ਮੰਨੀਆਂ ਮੰਗਾਂ ਲਾਗੂ ਹੋਣ ਅਤੇ ਫੜ੍ਹੇ ਮੁਲਾਜ਼ਮ ਰਿਹਾਅ ਹੋਣ ਤੋਂ ਬਾਅਦ ਕਰਾਂਗੇ ਹੜਤਾਲ ਖ਼ਤਮ- ਰੋਡਵੇਜ਼ ਮੁਲਾਜ਼ਮਾਂ ਦਾ ਵੱਡਾ ਐਲਾਨ
ਬਾਬੂਸ਼ਾਹੀ ਬਿਊਰੋ
ਚੰਡੀਗੜ੍ਹ, 30 ਨਵੰਬਰ 2025- ਰੋਡਵੇਜ਼ ਪੀਆਰਟੀਸੀ ਪਨਬੱਸ ਦੇ ਕੱਚੇ ਮੁਲਾਜ਼ਮਾਂ ਦੀ ਹੜਤਾਲ ਹਾਲੇ ਮੁੱਕੀ ਨਹੀਂ ਹੈ। ਹਾਲਾਂਕਿ ਮੀਟਿੰਗਾਂ ਦਾ ਦੌਰ ਵੀ ਵੇਖਣ ਨੂੰ ਮਿਲਿਆ ਪਰ ਫਿਲਹਾਲ ਕਿਸੇ ਵੀ ਤਰੀਕੇ ਦੀ ਰਾਹਤ ਮਿਲਦੀ ਨਜ਼ਰ ਨਹੀਂ ਆ ਰਹੀ। ਮੁਲਾਜ਼ਮ ਆਗੂਆਂ ਨੇ ਵੀਡੀਓ ਜਾਰੀ ਕਰਕੇ ਐਲਾਨ ਕੀਤਾ ਕਿ ਮੰਗਾਂ ਲਾਗੂ ਹੋਣ ਤੱਕ ਹੜਤਾਲ ਜਾਰੀ ਰਹੇਗੀ। ਆਗੂਆਂ ਨੇ ਕਿਹਾ ਕਿ ਕੱਚੇ ਮੁਲਾਜ਼ਮਾਂ ਦੀ ਰਿਹਾਈ ਹੋਣੀ ਜਰੂਰੀ ਹੈ, ਬਰਖਾਸਤ ਤੇ ਮੁਅੱਤਲ ਮੁਲਾਜ਼ਮਾਂ ਦੀ ਮੁੜ ਬਹਾਲੀ ਜਰੂਰੀ ਹੈ। ਇਹ ਵੀ ਮੰਗ ਮੰਤਰੀ ਸਾਹਿਬ ਦੇ ਅੱਗੇ ਰੱਖੀ ਗਈ।
ਮੰਤਰੀ ਜਾਂ ਵਿਭਾਗ ਦਾ ਲਿਖਤੀ ਆਰਡਰ ਆਉਣ ਤੇ ਹੀ ਹੜਤਾਲ ਮੁੱਕੇਗੀ। ਹੜਤਾਲ ਖਤਮ ਹੋਣ ਤੇ ਸਹਿਮਤੀ ਬਣੀ ਪਰ ਹੜਤਾਲ ਅਜੇ ਮੁੱਕੀ ਨਹੀਂ ਹੈ ਤਾਂ ਪੀਆਰਟੀਸੀ ਪਨ ਬੱਸ ਦੇ ਕੱਚੇ ਮੁਲਾਜ਼ਮਾਂ ਦੀ ਹੜਤਾਲ ਅਜੇ ਜਾਰੀ ਹੈ। ਜੇਲਾਂ 'ਚ ਡੱਕੇ ਮੁਲਾਜ਼ਮਾਂ ਦੀ ਰਿਹਾਈ ਹੋਣੀ ਬੇਹੱਦ ਜਰੂਰੀ ਹੈ।
ਹਾਲਾਂਕਿ ਪੰਜਾਬ ਦੇ ਟਰਾਂਸਪੋਰਟ ਮੰਤਰੀ ਲਾਲਜੀਤ ਸਿੰਘ ਭੁੱਲਰ ਦੇ ਨਾਲ ਹੜਤਾਲੀ ਮੁਲਾਜ਼ਮਾਂ ਦੀ ਬੈਠਕ ਹੋਈ ਤਾਂ ਤਮਾਮ ਮੰਗਾਂ ਮੁਲਾਜ਼ਮਾਂ ਦੇ ਵੱਲੋਂ ਟਰਾਂਸਪੋਰਟ ਮੰਤਰੀ ਦੇ ਅੱਗੇ ਰੱਖੀਆਂ ਗਈਆਂ ਪਰ ਇਹ ਸਭ ਦੇ ਦਰਮਿਆਨ ਮੁਲਾਜ਼ਮਾਂ ਨੇ ਕਹਿ ਦਿੱਤਾ ਕਿ ਹੜਤਾਲ ਉਦੋਂ ਹੀ ਮੁੱਕੇਗੀ ਜਦੋਂ ਮੰਨੀਆਂ ਹੋਈਆਂ ਮੰਗਾਂ ਲਾਗੂ ਹੋਣਗੀਆਂ, ਜਦੋਂ ਬਰਖਾਸਤ ਕੀਤੇ ਜਾਂ ਜਿਨ੍ਹਾਂ ਨੂੰ ਮੁਅੱਤਲ ਕੀਤਾ ਉਹਨਾਂ ਦੇ ਖਿਲਾਫ ਲਏ ਫੈਸਲੇ ਵਾਪਸ ਹੋਣਗੇ, ਜਦੋਂ ਜੇਲਾਂ ਦੇ ਵਿੱਚ ਡੱਕੇ ਮੁਲਾਜ਼ਮ ਬਾਹਰ ਆਉਣਗੇ, ਉਹਨਾਂ ਨੂੰ ਰਿਹਾਅ ਕਰ ਦਿੱਤਾ ਜਾਏਗਾ ਉਦੋਂ ਇਹ ਹੜਤਾਲ ਖਤਮ ਕੀਤੀ ਜਾਏਗੀ।