ਮਨੀਸ਼ ਤਿਵਾੜੀ ਨੇ ਸਿਡਨੀ ਵਿੱਚ ਆਸਟ੍ਰੇਲੀਆ–ਭਾਰਤ ਰਣਨੀਤਿਕ ਸੰਵਾਦ ਵਿੱਚ ਕੀਤੀ ਸ਼ਿਰਕਤ

ਪ੍ਰਮੋਦ ਭਾਰਤੀ 

   ਸਿਡਨੀ 18 ਮਈ,2026

 ਸਾਬਕਾ ਕੇਂਦਰੀ ਸੂਚਨਾ ਤੇ ਪ੍ਰਸਾਰਣ ਮੰਤਰੀ ਅਤੇ ਚੰਡੀਗੜ੍ਹ ਤੋਂ ਸੰਸਦ ਮੈਂਬਰ ਮਨੀਸ਼ ਤਿਵਾੜੀ ਨੇ ਅੱਜ ਸਿਡਨੀ ਵਿੱਚ ਸ਼ੁਰੂ ਹੋਏ ਦੋ ਦਿਨਾਂ ਪਹਿਲੇ ਆਸਟ੍ਰੇਲੀਆ–ਭਾਰਤ ਟਰੈਕ 1.5 ਰਣਨੀਤਿਕ ਸੰਵਾਦ ਵਿੱਚ ਹਿੱਸਾ ਲਿਆ। ਇਸ ਸੰਵਾਦ ਦੌਰਾਨ ਸਰਕਾਰ, ਉਦਯੋਗ ਅਤੇ ਅਕਾਦਮਿਕ ਖੇਤਰ ਦੇ ਆਗੂਆਂ ਨੇ ਵਪਾਰ, ਨਿਵੇਸ਼, ਆਰਥਿਕ ਮਜ਼ਬੂਤੀ ਅਤੇ ਆਸਟ੍ਰੇਲੀਆ–ਭਾਰਤ ਰਣਨੀਤਿਕ ਭਾਗੀਦਾਰੀ ਦੇ ਭਵਿੱਖ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ।

ਆਸਟ੍ਰੇਲੀਆ ਦੇ ਵਿਦੇਸ਼ ਮਾਮਲੇ ਅਤੇ ਵਪਾਰ ਵਿਭਾਗ ਵੱਲੋਂ ਸਟ੍ਰੈਟਜਿਕ ਐਂਡ ਟੈਕਨੋਲੋਜੀ ਪਾਲਿਸੀ ਇਨੀਸ਼ੀਏਟਿਵ (ਐੱਸਏਟੀਪੀਆਈ) ਰਾਹੀਂ ਅਤੇ ਭਾਰਤ ਦੇ ਵਿਦੇਸ਼ ਮੰਤਰਾਲੇ ਦੇ ਸਹਿਯੋਗ ਨਾਲ ਆਯੋਜਿਤ ਇਸ ਆਸਟ੍ਰੇਲੀਆ–ਭਾਰਤ ਟਰੈਕ 1.5 ਰਣਨੀਤਿਕ ਸੰਵਾਦ ਨੇ ਸਾਂਝੀਆਂ ਤਰਜੀਹਾਂ ਨੂੰ ਅੱਗੇ ਵਧਾਉਣ ਅਤੇ ਦੋਪੱਖੀ ਰਣਨੀਤਿਕ ਭਾਗੀਦਾਰੀ ਨੂੰ ਹੋਰ ਮਜ਼ਬੂਤ ਕਰਨ ਲਈ ਇੱਕ ਉੱਚ ਪੱਧਰੀ ਮੰਚ ਵਜੋਂ ਕੰਮ ਕੀਤਾ। ਇਹ ਸੰਵਾਦ ਅਨੰਤਾ ਐਸਪਨ ਸੈਂਟਰ (ਭਾਰਤ) ਦੇ ਸਹਿਯੋਗ ਨਾਲ ਆਯੋਜਿਤ ਕੀਤਾ ਗਿਆ।

ਤਿਵਾੜੀ, ਜਿਹੜੇ ਭਾਰਤ–ਆਸਟ੍ਰੇਲੀਆ ਸੰਸਦੀ ਮਿਤਰਤਾ ਗਰੁੱਪ ਦੇ ਪ੍ਰਧਾਨ ਵੀ ਹਨ, ਨੇ ‘ਭੂ-ਰਾਜਨੀਤੀ ਅਤੇ ਰਣਨੀਤਿਕ ਸੰਤੁਲਨ: ਬਦਲਦੇ ਵਿਸ਼ਵ ਧੁਰਿਆਂ ਦੇ ਦੌਰ ਵਿੱਚ ਭਾਰਤ-ਆਸਟ੍ਰੇਲੀਆ ਦੀਆਂ ਰਣਨੀਤਿਕ ਪ੍ਰਤੀਕਿਰਿਆਵਾਂ’ ਦੇ ਵਿਸ਼ੇ ‘ਤੇ ਹੋਏ ਸੈਸ਼ਨ ਦੌਰਾਨ ਵਿਸਥਾਰ ਨਾਲ ਆਪਣੇ ਵਿਚਾਰ ਪ੍ਰਗਟ ਕੀਤੇ। ਤਿਵਾੜੀ ਨੇ ਕਿਹਾ ਕਿ ਇਸ ਪਹਿਲੇ ਸੰਵਾਦ ਦਾ ਕੇਂਦਰ ਆਸਟ੍ਰੇਲੀਆ–ਭਾਰਤ ਆਰਥਿਕ ਅਤੇ ਵਪਾਰਕ ਸਬੰਧਾਂ ਨੂੰ ਮਜ਼ਬੂਤ ਕਰਨਾ ਸੀ, ਜਿਸ ਵਿੱਚ ‘ਭਾਰਤ ਨਾਲ ਆਸਟ੍ਰੇਲੀਆ ਦੀ ਆਰਥਿਕ ਭਾਗੀਦਾਰੀ ਲਈ ਨਵੇਂ ਰੋਡਮੈਪ’ ਨੂੰ ਅਮਲੀ ਰੂਪ ਦੇਣ ਉੱਤੇ ਖਾਸ ਜ਼ੋਰ ਦਿੱਤਾ ਗਿਆ।

ਤਿਵਾੜੀ ਦੀ ਸ਼ਮੂਲੀਅਤ ਨੇ ਭਾਰਤ ਦੇ ਸੰਸਦੀ ਅਤੇ ਨੀਤੀਗਤ ਦ੍ਰਿਸ਼ਟੀਕੋਣ ਨੂੰ ਉਭਾਰਿਆ ਹੈ, ਜਿਸ ਵਿੱਚ ਵਿਸ਼ਵ ਪੱਧਰੀ ਅਸਥਿਰਤਾ ਅਤੇ ਖੇਤਰੀ ਭਾਗੀਦਾਰੀਆਂ ਵਿਚਕਾਰ ਸੰਤੁਲਨ ਬਣਾਈ ਰੱਖਣ ਦੀ ਲੋੜ ‘ਤੇ ਜ਼ੋਰ ਦਿੱਤਾ ਗਿਆ। ਉਨ੍ਹਾਂ ਨੇ ਭਾਰਤ ਅਤੇ ਆਸਟ੍ਰੇਲੀਆ ਵਿਚਕਾਰ ਚੀਨ ਦੀ ਵਧ ਰਹੀ ਦਖਲਅੰਦਾਜ਼ੀ ਦਾ ਮੁਕਾਬਲਾ ਕਰਨ, ਇੰਡੋ-ਪੈਸਿਫਿਕ ਖੇਤਰ ਦੀ ਮਜ਼ਬੂਤੀ ਅਤੇ ਭਰੋਸੇਯੋਗ ਤਕਨਾਲੋਜੀਆਂ ਅਤੇ ਸਾਫ਼ ਊਰਜਾ ਖੇਤਰ ਵਿੱਚ ਸਹਿਯੋਗ ਨੂੰ ਅੱਗੇ ਵਧਾਉਣ ਸਬੰਧੀ ਸਾਂਝੇ ਦ੍ਰਿਸ਼ਟੀਕੋਣ ਨੂੰ ਰੋਸ਼ਨ ਕੀਤਾ। ਸੰਵਾਦ ਦੌਰਾਨ ਵਿਆਪਕ ਰਣਨੀਤਿਕ ਭਾਗੀਦਾਰੀ, ਆਪਸੀ ਲਾਜਿਸਟਿਕ ਸਹਾਇਤਾ ਸਮਝੌਤਾ ਅਤੇ ਸਮੁੰਦਰੀ ਸੁਰੱਖਿਆ ਸਹਿਯੋਗ ਵਰਗੇ ਮੌਜੂਦਾ ਢਾਂਚਿਆਂ ਨੂੰ ਵੀ ਮਜ਼ਬੂਤ ਕੀਤਾ ਗਿਆ।

ਸੰਵਾਦ ਦੇ ਪਹਿਲੇ ਦਿਨ ਦੇ ਪਹਿਲੇ ਸੈਸ਼ਨ ਵਿੱਚ ਭਾਰਤ–ਆਸਟ੍ਰੇਲੀਆ ਸੰਬੰਧਾਂ ‘ਤੇ ਚਰਚਾ ਹੋਈ। ਜਦਕਿ ਦੂਜੇ ਸੈਸ਼ਨ ਵਿੱਚ ਭੂ-ਰਾਜਨੀਤੀ ਅਤੇ ਰਣਨੀਤਿਕ ਸੰਤੁਲਨ ‘ਤੇ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਇਸ ਦੌਰਾਨ ਅਮਰੀਕੀ ਟੈਰਿਫ ਨੀਤੀਆਂ, ਚੀਨ ਦੇ ਜਵਾਬੀ ਕਦਮ ਅਤੇ ਮੱਧ-ਪੂਰਬ ਵਿੱਚ ਅਸਥਿਰਤਾ ਕਾਰਨ ਸਪਲਾਈ ਚੇਨਾਂ, ਮਾਰਕੀਟ ਪਹੁੰਚ ਅਤੇ ਆਰਥਿਕ ਸੁਰੱਖਿਆ ਉੱਤੇ ਪੈ ਰਹੇ ਪ੍ਰਭਾਵਾਂ ਦੀ ਸਮੀਖਿਆ ਕੀਤੀ ਗਈ। ਸੈਸ਼ਨ ਦਾ ਕੇਂਦਰ ਇਹ ਸੀ ਕਿ ਭਾਰਤ ਅਤੇ ਆਸਟ੍ਰੇਲੀਆ ਨੀਤੀ, ਨਿਵੇਸ਼ ਅਤੇ ਕੂਟਨੀਤੀ ਰਾਹੀਂ ਕਿਵੇਂ ਸਾਂਝੇ ਤੌਰ ‘ਤੇ ਖਤਰਿਆਂ ਨੂੰ ਘਟਾ ਸਕਦੇ ਹਨ ਅਤੇ ਚੁਣੌਤੀਆਂ ਨੂੰ ਭਾਗੀਦਾਰੀ-ਅਧਾਰਿਤ ਸਹਿਯੋਗ ਵਿੱਚ ਬਦਲ ਸਕਦੇ ਹਨ। ਤੀਜੇ ਸਵੇਰੇ ਦੇ ਪੈਨਲ ਵਿੱਚ ਵਪਾਰ ਅਤੇ ਨਿਵੇਸ਼ ‘ਤੇ ਚਰਚਾ ਹੋਈ, ਜਿਸ ਵਿੱਚ ਆਰਥਿਕ ਸਹਿਯੋਗ ਅਤੇ ਵਪਾਰ ਸਮਝੌਤੇ ਅਤੇ ਚੱਲ ਰਹੀਆਂ ਸੀਈਸੀਏ ਵਾਰਤਾਵਾਂ ਨੂੰ ਵਪਾਰਕ ਤੌਰ ‘ਤੇ ਲਾਭਕਾਰੀ ਪ੍ਰਾਜੈਕਟਾਂ, ਦੋਪੱਖੀ ਨਿਵੇਸ਼ ਵਾਧੇ ਅਤੇ ਨਿਯਮਕ ਸਹਿਮਤੀ ਵਿੱਚ ਤਬਦੀਲ ਕਰਨ ‘ਤੇ ਵਿਚਾਰ ਕੀਤਾ ਗਿਆ। ਇਸ ਦੌਰਾਨ ਸਾਫ਼ ਊਰਜਾ, ਡਿਜ਼ਿਟਲ ਵਪਾਰ, ਅਹਿਮ ਖਣਿਜ ਅਤੇ ਉੱਚ ਪੱਧਰੀ ਨਿਰਮਾਣ ਖੇਤਰਾਂ ‘ਤੇ ਖਾਸ ਧਿਆਨ ਦਿੱਤਾ ਗਿਆ।

ਦੁਪਹਿਰ ਸਮੇਂ ਬੰਦ ਦਰਵਾਜ਼ਿਆਂ ਪਿੱਛੇ ਹੋਏ ਸੈਸ਼ਨਾਂ ਵਿੱਚ ਦੋਪੱਖੀ ਸਹਿਯੋਗ ਦੇ ਖਾਸ ਖੇਤਰਾਂ ‘ਤੇ ਚਰਚਾ ਕੀਤੀ ਗਈ। ਪਹਿਲਾ ਸੈਸ਼ਨ ਅਹਿਮ ਖਣਿਜਾਂ ‘ਤੇ ਕੇਂਦਰਿਤ ਸੀ, ਜਿਸ ਵਿੱਚ ਆਸਟ੍ਰੇਲੀਆ ਵਿੱਚ ਬੈਟਰੀਆਂ ਅਤੇ ਸਾਫ਼ ਊਰਜਾ ਲਈ ਪ੍ਰੋਸੈਸਿੰਗ ਅਤੇ ਰਿਫਾਈਨਿੰਗ ਖੇਤਰ ਵਿੱਚ ਭਾਰਤੀ ਕੰਪਨੀਆਂ ਦੀ ਵਧਦੀ ਦਿਲਚਸਪੀ, ਸਾਂਝੇ ਉਪਰਾਲਿਆਂ ਅਤੇ ਤਕਨਾਲੋਜੀ ਸਹਿਯੋਗ ‘ਤੇ ਚਰਚਾ ਹੋਈ। ਦੂਜੇ ਸੈਸ਼ਨ ਵਿੱਚ ਊਰਜਾ ਸੁਰੱਖਿਆ ‘ਤੇ ਗੱਲਬਾਤ ਹੋਈ, ਜਿਸ ਵਿੱਚ ਕੱਚੇ ਤੇਲ ਅਤੇ ਐਲਪੀਜੀ ਸਪਲਾਈ ਚੇਨਾਂ ਦੀ ਮਜ਼ਬੂਤੀ ਲਈ ਲੰਬੇ ਸਮੇਂ ਦੀਆਂ ਵਿਵਸਥਾਵਾਂ, ਸਟੋਰੇਜ ਅਤੇ ਲਾਜਿਸਟਿਕ ਸਹਿਯੋਗ ਦੇ ਅਮਲੀ ਤਰੀਕਿਆਂ ਦੀ ਪੜਤਾਲ ਕੀਤੀ ਗਈ। ਜਦਕਿ ਤੀਜੇ ਸੈਸ਼ਨ ਵਿੱਚ ਲੋਕਾਂ, ਹੁਨਰਾਂ ਅਤੇ ਭਾਗੀਦਾਰੀਆਂ ‘ਤੇ ਧਿਆਨ ਦਿੱਤਾ ਗਿਆ, ਜਿਸ ਵਿੱਚ ਟੈਲੈਂਟ ਦੇ ਆਦਾਨ-ਪ੍ਰਦਾਨ, ਸਿੱਖਿਆ ਸੰਬੰਧ, ਪਰਵਾਸੀ ਉਦਯੋਗਪਤੀ ਅਤੇ ਸਾਂਝੇ ਖੋਜ ਤੇ ਵਿਕਾਸ ਉਪਰਾਲਿਆਂ ਰਾਹੀਂ ਆਰਥਿਕ ਸਹਿਯੋਗ ਦੇ ਅਗਲੇ ਪੜਾਅ ਨੂੰ ਮਜ਼ਬੂਤ ਕਰਨ ਬਾਰੇ ਵਿਚਾਰ ਕੀਤਾ ਗਿਆ। ਦਿਨ ਦਾ ਸਮਾਪਨ ਇੱਕ ਆਧਿਕਾਰਿਕ ਡਿਨਰ ਅਤੇ ਨੈੱਟਵਰਕਿੰਗ ਸਮਾਗਮ ਨਾਲ ਹੋਇਆ, ਜਿਸਨੇ ਟਰੈਕ 1.5 ਫਾਰਮੈਟ ਦੀ ਰਣਨੀਤਿਕ ਚਰਚਾ ਅਤੇ ਸੰਬੰਧ ਮਜ਼ਬੂਤੀ ਦੇ ਮਿਲੇ-ਜੁਲੇ ਰੂਪ ਨੂੰ ਦਰਸਾਇਆ।

ਆਧਿਕਾਰਿਕ ਸੈਸ਼ਨਾਂ ਤੋਂ ਇਲਾਵਾ, ਤਿਵਾੜੀ ਨੇ ਸਿਡਨੀ ਵਿੱਚ ਇੰਡੀਅਨ ਓਵਰਸੀਜ਼ ਕਾਂਗਰਸ ਵੱਲੋਂ ਆਯੋਜਿਤ ਪਰਵਾਸੀ ਭਾਰਤੀ ਸਮਾਗਮਾਂ ਵਿੱਚ ਵੀ ਸ਼ਮੂਲੀਅਤ ਕੀਤੀ ਅਤੇ ਸੱਭਿਆਚਾਰਕ ਤੇ ਸਿਆਸੀ ਰਿਸ਼ਤਿਆਂ ਨੂੰ ਹੋਰ ਮਜ਼ਬੂਤ ਕੀਤਾ। ਇਹ ਸੰਵਾਦ ਭਾਰਤ–ਆਸਟ੍ਰੇਲੀਆ ਰਣਨੀਤਿਕ ਸਹਿਯੋਗ ਨੂੰ ਅਮਲੀ ਰੂਪ ਦੇਣ ਵੱਲ ਇੱਕ ਮਹੱਤਵਪੂਰਨ ਕਦਮ ਸਾਬਤ ਹੋਇਆ ਹੈ, ਜਿਹੜਾ ਨੀਤੀਗਤ ਸਹਿਮਤੀ ਤੋਂ ਅੱਗੇ ਵਧਦਿਆਂ ਰੱਖਿਆ, ਤਕਨਾਲੋਜੀ ਅਤੇ ਆਰਥਿਕ ਭਾਗੀਦਾਰੀ ਵਿੱਚ ਵਿਹਾਰਕ ਸਹਿਯੋਗ ਵੱਲ ਕੇਂਦਰਿਤ ਹੈ।

Follow Babushahi Network Channel on WhatsApp