ਮੀਟ ਦਿ ਚੈਂਪੀਅਨਜ਼ ਆਫ਼ ਗੋਲਡ ਕੋਸਟ
ਹਿਨਾ ਦੇ ਸੁਨਹਿਰੀ ਨਿਸ਼ਾਨੇ ਨੇ ਭਾਰਤ ਦੀ ਗੋਲਡਨ ਮੁਹਿੰਮ ਨੂੰ ਬਰੇਕਾਂ ਤੋਂ ਬਚਾਇਆ
ਪਾਵਰਲਿਫਟਰ ਸਚਿਨ ਚੌਧਰੀ ਨੇ ਕਾਂਸੀ ਦਾ ਤਮਗਾ ਤੋਲਿਆ
ਪੰਜ ਪੁਰਸ਼ ਮੁੱਕੇਬਾਜ਼ਾਂ ਨੇ ਸੈਮੀ ਫਾਈਨਲ ਚ ਦਾਖਲਾ ਪਾ ਕੇ ਤਮਗਾ ਪੱਕਾ ਕੀਤਾ
ਹਾਕੀ ਵਿੱਚ ਪੁਰਸ਼ ਤੇ ਮਹਿਲਾ ਦੋਵੇਂ ਟੀਮਾਂ ਨੇ ਸੈਮੀ ਫਾਈਨਲ ਦੀ ਟਿਕਟ ਕਟਾਈ
ਰਾਸ਼ਟਰਮੰਡਲ ਖੇਡਾਂ ਵਿੱਚ ਭਾਰਤੀ ਖੇਡ ਦਲ ਲਈ ਅੱਜ ਦਾ ਦਿਨ ਪਿਛਲੇ ਦੋ ਦਿਨਾਂ ਮੁਕਾਬਲੇ ਠੀਕ-ਠਾਕ ਹੀ ਰਿਹਾ। ਚੌਥੇ ਤੇ ਪੰਜਵੇਂ ਦਿਨ ਤਿੰਨ-ਤਿੰਨ ਸੋਨ ਤਮਗੇ ਜਿੱਤਣ ਵਾਲੇ ਭਾਰਤੀ ਖੇਡ ਦਲ ਨੂੰ ਅੱਜ ਇਕ ਹੀ ਸੋਨ ਤਮਗਾ ਤੇ ਇਕ ਕਾਂਸੀ ਦਾ ਤਮਗਾ ਹਾਸਲ ਹੋਇਆ।ਭਾਰਤ ਨੇ ਹੁਣ ਤੱਕ ਕੁੱਲ 11 ਸੋਨ ਤਮਗੇ, ਚਾਰ ਚਾਂਦੀ ਦੇ ਅਤੇ ਛੇ ਕਾਂਸੀ ਦੇ ਤਮਗਿਆਂ ਸਣੇ ਕੁੱਲ 21 ਤਮਗੇ ਜਿੱਤੇ ਹਨ।ਪੰਜਾਬਣ ਨਿਸ਼ਾਨੇਬਾਜ਼ ਹਿਨਾ ਸਿੱਧੂ ਦੇ ਸੁਨਹਿਰੀ ਨਿਸ਼ਾਨੇ ਨੇ ਭਾਰਤ ਦੀਆਂ ਅੱਜ ਗੋਲਡ ਕੋਸਟ ਵਿਖੇ ਗੋਲਡਨ ਮੁਹਿੰਮ ਨੂੰ ਬਰੇਕਾਂ ਲੱਗਣ ਤੋਂ ਬਚਾ ਲਈਆਂ। ਹਿਨਾ ਸਿੱਧੂ ਨੇ 25 ਮੀਟਰ ਪਿਸਟਲ ਈਵੈਂਟ ਵਿੱਚ 38 ਦੇ ਸਕੋਰ ਨਾਲ ਖੇਡਾਂ ਦਾ ਨਵਾਂ ਰਿਕਾਰਡ ਬਣਾਉਂਦਿਆਂ ਸੋਨੇ ਦਾ ਤਮਗਾ ਜਿੱਤਿਆ। ਹਿਨਾ ਨੇ ਦੋ ਦਿਨ ਪਹਿਲਾਂ 10 ਮੀਟਰ ਪਿਸਟਲ ਵਿੱਚ ਚਾਂਦੀ ਦਾ ਤਮਗਾ ਜਿੱਤਿਆ ਸੀ। ਅੱਜ ਹਿਨਾ ਨੇ ਆਪਣੇ ਤਮਗੇ ਦਾ ਰੰਗ ਚਿੱਟੇ ਤੋਂ ਪੀਲੇ ਵਿੱਚ ਬਦਲ ਲਿਆ।ਪੰਜਾਬੀ ਖਿਡਾਰੀਆਂ ਦਾ ਵੀ ਇਨ੍ਹਾਂ ਖੇਡਾਂ ਵਿੱਚ ਇਹ ਹੁਣ ਤੱਕ ਦਾ ਚੌਥਾ ਤਮਗਾ ਹੈ।
ਪੈਰਾ ਸਪੋਰਟਸ ਦੇ ਖਿਡਾਰੀ ਸਚਿਨ ਚੌਧਰੀ ਨੇ ਕਾਂਸੀ ਦਾ ਤਮਗਾ ਜਿੱਤਿਆ। ਸਚਿਨ ਨੇ ਪਾਵਰਲਿਫਟਿੰਗ ਦੇ ਹੈਵੀਵੇਟ ਵਰਗ ਵਿੱਚ ਕੁੱਲ 181 ਕਿਲੋ ਭਾਰ ਚੁੱਕ ਕੇ ਕਾਂਸੀ ਦਾ ਤਮਗਾ ਜਿੱਤਿਆ।ਪੁਰਸ਼ਾਂ ਦੀ ਮੁੱਕੇਬਾਜ਼ੀ ਵਿੱਚ ਭਾਰਤ ਦੇ ਪੰਜ ਮੁੱਕੇਬਾਜ਼ਾਂ ਨੇ ਅੱਜ ਸੈਮੀ ਫਾਈਨਲ ਵਿੱਚ ਦਾਖਲਾ ਪਾ ਕੇ ਪੰਜ ਤਮਗੇ ਹੋਰ ਪੱਕੇ ਕਰ ਲਏ। ਪੁਰਸ਼ਾਂ ਦੀ ਮੁੱਕੇਬਾਜ਼ੀ ਵਿੱਚ ਅਮਿਤ ਨੇ 49 ਕਿਲੋ ਗ੍ਰਾਮ, ਮੁਹੰਮਦ ਹਸਾਮੂਦੀਨ ਨੇ 56 ਕਿਲੋ ਗ੍ਰਾਮ, ਮਨੋਜ ਕੁਮਾਰ ਨੇ 69 ਕਿਲੋ ਗ੍ਰਾਮ, ਨਮਨ ਤੰਵਰ ਨੇ 91 ਕਿਲੋ ਗ੍ਰਾਮ ਅਤੇ ਸਤੀਸ਼ ਕੁਮਾਰ ਨੇ 91 ਤੋਂ ਵੱਧ ਕਿਲੋ ਗ੍ਰਾਮ ਵਿੱਚ ਕੁਆਰਟਰ ਫਾਈਨਲ ਮੈਚ ਜਿੱਤੇ।
ਹਾਕੀ ਵਿੱਚ ਭਾਰਤ ਦੀਆਂ ਦੋਵੇਂ ਪੁਰਸ਼ ਤੇ ਮਹਿਲਾਵਾਂ ਦੀ ਟੀਮ ਨੇ ਅੱਜ ਖੇਡੇ ਲੀਗ ਮੈਚ ਜਿੱਤ ਕੇ ਸੈਮੀ ਫ਼ਾਈਨਲ ਦੀ ਟਿਕਟ ਕਟਾਈ।ਪੁਰਸ਼ ਹਾਕੀ ਵਿੱਚ ਭਾਰਤ ਨੇ ਪੂਲ ਬੀ ਵਿੱਚ ਲਗਾਤਾਰ ਦੂਜੀ ਜਿੱਤ ਦਰਜ ਕਰਦਿਆਂ ਸੈਮੀ ਫਾਈਨਲ ਵਿੱਚ ਸਥਾਨ ਪੱਕਾ ਕਰ ਲਿਆ। ਅੱਜ ਮਲੇਸ਼ੀਆ ਖਿਲਾਫ ਖੇਡੇ ਗਏ ਲੀਗ ਮੈਚ ਵਿੱਚ ਭਾਰਤ ਨੇ 2-1 ਨਾਲ ਜਿੱਤ ਦਰਜ ਕੀਤੀ। ਇਸ ਤੋਂ ਪਹਿਲਾਂ ਭਾਰਤ ਨੇ ਵੇਲਜ਼ ਨੂੰ 4-1 ਨਾਲ ਹਰਾਇਆ ਸੀ ਜਦੋਂ ਕਿ ਪਾਕਿਸਤਾਨ ਨਾਲ 2-2 ਦੀ ਬਰਾਬਰੀ ਕੀਤੀ ਸੀ। ਭਾਰਤ ਦੇ 7 ਅੰਕ ਹਨ ਅਤੇ ਆਖਰੀ ਮੈਚ ਇੰਗਲੈਂਡ ਖਿਲਾਫ ਹੈ।
ਅੱਜ ਦੇ ਮੈਚ ਵਿੱਚ ਜਿੱਤ ਦਾ ਸਿਹਰਾ ਡਰੈਗ ਫਲਿੱਕਰ ਹਰਮਨਪ੍ਰੀਤ ਸਿੰਘ ਜਾਂਦਾ ਹੈ ਜਿਸ ਨੇ ਦੋ ਗੋਲ ਕੀਤੇ, ਦੋਵੇਂ ਹੀ ਪੈਨਲਟੀ ਕਾਰਨਰ ਉਪਰ। ਹਰਮਨਪ੍ਰੀਤ ਨੇ ਪਹਿਲਾ ਗੋਲ ਤੀਜੇ ਅਤੇ ਦੂਜਾ ਗੋਲ 44ਵੇਂ ਮਿੰਟ ਵਿੱਚ ਕੀਤਾ। ਮਹਿਲਾ ਵਰਗ ਵਿੱਚ ਭਾਰਤੀ ਟੀਮ ਨੇ ਦੱਖਣੀ ਅਫ਼ਰੀਕਾ ਨੂੰ 1-0 ਨਾਲ ਹਰਾ ਕੇ ਲਗਾਤਾਰ ਤੀਜੀ ਜਿੱਤ ਨਾਲ ਸੈਮੀ ਫਾਈਨਲ ਵਿੱਚ ਦਾਖਲਾ ਪਾਇਆ। ਭਾਰਤ ਵੱਲੋਂ ਇਕਲੌਤਾ ਤੇ ਜੇਤੂ ਗੋਲ ਰਾਣੀ ਰਾਮਪਾਲ ਨੇ 47ਵੇਂ ਮਿੰਟ ਵਿੱਚ ਕੀਤਾ।
-
ਨਵਦੀਪ ਸਿੰਘ ਗਿੱਲ, ਖੇਡ ਮਾਹਿਰ ਅਤੇ ਲੇਖਕ
navdeepsinghgill82@gmail.com
97800-36216
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.