ਟਰੱਕਾਂ ਵੱਲੋਂ ਉਡਾਈ ਜਾਂਦੀ ਧੂੜ ਕਾਰਨ ਪੈਦਾ ਹੁੰਦੇ ਪ੍ਰਦੂਸ਼ਣ ਖਿਲਾਫ ਸ਼ੰਘਰਸ਼ ਦਾ ਐਲਾਨ
ਅਸ਼ੋਕ ਵਰਮਾ
ਬਠਿੰਡਾ,14ਅਗਸਤ 2025: ਸੀਮਿੰਟ ਫੈਕਟਰੀ ਖਿਲਾਫ ਲੜਾਈ ਲੜ ਰਹੀ ਸ਼ੰਘਰਸ਼ ਕਮੇਟੀ ਤਲਵੰਡੀ ਅਕਲੀਆ ਨੇ ਤਲਵੰਡੀ ਸਾਬੋ ਪਾਵਰ ਲਿਮਿਟਡ ਦੇ ਟਰੱਕਾਂ ਅਤੇ ਟਿੱਪਰਾਂ ਵੱਲੋਂ ਉਡਾਈ ਜਾਂਦੀ ਧੂੜ ਅਤੇ ਸਵਾਹ ਕਾਰਨ ਪੈਦਾ ਹੁੰਦੇ ਪ੍ਰਦੂਸ਼ਣ ਖਿਲਾਫ ਸੰਘਰਸ਼ ਦਾ ਐਲਾਨ ਕੀਤਾ ਹੈ। ਸੰਘਰਸ਼ ਕਮੇਟੀ ਦਾ ਕਹਿਣਾ ਹੈ ਕਿ ਇਹ ਸਮੱਸਿਆ ਪ੍ਰਬੰਧਕਾਂ ਦੇ ਧਿਆਨ ’ਚ ਲਿਆਂਦੀ ਗਈ ਸੀ ਪਰ ਮਸਲੇ ਦਾ ਹੱਲ ਨਹੀਂ ਹੋਇਆ ਹੈ। ਆਗੂਆਂ ਨੇ ਕਿਹਾ ਕਿ ਪਿੰਡ ਬਨਾਵਲਾ ਬੱਸ ਸਟੈਂਡ ਤੇ ਖਲੋਣ ਵਾਲੀਆਂ ਸਵਾਰੀਆਂ ਅਤੇ ਦੁਕਾਨਦਾਰ ਇਸ ਸਮੱਸਿਆ ਤੋਂ ਬੁਰੀ ਤਰਾਂ ਪ੍ਰੇਸ਼ਾਨ ਹਨ ਪਰ ਹਾਲੇ ਤੱਕ ਕੋਈ ਸੁਣਵਾਈ ਨਹੀਂ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਇਸ ਕਰਕੇ ਬਣਾਂਵਾਲੀ ਬੱਸ ਸਟੈਂਡ ਤੇ ਦੁਕਾਨਦਾਰਾਂ ਨੇ ਸ਼ੰਘਰਸ਼ ਕਮੇਟੀ ਨਾਲ ਮਿਲ ਕੇ ਇਸ ਮੁੱਦੇ ਨੂੰ ਲਹਿਰ ਬਣਾਉਣ ਦਾ ਪਹਿਲਾ ਕਦਮ ਚੁੱਕਿਆ ਹੈ।
ਸ਼ੰਘਰਸ਼ ਕਮੇਟੀ ਦਾ ਕਹਿਣਾ ਹੈ ਕਿ ਪਲਾਂਟ ਦੇ ਪ੍ਰਦੂਸ਼ਣ ਦਾ ਮਸਲਾ ਨੈਸ਼ਨਲ ਗਰੀਨ ਟ੍ਰਿਬਿਊਨਲ ਕੋਲ ਅਤੇ ਪਰਦੂਸ਼ਣ ਕੰਟਰੋਲ ਬੋਰਡ ਪਟਿਆਲਾ ਸਾਹਮਣੇ ਇਹ ਮੁੱਦਾ ਉਠਾਉਣ ਜਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਜਦੋਂ ਥਰਮਲ ਲਾਇਆ ਸੀ ਤਾਂ ਉਸ ਵਕਤ ਆਖਿਆ ਗਿਆ ਸੀ ਕਿ ਇਹ ਪਾਵਰ ਪਲਾਂਟ ਪਰਦੂਸ਼ਣ ਰਹਿਤ ਹੈ ਅਤੇ ਇਸਦਾ ਦਾ ਕੋਈ ਵੀ ਨਕਾਰਤਮਕ ਪ੍ਰਭਾਵ ਨਹੀਂ ਹੋਵੇਗਾ । ਆਗੂਆਂ ਨੇ ਕਿਹਾ ਕਿ ਇਸ ਦੇ ਉਲਟ ਹੁਣ ਇਸ ਇਲਾਕੇ ਵਿੱਚ ਸਾਹ,ਦਮੇ, ਐਲਰਜੀ ਅਤੇ ਹੋਰ ਭਿਆਨਕ ਰੋਗਾਂ ਦੀ ਗਿਣਤੀ ਲਗਾਤਾਰ ਵਧਦੀ ਜਾ ਰਹੀ ਹੈ। ਸੋ ਸ਼ੰਘਰਸ਼ ਕਮੇਟੀ ਦੇ ਪ੍ਰਧਾਨ ਸੁਖਦੀਪ ਸਿੰਘ, ਮੀਤ ਪ੍ਰਧਾਨ ਗੁਰਮੇਲ ਸਿੰਘ, ਸੈਕਟਰੀ ਮਨਪ੍ਰੀਤ ਸਿੰਘ ਅਤੇ ਮੀਡੀਆ ਇੰਚਾਰਜ ਖੁਸ਼ਵੀਰ ਸਿੰਘ ਦਾ ਕਹਿਣਾ ਹੈ ਕਿ ਪੰਜਾਬ ਸਰਕਾਰ ਇਸ ਸਮੱਸਿਆ ਦਾ ਤੁਰੰਤ ਨੋਟਿਸ ਲਵੇ ਨਹੀਂ ਇਲਾਕਾ ਨਿਵਾਸੀ ਸੰਘਰਸ਼ ਨੂੰ ਤੇਜ ਕਰਨਗੇ।