ਮਾਘੀ ਮੁਬਾਰਕ ਵਾਲਾ ਦਿਨ... ਅੱਜ ਜਨਮ ਦਿਵਸ ਹੈ ਪਿਆਰੇ ਸ਼ਾਇਰ ਸੁਰਜੀਤ ਪਾਤਰ ਜੀ ਦਾ
ਗੁਰਭਜਨ ਗਿੱਲ
ਦੋ ਸਾਲ ਪਹਿਲਾਂ ਤੀਕ ਮੈਂ ਮਾਘ ਦੀ ਸੰਗ੍ਰਾਂਦ ਵਾਲੇ ਦਿਨ ਸਵੇਰੇ ਉੱਠਣ ਸਾਰ ਤਿੰਨ ਫੋਨ ਜਨਮ ਦਿਨ ਮੁਬਾਰਕ ਲਈ ਕਰਦਾ। ਇਨ੍ਹਾਂ ਵਿੱਚੋਂ ਦੇ ਸੁਰਜੀਤ ਸਨ, ਪਾਤਰ ਤੇ ਜੱਜ। ਤੀਸਰਾ ਤ੍ਰੈਲੋਚਨ ਲੋਚੀ ਹੁੰਦਾ ਸੀ। ਪਾਤਰ ਸਾਹਿਬ ਸਦੀਵੀ ਅਲਵਿਦਾ ਕਹਿ ਗਏ।
ਪ੍ਰੋ. ਮੋਹਨ ਸਿੰਘ ਜੀ ਦੀ ਮੌਤ ਉਪਰੰਤ ਜਦ ਪਹਿਲੀ ਸੋਗ ਸਭਾ ਸ. ਜਗਦੇਵ ਸਿੰਘ ਜੱਸੋਵਾਲ ਜੀ ਦੇ ਗੁਰਦੇਵ ਨਗਰ ਸਥਿਤ ਘਰ ਵਿੱਚ ਹੋਈ ਤਾਂ ਸਭ ਨੇ ਬਰਸੀ ਸਮਾਗਮ ਕਰਨ ਦੀ ਸਲਾਹ ਦਿੱਤੀ। ਵੱਡੇ ਪੁਰਖ ਸਨ ਸਲਾਹ ਦੇਣ ਵਾਲੇ। ਸ. ਸੋਹਣ ਸਿੰਘ ਸੀਤਲ, ਲਾਲ ਚੰਦ ਯਮਲਾਜੱਟ, ਨਹਿੰਦਰ ਬੀਬਾ, ਸ ਸ ਨਰੂਲਾ , ਪ੍ਰਿੰਸੀਪਲ ਭਰਪੂਰ ਸਿੰਘ, ਮੁਹੰਮਦ ਸਦੀਕ, ਸੁਰਜੀਤ ਪਾਤਰ ਤੇ ਪ੍ਰਿੰਸੀਪਲ ਤਖ਼ਤ ਸਿੰਘ ਜੀ ਵਰਗੇ ਕਈ ਹੋਰ। ਪ੍ਰਧਾਨਗੀ ਕਰ ਰਹੇ ਪ੍ਰਿੰਸੀਪਲ ਸੰਤ ਸਿੰਘ ਸੇਖੋਂ ਜੀ ਨੇ ਫ਼ੈਸਲਾ ਸੁਣਾਇਆ, “ ਸੂਰਮਿਆਂ ਦੀ ਬਰਸੀ ਮਨਾਈਦੀ ਹੈ ਤੇ ਲਿਖਾਰੀਆਂ ਦੇ ਜਨਮ ਦਿਨ। ਜੱਸੋਵਾਲ ਜੀ ਨੇ ਸਤਿ ਬਚਨ ਕਿਹਾ ਤੇ 20 ਅਕਤੂਬਰ 1978 ਨੂੰ ਮੋਹਨ ਸਿੰਘ ਮੇਲਾ ਇੰਜ ਸ਼ੁਰੂ ਹੋਇਆ।
ਸੁਰਜੀਤ ਪਾਤਰ ਜੀ ਨੇ ਸਭ ਤੋਂ ਲੰਮਾ ਸਮਾਂ ਲੁਧਿਆਣਾ ਵਿੱਚ ਗੁਜ਼ਾਰਿਆ। ਉਹ 1972 ਵਿੱਚ ਪੀ ਏ ਯੂ ਲੁਧਿਆਣਾ ਵਿੱਚ ਰੁਜ਼ਗਾਰ ਲਈ ਆਏ ਤੇ ਇੱਥੇ ਹੀ ਪੂਰਾ ਸਫ਼ਲ ਜੀਵਨ ਗੁਜ਼ਾਰਿਆ।
ਉਨ੍ਹਾਂ ਦੀ ਸੰਗਤ ਮਾਨਣ ਦਾ ਪੰਜਾਬੀ ਸਾਹਿੱਤ ਅਕਾਡਮੀ ਵਿੱਚ ਛੇ ਸਾਲ ਇਕੱਠਿਆਂ ਕੰਮ ਕਰਨ ਦਾ, ਯੂਨੀਵਰਸਿਟੀ ਵਿੱਚ ਵੀ 22 ਸਾਲ ਲਗਾਤਾਰ ਇਕੱਠਿਆਂ ਕੰਮ ਕਰਨ ਦਾ ਮਾਣ ਮੈਨੂੰ ਪ੍ਰਾਪਤ ਹੈ। ਪਰਿਵਾਰਕ ਨੇੜ ਦਾ ਵੱਜਾ ਕਾਰਨ ਸਾਡੇ ਬੱਚੇ ਬਣੇ, ਜੋ ਇਰ ਦੂਜੇ ਦੇ ਸਾਹੀਂ ਜਿਉਂਦੇ ਨੇ।
ਪਾਤਰ ਸਾਹਿਬ ਦੇ ਵਿਛੋੜੇ ਉਪਰੰਤ ਲਿਖੀ ਗ਼ਜ਼ਲ ਉਨ੍ਹਾਂ ਦੇ ਜਨਮ ਦਿਹਾੜੇ ਤੇ ਤੁਹਾਡੇ ਲਈ ਹਾਜ਼ਰ ਹੈ।
ਗੁਰਭਜਨ ਗਿੱਲ
ਗ਼ਜ਼ਲ
ਚੜ੍ਹਦੇ ਸੂਰਜ ਦੇ ਵਿੱਚ ਲੁਕਿਆ, ਕਿੱਧਰ ਸ਼ਬਦ ਸਵਾਰ ਤੁਰ ਗਿਆ।
ਕਦੇ ਕੁਵੇਲਾ ਹੁਣ ਨਹੀਂ ਕਰਦਾ, ਕਰਕੇ ਕੌਲ ਕਰਾਰ ਤੁਰ ਗਿਆ।
ਏਸ ਤਰ੍ਹਾਂ ਤਾਂ ਹੌਕਾ ਵੀ ਨਾ ਹਿੱਕੜੀ ਵਿੱਚੋਂ ਰੁਖ਼ਸਤ ਹੁੰਦਾ,
ਕੋਲ ਪਿਆਂ ਨੂੰ ਮਾਰ ਝਕਾਨੀ, ਚੁੱਪ ਦੀ ਬੁੱਕਲ ਮਾਰ ਤੁਰ ਗਿਆ।
ਅਚਨਚੇਤ ਕਿਸ ਮਾਰਗ ਤੁਰਿਆ, ਪਿੱਛੇ ਛੱਡ ਕੇ ਗੰਧ ਕਸਤੂਰੀ,
ਲੱਭਦੇ ਫਿਰੀਏ ਪੌਣਾਂ ਵਿੱਚੋਂ, ਸਭ ਨੂੰ ਜਿਊਂਦੇ ਮਾਰ ਤੁਰ ਗਿਆ।
ਅਜੇ ਤਾਂ ਉਸਨੇ ਦੱਸਣਾ ਸੀ ਕਿ, ਸਾਥੋਂ ਧਰਤੀ ਕੀ ਚਾਹੁੰਦੀ ਹੈ,
ਸੁਰ ਸ਼ਬਦਾਂ ਦਾ ਵਹਿੰਦਾ ਚਸ਼ਮਾ ਸਰਦ ਖ਼ਾਮੋਸ਼ੀ ਧਾਰ ਤੁਰ ਗਿਆ।
ਲਿਖਤੁਮ ਪਾਤਰ, ਪੜ੍ਹਤੁਮ ਦੁਨੀਆਂ, ਸਗਲ ਸ੍ਰਿਸ਼ਟੀ ਮਾਰ ਕਲਾਵੇ,
ਕਣ ਕਣ ਵਿੱਚੋਂ ਲੱਭਦੇ ਫਿਰੀਏ, ਕਿੱਧਰ ਰੂਹ-ਅਸਵਾਰ ਤੁਰ ਗਿਆ।
ਬੰਸਰੀਆਂ ਦੇ ਛੇਕਾਂ ਅੰਦਰੋਂ, ਹੂਕ ਕਿਸੇ ਦਰਦੀਲੀ ਪੁੱਛਿਆ,
ਹੋਂਠ ਛੁਹਾਇਆਂ ਤੋਂ ਬਿਨ ਸਾਡਾ, ਕਿੱਧਰ ਕ੍ਰਿਸ਼ਨ ਮੁਰਾਰ ਤੁਰ ਗਿਆ।
ਕੋਰੇ ਵਰਕ ਉਡੀਕ ਰਹੇ ਨੇ, ਰੰਗਲੀ ਡਾਇਰੀ ਅੱਥਰੂ ਅੱਥਰੂ,
ਕਲਮ, ਦਵਾਤ ਸਮੇਟ ਪਿਆਰਾ, ਕਿੱਧਰ ਸਿਰਜਣਹਾਰ ਤੁਰ ਗਿਆ।
-
ਗੁਰਭਜਨ ਗਿੱਲ, ਗੁਰਭਜਨ ਗਿੱਲ, ਸੰਪਾਦਕ ( ਲਿਟਰੇਰੀ ) ,ਬਾਬੂਸ਼ਾਹੀ ਡਾਟ ਕਾਮ
gurbhajangill@gmail.com
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.