ਸਿਹਤ ਲਈ ਫਾਇਦੇਮੰਦ ਹੁੰਦਾ ਹੈ ਘਰਾਟ ਚੱਕੀਆਂ ਨਾਲ ਪੀਸਿਆ ਆਟਾ
ਪਰ ਫਿਰ ਵੀ ਮੁੱਕਦੇ ਜਾ ਰਹੇ ਘਰਾਟ
ਰੋਹਿਤ ਗੁਪਤਾ
ਗੁਰਦਾਸਪੁਰ , 13 ਜੁਲਾਈ 2025 :
ਕੋਈ ਸਮਾਂ ਸੀ ਜਦੋਂ ਲੋਕ ਨਹਿਰੀ ਪਾਣੀ ਨਾਲ ਚੱਲਣ ਵਾਲੀਆਂ ਘਰਾਟ ਚੱਕੀਆਂ ਤੋਂ ਆਟਾ ਪਿਸਵਾਉਣ ਨੂੰ ਹੀ ਤਰਜੀਹ ਦਿੰਦੇ ਸਨ ਕਿਉਂਕਿ ਇਹਨਾਂ ਚੱਕੀਆਂ ਨਾਲ ਪੀਸਿਆ ਆਟਾ ਪੂਰੀ ਤਰ੍ਹਾਂ ਨਾਲ ਕੁਦਰਤੀ ਗੁਣਾਂ ਨਾਲ ਭਰਪੂਰ ਹੁੰਦਾ ਹੈ ਪਰ ਹੌਲੀ ਹੌਲੀ ਆਧੁਨਿਕ ਮਸ਼ੀਨੀ ਯੁਗ ਆ ਗਿਆ ਤੇ ਘਰਾਟ ਚੱਕੀਆਂ ਦਾ ਚਲਨ ਘੱਟਦਾ ਗਿਆ । ਜਿਲਾ ਗੁਰਦਾਸਪੁਰ ਵਿੱਚ ਜਿੱਥੇ ਕਿਸੇ ਸਮੇਂ 60_ 65 ਘਰਾਟ ਚੱਕੀਆਂ ਹੁੰਦੀਆਂ ਸੀ ਉੱਥੇ ਹੀ ਹੁਣ ਸਿਰਫ ਤਿੰਨ ਘਰਾਟ ਚੱਕੀਆ ਰਹਿ ਗਈਆਂ ਹਨ। ਦੱਸ ਦਈਏ ਕਿ ਇਹ ਚੱਕੀਆਂ ਨਹਿਰੀ ਪਾਣੀ ਦੇ ਬਹਾਵ ਨਾਲ ਚਲਦੀਆਂ ਹਨ। ਜਦੋਂ ਨਹਿਰੀ ਪਾਣੀ ਦਾ ਬਹਾਵ ਤੇਜ਼ ਹੁੰਦਾ ਹੈ ਤਾਂ ਕੁਦਰਤੀ ਪੱਥਰਾਂ ਨਾਲ ਬਣੀਆਂ ਇਹ ਚੱਕੀਆਂ ਘੁੰਮਣੀਆਂ ਸ਼ੁਰੂ ਹੁੰਦੀਆਂ ਹਨ ਅਤੇ ਇਹਨਾਂ ਵਿੱਚ ਪਾਈ ਗਈ ਕਣਕ ਪਿੱਸਣੀ ਸ਼ੁਰੂ ਹੋ ਜਾਂਦੀ ਹੈ ਪਰ ਜਦੋਂ ਨਹਿਰੀ ਪਾਣੀ ਪਿੱਛੋਂ ਬੰਦ ਹੋ ਜਾਂਦਾ ਹੈ ਤਾਂ ਇਹ ਚੱਕੀਆਂ ਵੀ ਬੰਦ ਕਰ ਦਿੱਤੀ ਜਾਂਦੀਆਂ ਹਨ । ਹਾਲਾਂਕਿ ਘਰਾਟ ਚੱਕੀਆਂ ਨਾਲ ਆਟਾ ਪਿਸਵਾਉਣ ਨੂੰ ਅੱਜ ਵੀ ਕੁਝ ਲੋਕ ਤਰਜੀਹ ਦਿੰਦੇ ਹਨ ਜੋ ਇਸ ਦਾ ਮੁੱਲ ਜਾਣਦੇ ਹਨ ।