ਮਾਮਲਾ ਐਸਬੀ ਰਾਈਸ ਮਿਲ ਵਿੱਚ ਕਾਲਾ ਬਜਾਰੀ ਕਰਕੇ ਡੰਪ ਕੀਤੀ ਕਣਕ ਦਾ: ਮਾਰਕੀਟ ਕਮੇਟੀ ਨੇ ਆਪ ਬੀਜੀ ਕਣਕ ਦੇ ਮੰਗੇ ਸਬੂਤ
- ਮਾਮਲਾ ਐਸਡੀਐਮ ਵੱਲੋਂ ਆਪਣੇ ਹੱਥਾਂ ਵਿੱਚ ਲੈਣ ਤੋਂ ਬਾਅਦ ਮਾਰਕੀਟ ਕਮੇਟੀ ਦੀ ਖੁੱਲੀ ਸੀ ਨੀਂਦ
- ਰਾਈਸ ਮਿਲ ਮਾਲਕ ਨੇ ਆਪ ਬੀਜੀ ਹੋਈ ਕਣਕ ਸਟੋਰ ਕਰਨ ਦਿੱਤਾ ਹਵਾਲਾ
- ਮਾਰਕੀਟ ਕਮੇਟੀ ਨੇ ਆਪ ਬੀਜੀ ਕਣਕ ਦੇ ਮੰਗੇ ਸਬੂਤ
ਦੀਪਕ ਜੈਨ
ਜਗਰਾਉਂ, 16 ਜੁਲਾਈ 2025 - ਮਈ ਦੇ ਬੀਤੇ ਮਹੀਨੇ ਵਿੱਚ ਜਗਰਾਉਂ ਦੇ ਲਾਗਲੇ ਪਿੰਡ ਰਸੂਲਪੁਰ ਵਿਖੇ ਐਸਬੀ ਰਾਇਸ ਮਿਲ ਵਿੱਚ ਅਨਅਧਿਕਾਰਤ ਤੌਰ ਤੇ ਕਣਕ ਦੀਆਂ ਬੋਰੀਆਂ ਦੇ ਭੰਡਾਰ ਨੂੰ ਡੰਪ ਕਰਨ ਦਾ ਮਾਮਲਾ ਅਖਬਾਰਾਂ ਵਿੱਚ ਸੁਰਖੀਆਂ ਬਣਨ ਤੋਂ ਬਾਅਦ ਐਸਡੀਐਮ ਜਗਰਾਓ ਕਰਨਦੀਪ ਸਿੰਘ ਵੱਲੋਂ ਵਿਭਾਗ ਨੂੰ ਇੱਕ ਪੱਤਰ ਜਾਰੀ ਕਰ ਕਾਰਵਾਈ ਕਰਨ ਬਾਰੇ ਲਿਖਿਆ ਸੀ। ਇੱਥੇ ਤੁਹਾਨੂੰ ਦੱਸ ਦਈਏ ਕਿ ਜਦੋਂ ਇਹ ਮਾਮਲਾ ਸਬ ਡਵੀਜ਼ਨ ਜਗਰਾਉਂ ਦੇ ਉਪ ਮੰਡਲ ਮਜਿਸਟਰੇਟ ਕਰਨਦੀਪ ਸਿੰਘ ਦੇ ਧਿਆਨ ਵਿੱਚ ਆਇਆ ਤਾਂ ਉਹਨਾਂ ਨੇ ਪੂਰੀ ਸਖਤੀ ਕਰਦਿਆਂ ਹੋਇਆਂ ਇਸ ਮਾਮਲੇ ਨੂੰ ਆਪਣੇ ਕੰਟਰੋਲ ਵਿੱਚ ਲੈ ਲਿੱਤਾ ਅਤੇ ਫੂਡ ਸਪਲਾਈ ਮਹਿਕਮੇ ਦੇ ਉੱਚ ਅਧਿਕਾਰੀਆਂ ਅਤੇ ਸਰਕਾਰ ਨੂੰ ਕੀਤੀ ਗਈ ਇਸ ਕਾਲਾ ਬਜ਼ਾਰੀ ਤੋਂ ਵੀ ਜਾਣੂ ਕਰਵਾਇਆ।
ਉੰਝ ਤਾਂ ਸੈਲਰ ਮਾਲਕ ਕਿਸੇ ਵੀ ਨਿਯਮ ਦੇ ਅਧੀਨ ਆਪਣੇ ਸੈਲਰ ਅੰਦਰ ਇੰਨੇ ਵੱਡੇ ਪੱਧਰ ਤੇ ਕਣਕ ਦੀ ਸਟੋਰੇਜ ਨਹੀਂ ਕਰ ਸਕਦੇ ਅਤੇ ਸੈਲਰ ਸਿਰਫ ਝੋਨੇ ਸਟੋਰ ਕਰਨ ਦਾ ਹੀ ਅਧਿਕਾਰ ਰੱਖਦੇ ਹਨ ਅਤੇ ਸੈਲਰ ਕੋਲ ਸਿਰਫ ਅਤੇ ਸਿਰਫ ਝੋਨੇ ਅਤੇ ਚਾਵਲ ਅਤੇ ਝੋਨੇ ਤੋਂ ਪੈਦਾ ਹੋਈ ਫਕ ਵਗੈਰਾ ਸਟੋਰ ਕਰਨ ਦਾ ਹੀ ਲਾਇਸੈਂਸ ਹੁੰਦਾ ਹੈ। ਉਸ ਟਾਈਮ ਇੰਡੀਆ ਅਤੇ ਪਾਕਿਸਤਾਨ ਦੇ ਆਪਸੀ ਸੰਬੰਧਾਂ ਵਿੱਚ ਪਹਿਲਗਾਮ ਵਾਲੀ ਘਟਨਾ ਤੋਂ ਬਾਅਦ ਜੰਗ ਵਾਲਾ ਮਾਹੌਲ ਹੋਨ ਕਰਕੇ ਇਹ ਸਟੋਰ ਕੀਤੀ ਕਣਕ ਸੈਲਰ ਮਾਲਕਾਂ ਅਤੇ ਵਪਾਰੀਆਂ ਵੱਲੋਂ ਮਿਲੀ ਭੁਗਤ ਕਰਕੇ ਕੀਤੀ ਗਈ ਹੋ ਸਕਦੀ ਹੈ। ਜੇ ਜਾਣਕਾਰਾਂ ਦੀ ਮੰਨੀਏ ਤਾਂ ਇਸ ਮਾਮਲੇ ਵਿੱਚ ਸ਼ੈਲਰ ਮਾਲਕਾਂ ਤੇ ਮਾਮਲਾ ਦਰਜ ਹੋਣਾ ਬਣਦਾ ਸੀ ਅਤੇ ਉਕਤ ਸੈਲਰ ਦਾ ਸੈਲਰ ਲਾਈਸੰਸ ਵੀ ਰੱਦ ਹੋ ਸਕਦਾ ਸੀ।
ਉਸ ਤੋਂ ਬਾਅਦ ਮਾਰਕੀਟ ਕਮੇਟੀ ਵੱਲੋਂ ਰਾਈਸ ਮਿਲ ਮਾਲਕ ਨੂੰ ਲੱਖਾਂ ਰੁਪਈਆ ਦਾ ਜੁਰਮਾਨਾ ਵੀ ਕੀਤਾ ਗਿਆ ਸੀ ਜਿਸ ਦਾ ਉਹਨੇ ਹਾਲੇ ਤੱਕ ਭੁਗਤਾਨ ਨਹੀਂ ਕੀਤਾ। ਹੁਣ ਰਾਈਸ ਮਿਲ ਮਾਲਕ ਨੇ ਸਟੋਰ ਕੀਤੀ ਕਣਕ ਨੂੰ ਆਪ ਬੀਜੀ ਹੋਈ ਕਣਕ ਨੂੰ ਆਪਣੇ ਸੈਲਰ ਵਿੱਚ ਸਟੋਰ ਕਰਨ ਦਾ ਹਵਾਲਾ ਦਿੰਦੇ ਹੋਏ ਮਾਰਕੀਟ ਕਮੇਟੀ ਨੂੰ ਜਵਾਬ ਦਿੱਤਾ ਹੈ।
ਸੂਤਰਾਂ ਦੀ ਮੰਨੀਏ ਤਾਂ ਤਿੰਨ ਮਹੀਨੇ ਦਾ ਸਮਾਂ ਬੀਤ ਜਾਣ ਬਾਅਦ ਵੀ ਮਾਰਕੀਟ ਕਮੇਟੀ ਵੱਲੋਂ ਕੀਤੀ ਜਾ ਰਹੀ ਢਿੱਲੀ ਕਾਰਗੁਜ਼ਾਰੀ ਦੇ ਚਲਦੇ ਇੰਝ ਲੱਗਦਾ ਹੈ ਕਿ ਮਾਰਕੀਟ ਕਮੇਟੀ ਇਹ ਮਾਮਲੇ ਨੂੰ ਠੰਡੇ ਬਸਤੇ ਹੀ ਰੱਖਣਾ ਚਾਹੁੰਦੀ ਹੈ।
ਇਸ ਮਾਮਲੇ ਵਿੱਚ ਜਦੋਂ ਮਾਰਕੀਟ ਕਮੇਟੀ ਦੇ ਸੈਕਟਰੀ ਜਸਪਾਲ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਹਨਾਂ ਕਿਹਾ ਕਿ ਸੈਲਰ ਮਾਲਕ ਵੱਲੋਂ ਦਿੱਤੇ ਹਵਾਲੇ ਤੋਂ ਬਾਅਦ ਉਸ ਨੂੰ ਉਹਦੇ ਦੁਆਰਾ ਬੀਜੀ ਹੋਈ ਕਣਕ ਦੇ ਸਬੂਤ ਪੇਸ਼ ਕਰਨ ਲਈ ਤਿੰਨ ਦਿਨ ਦਾ ਸਮਾਂ ਦਿੱਤਾ ਗਿਆ ਹੈ।
ਸੈਕਟਰੀ ਜਸਪਾਲ ਨੇ ਦੱਸਿਆ ਕਿ ਜੇਕਰ ਸੈਲਰ ਮਾਲਕ ਵੱਲੋਂ ਦਿੱਤੇ ਗਏ ਹਵਾਲੇ ਦੇ ਪੁਖਤਾ ਸਬੂਤ ਤਿੰਨ ਦਿਨਾਂ ਚ ਪੇਸ਼ ਨਾ ਕੀਤੇ ਗਏ ਤਾਂ ਇਹ ਮਾਮਲਾ ਐਸਡੀਐਮ ਦਰਬਾਰ ਵਿੱਚ ਪਹੁੰਚੇਗਾ ਅਤੇ ਉਸ ਨੂੰ 10 ਗੁਣਾ ਜੁਰਮਾਨਾ ਵੀ ਕੀਤਾ ਜਾ ਸਕਦਾ ਹੈ।