ਵਾਹੁਟੀ ਨੂੰ ਮੌਤ ਦੀ ਗੱਡੀ ਚਾੜਨ ਲਈ ਪਤੀ ਨੇ ਹੀ ਦਿੱਤੀ ਸੀ ਸੁਪਾਰੀ; ਪੁਲਿਸ ਨੇ ਇੰਝ ਸੁਲਝਾਇਆ ਲੁਧਿਆਣਾ ਕਤਲ ਕਾਂਡ
ਪਤੀ ਤੇ ਗਰਲ ਫਰੈਂਡ ਸਮੇਤ 6 ਗ੍ਰਿਫਤਾਰ
ਸੰਜੀਵ ਸੂਦ
ਲੁਧਿਆਣਾ 17 ਫਰਵਰੀ 2025- ਲੁਧਿਆਣਾ ਪੁਲਿਸ ਨੇ ਮਾਨਵੀ ਮਰਡਰ ਕੇਸ ਨੂੰ ਕੁਝ ਘੰਟਿਆਂ ਵਿਚ ਹੀ ਸੁਲਝਾ ਲਿਆ ਹੈ। ਪੁਲਸ ਨੇ ਮ੍ਰਿਤਕਾ ਦੇ ਪਤੀ ਸਮੇਤ 6 ਮੁਲਜ਼ਮਾਂ ਨੂੰ ਕਾਬੂ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪੁਲਸ ਕਮਿਸ਼ਨਰ ਕੁਲਦੀਪ ਚਾਹਲ ਨੇ ਦੱਸਿਆ ਕਿ ਮਾਨਵੀ ਦਾ ਕਤਲ ਕਿਸੇ ਹੋਰ ਨੇ ਨਹੀਂ ਸਗੋਂ ਉਸ ਦੇ ਪਤੀ ਅਨੋਖ ਮਿੱਤਲ ਨੇ ਹੀ ਕਰਵਾਇਆ ਹੈ।
ਉਨ੍ਹਾਂ ਦੱਸਿਆ ਕਿ ਅਨੋਖ ਦੇ ਇਕ ਕੁੜੀ ਨਾਲ ਨਾਜਾਇਜ਼ ਸਬੰਧ ਸਨ। ਉਸ ਨਾਲ ਵਿਆਹ ਕਰਵਾਉਣ ਲਈ ਕੁੜੀ ਨਾਲ ਰਲ਼ ਕੇ ਪਲਾਨ ਬਣਾਇਆ ਤੇ ਡੇਹਲੋਂ ਇਲਾਕੇ ਵਿਚ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਪੁਲਸ ਨੇ ਇਸ ਮਾਮਲੇ ਵਿਚ ਅਨੋਖ ਮਿੱਤਲ ਸਣੇ 6 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਦੱਸ ਦਈਏ ਕਿ ਡੇਹਲੋਂ ਬਾਈਪਾਸ ’ਤੇ ਬੀਤੀ ਰਾਤ ਲਿਪਸੀ (32) ਦਾ ਕਤਲ ਕਰ ਦਿੱਤਾ ਗਿਆ ਸੀ। ਇਸ ਦੌਰਾਨ ਉਸ ਦੇ ਪਤੀ ਅਨੋਖ ਮਿੱਤਲ ਪੁੱਤਰ ਕੇਵਲ ਕ੍ਰਿਸ਼ਨ ਮਿੱਤਲ ਵਾਸੀ ਲੁਧਿਆਣਾ, ਜੋ ਕਿ ‘ਆਪ’ ਨਾਲ ਜੁੜਿਆ ਹੋਇਆ ਹੈ, ਨੇ ਡੇਹਲੋਂ ਪੁਲਸ ਨੂੰ ਦਿੱਤੇ ਬਿਆਨ ਵਿਚ ਕਿਹਾ ਸੀ ਕਿ ਬੀਤੀ ਰਾਤ ਉਹ ਅਤੇ ਉਸ ਦੀ ਪਤਨੀ ਡੇਹਲੋਂ-ਮਾਲੇਰਕੋਟਲਾ ਰੋਡ ’ਤੇ ਪੋਹੀੜ ਨੇੜੇ ਇਕ ਰੈਸਟੋਰੈਂਟ ’ਚੋਂ ਖਾਣਾ ਖਾ ਕੇ ਵਾਪਸ ਲੁਧਿਆਣਾ ਜਾ ਰਹੇ ਸਨ ਤਾਂ ਡੇਹਲੋਂ ਬਾਈਪਾਸ ’ਤੇ 12.45 ਵਜੇ ਬਾਥਰੂਮ ਕਰਨ ਲਈ ਗੱਡੀ ਰੋਕੀ।
ਇਸ ਦੌਰਾਨ ਪਿੱਛਿਓਂ ਆਈ ਇਕ ਗੱਡੀ ਵਿਚੋਂ 5-6 ਵਿਅਕਤੀਆਂ ਨੇ ਉੱਤਰ ਕੇ ਪਹਿਲਾਂ ਉਸ ਦੀ ਲੱਤ ’ਤੇ ਲੋਹੇ ਦੀ ਰਾਡ ਨਾਲ ਵਾਰ ਕੀਤਾ ਅਤੇ ਫਿਰ ਮੂੰਹ ਵਿਚ ਕੱਪੜਾ ਪਾ ਕੇ ਉਸ ਦਾ ਮੂੰਹ ਬੰਦ ਕਰ ਦਿੱਤਾ, ਜਿਸ ਕਾਰਨ ਉਹ ਬੇਹੋਸ਼ ਹੋ ਗਿਆ।
ਉਸ ਨੇ ਦੱਸਿਆ ਸੀ ਕਿ 15-20 ਮਿੰਟ ਬਾਅਦ ਜਦੋਂ ਉਸ ਨੂੰ ਹੋਸ਼ ਆਇਆ ਤਾਂ ਦੇਖਿਆ ਕਿ ਉਸ ਦੀ ਕਾਰ ਉੱਥੇ ਨਹੀਂ ਸੀ ਅਤੇ ਉਸ ਦੀ ਪਤਨੀ ਸੜਕ ’ਤੇ ਗੰਭੀਰ ਜ਼ਖ਼ਮੀ ਹਾਲਤ ਵਿਚ ਪਈ ਸੀ, ਜਿਸ ਦੇ ਸਰੀਰ ’ਤੇ ਤੇਜ਼ਧਾਰ ਹਥਿਆਰਾਂ ਦੇ ਨਿਸ਼ਾਨ ਸਨ।
ਸੂਚਨਾ ਮਿਲਣ ’ਤੇ ਡੇਹਲੋਂ ਥਾਣੇ ਦੇ ਮੁਖੀ ਇੰਸ. ਸੁਖਜਿੰਦਰ ਸਿੰਘ ਪੁਲਸ ਪਾਰਟੀ ਸਮੇਤ ਮੌਕੇ ’ਤੇ ਪੁੱਜੇ ਤੇ ਲਿਪਸੀ ਨੂੰ ਸਿਵਲ ਹਸਪਤਾਲ ਡੇਹਲੋਂ ਵਿਖੇ ਲੈ ਗਏ, ਜਿਥੋਂ ਡਾਕਟਰਾਂ ਨੇ ਉਸ ਨੂੰ ਦਯਾਨੰਦ ਹਸਪਤਾਲ ਲੁਧਿਆਣਾ ਭੇਜ ਦਿੱਤਾ ਪਰ ਉੱਥੇ ਉਸ ਦੀ ਮੌਤ ਗਈ। ਉਸ ਨੇ ਦੱਸਿਆ ਕਿ ਲੁਟੇਰੇ ਉਸ ਦਾ ਸੋਨੇ ਦਾ ਕੜਾ, ਚੇਨ ਤੇ ਉਸ ਦੀ ਰਿਟਜ਼ ਕਾਰ ਲੈ ਕੇ ਫ਼ਰਾਰ ਹੋ ਗਏ।
ਸੀ.ਆਈ.ਏ. ਇੰਚਾਰਜ ਇੰਸਪੈਕਟਰ ਬਿਕਰਮਜੀਤ ਸਿੰਘ ਘੁੰਮਣ ਨੇ ਵੀ ਮੌਕੇ ਦਾ ਜਾਇਜ਼ਾ ਲਿਆ। ਪੁਲਸ ਨੂੰ ਅਨੋਖ ਮਿੱਤਲ ਵੱਲੋਂ ਦੱਸੀ ਸਾਰੀ ਕਹਾਣੀ ਸ਼ੱਕੀ ਲੱਗ ਰਹੀ ਸੀ ਤੇ ਜਦੋਂ ਡੂੰਘਾਈ ਨਾਲ ਛਾਣਬੀਣ ਕੀਤੀ ਗਈ ਤਾਂ ਪੁਲਸ ਦਾ ਸ਼ੱਕ ਸਹੀ ਨਿਕਲਿਆ। ਲੁੱਟ ਦੀ ਸਾਰੀ ਕਹਾਣੀ ਇਕ ਡਰਾਮਾ ਨਿਕਲੀ ਤੇ ਅਸਲ ਵਿਚ ਅਨੋਖ ਮਿੱਤਲ ਹੀ ਕਤਲ ਦਾ ਮਾਸਟਰ ਮਾਈਂਡ ਨਿਕਲਿਆ।