ਪੰਚਾਇਤਾਂ ਦੀਆਂ ਉਪ ਚੋਣਾਂ ਲਈ ਅਖੀਰਲੇ ਦਿਨ ਬਠਿੰਡਾ ਜ਼ਿਲ੍ਹੇ ‘ਚ 51 ਨਾਮਜ਼ਦਗੀਆਂ ਦਾਖਲ
ਅਸ਼ੋਕ ਵਰਮਾ
ਬਠਿੰਡਾ, 17 ਜੁਲਾਈ 2025: ਬਠਿੰਡਾ ਜ਼ਿਲ੍ਹੇ ਅੰਦਰ ਵੱਖ-ਵੱਖ ਪਿੰਡਾਂ ਦੇ 46 ਵਾਰਡਾਂ ਲਈ ਪੰਚਾਂ ਦੀ 27 ਜੁਲਾਈ ਨੂੰ ਹੋਣ ਵਾਲੀ ਉਪ ਚੋਣ ਵਾਸਤੇ ਅੱਜ ਨਾਮਜ਼ਦਗੀਆਂ ਭਰਨ ਦੇ ਅਖੀਰਲੇ ਦਿਨ 51 ਨਾਮਜ਼ਦਗੀ ਪੱਤਰ ਦਾਖਲ ਹੋਏ ਹਨ। ਹੁਣ ਤੱਕ ਜ਼ਿਲ੍ਹੇ ਅੰਦਰ ਕੁਲ 60 ਨਾਮਜ਼ਦਗੀ ਪੱਤਰ ਦਾਖਲ ਹੋਏ ਹਨ। ਇਹ ਜਾਣਕਾਰੀ ਜ਼ਿਲ੍ਹਾ ਚੋਣ ਅਫ਼ਸਰ-ਕਮ-ਡਿਪਟੀ ਕਮਿਸ਼ਨਰ ਸ੍ਰੀ ਸ਼ੌਕਤ ਅਹਿਮਦ ਪਰੇ ਨੇ ਸਾਂਝੀ ਕੀਤੀ।
ਜ਼ਿਲ੍ਹਾ ਚੋਣ ਅਫਸਰ ਸ੍ਰੀ ਸ਼ੌਕਤ ਅਹਿਮਦ ਪਰੇ ਨੇ ਦੱਸਿਆ ਕਿ ਬਲਾਕ ਬਠਿੰਡਾ ਦੇ ਬਾਜ਼ੀਗਰ ਬਸਤੀ, ਤਲਾਬ ਨਹਿਰ ਬਸਤੀ 1,4,5 ਤੋਂ ਇਲਾਵਾ ਪਿੰਡ ਦਿਉਣ, ਦਿਉਣ ਖੁਰਦ, ਮੀਆਂ ਤੇ ਵਿਰਕ ਕਲਾਂ ਦੇ 8 ਵਾਰਡਾਂ ਲਈ 9, ਬਲਾਕ ਭਗਤਾ ਭਾਈਕਾ ਦੇ ਪਿੰਡ ਬੁਰਜ਼ ਥਰੋੜ, ਹਮੀਰਗੜ੍ਹ, ਨਿਉਰ ਦੇ 4 ਵਾਰਡਾਂ ਲਈ 7, ਬਲਾਕ ਗੋਨਿਆਨਾ ਦੇ ਪਿੰਡ ਭੋਖੜਾ ਖੁਰਦ, ਕੋਠੇ ਚੇਤ ਸਿੰਘ ਤੇ ਮਹਿਮਾ ਸਵਾਈ ਦੇ 6 ਵਾਰਡਾਂ ਲਈ 6, ਬਲਾਕ ਮੌੜ ਦੇ ਪਿੰਡ ਬਘੇੜ ਚੜਤ, ਬੁਰਜ਼ ਅਤੇ ਬੁਰਜ਼ ਸੇਮਾ ਦੇ 3 ਵਾਰਡਾਂ ਲਈ 4, ਬਲਾਕ ਨਥਾਣਾ ਦੇ ਪਿੰਡ ਭਾਈ ਹਰਜੋਗਿੰਦਰ ਸਿੰਘ ਨਗਰ, ਬੁਰਜ਼ ਕਾਹਨ ਸਿੰਘ ਵਾਲਾ, ਚੱਕ ਬਖਤੂ, ਢਿੱਲਵਾਂ, ਕੋਠੇ ਗੋਬਿੰਦ ਨਗਰ, ਸ਼ਹੀਦ ਬਾਬਾ ਜੀਵਨ ਸਿੰਘ ਨਗਰ, ਤੁੰਗਵਲੀ ਤੇ ਕਲਿਆਣ ਸੁੱਖਾ ਦੇ 10 ਵਾਰਡਾਂ ਲਈ 10, ਬਲਾਕ ਫੂਲ ਦੇ ਪਿੰਡ ਦੁਲੇਵਾਲਾ, ਹਰਨਾਮ ਸਿੰਘ ਵਾਲਾ, ਟਲਵਲੀ ਦੇ 4 ਵਾਰਡਾਂ ਲਈ 7, ਬਲਾਕ ਰਾਮਪੁਰਾ ਦੇ ਪਿੰਡ ਭੂੰਦੜ ਤੇ ਕੋਟੜਾ ਕੌੜਾ ਦੇ 2 ਵਾਰਡਾਂ ਲਈ ਕੋਈ ਨਹੀਂ, ਬਲਾਕ ਸੰਗਤ ਦੇ ਪਿੰਡ ਬਾਜ਼ਕ, ਮਛਾਣਾ ਤੇ ਘੁਦਾ ਦੇ 4 ਵਾਰਡਾਂ ਲਈ 5 ਅਤੇ ਬਲਾਕ ਤਲਵੰਡੀ ਸਾਬੋ ਦੇ ਪਿੰਡ ਜੱਜਲ, ਲੇਲੇਵਾਲਾ, ਨੱਤ ਤੇ ਸੇਖਪੁਰਾ ਦੇ 5 ਵਾਰਡਾਂ ਲਈ 3 ਉਮੀਦਵਾਰਾਂ ਵੱਲੋਂ ਆਪੋ ਆਪਣੀਆਂ ਨਾਮਜ਼ਦਗੀਆਂ ਦਾਖਲ ਕਰਵਾਈਆਂ ਗਈਆਂ।
ਜ਼ਿਲ੍ਹਾ ਚੋਣ ਅਫ਼ਸਰ ਸ੍ਰੀ ਸ਼ੌਕਤ ਅਹਿਮਦ ਪਰੇ ਨੇ ਹੋਰ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਜਮ੍ਹਾਂ ਕਰਵਾਏ ਨਾਮਜ਼ਦਗੀ ਪੱਤਰਾਂ ਦੀ 18 ਜੁਲਾਈ ਨੂੰ ਪੜਤਾਲ ਕੀਤੀ ਜਾਵੇਗੀ। ਉਨ੍ਹਾਂ ਅੱਗੇ ਦੱਸਿਆ ਕਿ 19 ਜੁਲਾਈ ਨੂੰ ਜਮ੍ਹਾਂ ਕਰਵਾਏ ਹੋਏ ਨਾਮਜ਼ਦਗੀ ਪੱਤਰ ਵਾਪਿਸ ਲਏ ਜਾ ਸਕਦੇ ਹਨ ਅਤੇ 27 ਜੁਲਾਈ ਨੂੰ ਵੋਟਾਂ ਸਵੇਰੇ 8 ਤੋਂ ਸ਼ਾਮ 4 ਵਜੇ ਤੱਕ ਪੈਣਗੀਆਂ ਅਤੇ ਉਸੇ ਦਿਨ ਹੀ ਨਤੀਜੇ ਐਲਾਨੇ ਜਾਣਗੇ। ਉਨ੍ਹਾਂ ਕਿਹਾ ਕਿ 46 ਵਾਰਡਾਂ ਲਈ ਬਣਾਏ ਗਏ 39 ਪੋਲਿੰਗ ਬੂਥਾਂ ‘ਤੇ ਵੋਟਿੰਗ ਹੋਵੇਗੀ।