ਪੰਜਾਬੀ ਸੂਫ਼ੀ ਕਵੀ ਬਾਬਾ ਬੁੱਲ੍ਹੇ ਸ਼ਾਹ ਦੀ ਮਜ਼ਾਰ ਤੋੜਨ ਦੇ ਮੁਜ਼ਰਿਮਾਂ ਨੂੰ ਸਜ਼ਾ ਦਿਓ- ਦੇਸ਼ ਭਗਤਾਂ ਦੀ ਮੰਗ
ਜਲੰਧਰ 29 ਜਨਵਰੀ 2026 -
ਪੰਜਾਬੀ ਸੂਫ਼ੀ, ਕਵੀ,ਸੰਤ ਦਰਵੇਸ਼, ਮਨੁੱਖੀ ਕਦਰਾਂ ਕੀਮਤਾਂ ਤੇ ਪਹਿਰਾ ਦੇਣ ਵਾਲੇ, ਹਨ੍ਹੇਰੀਆਂ ਤਾਕਤਾਂ ਦੇ ਖਿਲਾਫ਼ ਲਟ ਲਟ ਬਲਦੀ ਮਸ਼ਾਲ, ਬਾਬਾ ਬੁੱਲੇ ਸ਼ਾਹ ਹੋਰਾਂ ਦੀ ਮੰਸੂਰੀ (ਉੱਤਰਾਖੰਡ) ਵਿੱਚ ਬਣੀ ਮਜ਼ਾਰ ਨੂੰ ਅਜੋਕੀ ਧਾਰਮਿਕ ਫਿਰਕਾਪ੍ਰਸਤ ਭਗਵੀਂ ਵਿਚਾਰਧਾਰਾ ਨੂੰ ਮੰਨਣ ਵਾਲੇ ਤੱਤਾਂ ਦੁਆਰਾ ਤੋੜ ਦਿੱਤੇ ਜਾਣ ਦੀ ਸਖ਼ਤ ਆਲੋਚਨਾ ਕਰਦਿਆਂ ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਪ੍ਰਧਾਨ ਕੁਲਵੰਤ ਸਿੰਘ ਸੰਧੂ, ਜਨਰਲ ਸਕੱਤਰ ਗੁਰਮੀਤ ਸਿੰਘ ਅਤੇ ਸਭਿਆਚਾਰਕ ਵਿੰਗ ਦੇ ਕਨਵੀਨਰ ਅਮੋਲਕ ਸਿੰਘ ਨੇ ਕਿਹਾ ਹੈ ਕਿ ਇਸ ਫਿਰਕੂ ਨਫ਼ਰਤੀ ਅਤੇ ਭਾਈਚਾਰਕ ਸਾਂਝ ਵਿੱਚ ਜ਼ਹਿਰ ਘੋਲ਼ ਕੇ ਸੌੜੇ ਰਾਜਨੀਤਿਕ ਮੰਤਵਾਂ ਦੀ ਫ਼ਸਲ ਤਿਆਰ ਕਰਨ ਵਾਲੀ ਹਰਕਤ ਕਰਨ ਵਾਲੇ ਤੱਤਾਂ ਵਿਰੁੱਧ ਸਖ਼ਤ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ।
ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਆਗੂਆਂ ਨੇ ਆਪਣੇ ਪ੍ਰੈੱਸ ਬਿਆਨ ਵਿੱਚ ਸਰਕਾਰ, ਸਿਵਲ ਅਤੇ ਪੁਲਿਸ ਪ੍ਰਸ਼ਾਸਨ ਦੀ ਭੂਮਿਕਾ ਦੀ ਸਖ਼ਤ ਨਿੰਦਾ ਕੀਤੀ ਹੈ ਕਿਉਂਕਿ ਹਿੰਦੂ ਰੱਖਿਆ ਦਲ ਉੱਤਰਾਖੰਡ ਦੇ ਸੂਬਾ ਮੁਖੀ ਲਲਿਤ ਸ਼ਰਮਾ ਨੇ ਪੂਰੀ ਬੇਹਯਾਈ ਨਾਲ਼ ਹਮਲੇ ਦੀ ਜ਼ਿੰਮੇਵਾਰੀ ਲੈਂਦਿਆਂ ਕਿਹਾ ਹੈ ਕਿ, " ਇਹ ਦੇਵ ਨਗਰੀ ਹੈ,ਬਾਬਾ ਬੁੱਲੇ ਸ਼ਾਹ ਦੀ ਕਬਰ ਪਾਕਿਸਤਾਨ ਵਿੱਚ ਹੈ ਇਸ ਕਰਕੇ ਉਸਦੀ ਇੱਥੇ ਮਜ਼ਾਰ ਕਿਸੇ ਵੀ ਕੀਮਤ ਤੇ ਬਰਦਾਸ਼ਤ ਨਹੀਂ ਕੀਤੀ ਜਾਏਗੀ। ਉਸਨੇ ਆਪਣੇ ਬਿਆਨ ਵਿੱਚ ਕਿਹਾ ਕਿ' "ਇਹ ਮਜ਼ਾਰ ਸਿਰਫ਼ ਸੌ ਸਾਲ ਪਹਿਲਾਂ ਬਣੀ ਸੀ ਜਦ ਕਿ ਸਨਾਤਨ ਧਰਮ ਹਜ਼ਾਰ ਸਾਲ ਪੁਰਾਣਾ ਹੈ ਇਸ ਕਰਕੇ ਅਸੀਂ ਪਹਿਲਾਂ ਹੀ ਸ਼ਰੇਆਮ ਚਿਤਾਵਨੀ ਦੇ ਦਿੱਤੀ ਸੀ ਕਿ ਅਸੀਂ ਇਸ ਮਜ਼ਾਰ ਨੂੰ ਤੋੜਾਂਗੇ ਹੁਣ ਅਸੀਂ ਇਸਨੂੰ ਤੋੜਨ ਦੀ ਜ਼ਿੰਮੇਵਾਰੀ ਲੈਂਦੇ ਹੋਏ ਇਹ ਵੀ ਸਾਫ਼ ਕਰਨਾ ਚਾਹੁੰਦੇ ਹਾਂ ਕਿ ਕਿਸੇ ਨਿਜੀ ਜ਼ਮੀਨ ਤੇ ਵੀ ਕੋਈ ਅਜੇਹੇ ਗ਼ਲਤ ਕੰਮ ਨਹੀਂ ਕਰ ਸਕਦਾ"।
ਕਮੇਟੀ ਦੇ ਆਗੂਆਂ ਨੇ ਪ੍ਰੈਸ ਬਿਆਨ ਵਿੱਚ ਕਿਹਾ ਹੈ ਕਿ ਮਹਾਨ ਬਾਬਾ ਬੁੱਲ੍ਹੇ ਸ਼ਾਹ ਦੀ ਵਿਚਾਰਧਾਰਾ ਉਸ ਵਕਤ ਵੀ ਅਤੇ ਹੁਣ ਵੀ ਧਾਰਮਿਕ ਕੱਟੜਪੁਣੇ, ਫਿਰਕਾਪ੍ਰਸਤੀ , ਅੰਧਵਿਸ਼ਵਾਸ਼ਾਂ ਨੂੰ ਚੁਣੌਤੀ ਦਿੰਦੀ ਰਹੀ ਸੀ, ਅਤੇ ਅੱਜ ਵੀ ਦੇ ਰਹੀ ਹੈ। ਧਾਰਮਿਕ ਕੱਟੜਪੰਥੀ ਕੁਝ ਲੋਕ ਉਸ ਸਮੇਂ ਵੀ ਬੁੱਲੇ ਸ਼ਾਹ ਦੇ ਵਿਚਾਰਾਂ ਦੀ ਸਮਾਜ ਅੰਦਰ ਨਵੀਂ ਚੇਤਨਾ ਦਾ ਚਾਨਣ ਵੰਡਣ ਵਾਲੀ ਵਿਚਾਰਧਾਰਾ ਤੋਂ ਭੈਅ ਭੀਤ ਸਨ ਅਤੇ ਅੱਜ ਵੀ ਉਸ ਸੌੜੀ ਸੋਚ ਦੇ ਰਾਜਨੀਤਿਕ ਮੰਤਵਾਂ ਨੂੰ ਪ੍ਰਨਾਏ ਤੱਤਾਂ ਨੇ ਵਿਚਾਰਾਂ ਦਾ ਸੰਵਾਦ ਰਚਣ ਦੀ ਬਜਾਏ ਫਿਰਕੂ ਫਾਸ਼ੀ ਹੱਲੇ ਦਾ ਰਾਹ ਚੁਣਿਆ ਹੋਇਆ ਹੈ ਕਿਉਂਕਿ ਉਹਨਾਂ ਨੂੰ ਨੰਗਾ ਚਿੱਟਾ ਥਾਪੜਾ ਹੈ । ਕਮੇਟੀ ਦਾ ਕਹਿਣਾ ਹੈ ਕਿ ਬਾਬਾ ਬੁੱਲ੍ਹੇ ਸ਼ਾਹ,ਗ਼ਦਰ ਪਾਰਟੀ ਦੀ ਬਹੁਤ ਹੀ ਮਹਾਨ ਸਾਂਝੀ ਵਿਰਾਸਤ ਦੇ ਅਨਮੋਲ ਹੀਰੇ ਹਨ। ਉਹ ਸਾਡੇ ਲੋਕਾਂ ਦੀ ਹਰ ਧੜਕਣ ਵਿੱਚ 100 ਵਰ੍ਹੇ ਬਾਅਦ ਅੱਜ ਹੋਰ ਵੀ ਵਧੇਰੇ ਪ੍ਰਸੰਗਿਕ ਅਤੇ ਪ੍ਰੇਰਨਾ ਦਾਇਕ ਹਨ। ਕਮੇਟੀ ਨੇ ਕਿਹਾ ਕਿ ਬੁੱਲ੍ਹੇ ਸ਼ਾਹ ਨੂੰ ਦਫ਼ਨ ਕਰਨ ਵੇਲੇ ਵੀ ਵਾ-ਵਾਵੇਲਾ ਮਚਾਇਆ ਗਿਆ ਸੀ ਤੇ ਅੱਜ ਵੀ ਉਨ੍ਹਾਂ ਫਿਰਕਾਪ੍ਰਸਤ ਟੋਲਿਆਂ ਨੂੰ ਕੋਈ ਨਹੀਂ ਜਾਣਦਾ, ਇਤਿਹਾਸ ਨੇ ਇਨ੍ਹਾਂ ਨੂੰ ਵੀ ਇੱਕ ਦਿਨ ਕੂੜੇਦਾਨ ਵਿੱਚ ਵਗਾਹ ਮਾਰਨਾ ਹੈ ।
ਕਮੇਟੀ ਨੇ ਕਿਹਾ ਕਿ ਸਾਂਝੇ ਪੰਜਾਬ ਦਾ ਬਾਬਾ ਸਾਂਝੀ ਧਰਤੀ ਤੇ ਅੱਜ ਵੀ ਨੱਚਦਾ, ਗਾਉਂਦਾ ਹੋਇਆ ਸੁਣਾਈ ਦਿੰਦਾ ਹੈ । ਜਨਤਕ ਜਮਹੂਰੀ ਜਥੇਬੰਦੀਆਂ ਨੂੰ ਜ਼ੋਰਦਾਰ ਅਪੀਲ ਕੀਤੀ ਹੈ ਕਿ ਉਹ ਕਮੇਟੀ ਦੇ ਸੱਦੇ ਤੇ ਪੰਜਾਬ ਭਰ ਵਿੱਚ ਹਰ ਸੰਭਵ ਢੰਗ ਨਾਲ ਇਸ ਫਿਰਕੂ ਫਾਸ਼ੀ ਹੱਲੇ ਖ਼ਿਲਾਫ਼ ਜ਼ੋਰਦਾਰ ਆਵਾਜ਼ ਬੁਲੰਦ ਕਰਨ ਨਹੀਂ ਤਾਂ ਇਹ ਫਾਸ਼ੀ ਵਿਰਤੀ 'ਚ ਗ੍ਰਸੇ ਟੋਲਿਆਂ ਵੱਲੋਂ ਪੰਜਾਬ ਦੀਆਂ ਵਿਰਾਸਤੀ ਯਾਦਗਾਰਾਂ ਅਤੇ ਸਮਾਗਮਾਂ ਵਿੱਚ ਵੀ ਖਲਲ ਪਾਉਣ ਦੇ ਹੱਲੇ ਕਰਨ ਲਈ ਹੌਸਲੇ ਵਧਣਗੇ ਕਿਉਂਕਿ ਉਹਨਾਂ ਨੂੰ ਹਕੂਮਤੀ ਗਲਿਆਰਿਆਂ ਦੀ ਯੋਜਨਾਬੱਧ ਸਰਪ੍ਰਸਤੀ ਮਿਲੀ ਹੋਈ ਹੈ।