ਜਾਅਲੀ ਵੀਜ਼ਾ ਕੈਂਸਿਲ ਚਿੱਠੀਆਂ: ‘‘ਅੱਖਾਂ ਅਜੇ ਚਮਕੀਆਂ ਨਹੀਂ ਤੇ ਅੱਖੀਂ ਘੱਟਾ ਪਾਉਣ ਵਾਲੇ ਆ ਗਏ’’- ਖੁਦ ਕਰੋ ਚੈਕ
-ਹਰਜਿੰਦਰ ਸਿੰਘ ਬਸਿਆਲਾ-
ਔਕਲੈਂਡ, 30 ਜਨਵਰੀ 2025:-ਇਕ ਸਮਾਂ ਸੀ ਜਦੋਂ ਜਾਅਲੀ ਵੀਜ਼ਾ ਮੰਜ਼ੂਰ ਹੋਣ ਵਾਲੀਆਂ ਚਿੱਠੀਆਂ ਦਾ ਨਾਂਅ ਲੈ ਕੇ ਅੱਖਾਂ ਵਿਚ ਚਮਕ ਪੈਦਾ ਕੀਤੀ ਜਾਂਦੀ ਸੀ ਜਾਂ ਜਾਅਲੀ ਵੀਜ਼ਾ ਵਿਖਾ ਕੇ ਧੋਖਾਧੜੀ ਵਾਲੇ ਆਪਣਾ ਕਾਰਾ ਕਰ ਜਾਂਦੇ ਸਨ, ਹੁਣ ਉਨ੍ਹਾਂ ਨੇ ਦੂਜਾ ਰਸਤਾ ਲੱਭਦਿਆਂ ਵੀਜ਼ਾ ਕੈਂਸਿਲ ਵਾਲੀਆਂ ਚਿੱਠੀਆਂ ਦਾ ਸਹਾਰਾ ਲੈ ਕੇ ਧੋਖਾਧੜੀ ਕਰਨ ਦਾ ਰਾਹ ਲੱਭਿਆ ਹੈ। ਯਾਤਰਾ ਨਾਲ ਸਬੰਧਿਤ ਇਕ ਸ਼ੋਸ਼ਲ ਮੀਡੀਆ ਸਫ਼ੇ ਉਤੇ ਕਿਸ ਨੇ ਇਸ ਨਕਲੀ ਚਿੱਠੀ ਬਾਰੇ ਲਿਖਿਆ ਹੈ ਜਿਸ ਦੇ ਵਿਚ ਨਿਊਜ਼ੀਲੈਂਡ ਇਮੀਗ੍ਰੇਸ਼ਨ ਦਾ ਲੋਗੋ, ਗਾਹਕ ਨੰਬਰ, ਅਰਜ਼ੀ ਨੰਬਰ ਆਦਿ ਸ਼ਾਮਿਲ ਕੀਤਾ ਗਿਆ ਹੈ। ‘ਤੁਹਾਡਾ ਵੀਜ਼ਾ ਕੈਂਸਲ ਕਰ ਦਿੱਤਾ ਗਿਆ ਹੈ’’ ਵਾਲੇ ਸ਼ਬਦਾਂ ਨਾਲ ਲਿਖੀ ਚਿੱਠੀ ਨਿਊਜ਼ੀਲੈਂਡ ਦੀ ਯਾਤਰਾ ਦੀ ਯੋਜਨ ਬਣਾ ਰਹੇ ਵਿਦੇਸ਼ੀ ਸੈਲਾਨੀਆਂ ਨੂੰ ਆ ਰਹੀ ਹੈ, ਜੋ ਕਿ ਧੋਖਾਧੜੀ ਦਾ ਇਕ ਰੂਪ ਹੈ। ਇਸ ਚਿੱਠੀ ਦੇ ਵਿਚ ਲਿਖਿਆ ਜਾਂਦਾ ਹੈ ਕਿ ਤੁਹਾਡਾ ਪ੍ਰਵਾਨਿਤ ਵੀਜ਼ਾ ਰੱਦ ਕਰ ਦਿੱਤਾ ਗਿਆ ਹੈ।
ਪੱਤਰ ਵਿਚ ਇਹ ਵੀ ਲਿਖਿਆ ਗਿਆ ਹੈ ਕਿ “ਨਿਊਜ਼ੀਲੈਂਡ ਦੀ ਯਾਤਰਾ ਦੀ ਕੋਸ਼ਿਸ਼ ਨਾ ਕਰੋ’’। ਚਿੱਠੀ ਵਿੱਚ ਚੇਤਾਵਨੀ ਦਿੱਤੀ ਜਾਂਦੀ ਹੈ ਕਿ ‘‘ਤੁਹਾਡਾ ਵੀਜ਼ਾ ਮਨਜ਼ੂਰ ਹੋ ਗਿਆ ਸੀ, ਪਰ ਬਾਅਦ ਵਿੱਚ ਭਰੋਸਾ ਜਾਂਚਾਂ ਨੇ ਸਾਡੇ ਲਈ ਚਿੰਤਾਵਾਂ ਪੈਦਾ ਕੀਤੀਆਂ, ਜਿਸ ਕਾਰਨ ਇਹ ਵੀਜ਼ਾ ਕੈਂਸਿਲ ਕਰ ਦਿੱਤਾ ਗਿਆ ਹੈ। ਤੁਸੀਂ ਆਪਣੇ ਵਿਜ਼ਟਰ ਵੀਜ਼ਾ ’ਤੇ ਨਿਊਜ਼ੀਲੈਂਡ ਦੀ ਯਾਤਰਾ ਨਹੀਂ ਕਰ ਸਕਦੇ ਜਦੋਂ ਤੱਕ ਸਾਡੀਆਂ ਚਿੰਤਾਵਾਂ ਦਾ ਹੱਲ ਨਹੀਂ ਹੋ ਜਾਂਦਾ। ਵਾਧੂ ਜਾਣਕਾਰੀ ਲਈ ਪ੍ਰਾਪਤਕਰਤਾ ਨਾਲ ਸੰਪਰਕ ਕੀਤਾ ਜਾ ਸਕਦਾ ਹੈ’’।
ਇੰਝ ਲਗਦਾ ਹੈ ਕਿ ਜਿਵੇਂ ਵੀਜ਼ਾ ਮਿਲਣ ਉਤੇ ਚਮਕਣ ਵਾਲੀਆਂ ਅੱਖਾਂ ਦੇ ਵਿਚ ਘੱਟਾ ਪਾਉਣ ਵਾਲੇ ਜਿਵੇਂ ਕਿਤੇ ਨਾ ਕਿਤੇ ਘਾਤ ਲਾ ਕੇ ਬੈਠੇ ਰਹਿੰਦੇ ਹਨ ਅਤੇ ਮੌਕਾ ਮਿਲਦਿਆਂ ਹੀ ਤੁਹਾਨੂੰ ਲੁੱਟਣ ਦੀ ਕੋਸ਼ਿਸ਼ ਕਰਦੇ ਹਨ। ਸੋ ਅਜਿਹੀਆਂ ਚਿੱਠੀਆਂ ਦੇ ਉਤੇ ਵਿਸ਼ਵਾਸ਼ ਕਰਨ ਤੋਂ ਪਹਿਲਾਂ ਇਮੀਗ੍ਰੇਸ਼ਨ ਦੇ ਨਾਲ ਚੈਕ ਕਰ ਲਓ।