ਬਜ਼ੁਰਗ ਪਿਤਾ ਦੀਆਂ ਬੁੱਢੀਆਂ ਅੱਖਾਂ ਤਰਸ ਰਹੀਆਂ ਹਨ ਪੁੱਤ ਦੇ ਅੰਤਿਮ ਦਰਸ਼ਨਾਂ ਨੂੰ
12 ਸਾਲ ਪਹਿਲਾਂ ਕਰਜਾ ਚੁੱਕ ਕੇ ਭੇਜਿਆ ਸੀ ਪੁੱਤ ਵਿਦੇਸ਼, ਮਸ਼ੀਨ ਚ ਦੱਬਣ ਕਾਰਨ ਹੋਈ ਮੌਤ,
ਮਦਦ ਦੀ ਲਗਾ ਰਿਹਾ ਗੁਹਾਰ
ਰੋਹਿਤ ਗੁਪਤਾ
ਗੁਰਦਾਸਪੁਰ : ਬਟਾਲਾ ਦੇ ਰਹਿਣ ਵਾਲੇ ਵਰੁਣ ਸ਼ੈਲੀ ਦਾ ਵਿਦੇਸ਼ੀ ਧਰਤੀ ਇਟਲੀ ਵਿੱਚ ਕੰਮ ਦੌਰਾਨ ਮਸ਼ੀਨ ਚ ਦੱਬਣ ਕਾਰਨ ਮੌਤ ਹੋ ਜਾਣ ਦੀ ਦੁੱਖਦ ਖਬਰ ਸਾਹਮਣੇ ਆਈ ਹੈ। ਮ੍ਰਿਤਕ ਦੀ ਉਮਰ 40 ਸਾਲ ਦੇ ਕਰੀਬ ਦੱਸੀ ਜਾ ਰਹੀ ਹੈ ।ਬਜ਼ੁਰਗ ਪਿਤਾ ਤੇ ਪਰਿਵਾਰਕ ਮੈਬਰਾਂ ਨੇ ਹੰਜੂਆ ਭਰੀਆਂ ਅੱਖਾਂ ਨਾਲ ਦੱਸਿਆ ਕਿ ਉਹਨਾਂ ਨੇ 12 ਸਾਲ ਪਹਿਲਾਂ 7 ਲੱਖ ਦਾ ਕਰਜ਼ਾ ਚੁੱਕ ਕੇ ਵਰੁਣ ਨੂੰ ਇਟਲੀ ਭੇਜਿਆ ਸੀ। ਓਹਨਾ ਅੱਗੇ ਦੱਸਿਆ ਕਿ ਉਥੇ ਉਸਦਾ ਕੰਮ ਵੀ ਸੈੱਟ ਹੋ ਚੁੱਕਿਆ ਸੀ ਅਕਸਰ ਹੀ ਉਹ ਭਾਰਤ ਆਉਂਦਾ ਰਹਿੰਦਾ ਸੀ ।ਵਰੁਣ ਦੀ ਮਾਤਾ ਪਿਛਲੇ ਸਾਲ ਸੁਵਰਗਵਾਸ ਹੋ ਗਏ ਸਨ। ਇਸ ਸਾਲ ਵੀ ਉਹ ਪਿਤਾ ਨੂੰ ਮਿਲਣ ਭਾਰਤ ਆਇਆ ਸੀ ਅਤੇ ਮਾਰਚ 17 ਨੂੰ ਵਾਪਸ ਇਟਲੀ ਗਿਆ ਸੀ ਅਤੇ ਅਪ੍ਰੈਲ 8 ਨੂੰ ਇਹ ਦੁੱਖ ਭਰੀ ਖਬਰ ਮਿਲ ਗਈ ਕਿ ਓਥੇ ਕੰਮ ਕਰਦੇ ਸਮੇਂ ਮਸ਼ੀਨ ਚ ਦੱਬ ਜਾਣ ਕਾਰਨ ਵਰੁਣ ਦੀ ਮੌਤ ਹੋ ਗਈ ਹੈ। ਵਰੁਣ ਆਪਣੇ ਪਿਤਾ ਦਾ ਇਕਲੌਤਾ ਸਹਾਰਾ ਸੀ। ਪਰਿਵਾਰ ਤੇ ਬਜੁਰਗ ਪਿਤਾ ਹੁਣ ਸਰਕਾਰ ਕੋਲ ਗੁਹਾਰ ਲਗਾ ਰਹੇ ਹਨ ਕਿ ਵਰੁਣ ਦੀ ਮ੍ਰਿਤਕ ਦੇਹ ਭਾਰਤ ਲਿਆ ਕੇ ਉਸਦੇ ਪਰਿਵਾਰ ਨੂੰ ਸੋਂਪੀ ਜਾਵੇ ਤਾਂਕਿ ਵਰੁਣ ਦੇ ਆਖਰੀ ਦਰਸ਼ਨ ਕਰ ਸਕਣ ਅਤੇ ਉਸਦੀ ਦੀਆਂ ਅੰਤਿਮ ਰਸਮਾਂ ਪੂਰਨ ਕੀਤੀਆਂ ਜਾ ਸਕਣ ।