Canada ਫੈਡਰਲ ਚੋਣਾਂ: ਮਾਰਕ ਕਾਰਨੀ ਮੁੜ ਬਣਗੇ ਕੈਨੇਡਾ ਦੇ ਪ੍ਰਧਾਨ ਮੰਤਰੀ
ਕੈਨੇਡਾ, 29 ਅਪ੍ਰੈਲ 2025- ਕੈਨੇਡਾ ਫੈਡਰਲ ਚੋਣਾਂ ਦੇ ਸਾਹਮਣੇ ਆਏ ਨਤੀਜਿਆਂ ਅਨੁਸਾਰ, ਮੁੜ ਮਾਰਕ ਕਾਰਨੀ ਦਾ ਕੈਨੇਡਾ ਦਾ ਪ੍ਰਧਾਨ ਮੰਤਰੀ ਬਣਨਾ ਤੈਅ ਹੋ ਗਿਆ ਹੈ। ਹਾਲਾਂਕਿ ਉਨ੍ਹਾਂ ਦੀ ਪਾਰਟੀ ਨੂੰ ਸਪੱਸ਼ਟ ਬਹੁਤ (172 ਸੀਟਾਂ) ਨਹੀਂ ਮਿਲੀਆਂ ਹਨ, ਪਰ ਸਿਆਸੀ ਮਾਹਿਰਾਂ ਅਨੁਸਾਰ ਕਾਰਨੀ ਦਾ ਪੀ ਐੱਮ ਬਣਨਾ ਤੈਅ ਹੈ। ਮਾਰਕ ਕਾਰਨੀ ਦੀ ਪਾਰਟੀ ਨੂੰ ਸਭ ਤੋਂ ਵੱਧ ਸੀਟਾਂ 168 ਮਿਲੀਆਂ ਹਨ, ਜਦੋਂਕਿ ਕੰਸਰਵੇਟਿਵ 144 ਸੀਟਾਂ ਤੇ ਹੀ ਸਿਮਟ ਗਈ।
ਹਾਲਾਂਕਿ ਸਿੱਖ ਆਗੂ ਅਤੇ ਬਰਨਬੀ ਸੈਂਟਰ ਤੋਂ ਚੋਣ ਲੜ ਰਹੇ ਐਨਡੀਪੀ ਦੇ ਉਮੀਦਵਾਰ ਜਗਜੀਤ ਸਿੰਘ ਚੋਣ ਹਾਰ ਗਏ ਹਨ। ਉਨ੍ਹਾਂ ਨੇ ਆਪਣੀ ਹਾਰ ਕਬੂਲਦੇ ਹੋਏ ਪਾਰਟੀ ਦੇ ਨੇਤਾ ਵਜੋਂ ਅਸਤੀਫ਼ਾ ਦੇਣ ਦਾ ਐਲਾਨ ਕੀਤਾ ਹੈ। ਦੂਜੇ ਬੰਨੇ ਵੇਖੀਏ ਤਾਂ ਬੈਂਕ ਆਫ਼ ਕੈਨੇਡਾ ਅਤੇ ਬੈਂਕ ਆਫ਼ ਯੂ ਕੇ ਦੇ ਚੀਫ਼ ਰਹਿਣ ਵਾਲੇ ਕਾਰਨੀ ਦੀ ਜ਼ਿੰਦਗੀ ਵਿਚ ਇਹ ਪਹਿਲੀ ਚੁਣਾਂਵੀ ਲੜਾਈ ਸੀ।
ਚੋਣ ਨਤੀਜਿਆਂ ਤੇ ਰੁਝਾਨਾਂ ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਕਾਰਨੀ ਮੁਲਕ ਦੇ ਅਗਲੇ ਪ੍ਰਧਾਨ ਮੰਤਰੀ ਵਜੋਂ ਅਗਵਾਈ ਕਰਨਗੇ। ਆਪਣੇ ਜੇਤੂ ਭਾਸ਼ਣ ਵਿਚ ਕਾਰਨੀ ਨੇ ਕੈਨੇਡਾ ਨੂੰ ਮਜ਼ਬੂਤ ਬਣਾਉਣ ਲਈ ਇਕਮੁੱਠਤਾ ਦਾ ਸੱਦਾ ਦਿੱਤਾ ਹੈ। ਆਰਥਿਕ ਨੀਤੀਆਂ ਵਿਚ ਸੁਧਾਰ ਅਤੇ ਵਿਸ਼ਵ ਵਪਾਰ ਲਈ ਨਵੇਂ ਸੰਬੰਧਾਂ ਦੀ ਗੱਲ ਕਰਦਿਆਂ ਉਨ੍ਹਾਂ ਐਲਾਨ ਕੀਤਾ ਹੈ ਕਿ ਪਹਿਲੀ ਜੁਲਾਈ ਤੋਂ ਮੁਲਕ ਭਰ ਵਿਚ ਸਾਰੀਆਂ ਆਰਥਿਕ ਰੁਕਾਵਟਾਂ ਦੂਰ ਕਰਦਿਆਂ ਇੱਕ ਇਕਾਨਮੀ ਬਣਾਈ ਜਾਵੇਗੀ। ਮਾਰਕ ਕਾਰਨੀ ਦੀ ਪਾਰਟੀ ਦੀ ਵੱਡੀ ਜਿੱਤ 'ਤੇ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀ ਵਧਾਈ ਦਿੱਤੀ ਹੈ।