ਕੌਂਸਿਲ ਨੇ ਫਿਰ ਪਾਇਆ ਬਟੂਏ ਨੂੰ ਹੱਥ! 

ਫਿਰ ਕਹਿੰਦੇ ਕਿੱਥੇ ਜਾਂਦੀ ਤਨਖਾਹ, ਆਮ ਬੰਦੇ ਦਾ ਤਾਂ ਨਿਕਲ ਗਿਆ ਸਾਹ
ਔਕਲੈਂਡ ਕੌਂਸਲ ਵੱਲੋਂ ਟੈਕਸਾਂ ਵਿੱਚ 7.9% ਦੇ ਭਾਰੀ ਵਾਧੇ ਨੂੰ ਮਨਜ਼ੂਰੀ; ਆਮ ਪਰਿਵਾਰਾਂ ’ਤੇ ਸਾਲਾਨਾ 320 ਡਾਲਰ ਦਾ ਵਾਧੂ ਬੋਝ
-ਰੇਟਸ ਵਾਧਾ 1 ਜੁਲਾਈ 2026 ਤੋਂ ਲਾਗੂ ਹੋ ਜਾਵੇਗਾ।
ਔਕਲੈਂਡ, 27 ਮਈ, 2026:-ਮਹਿੰਗਾਈ ਦੀ ਮਾਰ ਝੱਲ ਰਹੇ ਔਕਲੈਂਡ ਵਾਸੀਆਂ ਨੂੰ ਕੌਂਸਲ ਨੇ ਇੱਕ ਵੱਡਾ ਝਟਕਾ ਦਿੱਤਾ ਹੈ। ਔਕਲੈਂਡ ਕੌਂਸਲ ਨੇ 14-7 ਦੇ ਬਹੁਮਤ ਨਾਲ ਸ਼ਹਿਰ ਦੇ ਨਵੇਂ ਬਜਟ ਨੂੰ ਪਾਸ ਕਰਦਿਆਂ ਰੇਟਸ (ਪ੍ਰਾਪਰਟੀ ਟੈਕਸ) ਵਿੱਚ ਔਸਤਨ 7.9% ਵਾਧਾ ਕਰਨ ਦਾ ਇਤਿਹਾਸਕ ਫੈਸਲਾ ਲਿਆ ਹੈ। ਇਸ ਫੈਸਲੇ ਦੇ ਲਾਗੂ ਹੋਣ ਨਾਲ ਹੁਣ ਹਰੇਕ ਔਸਤ ਪਰਿਵਾਰ ਨੂੰ ਹਰ ਸਾਲ ਲਗਭਗ 320 ਡਾਲਰ (ਤਕਰੀਬਨ 6.16 ਡਾਲਰ ਪ੍ਰਤੀ ਹਫ਼ਤਾ) ਵਾਧੂ ਟੈਕਸ ਤਾਰਨਾ ਪਵੇਗਾ। ਜਿੱਥੇ ਮੇਅਰ ਵੇਨ ਬ੍ਰਾਊਨ ਨੇ ‘ਸਿਟੀ ਰੇਲ ਲਿੰਕ’ ਵਰਗੇ ਵੱਡੇ ਪ੍ਰੋਜੈਕਟਾਂ ਦੇ ਖ਼ਰਚਿਆਂ ਦਾ ਹਵਾਲਾ ਦਿੰਦੇ ਹੋਏ ਇਸ ਫੈਸਲੇ ਨੂੰ ਮਜਬੂਰੀ ਦੱਸਿਆ ਹੈ, ਉੱਥੇ ਹੀ ਆਮ ਲੋਕਾਂ ਦੀਆਂ ਸੰਸਥਾਵਾਂ ਨੇ ਇਸ ਨੂੰ ਪਰਿਵਾਰਾਂ ਦਾ ਲੱਕ ਤੋੜਨ ਵਾਲਾ ਕਦਮ ਕਰਾਰ ਦਿੱਤਾ ਹੈ।
ਕੌਂਸਲ ਨੇ ਕਿਉਂ ਲਿਆ ਇਹ ਫੈਸਲਾ?
ਸਿਟੀ ਰੇਲ ਲਿੰਕ ਦਾ ਖਰਚਾ: ਮੇਅਰ ਵੇਨ ਬ੍ਰਾਊਨ ਨੇ ਬਜਟ ਦਾ ਬਚਾਅ ਕਰਦਿਆਂ ਕਿਹਾ ਕਿ ਇਸ ਵਾਧੇ ਦਾ ਮੁੱਖ ਕਾਰਨ 2026 ਵਿੱਚ ਸ਼ੁਰੂ ਹੋਣ ਜਾ ਰਿਹਾ ਨਿਊਜ਼ੀਲੈਂਡ ਦਾ ਸਭ ਤੋਂ ਵੱਡਾ ਇੰਫਰਾਸਟਰੱਕਚਰ ਪ੍ਰੋਜੈਕਟ ‘ਸਿਟੀ ਰੇਲ ਲਿੰਕ’ ਹੈ। ਇਸ ਨੂੰ ਚਲਾਉਣ, ਇਸ ਦੇ ਵਿਆਜ ਅਤੇ ਹੋਰ ਖਰਚਿਆਂ ਲਈ ਸਾਲਾਨਾ 235 ਮਿਲੀਅਨ ਡਾਲਰ ਦੀ ਲੋੜ ਹੈ।
ਗਲੋਬਲ ਆਰਥਿਕ ਦਬਾਅ: ਮੇਅਰ ਮੁਤਾਬਕ ਜੇਕਰ ਕੌਂਸਲ 106 ਡਾਲਰ ਮਿਲੀਅਨ ਦੀ ਬਚਤ ਦਾ ਪਲਾਨ ਨਾ ਤਿਆਰ ਕਰਦੀ, ਤਾਂ ਤੇਲ ਦੀਆਂ ਵਧਦੀਆਂ ਕੀਮਤਾਂ ਅਤੇ ਮਹਿੰਗਾਈ ਕਾਰਨ ਇਹ ਵਾਧਾ 15% ਤੱਕ ਜਾ ਸਕਦਾ ਸੀ।
ਬਾਕੀ ਦੇਸ਼ ਨਾਲੋਂ ਘੱਟ: ਵੇਨ ਬ੍ਰਾਊਨ ਨੇ ਤਰਕ ਦਿੱਤਾ ਕਿ ਨਿਊਜ਼ੀਲੈਂਡ ਦੇ ਬਾਕੀ ਸ਼ਹਿਰਾਂ (ਜਿਵੇਂ ਵੈਲਿੰਗਟਨ, ਹੈਮਿਲਟਨ ਜਾਂ ਡੁਨੇਡਿਨ) ਵਿੱਚ ਰੇਟਸ 30% ਤੋਂ 50% ਤੱਕ ਵਧੇ ਹਨ, ਜਦਕਿ ਔਕਲੈਂਡ ਵਿੱਚ ਸਖ਼ਤ ਵਿੱਤੀ ਅਨੁਸ਼ਾਸਨ ਕਾਰਨ ਇਸ ਨੂੰ ਸਿੰਗਲ ਡਿਜਿਟ (7.9%) ’ਤੇ ਰੋਕਿਆ ਗਿਆ ਹੈ।
ਵਿਰੋਧ ਅਤੇ ਚਿੰਤਾਵਾਂ: ਦੂਜੇ ਪਾਸੇ, ~ਔਕਲੈਂਡ ਰੇਟਪੇਅਰਜ਼ ਅਲਾਇੰਸ’ ਅਤੇ ਵਾਧੇ ਦਾ ਵਿਰੋਧ ਕਰਨ ਵਾਲੇ ਕੌਂਸਲਰਾਂ ਨੇ ਇਸ ਫੈਸਲੇ ਦੀ ਤਿੱਖੀ ਆਲੋਚਨਾ ਕੀਤੀ ਹੈ।  ਰੇਟਪੇਅਰਜ਼ ਅਲਾਇੰਸ ਦਾ ਕਹਿਣਾ ਹੈ: ਪਹਿਲਾਂ ਹੀ ਮਹਿੰਗਾਈ ਦੀ ਮਾਰ ਝੱਲ ਰਹੇ ਆਮ ਪਰਿਵਾਰਾਂ ਲਈ ਇਹ ਫੈਸਲਾ ਉਨ੍ਹਾਂ ਦਾ ਲੱਕ ਤੋੜਨ ਵਰਗਾ ਹੈ। ਕੌਂਸਲ ਨੂੰ ਆਪਣੇ ਫ਼ਾਲਤੂ ਖ਼ਰਚੇ ਘਟਾਉਣੇ ਚਾਹੀਦੇ ਸਨ, ਨਾ ਕਿ ਲੋਕਾਂ ਦੀ ਜੇਬ ’ਤੇ ਬੋਝ ਪਾਉਣਾ ਚਾਹੀਦਾ ਸੀ। ਕੁਝ ਨੌਰਥ ਸ਼ੋਰ ਦੇ ਕੌਂਸਲਰਾਂ ਨੇ ਰੇਟਸ ਵਿੱਚ ਵਾਧੇ ਨੂੰ 5.9% ਤੱਕ ਸੀਮਤ ਕਰਨ ਲਈ ਕਟੌਤੀਆਂ ਦੇ ਪ੍ਰਸਤਾਵ ਵੀ ਦਿੱਤੇ ਸਨ, ਪਰ ਕੌਂਸਲ ਨੇ ਉਨ੍ਹਾਂ ਨੂੰ ਇਹ ਕਹਿ ਕੇ ਰੱਦ ਕਰ ਦਿੱਤਾ ਕਿ ਇਸ ਨਾਲ ਸ਼ਹਿਰ ਦੀ ਕ੍ਰੈਡਿਟ ਰੇਟਿੰਗ ਖ਼ਰਾਬ ਹੋ ਸਕਦੀ ਹੈ ਅਤੇ ਸਥਾਨਕ ਗ੍ਰਾਂਟਾਂ (ਜਿਵੇਂ ਸਾਂਤਾ ਪਰੇਡ, ਫੈਸ਼ਨ ਵੀਕ ਆਦਿ) ਬੰਦ ਕਰਨੀਆਂ ਪੈਣਗੀਆਂ।
ਆਮ ਲੋਕਾਂ ’ਤੇ ਕੀ ਅਸਰ ਪਵੇਗਾ? ਨਵੇਂ ਨਿਯਮਾਂ ਮੁਤਾਬਕ, ਰੇਟਸ ਵਿੱਚ ਵਾਧਾ ਪ੍ਰਾਪਤੀ ਦੀ ਕੀਮਤ  ਦੇ ਹਿਸਾਬ ਨਾਲ ਵੱਖ-ਵੱਖ ਹੋ ਸਕਦਾ ਹੈ: ਜੇਕਰ ਘਰ ਦੀ ਕੀਮਤ 1.28 ਮਿਲੀਅਨ ਹੋ ਤਾਂ ਔਸਤਨ ਸਾਲਾਨਾ ਟੈਕਸ 4375 ਤੱਕ ਹੋ ਜਾਵੇਗਾ।
ਇਹ ਨਵਾਂ ਬਜਟ ਅਤੇ ਰੇਟਸ ਵਾਧਾ 1 ਜੁਲਾਈ 2026 ਤੋਂ ਲਾਗੂ ਹੋ ਜਾਵੇਗਾ। ਔਕਲੈਂਡ ਵਾਸੀ ਕੌਂਸਲ ਦੀ ਵੈੱਬਸਾਈਟ ’ਤੇ ਜਾ ਕੇ ਆਪਣੀ ਪ੍ਰਾਪਰਟੀ ਦੇ ਮੁਤਾਬਕ ਸਹੀ ਅੰਕੜੇ ਚੈੱਕ ਕਰ ਸਕਦੇ ਹਨ।
ਕਿੱਥੇ ਜਾਂਦਾ ਟੈਕਸ?: ਕੂੜਾ ਪ੍ਰਬੰਧਨ - ਖਾਣ-ਪੀਣ ਦੇ ਬਚੇ ਹੋਏ ਹਿੱਸੇ ਦੀ ਸੇਵਾ, ਕੁਦਰਤੀ ਵਾਤਾਵਰਣ ਲਈ ਵਿਸ਼ੇਸ਼ ਟੈਕਸ - ਗੈਰ-ਕਾਰੋਬਾਰੀ, ਇੱਕਸਾਰ ਸਾਲਾਨਾ ਜਨਰਲ ਚਾਰਜ, ਕੂੜਾ ਪ੍ਰਬੰਧਨ - ਸਟੈਂਡਰਡ ਕੂੜਾ ਸੇਵਾ, ਕੂੜਾ ਪ੍ਰਬੰਧਨ - ਸਟੈਂਡਰਡ ਰੀਸਾਈਕਲਿੰਗ ਸੇਵਾ, ਕੂੜਾ ਪ੍ਰਬੰਧਨ - ਘੱਟੋ-ਘੱਟ ਬੇਸਿਕ ਚਾਰਜ, ਜਨਰਲ ਰੇਟ - ਸ਼ਹਿਰੀ ਰਿਹਾਇਸ਼ੀ, ਕਲਾਈਮੇਟ ਐਕਸ਼ਨ ਟਰਾਂਸਪੋਰਟ ਲਈ ਵਿਸ਼ੇਸ਼ ਟੈਕਸ - ਸ਼ਹਿਰੀ ਰਿਹਾਇਸ਼ੀ, ਪਾਣੀ ਦੀ ਗੁਣਵੱਤਾ ਲਈ ਵਿਸ਼ੇਸ਼ ਟੈਕਸ - ਗੈਰ-ਕਾਰੋਬਾਰੀ।

Follow Babushahi Network Channel on WhatsApp