RBI ਨੇ ਰੈਪੋ ਰੇਟ 5.25% 'ਤੇ ਰੱਖਿਆ ਬਰਕਰਾਰ; ਕਰਜ਼ੇ ਦੀਆਂ ਕਿਸ਼ਤਾਂ (EMI) 'ਚ ਫਿਲਹਾਲ ਕੋਈ ਬਦਲਾਅ ਨਹੀਂ!
ਮੁੰਬਈ, 8 ਅਪ੍ਰੈਲ 2026: ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਇਸ ਵਾਰ ਰੈਪੋ ਰੇਟ ਵਿੱਚ ਕੋਈ ਬਦਲਾਅ ਨਾ ਕਰਦੇ ਹੋਏ ਇਸ ਨੂੰ 5.25 ਫੀਸਦੀ 'ਤੇ ਬਰਕਰਾਰ ਰੱਖਿਆ ਹੈ। ਰਿਜ਼ਰਵ ਬੈਂਕ ਦੇ ਗਵਰਨਰ ਸੰਜੇ ਮਲਹੋਤਰਾ ਨੇ ਛੇ ਮੈਂਬਰੀ ਮੌਦਰਿਕ ਨੀਤੀ ਕਮੇਟੀ (MPC) ਦੀ ਬੈਠਕ ਤੋਂ ਬਾਅਦ ਇਸ ਦਾ ਐਲਾਨ ਕੀਤਾ। ਇਹ ਬੈਠਕ ਅਜਿਹੇ ਸਮੇਂ ਹੋਈ ਜਦੋਂ ਪੱਛਮੀ ਏਸ਼ੀਆ ਵਿੱਚ ਜੰਗੀ ਤਣਾਅ ਕਾਰਨ ਕੱਚੇ ਤੇਲ ਦੀਆਂ ਕੀਮਤਾਂ ਅਸਮਾਨ ਨੂੰ ਛੂਹ ਰਹੀਆਂ ਹਨ ਅਤੇ ਰੁਪਏ ਦੀ ਕੀਮਤ ਵਿੱਚ ਗਿਰਾਵਟ ਆਈ ਹੈ।
RBI ਨੇ ਫਰਵਰੀ 2025 ਤੋਂ ਹੁਣ ਤੱਕ ਵਿਆਜ ਦਰਾਂ ਵਿੱਚ ਕੁੱਲ 125 ਬੇਸਿਸ ਪੁਆਇੰਟ ਦੀ ਕਟੌਤੀ ਕੀਤੀ ਹੈ। ਸਾਲ 2019 ਤੋਂ ਬਾਅਦ ਪਹਿਲੀ ਵਾਰ ਦਰਾਂ ਇੰਨੀ ਤੇਜ਼ੀ ਨਾਲ ਹੇਠਾਂ ਲਿਆਂਦੀਆਂ ਗਈਆਂ ਹਨ। ਦਸੰਬਰ 2025 ਵਿੱਚ ਰੈਪੋ ਰੇਟ ਵਿੱਚ 25 ਬੇਸਿਸ ਪੁਆਇੰਟ ਦੀ ਕਟੌਤੀ ਕੀਤੀ ਗਈ ਸੀ, ਪਰ ਫਰਵਰੀ 2026 ਅਤੇ ਹੁਣ ਅਪ੍ਰੈਲ ਦੀ ਬੈਠਕ ਵਿੱਚ ਦਰਾਂ ਨੂੰ ਸਥਿਰ ਰੱਖਿਆ ਗਿਆ ਹੈ।
ਜੀਡੀਪੀ (GDP) ਗ੍ਰੋਥ ਦੇ ਅਨੁਮਾਨ
ਰਿਜ਼ਰਵ ਬੈਂਕ ਨੇ ਵਿੱਤੀ ਸਾਲ 2026-27 (FY27) ਲਈ ਆਰਥਿਕ ਗਤੀਵਿਧੀਆਂ ਦੇ ਬਿਹਤਰ ਰਹਿਣ ਦੀ ਉਮੀਦ ਜਤਾਈ ਹੈ। Q1 FY27-ਜੀਡੀਪੀ ਵਾਧੇ ਦਾ ਅਨੁਮਾਨ 6.7% ਤੋਂ ਵਧਾ ਕੇ 6.9% ਕਰ ਦਿੱਤਾ ਗਿਆ ਹੈ। Q2 FY27-ਜੀਡੀਪੀ ਗ੍ਰੋਥ ਦਾ ਅਨੁਮਾਨ 6.8% ਤੋਂ ਵਧਾ ਕੇ 7% ਕਰ ਦਿੱਤਾ ਗਿਆ ਹੈ। ਗਵਰਨਰ ਅਨੁਸਾਰ, ਭਾਰਤ ਅਜੇ ਵੀ ਵਿਦੇਸ਼ੀ ਨਿਵੇਸ਼ (FDI) ਲਈ ਇੱਕ ਆਕਰਸ਼ਕ ਦੇਸ਼ ਬਣਿਆ ਹੋਇਆ ਹੈ।
ਰੈਪੋ ਰੇਟ ਉਹ ਵਿਆਜ ਦਰ ਹੈ ਜਿਸ 'ਤੇ ਦੇਸ਼ ਦਾ ਕੇਂਦਰੀ ਬੈਂਕ (RBI) ਵਪਾਰਕ ਬੈਂਕਾਂ ਨੂੰ ਉਧਾਰ ਦਿੰਦਾ ਹੈ। ਜਦੋਂ ਬਾਜ਼ਾਰ ਵਿੱਚ ਮਹਿੰਗਾਈ ਵਧਦੀ ਹੈ, ਤਾਂ RBI ਰੈਪੋ ਰੇਟ ਵਧਾ ਦਿੰਦਾ ਹੈ ਤਾਂ ਜੋ ਕਰਜ਼ਾ ਮਹਿੰਗਾ ਹੋ ਜਾਵੇ ਅਤੇ ਲੋਕ ਖ਼ਰਚ ਘੱਟ ਕਰਨ। ਜਦੋਂ ਆਰਥਿਕਤਾ ਸੁਸਤ ਹੁੰਦੀ ਹੈ, ਤਾਂ ਦਰਾਂ ਘਟਾਈਆਂ ਜਾਂਦੀਆਂ ਹਨ ਤਾਂ ਜੋ ਸਸਤਾ ਕਰਜ਼ਾ ਮਿਲ ਸਕੇ ਅਤੇ ਬਾਜ਼ਾਰ ਵਿੱਚ ਖ਼ਰੀਦਦਾਰੀ ਵਧੇ।
ਤੁਹਾਡੀ EMI 'ਤੇ ਕੀ ਪਵੇਗਾ ਅਸਰ?
ਬੈਂਕਾਂ ਦੇ ਕਰਜ਼ੇ ਦੀਆਂ ਦਰਾਂ ਰੈਪੋ ਰੇਟ 'ਤੇ ਨਿਰਭਰ ਕਰਦੀਆਂ ਹਨ। ਰੈਪੋ ਰੇਟ ਸਥਿਰ ਰੱਖਣ ਦਾ ਮਤਲਬ ਹੈ ਕਿ ਤੁਹਾਡੇ ਹੋਮ ਲੋਨ, ਕਾਰ ਲੋਨ ਜਾਂ ਪਰਸਨਲ ਲੋਨ ਦੀਆਂ ਕਿਸ਼ਤਾਂ (EMI) ਫਿਲਹਾਲ ਉੱਥੇ ਹੀ ਰਹਿਣਗੀਆਂ। ਜੇਕਰ ਆਉਣ ਵਾਲੇ ਸਮੇਂ ਵਿੱਚ ਰੈਪੋ ਰੇਟ ਘਟਦਾ ਹੈ, ਤਾਂ ਹੀ ਤੁਹਾਡੀ EMI ਵਿੱਚ ਕਟੌਤੀ ਦੀ ਗੁੰਜਾਇਸ਼ ਬਣੇਗੀ।