ਇਕੱਤੀ ਅਕਤੂਬਰ 84- ਅਮਰਜੀਤ ਟਾਂਡਾ
ਇਹੀ ਸੀ ਉਹ ਦਿਨ ਤੇ ਰਾਤ
ਜਦੋਂ ਬੇਗੁਨਾਹ ਖੂਨ ਡੁੱਲਿਆ ਸੀ
ਤਾਰੀਖ ਦੇ ਪੰਨੇ ਉੱਤੇ
ਇਕ ਸੂਹਾ
ਦਾਗ ਬਣ ਕੇ ਰਹਿ ਗਿਆ ਸੀ
ਉਹ ਖੂਨ
ਦਾਗ ਏਨਾ ਗੂੜ੍ਹਾ ਸੀ
ਕਿ ਸਦੀਆਂ ਵੀ ਨਾ ਪੂੰਝ ਸਕਣਗੀਆਂ
ਧੜ ਅੱਗ ਨਾਲ ਜੂਝ ਰਹੇ ਸਨ
ਗਲੀਆਂ ਬਾਜ਼ਾਰਾਂ ਵਿੱਚ
ਸੱਤਾ ਬੰਸਰੀ ਵਜਾਉਂਦੀ ਰਹੀ
ਘਰ ਜ਼ਖ਼ਮੀ ਹੋਏ
ਸੜਕਾਂ ਗਵਾਹੀ ਦੇਣ ਨਿਕਲੀਆਂ ਕਤਲ ਕਰ ਦਿੱਤੀਆਂ ਗਈਆਂ
ਅੱਗ ਇਨੀ ਸੀ
ਕਿ ਆਂਢ ਗਵਾਂਢ ਨੂੰ ਵੀ ਨਾ
ਕਿਸੇ ਨੇ ਪਛਾਣਿਆ
ਸੁੱਕੀ ਧਰਤੀ ਵੀ ਧਾਹੀਂ ਰੋਈ ਸੀ
ਕੰਧਾਂ ਦੀ ਸ਼ਾਂਤੀ
ਤੱਕ ਕੇ ਬਥੇਰਾ ਵਿਲਕਣੀ
ਕਰ ਗਲੀ ਮੁਹੱਲਿਆਂ ਆਂ ਨੇ
ਇੱਕ ਵੀ ਨਾ ਸੁਣੀ
ਚੰਨ ਨੇ ਵੀ
ਆਪਣਾ ਚਿਹਰਾ ਛੁਪਾ ਲਿਆ ਸੀ
ਵਿਰਲੇ ਵਿਰਲੇ ਹਰਫ਼ ਰੋਏ
ਇਤਿਹਾਸ ਕਾਲੇ ਕੱਪੜੇ ਪਾ
ਹਰਲ ਹਰਲ ਫਿਰਦਾ ਰਿਹਾ ਸ਼ਿਕਾਰੀ ਕੁੱਤਿਆਂ ਵਾਂਗ
ਜੋ ਚਿਰਾਂ ਤੱਕ ਯਾਦਾਂ ਦੀ ਹਿਰਾਸਤ ਵਿੱਚ ਰਹੇਗਾ
ਤਾਰੇ ਵੀ ਗਵਾਹ ਹਨ ਉਹਨਾਂ ਪਲਾਂ ਦੇ,
ਜਦੋਂ ਬੇਇਨਸਾਫੀ ਨੇ ਜ਼ਮੀਨ ਨੂੰ ਲਾਲ ਕਰ ਦਿੱਤਾ ਸੀ
ਰੁੱਖ਼ਾਂ ਤੇ ਵੀ ਵਿਸ਼ਵਾਸ ਨਾ ਰਿਹਾ
ਹਰ ਮੋੜ ਤੇ
ਤਲਵਾਰਾਂ ਹੈਵਾਨੀਅਤ ਦਾ
ਨੰਗਾ ਨਾਚ ਕਰ ਰਹੀਆਂ ਸਨ
ਸਵੇਰ ਦਾ ਸੂਰਜ ਘਰੋਂ ਗਿਆ
ਸ਼ਾਮੀਂ ਘਰ ਨਾ ਪਰਤਿਆ
ਖੁਦਾ ਦਾ ਨਾਮ ਭੁੱਲ ਗਏ ਸਨ ਲੋਕ
ਉਸ ਰਾਤ
ਕਈ ਤਾਰੇ ਮਰੇ ਸਨ ਟੁੱਟ ਕੇ
ਆਪਣੀ ਹੀ ਨਫ਼ਰਤ ਨੇ
ਭਰਾਵਾਂ ਦੇ ਸੀਨੇ ਚ ਤੀਰ ਡੋਬੇ
ਅਣਸੁਣੇ ਜਾਣ ਵਾਲੇ ਬੋਲ ਬੋਲੇ
ਸੰਪਰਕ +61 412913021
drtanda193@gmail.com
-
ਅਮਰਜੀਤ ਟਾਂਡਾ, writer
drtanda193@gmail.com
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.