ਕੁਦਰਤੀ ਫਾਈਬਰ ਆਧਾਰਿਤ ਹੋਮ ਟੈਕਸਟਾਈਲ ਉਤਪਾਦਾਂ ਲਈ ਟ੍ਰਾਈਡੈਂਟ ਗਰੁੱਪ ਅਤੇ ਆਈ.ਸੀ.ਏ.ਆਰ-ਨਿਨਫੇਟ ਵਿਚਕਾਰ ਰਣਨੀਤਿਕ ਸਹਿਯੋਗ ਦੀ ਤਿਆਰੀ
ਬਾਬੂਸ਼ਾਹੀ ਬਿਊਰੋ
ਪੰਜਾਬ/ ਚੰਡੀਗੜ੍ਹ , 25 ਮਈ 2026
ਟ੍ਰਾਈਡੈਂਟ ਗਰੁੱਪ ਵੱਲੋਂ ਟਿਕਾਊ ਅਤੇ ਪਰਿਆਵਰਣ-ਅਨੁਕੂਲ ਟੈਕਸਟਾਈਲ ਨਵੀਨਤਾ ਨੂੰ ਉਤਸ਼ਾਹਿਤ ਕਰਨ ਦੇ ਉਦੇਸ਼ ਨਾਲ ਭਾਰਤੀ ਖੇਤੀਬਾੜੀ ਅਨੁਸੰਧਾਨ ਕੌਂਸਲ (ਆਈਸੀਏਆਰ) ਅਤੇ ਇਸਦੇ ਅਧੀਨ ਕੰਮ ਕਰ ਰਹੇ ਰਾਸ਼ਟਰੀ ਕੁਦਰਤੀ ਰੇਸ਼ਾ ਇੰਜੀਨੀਅਰਿੰਗ ਅਤੇ ਤਕਨਾਲੋਜੀ ਸੰਸਥਾਨ (ਆਈ.ਸੀ.ਏ.ਆਰ-ਨਿਨਫੇਟ) ਨਾਲ ਰਣਨੀਤਿਕ ਸਹਿਯੋਗ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਗਈ ਹੈ। ਇਸ ਪਹਿਲ ਦਾ ਮਕਸਦ ਕੁਦਰਤੀ ਫਾਈਬਰ ਆਧਾਰਿਤ ਨਵੀਂ ਪੀੜ੍ਹੀ ਦੇ ਹੋਮ ਟੈਕਸਟਾਈਲ ਉਤਪਾਦਾਂ ਦੇ ਵਪਾਰਕ ਵਿਕਾਸ ਨੂੰ ਤੇਜ਼ ਕਰਨਾ ਹੈ।
ਟ੍ਰਾਈਡੈਂਟ ਗਰੁੱਪ ਦੇ ਫਾਈਬਰ ਅਤੇ ਯਾਰਨ ਵਿਭਾਗ ਦੇ ਫੰਕਸ਼ਨਲ ਹੈੱਡ ਡਾ. ਨੇਮਾਈ ਚੰਦਰ ਰਾਏ ਨੇ ਆਈ.ਸੀ.ਏ.ਆਰ-ਨਿਨਫੇਟ ਦੇ ਡਾਇਰੈਕਟਰ ਡਾ. ਡੀ. ਬੀ. ਸ਼ਾਕਿਆਵਰ ਅਤੇ ਸੰਸਥਾ ਦੀ ਵਿਗਿਆਨਕ ਟੀਮ ਨਾਲ ਮੀਟਿੰਗ ਕਰਕੇ ਖੋਜ, ਤਕਨੀਕੀ ਵਿਕਾਸ ਅਤੇ ਉਦਯੋਗਿਕ ਵਰਤੋਂ ਦੇ ਖੇਤਰਾਂ ਵਿੱਚ ਸਹਿਯੋਗ ਦੀਆਂ ਸੰਭਾਵਨਾਵਾਂ ‘ਤੇ ਵਿਚਾਰ-ਵਟਾਂਦਰਾ ਕੀਤਾ।
ਮੀਟਿੰਗ ਦੌਰਾਨ ਵਿਸ਼ਵ ਪੱਧਰ ‘ਤੇ ਵੱਧ ਰਹੀ ਕੁਦਰਤੀ ਫਾਈਬਰਾਂ ਦੀ ਮੰਗ ਨੂੰ ਧਿਆਨ ਵਿੱਚ ਰੱਖਦਿਆਂ ਨਵੀਂ ਸੋਚ ਵਾਲੇ ਅਤੇ ਵਪਾਰਕ ਤੌਰ ‘ਤੇ ਉਪਯੋਗੀ ਉਤਪਾਦ ਵਿਕਸਿਤ ਕਰਨ ‘ਤੇ ਜ਼ੋਰ ਦਿੱਤਾ ਗਿਆ। ਪ੍ਰਸਤਾਵਿਤ ਸਹਿਯੋਗ ਤਹਿਤ ਦੋਵੇਂ ਸੰਸਥਾਵਾਂ ਵਿਚਕਾਰ ਸਮਝੌਤਾ (ਐੱਮ.ਓ.ਯੂ.) ਸਾਇਨ ਕਰਨ ਦੀ ਯੋਜਨਾ ਹੈ, ਜਿਸ ਰਾਹੀਂ ਲਿਨਨ ਵਰਗੇ ਕਾਟਨਾਈਜ਼ਡ ਜੂਟ, ਹੈਂਪ ਅਤੇ ਅਲਸੀ ਮਿਸ਼ਰਿਤ ਫਾਈਬਰਾਂ ਨਾਲ ਆਧੁਨਿਕ ਹੋਮ ਟੈਕਸਟਾਈਲ ਉਤਪਾਦ ਤਿਆਰ ਕੀਤੇ ਜਾਣਗੇ।
ਆਈ.ਸੀ.ਏ.ਆਰ-ਨਿਨਫੇਟ ਦੀ ਖੋਜ ਮਹਾਰਤ ਅਤੇ ਟ੍ਰਾਈਡੈਂਟ ਗਰੁੱਪ ਦੀ ਮਜ਼ਬੂਤ ਉਤਪਾਦਨ ਸਮਰੱਥਾ, ਉਤਪਾਦ ਵਿਕਾਸ ਅਤੇ ਅੰਤਰਰਾਸ਼ਟਰੀ ਮਾਰਕੀਟ ਵਿੱਚ ਮੌਜੂਦਗੀ ਨੂੰ ਜੋੜ ਕੇ ਪਰਿਆਵਰਣ-ਅਨੁਕੂਲ ਹੋਮ ਟੈਕਸਟਾਈਲ ਉਤਪਾਦਾਂ ਨੂੰ ਵਪਾਰਕ ਤੌਰ ‘ਤੇ ਮਜ਼ਬੂਤ ਬਣਾਉਣ ਦਾ ਉਦੇਸ਼ ਰੱਖਿਆ ਗਿਆ ਹੈ।
ਇਸ ਸਹਿਯੋਗ ਹੇਠ ਕਾਟਨਾਈਜ਼ੇਸ਼ਨ, ਬਲੈਂਡਿੰਗ, ਸਪਿਨਿੰਗ, ਵੀਵਿੰਗ ਅਤੇ ਫਿਨਿਸ਼ਿੰਗ ਵਰਗੀਆਂ ਆਧੁਨਿਕ ਫਾਈਬਰ ਪ੍ਰੋਸੈਸਿੰਗ ਤਕਨੀਕਾਂ ‘ਤੇ ਕੰਮ ਕੀਤਾ ਜਾਵੇਗਾ, ਜਿਸ ਨਾਲ ਉੱਚ ਗੁਣਵੱਤਾ ਅਤੇ ਪਰਿਆਵਰਣ ਲਈ ਜ਼ਿੰਮੇਵਾਰ ਟੈਕਸਟਾਈਲ ਹੱਲ ਵਿਕਸਿਤ ਹੋਣ ਦੀ ਉਮੀਦ ਹੈ।
ਇਹ ਪਹਿਲ ਦੇਸ਼ ਵਿੱਚ ਕੁਦਰਤੀ ਫਾਈਬਰ ਈਕੋਸਿਸਟਮ ਨੂੰ ਮਜ਼ਬੂਤ ਕਰਨ, ਟਿਕਾਊ ਵਿਕਲਪਾਂ ਨੂੰ ਉਤਸ਼ਾਹਿਤ ਕਰਨ ਅਤੇ ਗਲੋਬਲ ਟੈਕਸਟਾਈਲ ਨਿਰਯਾਤ ਵਿੱਚ ਭਾਰਤ ਦੀ ਸਥਿਤੀ ਨੂੰ ਹੋਰ ਮਜ਼ਬੂਤ ਬਣਾਉਣ ਵਿੱਚ ਮਦਦਗਾਰ ਸਾਬਤ ਹੋਵੇਗੀ। ‘ਆਤਮਨਿਰਭਰ ਭਾਰਤ’ ਅਤੇ ਗ੍ਰੀਨ ਉਦਯੋਗਿਕ ਵਿਕਾਸ ਦੀਆਂ ਰਾਸ਼ਟਰੀ ਤਰਜੀਹਾਂ ਦੇ ਅਨੁਕੂਲ ਇਹ ਸਾਂਝ ਟੈਕਸਟਾਈਲ ਖੇਤਰ ਵਿੱਚ ਨਵੀਨਤਾ ਆਧਾਰਿਤ ਟਿਕਾਊ ਵਿਕਾਸ ਪ੍ਰਤੀ ਟ੍ਰਾਈਡੈਂਟ ਗਰੁੱਪ ਦੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ।
- Download Babushahi App
-
-
