Babushahi Special ਚਿੰਤਾਜਨਕ:ਕੀਹਦੇ ਗੁੱਟ ਤੇ ਬੰਨ੍ਹਣਗੀਆਂ ਭੈਣਾਂ ਰੱਖੜੀ ਨਾੜ ’ਚ ਸਰਿੰਜ ਰਹਿਣ ਲੱਗ ਪਈ
ਅਸ਼ੋਕ ਵਰਮਾ
ਬਠਿੰਡਾ, 30 ਨਵੰਬਰ 2025: ਪੰਜਾਬ ਸਰਕਾਰ ਵੱਲੋਂ ਚਲਾਈ ਗਈ ‘ਯੁੱਧ ਨਸ਼ਿਆਂ ਵਿਰੁੱਧ ’ ਮੁਹਿੰਮ ਦਾ ਬਠਿੰਡਾ ਜਿਲ੍ਹੇ ’ਚ ਹੁਣ ਨਸ਼ਾ ਟੁੱਟਣ ਲੱਗਾ ਹੈ। ਪਿਛਲੇ ਕੁੱਝ ਦਿਨਾਂ ਦੌਰਾਨ ਹੋਈਆਂ ਗੱਭਰੂਆਂ ਦੀਆਂ ਨਸ਼ੇ ਕਾਰਨ ਹੋਈਆਂ ਮੌਤਾਂ ਤਾਂ ਇਹੋ ਇਸ਼ਾਰਾ ਕਰਦੀਆਂ ਹਨ। ਲੋਕ ਹੁਣ ਸਵਾਲ ਕਰਨ ਲੱਗੇ ਹਨ ਕਿ ਮੁੱਖ ਮੰਤਰੀ ਦਾ ‘ਨਸ਼ਾ ਮੁਕਤ ਪੰਜਾਬ’ ਕਿੱਥੇ ਹੈ। ਕੋਈ ਇੱਕ ਇਲਾਕਾ ਨਹੀਂ ਬਲਕਿ ਸ਼ਹਿਰ ਅਤੇ ਪਿੰਡ ਦੋਵੇਂ ਹੀ ਨਸ਼ਿਆਂ ਤੋਂ ਪੀੜਤ ਹਨ। ਪ੍ਰਸ਼ਾਸ਼ਨ ਅਤੇ ਸਰਕਾਰ ਵੱਲੋਂ ਕੀਤੇ ਜਾ ਰਹੇ ਨਸ਼ਾ ਮੁਕਤੀ ਦੇ ਦਾਅਵਿਆਂ ਦੌਰਾਨ ਵਧ ਰਹੇ ਮੌਤਾਂ ਦੇ ਮਾਮਲੇ ਗੰਭੀਰ ਸਵਾਲ ਚੁੱਕਣ ਲੱਗੇ ਹਨ। ਇਸ ਮਾਮਲੇ ’ਚ ਸਭ ਤੋਂ ਦਿਲ ਕੰਬਾਊ ਘਟਨਾ ਉਸ ਦਿਹਾੜੀਦਾਰ ਮਜਦੂਰ ਦੀ ਮੌਤ ਹੈ ਜਿਸ ਦੇ ਨਸ਼ੇ ਕਾਰਨ ਜਹਾਨੋਂ ਰੁਖਸਤ ਹੋਣ ਮਗਰੋਂ ਪਿੱੱਛੇ ਤਿੰਨ ਮਾਸੂਮ ਬੱਚੀਆਂ ਅਤੇ 80 ਸਾਲ ਦੀ ਬਿਰਧ ਜਿੰਦਗੀ ਦੀ ਜੰਗ ਲੜਨ ਲਈ ਇਕੱਲੀ ਰਹਿ ਗਈ ਹੈ।
ਪਿੰਡ ਝੁੰਬਾ ਨਾਲ ਜੁੜਿਆ ਇਹ ਮਾਮਲਾ ਬੇਹੱਦ ਦੁਖਦਾਇਕ ਹੈ ਜਿੱਥੇ 32 ਸਾਲ ਦੇ ਦਿਹਾੜੀਦਾਰ ਮਜ਼ਦੂਰ ਨੇ ਨਸ਼ੇ ਦਾ ਟੀਕਾ ਲਾਇਆ ਜਿਸ ਤੋਂ ਬਾਅਦ ਉਸ ਦੀ ਮੌਤ ਹੋ ਗਈ। ਇਹ ਮਜ਼ਦੂਰ ਤਿੰਨ ਨਾਬਾਲਿਗ ਧੀਆਂ ਦਾ ਪਿਤਾ ਸੀ ਜਿਸ ਦੀ ਮੌਤ ਕਾਰਨ ਪ੍ਰੀਵਾਰ ਬੇਸਹਾਰਾ ਹੋ ਗਿਆ ਹੈ। ਨਸ਼ੇ ਤੇ ਲੱਗਣ ਤੋਂ ਦੁਖੀ ਇਸ ਮਜ਼ਦੂਰ ਦੀ ਪਤਨੀ ਉਸ ਨੂੰ ਛੱਡਕੇ ਚਲੀ ਗਈ ਸੀ। ਹੁਣ ਘਰ ’ਚ ਤਿੰਨ ਬੱਚੀਆਂ ਅਤੇ 80 ਸਾਲ ਦੀ ਬਿਰਧ ਔਰਤ ਰਹਿ ਗਈ ਹੈ। ਪਿੰਡ ਵਾਸੀਆਂ ਦਾ ਕਹਿਣਾ ਹੈ ਕਿ ਹੁਣ ਇਸ ਪ੍ਰੀਵਾਰ ਦਾ ਜੂਨ ਗੁਜ਼ਾਰਾ ਕਿਸ ਤਰਾਂ ਚੱਲੇਗਾ ਵੱਡਾ ਮਸਲਾ ਬਣ ਗਿਆ ਹੈ। ਚਾਰ ਵਰਿ੍ਹਆਂ ਮਗਰੋਂ ਸਮੁੱਚੇ ਪਿੰਡ ਦੇ ਸਵਾਲ ਹਨ ਕਿ ਨਸ਼ਾ ਖਤਮ ਕਰਨ ਦੇ ਦਾਅਵਿਆਂ ਦਾ ਕੀ ਬਣਿਆ ਹੈ? ਘਰਾਂ ’ਚ ਵੈਣ ਪੈਣੋਂ ਕਿਉਂ ਨਹੀਂ ਰੁਕ ਰਹੇ ਹਨ? ਸ਼ਮਸ਼ਾਨਘਾਟਾਂ ਤੇ ਪਾਰਕਾਂ ’ਚ ਸਰਿੰਜਾਂ ਦੇ ਢੇਰ ਕਿਉਂ ਹਨ?
ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੇ ਜਿਲ੍ਹਾ ਕਮੇਟੀ ਮੈਂਬਰ ਜਗਸੀਰ ਸਿੰਘ ਝੁੰਬਾ ਦਾ ਕਹਿਣਾ ਸੀ ਕਿ ਚਿੱਟਾ ਟਾਫੀਆਂ ਵਾਂਗ ਵਿਕਦਾ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਪਿਛਲੇ ਤਿੰਨ ਸਾਲਾਂ ਦੌਰਾਨ ਪਿੰਡ ਦੇ ਤਕਰੀਬਨ ਦੋ ਦਰਜਨ ਮਜ਼ਦੂਰ ਨਸ਼ਿਆਂ ਕਾਰਨ ਜਹਾਨੋਂ ਕੂਚ ਕਰ ਚੁੱਕੇ ਹਨ। ਉਨ੍ਹਾਂ ਕਿਹਾ ਕਿ ਸਰਕਾਰ ਨਸ਼ਾ ਖਤਮ ਕਰਨ ਦੇ ਦਾਅਵੇ ਤਾਂ ਕਰਦੀ ਹੈ ਪਰ ਪੁਲਿਸ ਜਾਣਦਿਆਂ ਹੋਇਆਂ ਵੀ ਅਣਜਾਣ ਬਣੀ ਰਹਿੰਦੀ ਹੈ ਅਤੇ ਕੋਈ ਕਾਰਵਾਈ ਨਹੀਂ ਕਰਦੀ। ਉਨ੍ਹਾਂ ਕਿਹਾ ਕਿ ਜਿੰਨ੍ਹਾਂ ਨਸ਼ਾ ਤਸਕਰਾਂ ਨੂੰ ਗ੍ਰਿਫਤਾਰ ਕਰਕੇ ਪੁਲਿਸ ਜੇਲ੍ਹ ਭਿਜਵਾ ਦਿੰਦੀ ਹੈ ਉਹ ਜਮਾਨਤ ਤੇ ਬਾਹਰ ਆਉਣ ਤੋਂ ਬਾਅਦ ਫਿਰ ਨਸ਼ਾ ਤਸਕਰੀ ਸ਼ੁਰੂ ਕਰ ਦਿੰਦੇ ਹਨ। ਪਿੰਡ ਦੇ ਨੌਜਵਾਨਾਂ ਨੇ ਕਿਹਾ ਕਿ ਚਾਰ ਹਫਤੇ ’ਚ ਨਸ਼ਾ ਖਤਮ ਕਰਨ ਦਾ ਜਨਤਕ ਐਲਾਨ ਹੋਇਆ ਸੀ ਪਰ ਹੁਣ ਤੱਕ ਕਰੀਬ 200 ਹਫਤੇ ਲੰਘ ਚੁੱਕੇ ਹਨ, ਤਸਕਰੀ ਦਾ ਰਾਹ ਹਾਲੇ ਰੁਕ ਨਹੀਂ ਸਕਿਆ ਹੈ।
ਇਸੇ ਤਰਾਂ ਹੀ ਕੁੱਝ ਦਿਨ ਪਹਿਲਾਂ ਸਰਕਾਰੀ ਹਾਈ ਸਕੂਲ ਬੰਗੀ ਰਘੂ ਕੋਲ ਬੇਹੋਸ਼ ਹਾਲਤ ਵਿੱਚ ਨੌਜਵਾਨ ਮਿਲਿਆ ਸੀ ਜਿਸ ਦੀ ਬਾਂਹ ’ਚ ਟੀਕਾ ਲੱਗਿਆ ਹੋਇਆ ਸੀ ਅਤੇ ਸਰਿੰਜ ਨਾੜ ਵਿੱਚ ਫਸੀ ਹੋਈ ਸੀ। ਪਤਾ ਲੱਗਿਆ ਹੈ ਕਿ ਨੌਜਵਾਨ ਦੀ ਮੌਕੇ ਤੇ ਹੀ ਮੌਤ ਹੋ ਗਈ ਸੀ। ਮ੍ਰਿਤਕ ਰਾਮਾਂ ਮੰਡੀ ਦੇ ਨਜ਼ਦੀਕ ਪੈਂਦੇ ਕਿਸੇ ਪਿੰਡ ਦਾ ਸੀ। ਜਾਣਕਾਰੀ ਮੁਤਾਬਕ ਪ੍ਰੀਵਾਰ ਨੇ ਬਿਨਾਂ ਪੋਸਟਮਾਰਟਮ ਦੇ ਹੀ ਚੁੱਪ ਚੁਪੀਤੇ ਅੰਤਿਮ ਸਸਕਾਰ ਕਰ ਦਿੱਤਾ ਸੀ। ਦੱਸਿਆ ਜਾਂਦਾ ਹੈ ਕਿ ਇਹ ਨੌਜਵਾਨ ਲੰਬੇ ਸਮੇਂ ਤੋਂ ਨਸ਼ੇ ਦਾ ਆਦੀ ਸੀ। ਇਸ ਦੌਰਾਨ ਹੀ ਰਾਮਪੁਰਾ ’ਚ 22 ਸਾਲ ਦੇ ਨੌਜਵਾਨ ਦੀ ਮੌਤ ਹੋਈ ਸੀ ਜੋ ਨਸ਼ੇ ਦੇ ਟੀਕੇ ਦੀ ਆਦਤ ਦਾ ਸ਼ਿਕਾਰ ਸੀ। ਜਾਣਕਾਰੀ ਅਨੁਸਾਰ ਉਸ ਨੇ ਬਾਂਹ ’ਚ ਟੀਕਾ ਲਾਇਆ ਅਤੇ ਕੁੱਝ ਦੇਰ ਮਗਰੋਂ ਹੀ ਦਮ ਤੋੜ ਦਿੱਤਾ। ਪੁਲਿਸ ਦੋਵਾਂ ਮਾਮਲਿਆਂ ਦੀ ਜਾਂਚ ਕਰ ਰਹੀ ਹੈ।
ਲੰਘੀ 26 ਨਵੰਬਰ ਨੂੰ ਵੀ ਪਿੰਡ ਮੌੜ ਕਲਾਂ ’ਚ ਕਰੀਬ 22 ਸਾਲ ਦੇ ਨੌਜਵਾਨ ਦੀ ਮੌਤ ਵੀ ਨਸ਼ਿਆਂ ਕਾਰਨ ਹੋਈ ਸੀ। ਪ੍ਰੀਵਾਰ ਨੇ ਦੋਸ਼ ਲਾਇਆ ਸੀ ਕਿ ਪਿੰਡ ਦਾ ਇੱਕ ਮੈਡੀਕਲ ਸਟੋਰ ਮੁੰਡਿਆਂ ਨੂੰ ਨਸ਼ਿਆਂ ਦੀ ਚਾਟ ਤੇ ਲਾ ਰਿਹਾ ਹੈ। ਸਟੋਰ ਮਾਲਕ ਖਿਲਾਫ ਕਾਰਵਾਈ ਨੂੰ ਲੈਕੇ ਧਰਨਾ ਵੀ ਲਾਇਆ ਗਿਆ ਸੀ। ਸੂਤਰ ਦੱਸਦੇ ਹਨ ਕਿ ਦੋਵਾਂ ਧਿਰਾਂ ’ਚ ਸਮਝੌਤਾ ਹੋ ਗਿਆ ਜਿਸ ਕਰਕੇ ਪੁਲਿਸ ਕਾਰਵਾਈ ਅੱਗੇ ਨਾ ਵਧਾ ਸਕੀ। ਇੰਨ੍ਹਾਂ ਘਟਨਾਵਾਂ ਦੀ ਰੌਸ਼ਨੀ ’ਚ ਦੇਖੀਏ ਤਾਂ ਪਤਾ ਲੱਗਦਾ ਹੈ ਕਿ ਨਸ਼ੇ ਦੀਆਂ ਜੜਾਂ ਕਿੰਨੀਆਂ ਡੂੰਘੀਆਂ ਹਨ। ਪੰਜਾਬ ਸਰਕਾਰ ਵੱਲੋਂ ਚਲਾਈ ਜਾ ਰਹੀ ਮੁਹਿੰਮ ‘ਚਿੱਟੇ ਦੌਰ’ ਦੀ ਦੁਖਦੀ ਰਗ ’ਤੇ ਹੱਥ ਰੱਖਦੀ ਹੈ। ਲੋਕਾਂ ਨੇ ਸਰਕਾਰ ਕੋਲ ਪੰਜਾਬ ਦੀ ਜਵਾਨੀ ਨੂੰ ਬਚਾਉਣ ਲਈ ਵਾਸਤਾ ਪਾਇਆ ਹੈ। ਉਨ੍ਹਾਂ ਆਖਿਆ ਕਿ ਸਿਆਸਤ ਤੋਂ ਉੱਪਰ ਚਿੱਟੇ ਖ਼ਿਲਾਫ਼ ਸਾਂਝੀ ਜੰਗ ਲੜਨ ਦੀ ਲੋੜ ਹੈ।
ਚਿੱਟਾ ਵਿਕਣ ਸਬੰਧੀ ਲਿਖਿਆ
ਮੌੜ ਕਲਾਂ ਵਿੱਚ ਕੰਧ ’ਤੇ ਚਿੱਟਾ ਸ਼ਰੇਆਮ ਵਿਕਦਾ ਹੈ ਲਿਖ ਦਿੱਤਾ ਗਿਆ ਹੈ। ਇਸ ਸਬੰਧ ਵਿੱਚ ਵੀਡੀਓ ਵਾਇਰਲ ਹੋਈ ਹੈ। ਪੁਲਿਸ ਪ੍ਰਸ਼ਾਸ਼ਨ ਲਿਖਣ ਵਾਲਿਆਂ ਨੂੰ ਸ਼ਰਾਰਤੀ ਅਨਸਰ ਦੱਸ ਰਿਹਾ ਹੈ ਜਦੋਂਕਿ ਪਿੰਡ ਵਾਸੀ ਇਸ ਨੂੰ ਹਕੀਕਤ ਕਰਾਰ ਦੇ ਰਹੇ ਹਨ। ਪੁਲਿਸ ਕਾਰਵਾਈ ਦੀ ਥਾਂ ਦਰਜ ਕੇਸਾਂ ਦੇ ਅੰਕੜੇ ਨਾਲ ਸਫਾਈ ਦੇ ਰਹੀ ਹੈ। ਡੀਐਸਪੀ ਕੁਲਦੀਪ ਸਿੰਘ ਬਰਾੜ ਨੇ ਦਾਅਵਾ ਕੀਤਾ ਕਿ ਨਸ਼ਾ ਵਿਕਣ ਦੀ ਸੂਚਨਾ ਮਿਲਣ ਤੇ ਪੁਲਿਸ ਤੁਰੰਤ ਕਾਰਵਾਈ ਕਰਦੀ ਹੈ ਅਤੇ ਨਸ਼ਿਆਂ ਖਿਲਾਫ ਲਗਾਤਾਰ ਕਾਸੋ ਆਪਰੇਸ਼ਨ ਚਲਾਇਆ ਜਾ ਰਿਹਾ ਹੈ।