ਉਹ ਕੁੜੀ-ਅਮਰਜੀਤ ਟਾਂਡਾ
ਉਹ ਕੁੜੀ
ਫੁੱਲਾਂ ਨੂੰ ਮਹਿਕਣਾ ਸਿਖਾਉਂਦੀ
ਪੰਛੀਆਂ ਨੂੰ
ਉੱਚੀਆਂ ਉਡਾਣਾਂ ਭਰਨਾ ਦੱਸਦੀ
ਆਪਣੇ ਸਤਰੰਗੇ ਦੁਪੱਟੇ ਨੂੰ ਲਹਿਰਾ ਸਾਗਰਾਂ ਦੀ ਭੁੱਖ ਮਿਟਾਉਂਦੀ
ਠਰੇ ਬਰਫੀਲੇ ਪ੍ਰਬਤਾਂ ਨੂੰ
ਆਪਣੀ ਧੁਖ਼ਦੀ ਹਿੱਕ ਚੋਂ ਨਿੱਘ ਵੰਡਦੀ
ਸੱਜਰੀ ਸਵੇਰ ਵਿਛਦੀ
ਤਾਂ ਤ੍ਰੇਲ ਤੁਪਕਿਆਂ ਨੂੰ
ਮੁਸਕਰਾਹਟਾਂ ਦੀ ਭਾਸ਼ਾ ਦੱਸਦੀ
ਰੰਗ ਖਲਾਰਦੀ ਪਹਿਲੀਆਂ ਰਿਸ਼ਮਾਂ ਨੂੰ ਲੈ ਕੇ
ਪੰਛੀਆਂ ਨੂੰ ਉੱਚੀਆਂ ਉਡਾਣਾਂ
ਭਰਨ ਲਈ
ਅਸਮਾਨ ਦੀ ਨੀਲੀ ਚਾਦਰ
ਖੋਲ੍ਹ ਕੇ ਦਿੰਦੀ
ਕੁੜੀ ਕਾਲੀਆਂ ਰਾਤਾਂ ਦੀਆਂ
ਤਰੰਗਾਂ ਵਿੱਚ
ਨਵੇਂ ਸੁਪਨਿਆਂ ਦੀ ਕਸ਼ੀਦਗੀ ਕਰ ਦੇਵੇ
ਅੱਲ੍ਹੜ ਮੁਟਿਆਰ
ਕੀ ਕੀ ਨਾ ਕਰਦੀ
ਤਿੱਖੀਆਂ ਨਜ਼ਰਾਂ ਨਾਲ
ਉਹ ਕੁਆਰੀਆਂ ਪੌਣਾਂ ਨੂੰ
ਉਹਨਾਂ ਦੇ ਰਾਜ਼ ਪੁੱਛਦੀ ਆਪਣੇ ਸਮਝਾਉਂਦੀ
ਨਦੀਏ ਨਹਾ
ਆਪਣੇ ਭਿੱਜੇ ਕੇਸ ਛੰਡਦੀ
ਤਾਂ ਬੱਦਲਾਂ ਨੂੰ ਕਾਲੀਆਂ ਘੋਰ ਘਟਾਵਾਂ ਨਸੀਬ ਹੁੰਦੀਆਂ
ਉਹਦੀ ਇੱਕ ਇੱਕ ਤੱਕਣੀ
ਸਮੁੰਦਰਾਂ ਦੀ ਗਹਿਰਾਈ ਮਿਣਦੀ
ਨਖ਼ਰਿਆਂ ਚ ਘੁਲੀ ਮੁਹੱਬਤ
ਗੱਭਰੂਆਂ ਦੇ ਸਾਹ ਗਿਣਦੀ
ਰੁੱਖਾਂ ਦੀਆਂ ਉਦਾਸੀਆਂ ਖੋਰਦੀ
ਉਹਦੇ ਨਰਮ ਪੋਟਿਆਂ ਦੀ ਹਰੇਕ ਛੋਹ
ਚੰਦ ਤਾਰਿਆਂ ਨੂੰ
ਉਹ ਆਪਣੇ ਅਣਛੁਹੇ ਅੰਗਾਂ ਚੋਂ ਅੰਗੜਾਈਆਂ ਬਖਸ਼ਦੀ
ਦਿਨ ਚੜਦੇ ਚਿੱਟੇ
ਉਹਦੇ ਹੱਸਦੇ ਦੰਦਾਂ ਨੂੰ ਦੇਖ ਦੇਖ
ਸਮੇਂ ਦੀ ਰਫ਼ਤਾਰ ਮਾਪਦੀ
ਨਦੀਆਂ ਦੀਆਂ ਲਹਿਰਾਂ ਦੇ ਸੰਤਾਪ ਸੁਣਦੀ
ਉਹਦੀ ਟੋਰ ਦੇਖ ਕੇ
ਅੰਬਰ ਵੀ ਝੁਕ ਜਾਵੇ
ਉਸਦਾ ਖਿੜ ਖਿੜ ਹੱਸਣਾ
ਪਿੰਡ ਨੂੰ ਜਾਂਦੇ ਰਾਹ ‘ਤੇ ਵੱਜਦਾ ਸ਼ਹਿਨਾਈ ਦਾ ਪਹਿਲਾ ਸੁਰ ਬਣਦਾ
ਕੁੜੀ ਮੁਸਕਰਾਹਟਾਂ ਨੂੰ ਅਰਥ ਦਿੰਦੀ
ਕਦਮਾਂ ਨਾਲ ਚੱਲਣ ਲਈ ਕਹਿੰਦੀ
ਮੌਸਮਾਂ ਦੇ ਮੱਥੇ ਤੇ
ਉਹਨਾਂ ਦੀ ਤਕਦੀਰ ਲਿਖਦੀ
ਧੁੱਪ ਦੇ ਤਿੱਖੇ ਤੀਰਾਂ ਨੂੰ
ਹੌਸਲੇ ਦੀ ਛਾਂ ਕਰਦੀ
ਉਹ ਹਨ੍ਹੇਰੀਆਂ ਨੂੰ ਨੱਚਣਾ ਸਿਖਾਵੇ
ਅਰਸ਼ੀ ਬਿਜ਼ਲੀਆਂ ਨੂੰ ਫ਼ੜ ਕੇ
ਰਾਤਾਂ ਚ ਵਿਯੋਗੇ ਦੀਵੇ ਜਗਾਵੇ
ਮਾਰੂਥਲੀ ਰੇਤਾ ਚ
ਚੁੱਪ ਬੀਜ਼ ਜਾਵੇ
ਸੁੰਨੇ ਸੀਨਿਆਂ ਚ
ਸਾਹਾਂ ਚੋਂ ਧੜਕਣਾਂ ਪਾਵੇ
”ਸੰਪਰਕ +61 412913021
ਅੰਤਰਰਾਸ਼ਟਰੀ ਪੱਧਰ ਦੇ ਪ੍ਰਸਿੱਧ ਕੀਟ ਵਿਗਿਆਨੀ ਦੇ ਖੇਤੀ ਮਾਹਰ
-
ਅਮਰਜੀਤ ਟਾਂਡਾ, ਅੰਤਰਰਾਸ਼ਟਰੀ ਪੱਧਰ ਦੇ ਪ੍ਰਸਿੱਧ ਕੀਟ ਵਿਗਿਆਨੀ ਦੇ ਖੇਤੀ ਮਾਹਰ
drtanda193@gmail.com
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.