ਕੈਲੇਫੋਰਨੀਆਂ ਪੰਜਾਬੀ ਕਲੱਬ ਨੇ ਕਲੋਵਿਸ ਵਿਖੇ ਦੇਬੀ ਨਾਈਟ ਕਰਵਾਈ
“ਦੇਬੀ ਮਖਸੂਸਪੁਰੀ ਅਤੇ ਧਰਮਵੀਰ ਥਾਂਦੀ ਲਾਈਆਂ ਰੌਣਕਾਂ”
ਫਰਿਜ਼ਨੋ, ਕੈਲੇਫੋਰਨੀਆਂ (ਗੁਰਿੰਦਰਜੀਤ ਨੀਟਾ ਮਾਛੀਕੇ): ਕੈਲੇਫੋਰਨੀਆਂ ਪੰਜਾਬੀ ਕਲੱਬ ਅਤੇ ਕਲੋਵਿਸ ਕੈਸ਼ਲ ਵੱਲੋਂ ਗਾਇਕੀ ਦੇ ਸਿਰਮੌਰ ਗੀਤਕਾਰ ਅਤੇ ਗਾਇਕ ਦੇਬੀ ਮਖਸੂਸਪੁਰੀ ਦੀ ਸ਼ੇਅਰੋ-ਸ਼ਾਇਰੀ ਅਤੇ ਗੀਤਾਂ ਨਾਲ ਮੰਨੋਰੰਜਨ ਭਰਪੂਰ ਨਾਈਟ ਕਰਵਾਈ ਗਈ। ਇਸ ਦੇਬੀ ਨਾਈਟ ਦੀ ਸ਼ੁਰੂਆਤ ਬੀਬੀ ਜੋਤ ਰਣਜੀਤ ਨੇ ਸਭ ਜੀ ਅਇਆ ਕਹਿਣ ਉਪਰੰਤ ਸਮੂੰਹ ਸਹਿਯੋਗੀਆਂ ਦਾ ਧੰਨਵਾਦ ਕਰਨ ਨਾਲ ਸ਼ਾਇਰਾਨਾ ਅੰਦਾਜ਼ ਵਿੱਚ ਕੀਤੀ। ਜਿਸ ਦੌਰਾਨ ਪਹਾੜਾਂ ਦੀਆਂ ਹੁਸੀਨ ਵਾਦੀਆਂ ਵਿੱਚ ਸਥਿਤ ਕਲੋਵਿਸ ਕੈਸ਼ਲ ਵਿਖੇ ਦੇਬੀ ਮਸੂਸਪੁਰੀ ਨੇ ਆਪਣੇ ਗੀਤ “ਰਿਸ਼ਤਾ ਰੱਖੋ ਆਸ ਨਾ ਰੱਖੋ, ਗੱਲ ਸਮਝ ਵਿੱਚ ਆ ਗਈ” ਆਦਿਕ ਆਪਣੇ ਬਹੁਤ ਸਾਰੇ ਨਵੇਂ-ਪੁਰਾਣੇ ਗੀਤਾਂ ਰਾਹੀ ਸਰੋਤਿਆਂ ਦਾ ਭਰਪੂਰ ਮਨੋਰੰਜਨ ਕੀਤਾ। ਇਸ ਤਰ੍ਹਾਂ ਜਾਪ ਰਿਹਾ ਸੀ ਕਿ ਜਿਵੇ ਸ਼ਾਂਤ ਵਾਤਾਵਰਣ ਵਿੱਚ ਦੇਬੀ ਦੀ ਗਾਇਕੀ ਸਰੋਤਿਆਂ ਨੂੰ ਕੀਲ ਆਪਣੇ ਅਤੀਤ ਵਿੱਚ ਲੈ ਕੇ ਜਾ ਰਹੀ ਸੀ। ਹਰ ਕੋਈ ਇਸ ਦਾ ਭਰਪੂਰ ਅਨੰਦ ਮਾਣ ਰਿਹਾ ਸੀ।
ਇਸੇ ਤਰ੍ਹਾਂ ਦੇਬੀ ਨਾਈਟ ਦੇ ਅਗਲੇ ਦੌਰ ਵਿੱਚ ਸਥਾਨਕ ਗਾਇਕ ਅਤੇ ਗੀਤਕਾਰ ਧਰਮਵੀਰ ਥਾਂਦੀ ਨੇ “ਚੰਨਾਂ ਤਾਰੇ ਤੇਰੇ ਕੋਲ ਹੋਣਗੇ, ਅਸੀਂ ਤਾਂ ਕੱਲੇ ਬਹਿ ਕੇ ਰੋਈਏ” ਆਦਿਕ ਬਹੁਤ ਸਾਰੇ ਗੀਤ ਹਾਜ਼ਰੀਨ ਦੀ ਮੰਗ ‘ਤੇ ਆਪਣੇ ਵਿਰਸੇ ਅਤੇ ਰਿਸ਼ਤਿਆਂ ਨਾਲ ਜੁੜੇ ਗੀਤ ਗਾ ਵਾਹ-ਵਾਹ ਕਰਵਾਈ। ਪੰਜਾਬ ਤੋਂ ਹਜਾਰਾਂ ਮੀਲ ਦੂਰ ਬੈਠੇ ਸਰੋਤੇ ਕੁਝ ਪਲਾਂ ਲਈ ਜਾਪਦਾ ਸੀ ਕਿ ਸੱਚਮੁੱਚ ਆਪਣੇ ਪਰਿਵਾਰਾਂ ਵਿੱਚ ਪੰਜਾਬ ਪਹੁੰਚ ਗਏ ਹੋਣ।
ਇਸ ਪ੍ਰੋਗਰਾਮ ਦੌਰਾਨ ਸਮੂੰਹ ਹਾਜ਼ਰੀਨ ਲਈ ਪ੍ਰਬੰਧਕਾਂ ਵੱਲੋਂ ਖਾਣ-ਪੀਣ ਦਾ ਪੂਰਾ ਪ੍ਰਬੰਧ ਕੀਤਾ ਗਿਆ ਸੀ। ਪ੍ਰੋਗਰਾਮ ਦੀ ਸਮਾਪਤੀ ਤੋਂ ਬਾਅਦ ਰਾਤਰੀ ਦੇ ਭੋਜ਼ਨ ਦਾ ਸਭ ਨੇ ਅਨੰਦ ਮਾਣਿਆ। ਇਸ ਸਮੁੱਚੇ ਪ੍ਰੋਗਰਾਮ ਦੀ ਸਫਲਤਾ ਲਈ ਪ੍ਰਬੰਧਕਾਂ ਵਿੱਚੋਂ ਧਰਮਵੀਰ ਥਾਂਦੀ, ਗੁੱਲੂ ਬਰਾੜ, ਸ਼ਿੰਦਾ ਚਾਹਲ, ਗੋਰਾ ਮੁਲਤਾਨੀ, ਸਤਨਾਮ ਸੈਣੀ, ਪਵਨ ਬਾਂਸਲ, ਪੂਰਨ ਥਾਂਦੀ ਆਦਿਕ ਅਤੇ ਸਹਿਯੋਗੀ ਵਧਾਈ ਦੇ ਪਾਤਰ ਹਨ।