ਬਾਬੂਸ਼ਾਹੀ ਡਾਟ ਕਾਮ ਦਾ ਥੋੜੇ ਸਮੇਂ ਚ ਹੀ ਵਿਸ਼ਵ ਭਰ ਦੇ ਪੰਜਾਬੀਆਂ ਚ ਪ੍ਰਵਾਨ ਹੋਣਾ ਬਲਜੀਤ ਬੱਲੀ ਦੀ ਨਿਰੰਤਰ ਸਾਧਨਾ ਤੇ ਸਹਿਯੇਗੀ ਟੀਮ ਦੇ ਸਹਿਯੋਗ ਦਾ ਫ਼ਲ ਹੈ। ਅਜੇ ਕੱਲ੍ਹ ਦੀ ਗੱਲ ਹੈ, ਪੰਜਾਬ ਸਟੂਡੈਂਟਸ ਯੂਨੀਅਨ ਦੇ ਮੋਗਾ ਸੰਘਰਸ਼ ਚੋਂ ਨਿਕਲਿਆ ਰਾਮਪੁਰਾ ਫੂਲ ਦਾ ਇਹ ਨੌਜਵਾਨ ਪੰਜਾਬੀ ਟ਼ਿਬਿਊਨ ਚ ਲਿਣ ਲੱਗ ਪਿਆ। ਕੁਝ ਸਮੇਂ ਚ ਹੀ ਰਾਮਪੁਰਾ ਫੂਲ ਪੱਤਰਕਾਰੀ ਦਾ ਕੇਂਦਰ ਧੁਰਾ ਬਣ ਗਿਆ। ਪੰਜਾਬੀ ਟ੍ਰਿਬਿਊਨ ਤੇ ਅਜੀਤ ਚ ਸਟਾਫ ਰੀਪੋਰਟਰ ਬਣ ਕੇ ਬਲਜੀਤ ਨੇ ਵਿਸ਼ਵ ਪਛਾਣ ਹਾਸਲ ਕੀਤੀ।
ਉਸ ਦੀ ਤਿਰਛੀ ਨਜ਼ਰ ਨਾਲ ਹੀ ਖਬਰ ਵਿਚਲੀ ਖਬਰ ਦੀ ਰੀਤ ਪਈ।
ਬਾਬੂਸ਼ਾਹੀ ਡਾਟ ਕਾਮ ਨੇ ਇਲੈਕਟਰਾਨਿਕ ਸੰਚਾਰ ਮਾਧਿਅਮ ਚ ਪੈਂਠ ਬਣਾਈ ਹੈ। ਇਹ ਨਿਰੰਤਰ ਸਾਧਨਾ ਦਾ ਮਿੱਠਾ ਫ਼ਲ ਹੈ।
ਕਰੋੜਪਤੀ ਪਾਠਕ ਘੇਰਾ ਜ਼ਿੰਦਾਬਾਦ।
ਉਸਤਾਦ ਜੀ
ਉਸਤਾਦ ਇਸ ਲਈ ਕਿਉਂਕਿ ਮੇਰੇ ਬੇਲੀ ਬਲਜੀਤ ਨੇ ਹੀ ਮੈਨੂੰ ਪੰਜਾਬੀ ਚ ਟਾਈਪ ਕਰਨਾ ਸਿਖਾਇਆ ਹੈ, ਜਿਸ ਨਾਲ ਮੈਂ ਸ਼ਬਦ ਟੱਬਰ ਚ ਬਹਿਣ ਜੋਗਾ ਹੋਇਆ ਹਾਂ। ਮੁਬਾਰਕ ਸਾਰੀ ਟੀਮ ਨੂੰ। ਮੈਂ ਵੀ ਬਾਬੂਸ਼ਾਹੀ ਲਈ ਲਿਖ ਕੇ ਰੱਜ ਮਹਿਸੂਸ ਕਰਦਾ ਹਾਂ। ਪਿਛਲੇ ਸਾਲ ਬਲਜੀਤ ਨੇ ਮੈਨੂੰ ਵੀ ਬਾਬੂਸ਼ਾਹੀ ਡਾਟ ਕਾਮ ਦਾ ਆਨਰੇਰੀ ਸੰਪਾਦਕ(ਸਾਹਿੱਤ) ਦਾ ਅਧਿਕਾਰ ਪੱਤਰ ਮੇਰੇ ਮੁਰਸ਼ਦ ਡਾ: ਐੱਸ ਪੀ ਸਿੰਘ ਸਾਬਕਾ ਵਾਈਸ ਚਾਂਸਲਰ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੀ ਹਾਜ਼ਰੀ ਚ ਮੇਰੇ ਗ਼ਜ਼ਲ ਸੰਗ੍ਰਹਿ ਰਾਵੀ ਦੇ ਲੋਕ ਅਰਪਨ ਸਮਾਰੋਹ ਮੌਕੇ ਜੀ ਜੀ ਐੱਨ ਖਾਲਸਾ ਕਾਲਿਜ ਲੁਧਿਆਣਾ ਚ ਸੌਂਪੀ। ਮੈਂ ਬਲਜੀਤ ਦੀ ਮੁਹੱਬਤ ਤੇ ਮਿਹਨਤ ਅੱਗੇ ਨਤਮਸਤਕ ਹਾਂ।
ਮੈਂ ਆਪਣੀ ਇਹ ਗ਼ਜ਼ਲ ਬਾਬੂ ਸ਼ਾਹੀ ਡਾਟ ਕਾਮ ਦੇ ਮਿਹਨਤੀ ਕਾਮਿਆਂ ਤੇ ਬਲਜੀਤ ਬੱਲੀ ਪਰਿਵਾਰ ਦੇ ਨਾਮ ਕਰਦਾ ਹਾਂ।
ਗ਼ਜ਼ਲ
ਨਿਸ਼ਚਾ ਧਾਰ ਤੁਰੋ ਤਾਂ ਕਾਦਰ ਮੰਜ਼ਿਲ ਨੇੜੇ ਕਰ ਦੇਂਦਾ ਹੈ।
ਸ਼ਿਵਾ ਦੇਵਤਾ,ਬੇਹਿੰਮਤੇ ਨੂੰ ,ਓਦਾਂ ਕਿੱਥੇ ਵਰ ਦੇਂਦਾ ਹੈ।
ਰਹਿਮਤ ਦਾ ਮੀਂਹ ਸੁੱਤਿਆਂ ਉੱਤੇ ਤੱਕਿਆ ਨਹੀਂ ਮੈਂ ਕਦੇ ਬਰਸਦਾ,
ਹਿੰਮਤੀਆਂ ਨੂੰ ਦਾਤਾਂ ਦੇ ਦੇ ਝੋਲੀ ਨਿੱਕੀ ਕਰ ਦੇਂਦਾ ਹੈ।
ਹੱਸ ਕੇ ਤੱਕਿਆਂ ਧਰਤੀ ਸਾਰੀ ਫੁੱਲ ਕਲੀਆਂ ਖ਼ੁਸ਼ਬੋਆਂ ਬਣਦੀ,
ਅੱਖ ਵਿੱਚ ਅੱਥਰੂ ਹੋਣ ਤਾਂ ਸ਼ੀਸ਼ਾ ਚਿਹਰਾ ਧੁੰਦਲਾ ਕਰ ਦੇਂਦਾ ਹੈ।
ਤੇਰੀ ਮੇਰੀ ਸ਼ਕਤੀ ਵੇਖੀਂ,ਇੱਕ ਨੁਕਤੇ ਤੇ ਰੁਕ ਨਾ ਜਾਵੇ,
ਪੱਥਰ ਦੇ ਧੁਰ ਅੰਦਰ ਰੱਬ ਹੀ,ਕੀੜਿਆਂ ਨੂੰ ਵੀ ਘਰ ਦੇਂਦਾ ਹੈ।
ਚੋਤੋ ਰੱਖੀਂ,ਹਿੰਮਤ ਅੱਗੇ ਨੱਚਦੀ ਫਿਰਦੀ ਧਨ ਦੀ ਦੇਵੀ,
ਜੇ ਪਰਵਾਜ਼ ਪਰਿੰਦਾ ਚਾਹੇ ,ਤਾਂ ਹਿੰਮਤ ਨੂੰ ਪਰ ਦੇਂਦਾ ਹੈ।
ਮੈਂ ਬਣਦਾਂ ਜਦ ਜੁਗਨੂੰ ,ਤਾਰਾ, ਚੰਨ ਜੇ ਰਾਤ ਹਨ੍ਹੇਰੀ ਅੰਦਰ,
ਤੜਸਸਾਰ ਪਰਭਾਤ ਦੇ ਮਗਰੋਂ, ਸੂਰਜ ਮਮਟੀ ਧਰ ਦੇਂਦਾ ਹੈ।
ਗਗਨ ਥਾਲ ਵਿੱਚ ਚੰਨ ਤੇ ਸੂਰਜ ਜੇਕਰ ਦੀਵੇ ਦਿਸਦੇ ਹੋਵਣ,
ਮੇਰਾ ਬਾਬਾ ਸੁਪਨਿਆਂ ਨੂੰ ਵੀ ,ਧਰਤੀ ਜਿੱਡਾ ਬਰ ਦੇਂਦਾ ਹੈ।
-
ਗੁਰਭਜਨ ਗਿੱਲ , ਲੇਖਕ
gurbhajansinghgill@gmail.com
9872631199
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.