ਗੁਰਦੁਆਰਾ ਸਾਹਿਬ 'ਚ ਚੋਲਾ ਸਾਹਿਬ ਬਦਲਣ ਸਮੇਂ 100 ਫੁੱਟ ਉੱਪਰ ਫਸਿਆ ਸੀ ਨੌਜਵਾਨ, ਆਰਮੀ ਨੇ ਇੰਝ ਬਚਾਈ ਜਾਨ
ਆਰਮੀ ਦੀ ਅਮੋਘ ਡਿਵੀਜ਼ਨ ਦੇ ਅਧਿਕਾਰੀਆਂ ਦੀ ਸੂਝ-ਬੂਝ ਅਤੇ ਬਹਾਦਰੀ ਨੇ ਬਚਾਇਆ ਨੌਜਵਾਨ
ਫਾਜਿਲਕਾ, 31 ਦਸੰਬਰ 2025- ਆਰਮੀ ਦੀ ਅਮੋਘ ਡਿਵੀਜ਼ਨ ਵੱਲੋਂ ਪਿੰਡ ਗਿੱਦੜਾਵਾਲੀ ਵਿਖੇ ਸਥਾਨਕ ਗੁਰਦੁਆਰਾ ਸਾਹਿਬ ਦੇ ਨਿਸ਼ਾਨ ਸਾਹਿਬ ਦਾ ਚੋਲਾ ਚੜ੍ਹਾਉਣ ਦੌਰਾਨ ਤਾਰ ਟੁੱਟਣ ਕਾਰਨ ਉੱਪਰ ਅਟਕੇ ਨੌਜਵਾਨ ਨੂੰ ਬਹੁਤ ਦਲੇਰੀ ਦੇ ਨਾਲ ਬਚਾਅ ਕਰਕੇ ਉਤਾਰਿਆ ਗਿਆ।
ਸਰਕਾਰੀ ਬੁਲਾਰੇ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਸੂਚਨਾ ਮਿਲੀ ਸੀ ਕਿ ਸਥਾਨਕ ਪਿੰਡ ਗਿੱਦੜਾਂਵਾਲੀ ਦਾ ਇੱਕ ਨੌਜਵਾਨ ਜੋ ਕਿ ਪਿੰਡ ਦੇ ਗੁਰਦੁਆਰਾ ਸਾਹਿਬ ਦਾ ਨਿਸ਼ਾਨ ਸਾਹਿਬ ਦਾ ਚੋਲਾ ਚੜ੍ਹਾਉਣ ਲਈ ਉੱਪਰ ਚੜ੍ਹਿਆ ਸੀ।
ਇਸ ਦੌਰਾਨ ਅਚਾਨਕ ਤਾਰ ਟੁੱਟਣ ਕਾਰਨ ਨੌਜਵਾਨ ਉੱਪਰ ਹੀ ਅਟਕ ਗਿਆ। ਇਸ ਸਬੰਧੀ ਸੂਚਨਾ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਦਿੱਤੀ ਗਈ ਜਿਸ 'ਤੇ ਫੌਰਨ ਕਾਰਵਾਈ ਕਰਦੇ ਹੋਏ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਆਰਮੀ ਦੀ ਅਮੋਘ ਡਿਵੀਜ਼ਨ ਦੇ ਅਧਿਕਾਰੀਆਂ ਦੇ ਨਾਲ ਤਾਲਮੇਲ ਕੀਤਾ।
ਆਰਮੀ ਵੱਲੋਂ ਤੁਰੰਤ ਕਾਰਵਾਈ ਕਰਦੇ ਹੋਏ ਬੜੀ ਸੂਝ-ਬੂਝ ਅਤੇ ਦਲੇਰੀ ਦੇ ਨਾਲ ਕਾਫੀ ਉਚਾਈ 'ਤੇ ਅਟਕੇ ਨੌਜਵਾਨ ਨੂੰ ਰੈਸਕਿਊ ਕਰਕੇ ਨੀਚੇ ਉਤਾਰਿਆ। ਆਰਮੀ ਦੀ ਸੂਝਬੂਝ ਕਾਰਨ ਨੌਜਵਾਨ ਨੂੰ ਸੁਰੱਖਿਅਤ ਨੀਚੇ ਉਤਾਰਿਆ ਗਿਆ ਅਤੇ ਉਹ ਹੁਣ ਪੂਰੀ ਤਰ੍ਹਾਂ ਨਾਲ ਬਿਲਕੁਲ ਠੀਕ ਹੈ ਤੇ ਕਿਸੇ ਵੀ ਤਰ੍ਹਾਂ ਦੀ ਕੋਈ ਅਣਸੁਖਾਵੀਂ ਘਟਨਾ ਨਹੀਂ ਵਾਪਰੀ।
ਡਿਪਟੀ ਕਮਿਸ਼ਨਰ ਨੇ ਬੜੀ ਬਹਾਦਰੀ ਅਤੇ ਸੂਝ-ਬੂਝ ਨਾਲ ਕੰਮ ਕਰਨ ਦੇ ਲਈ ਆਰਮੀ ਅਮੋਘ ਡਿਵੀਜ਼ਨ ਦਾ ਵਿਸ਼ੇਸ਼ ਧੰਨਵਾਦ ਵੀ ਕੀਤਾ। ਉਨ੍ਹਾਂ ਨੇ ਦੱਸਿਆ ਕਿ ਅਜਿਹੇ ਸਮੇਂ ਵਿੱਚ ਆਰਮੀ ਨੇ ਹਮੇਸ਼ਾ ਮੋਹਰੀ ਭੂਮਿਕਾ ਨਿਭਾਈ ਹੈ ਅਤੇ ਹਰ ਖੇਤਰ ਵਿੱਚ ਜਦੋਂ ਵੀ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਜ਼ਰੂਰਤ ਪਈ ਹੈ, ਆਰਮੀ ਦੇ ਅਧਿਕਾਰੀਆਂ ਅਤੇ ਜਵਾਨਾਂ ਨੇ ਬੜੀ ਦਲੇਰੀ ਦੇ ਨਾਲ ਕੰਮ ਕਰਦੇ ਹੋਏ ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਸਹਾਇਤਾ ਕੀਤੀ ਹੈ।