ਜਗਰਾਉਂ ਵੇਅਰਹਾਊਸ 'ਚ ਚੌਲਾਂ ਦਾ ਵਜ਼ਨ ਵਧਾਉਣ ਦਾ ਹੰਗਾਮਾ!
ਚਾਰ ਮੈਂਬਰੀ ਕਮੇਟੀ ਨੇ ਦਿੱਤੀ ਰਿਪੋਰਟ, ਐਸ.ਡੀ.ਐਮ. ਨੇ ਤੁਰੰਤ ਏਕਸ਼ਨ ਦੀ ਚੇਤਾਵਨੀ
ਦੀਪਕ ਜੈਨ, ਜਗਰਾਉਂ -
ਨੇੜਲੇ ਇੱਕ ਸਰਕਾਰੀ ਵੇਅਰਹਾਊਸ ਵਿੱਚ ਚੌਲਾਂ ਦੀਆਂ ਬੋਰੀਆਂ ਨੂੰ ਜਾਣ-ਬੁੱਝ ਕੇ ਗਿੱਲਾ ਕਰਨ ਦਾ ਦੋਸ਼ ਲੱਗਣ ਤੋਂ ਬਾਅਦ ਇਲਾਕੇ ਭਰ 'ਚ ਚਰਚਾ ਛਿੜ ਗਈ ਹੈ। ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਇਹ ਮਾਮਲਾ ਗੁੰਝਲਦਾਰ ਰੂਪ ਧਾਰਨ ਕਰ ਗਿਆ ਹੈ। ਵੀਡੀਓ ਵਿੱਚ ਦਿਖਾਇਆ ਗਿਆ ਕਿ ਗੋਦਾਮ ਅੰਦਰ ਚੌਲਾਂ ਦੀਆਂ ਬੋਰੀਆਂ 'ਤੇ ਪਾਣੀ ਛਿੜਕਿਆ ਜਾ ਰਿਹਾ ਸੀ ਤਾਂ ਜੋ ਉਨ੍ਹਾਂ ਦਾ ਵਜ਼ਨ ਵਧ ਜਾਵੇ।
ਇੰਸਪੈਕਟਰ ਦਾ ਪੱਖ: "ਮੁਰੰਮਤ ਦਾ ਕੰਮ ਚੱਲ ਰਿਹਾ ਸੀ"
ਵੇਅਰਹਾਊਸ ਇੰਸਪੈਕਟਰ ਸੰਜੀਵ ਬਹਿਲ ਨੇ ਦੋਸ਼ਾਂ ਨੂੰ ਪੂਰੀ ਤਰ੍ਹਾਂ ਰੱਦ ਕਰਦੇ ਕਿਹਾ ਕਿ ਗੋਦਾਮ ਵਿੱਚ ਉਸ ਸਮੇਂ ਕੰਸਟਰਕਸ਼ਨ ਦਾ ਕੰਮ ਚੱਲ ਰਿਹਾ ਸੀ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਪਾਈਪ ਮੁਰੰਮਤ ਲਈ ਵਰਤੀ ਜਾ ਰਹੀ ਸੀ, ਨਾ ਕਿ ਚੌਲਾਂ ਨੂੰ ਗਿੱਲਾ ਕਰਨ ਲਈ। ਬਹਿਲ ਅਨੁਸਾਰ, ਉਥੇ ਹੋਈ ਜਾਂਚ ਵਿਚ ਕੋਈ ਬੇਨਿਯਮੀ ਸਾਹਮਣੇ ਨਹੀਂ ਆਈ।
ਐਸਡੀਐਮ ਉਪਿੰਦਰਜੀਤ ਕੌਰ ਬਰਾੜ ਦਾ ਕੜਾ ਰਵੱਈਆਜਗਰਾਉਂ ਦੀ ਐਸਡੀਐਮ ਉਪਿੰਦਰਜੀਤ ਕੌਰ ਬਰਾੜ ਨੇ ਕਿਹਾ ਕਿ ਉਹ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈ ਰਹੀਆਂ ਹਨ ਅਤੇ ਤੁਰੰਤ ਜਾਂਚ ਦੇ ਹੁਕਮ ਜਾਰੀ ਕਰ ਦਿੱਤੇ ਹਨ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਜੇਕਰ ਕਿਸੇ ਵੀ ਅਧਿਕਾਰੀ ਜਾਂ ਕਰਮਚਾਰੀ ਦੁਆਰਾ ਵਜ਼ਨ ਘਪਲੇ ਦੀ ਪੁਸ਼ਟੀ ਹੋਈ ਤਾਂ ਕਾਰਵਾਈ ਕਾਨੂੰਨੀ ਤੌਰ 'ਤੇ ਕੀਤੀ ਜਾਵੇਗੀ। ਮੌਕੇ 'ਤੇ ਮਚੀ ਹੜਕੰਪ ਦੀ ਜਾਣਕਾਰੀ ਅਨੁਸਾਰ, ਜਦੋਂ ਸੂਚਿਤ ਵਿਅਕਤੀ ਗੋਦਾਮ 'ਤੇ ਪਹੁੰਚਿਆ, ਉਹ ਵੇਖ ਕੇ ਹੈਰਾਨ ਰਹਿ ਗਿਆ ਕਿ ਬੋਰੀਆਂ 'ਤੇ ਪਾਣੀ ਪਾਇਆ ਜਾ ਰਿਹਾ ਸੀ। ਪਹੁੰਚਦੇ ਹੀ ਪਾਈਪ ਬੰਦ ਕੀਤੀ ਗਈ ਅਤੇ ਕੁਝ ਕਰਮਚਾਰੀ ਉਥੋਂ ਤੁਰੰਤ ਦੌੜ ਗਏ। ਮੌਕੇ ਬਚੇ ਸਟਾਫ਼ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ।
ਜ਼ਿਲ੍ਹਾ ਮੈਨੇਜਰ ਦੀ ਪੁਸ਼ਟੀ ਅਤੇ ਚੇਤਾਵਨੀ
ਜ਼ਿਲ੍ਹਾ ਮੈਨੇਜਰ ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਵਾਇਰਲ ਵੀਡੀਓ ਮਾਮਲੇ ਦੀ ਜਾਂਚ ਲਈ ਚਾਰ ਮੈਂਬਰੀ ਕਮੇਟੀ ਤਿਆਰ ਕੀਤੀ ਗਈ ਸੀ ਜਿਸ ਨੇ ਆਪਣੀ ਰਿਪੋਰਟ ਤਿਆਰ ਕਰ ਕੇ ਜਮ੍ਹਾਂ ਕਰਾ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਉਹ ਕੱਲ੍ਹ ਇਸ ਰਿਪੋਰਟ ਦਾ ਵਿਸਤ੍ਰਿਤ ਅਧਿਐਨ ਕਰਨਗੇ ਅਤੇ ਦੋਸ਼ ਸਾਬਤ ਹੋਣ ਵਾਲੇ ਕਰਮਚਾਰੀਆਂ ਨੂੰ ਕਿਸੇ ਵੀ ਹਾਲਤ ਵਿੱਚ ਬਖਸ਼ਿਆ ਨਹੀਂ ਜਾਵੇਗਾ।
Click to Follow Babushahi Facebook page →