ਕੀ ਹੁਣ America 'ਚ ਹੋਵੇਗੀ 'No Entry'? 'ਵੀਜ਼ਾ' ਅਤੇ 'ਸ਼ਰਨ' 'ਤੇ ਸਰਕਾਰ ਨੇ ਸੁਣਾਇਆ ਫੈਸਲਾ, ਪੜ੍ਹੋ..
ਬਾਬੂਸ਼ਾਹੀ ਬਿਊਰੋ
ਵਾਸ਼ਿੰਗਟਨ ਡੀਸੀ, 29 ਨਵੰਬਰ, 2025: ਵ੍ਹਾਈਟ ਹਾਊਸ (White House) ਦੇ ਨੇੜੇ ਨੈਸ਼ਨਲ ਗਾਰਡ ਦੇ ਜਵਾਨਾਂ 'ਤੇ ਹੋਏ ਜਾਨਲੇਵਾ ਹਮਲੇ ਤੋਂ ਬਾਅਦ ਅਮਰੀਕਾ ਨੇ ਆਪਣੀਆਂ ਸੁਰੱਖਿਆ ਨੀਤੀਆਂ ਵਿੱਚ ਸਖ਼ਤ ਬਦਲਾਅ ਕਰ ਦਿੱਤਾ ਹੈ। ਟਰੰਪ ਪ੍ਰਸ਼ਾਸਨ ਨੇ ਸ਼ੁੱਕਰਵਾਰ ਨੂੰ ਇੱਕ ਵੱਡਾ ਫੈਸਲਾ ਲੈਂਦਿਆਂ ਸਾਰੇ ਸ਼ਰਨ (Asylum) ਮਾਮਲਿਆਂ 'ਤੇ ਤੁਰੰਤ ਪ੍ਰਭਾਵ ਨਾਲ ਰੋਕ ਲਗਾ ਦਿੱਤੀ ਹੈ। ਇਸ ਦੇ ਨਾਲ ਹੀ, ਅਮਰੀਕੀ ਵਿਦੇਸ਼ ਵਿਭਾਗ ਨੇ ਅਫ਼ਗਾਨ ਪਾਸਪੋਰਟ (Afghan Passport) 'ਤੇ ਯਾਤਰਾ ਕਰਨ ਵਾਲੇ ਵਿਅਕਤੀਆਂ ਲਈ ਵੀਜ਼ਾ (Visa) ਜਾਰੀ ਕਰਨਾ ਵੀ ਬੰਦ ਕਰ ਦਿੱਤਾ ਹੈ।
USCIS ਦੇ ਡਾਇਰੈਕਟਰ ਜੋਸੇਫ਼ ਐਡਲੋ (Joseph Edlow) ਨੇ ਪੁਸ਼ਟੀ ਕੀਤੀ ਹੈ ਕਿ ਜਦੋਂ ਤੱਕ ਹਰ ਬਿਨੈਕਾਰ ਦੀ ਵੱਧ ਤੋਂ ਵੱਧ ਪੱਧਰ 'ਤੇ ਜਾਂਚ ਨਹੀਂ ਹੋ ਜਾਂਦੀ, ਉਦੋਂ ਤੱਕ ਕਿਸੇ ਨੂੰ ਵੀ ਸ਼ਰਨ ਨਹੀਂ ਦਿੱਤੀ ਜਾਵੇਗੀ, ਕਿਉਂਕਿ ਅਮਰੀਕੀ ਨਾਗਰਿਕਾਂ ਦੀ ਸੁਰੱਖਿਆ ਸਭ ਤੋਂ ਉੱਪਰ ਹੈ।
"ਸੁਰੱਖਿਆ ਨਾਲ ਸਮਝੌਤਾ ਨਹੀਂ" - ਜੋਸੇਫ਼ ਐਡਲੋ
USCIS ਦੇ ਡਾਇਰੈਕਟਰ ਜੋਸੇਫ਼ ਐਡਲੋ ਨੇ ਸੋਸ਼ਲ ਮੀਡੀਆ 'ਤੇ ਜਾਣਕਾਰੀ ਦਿੰਦਿਆਂ ਕਿਹਾ, "ਅਸੀਂ ਸਾਰੇ ਸ਼ਰਨ ਫੈਸਲਿਆਂ ਨੂੰ ਉਦੋਂ ਤੱਕ ਲਈ ਰੋਕ ਦਿੱਤਾ ਹੈ, ਜਦੋਂ ਤੱਕ ਅਸੀਂ ਇਹ ਯਕੀਨੀ ਨਹੀਂ ਬਣਾ ਲੈਂਦੇ ਕਿ ਹਰ ਵਿਦੇਸ਼ੀ ਦੀ ਪੂਰੀ ਡੂੰਘਾਈ ਨਾਲ ਜਾਂਚ ਅਤੇ ਸਕ੍ਰੀਨਿੰਗ (Screening) ਹੋ ਗਈ ਹੈ। ਅਮਰੀਕੀ ਲੋਕਾਂ ਦੀ ਸੁਰੱਖਿਆ ਹਮੇਸ਼ਾ ਪਹਿਲਾਂ ਆਉਂਦੀ ਹੈ।" ਇਹ ਹੁਕਮ ਉਨ੍ਹਾਂ ਰਿਪੋਰਟਾਂ ਤੋਂ ਬਾਅਦ ਆਇਆ ਹੈ ਜਿਨ੍ਹਾਂ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਕਈ ਮਾਮਲਿਆਂ ਵਿੱਚ ਪੂਰੀ ਜਾਂਚ ਕੀਤੇ ਬਿਨਾਂ ਹੀ ਸ਼ਰਨ ਦੇ ਦਿੱਤੀ ਗਈ ਸੀ।
USCIS has halted all asylum decisions until we can ensure that every alien is vetted and screened to the maximum degree possible. The safety of the American people always comes first.
— USCIS Director Joseph B. Edlow (@USCISJoe) November 28, 2025
ਅਫ਼ਗਾਨੀ ਹਮਲਾਵਰ ਨੇ ਕੀਤੀ ਸੀ ਫਾਇਰਿੰਗ
ਇਹ ਸਖ਼ਤ ਕਦਮ ਉਸ ਘਟਨਾ ਤੋਂ ਬਾਅਦ ਚੁੱਕਿਆ ਗਿਆ ਹੈ ਜਿਸ ਵਿੱਚ 29 ਸਾਲਾ ਅਫ਼ਗਾਨ ਮੂਲ ਦੇ ਰਹਿਮਾਨਉੱਲਾ ਲਕਨਵਾਲ (Rahmanullah Lakanwal) ਨੇ ਵ੍ਹਾਈਟ ਹਾਊਸ ਨੇੜੇ ਦੋ ਨੈਸ਼ਨਲ ਗਾਰਡ ਜਵਾਨਾਂ 'ਤੇ ਗੋਲੀ ਚਲਾ ਦਿੱਤੀ ਸੀ। ਇਸ ਹਮਲੇ ਵਿੱਚ 20 ਸਾਲ ਦੀ ਮਹਿਲਾ ਸੈਨਿਕ ਸਾਰਾ ਬੇਕਸਟ੍ਰੋਮ ਦੀ ਮੌਤ ਹੋ ਗਈ, ਜਦਕਿ 24 ਸਾਲਾ ਐਂਡਰਿਊ ਵੋਲਫ ਗੰਭੀਰ ਰੂਪ ਵਿੱਚ ਜ਼ਖਮੀ ਹਨ। ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਲਕਨਵਾਲ 2021 ਵਿੱਚ ਅਮਰੀਕਾ ਆਇਆ ਸੀ ਅਤੇ ਉਸਨੂੰ ਹਾਲ ਹੀ ਵਿੱਚ ਸ਼ਰਨ ਮਿਲੀ ਸੀ।
ਬਾਈਡਨ ਦੇ ਸਮੇਂ ਦੇ ਕੇਸ ਦੁਬਾਰਾ ਖੁੱਲ੍ਹਣਗੇ
ਹਮਲੇ ਦੇ 24 ਘੰਟਿਆਂ ਦੇ ਅੰਦਰ ਸਰਕਾਰ ਨੇ ਐਲਾਨ ਕੀਤਾ ਹੈ ਕਿ ਬਾਈਡਨ ਪ੍ਰਸ਼ਾਸਨ (Biden Administration) ਦੌਰਾਨ ਮਨਜ਼ੂਰ ਹੋਏ ਸਾਰੇ ਸ਼ਰਨ ਮਾਮਲਿਆਂ ਦੀ ਮੁੜ ਸਮੀਖਿਆ (Review) ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ, USCIS ਨੇ ਪਹਿਲਾਂ ਹੀ 19 ਦੇਸ਼ਾਂ ਦੇ ਨਾਗਰਿਕਾਂ ਦੇ ਗ੍ਰੀਨ ਕਾਰਡ (Green Card) ਅਰਜ਼ੀਆਂ ਦੀ ਸਖ਼ਤੀ ਨਾਲ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
'ਥਰਡ ਵਰਲਡ' ਤੋਂ ਮਾਈਗ੍ਰੇਸ਼ਨ 'ਤੇ ਹਮੇਸ਼ਾ ਲਈ ਰੋਕ?
ਰਾਸ਼ਟਰਪਤੀ ਡੋਨਾਲਡ ਟਰੰਪ (Donald Trump) ਨੇ ਰਾਤ ਨੂੰ ਇੱਕ ਹੋਰ ਵੱਡਾ ਬਿਆਨ ਜਾਰੀ ਕਰਦਿਆਂ ਸੰਕੇਤ ਦਿੱਤਾ ਕਿ ਅਮਰੀਕਾ ਹੁਣ 'ਥਰਡ ਵਰਲਡ ਕੰਟਰੀਜ਼' (Third World Countries) ਤੋਂ ਮਾਈਗ੍ਰੇਸ਼ਨ (Migration) 'ਤੇ ਸਥਾਈ ਰੋਕ ਲਗਾਏਗਾ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਜੋ ਵੀ ਵਿਦੇਸ਼ੀ ਅਮਰੀਕਾ ਦੀ ਘਰੇਲੂ ਸ਼ਾਂਤੀ ਭੰਗ ਕਰੇਗਾ, ਉਸਦੀ ਨਾਗਰਿਕਤਾ (Citizenship) ਰੱਦ ਕਰ ਦਿੱਤੀ ਜਾਵੇਗੀ। ਨਾਲ ਹੀ, ਜੋ ਲੋਕ ਪੱਛਮੀ ਸੱਭਿਅਤਾ (Western Civilization) ਨਾਲ ਮੇਲ ਨਹੀਂ ਖਾਂਦੇ, ਉਨ੍ਹਾਂ ਨੂੰ ਸਿੱਧਾ ਡਿਪੋਰਟ (Deport) ਕਰ ਦਿੱਤਾ ਜਾਵੇਗਾ।