝ ਹੀ ਦੇਰ ਬਾਅਦ ਗੁਰਦਾਸਪੁਰ ਤੋਂ ਫਾਇਰ ਬ੍ਰਿਗੇਡ ਦੀਆਂ ਦੋ ਗੱਡੀਆਂ ਵੀ ਮੌਕੇ ਤੇ ਪਹੁੰਚੀਆਂ ਤੇ ਅੱਗ ਨੂੰ ਜਿਆਦਾ ਫੈਲਣ ਤੋਂ ਰੋਕਣ ਵਿੱਚ ਕਾਮਯਾਬੀ ਹਾਸਲ ਹੋ ਗਈ। ਪਰ ਫਿਰ ਵੀ ਦੋ ਕਿੱਲੇ ਦੇ ਕਰੀਬ ਕਣਕ ਸੜ ਕੇ ਸਵਾਹ ਹੋ ਗਈ ਸੀ ਜਬਕਿ ਸਾਢੇ ਚਾਰ ਕਿੱਲੇ ਦੇ ਕਰੀਬ ਨਾੜ ਵੀ ਸੜ ਕੇ ਸੁਆਹ ਹੋ ਗਿਆ ਜਿਸ ਤੋਂ ਤੂੜੀ ਬਣਨੀ ਸੀ।
ਪਿੰਡ ਦੇ ਸਰਪੰਚ ਹਰਜੰਤ ਸਿੰਘ ਦਾ ਕਹਿਣਾ ਹੈ ਕਿ ਪੀੜਿਤ ਕਿਸਾਨ ਸੰਤੋਖ ਸਿੰਘ ਢਾਈ ਕਿੱਲੇ ਜ਼ਮੀਨ ਦਾ ਮਾਲਕ ਹੈ ਜਿਸ ਵਿੱਚੋਂ ਦੋ ਕਿੱਲੇ ਦੇ ਕਰੀਬ ਕਣਕ ਪੂਰੀ ਤਰ੍ਹਾਂ ਨਾਲ ਸੜ ਗਈ ਹੈ ਅਤੇ ਉਸ ਦਾ ਟਰੈਕਟਰ ਅਤੇ ਉਹ ਆਪ ਵੀ ਬਾਕੀ ਦੀ ਕਣਕ ਨੂੰ ਬਚਾਉਣ ਦੇ ਬਚਾਉਂਦੇ ਮਸਾ ਸੜਨੋਂ ਬਚਿਆ ਹੈ। ਮੌਕੇ ਤੇ ਪਟਵਾਰੀ ਜਾਇਜਾ ਲੈਣ ਪਹੁੰਚੇ ਸੀ। ਪੀੜਿਤ ਕਿਸਾਨ ਨੂੰ ਨੁਕਸਾਨ ਦਾ ਯੋਗ ਮੁਆਵਜਾ ਮਿਲਣਾ ਚਾਹੀਦਾ ਹੈ।