ਚੰਦਭਾਨ ਹਿੰਸਾ ਮਾਮਲੇ 'ਚ ਦੂਜੀ ਧਿਰ ਆਈ ਮੀਡੀਆ ਸਾਹਮਣੇ; ਸਾਡੇ ਖ਼ਿਲਾਫ਼ ਕੀਤਾ ਗਿਆ ਗਿਣੀ-ਮਿਥੀ ਸਾਜਿਸ਼ ਤਹਿਤ ਮਾਹੌਲ ਤਿਆਰ: ਕਮਲਪ੍ਰੀਤ ਕੌਰ ਚੰਦਭਾਨ
ਮਨਜੀਤ ਸਿੰਘ ਢੱਲਾ
ਜੈਤੋ,12 ਫਰਵਰੀ 2025- ਪਿੰਡ ਚੰਦਭਾਨ ਵਿਖੇ ਪਿਛਲੇ ਦਿਨੀਂ ਹੋਈ ਗੰਦੇ ਪਾਣੀ ਦੀ ਨਿਕਾਸੀ ਨੂੰ ਲੈਕੇ ਹਿੰਸਾ ਮਾਮਲੇ ਵਿਚ ਦੂਜੀ ਧਿਰ ਅੱਜ ਮੀਡੀਆ ਸਾਹਮਣੇ ਆ ਕੇ ਆਪਣੇ ਪੱਖ ਰੱਖੇ। ਇਸ ਮੌਕੇ ਬੀਬੀ ਕਮਲਪ੍ਰੀਤ ਕੌਰ ਚੰਦਭਾਨ ਨੇ ਮੀਡੀਆ ਨੂੰ ਦੱਸਿਆ ਕਿ ਨਾਲੀ ਕੋਈ ਅਜਿਹਾ ਮਸਲਾ ਨਹੀਂ ਸੀ, ਜੋ ਸੁਲਝਾਇਆ ਨਹੀਂ ਸੀ ਜਾ ਸਕਦਾ ਸੀ। ਇਸ ਦੀ ਆੜ ਲੈ ਕੇ ਸਰਪੰਚ ਦੇ ਪਤੀ ਕੁਲਦੀਪ ਸਿੰਘ ਅਤੇ ਵਿਧਾਇਕ ਦੀ ਸਾਡੇ ਪਰਿਵਾਰ ਨੂੰ ਫਸਾਉਣ ਦੀ ਇੱਕ ਯੋਜਨਾਬੱਧ ਸਾਜਿਸ਼ ਸੀ।
ਘਟਨਾ ਨਾਲ ਸਬੰਧਿਤ ਪੁਲੀਸ ਕੇਸ ’ਚ ਸ਼ਾਮਿਲ ਹਰਵਿੰਦਰ ਸਿੰਘ ਬਰਾੜ ਦੀ ਪਤਨੀ ਅਤੇ ਬਲਾਕ ਸਮਿਤੀ ਦੇ ਸਾਬਕਾ ਵਾਈਸ ਚੇਅਰਪਰਸਨ ਤੋਂ ਇਲਾਵਾ ਗਮਦੂਰ ਸਿੰਘ ਪੱਪੂ ਦੀ ਭਰਜਾਈ ਵੀ ਹਨ ਬੀਬੀ ਕਮਲਪ੍ਰੀਤ ਕੌਰ ਚੰਦਭਾਨ। ਉਨ੍ਹਾਂ ਭਰੀਆਂ ਅੱਖਾਂ ਅਤੇ ਗਲ਼ੇ ਅਤੇ ਹੱਥ ਜੋੜ ਕੇ ਬੇਨਤੀ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਪਰਿਵਾਰ ਨੂੰ ਵਿਰੋਧੀਆਂ ਵੱਲੋਂ ‘ਧਨਾਢ’ ਅਤੇ ‘ਵਿਧਾਇਕ ਨਾਲ ਮਿਲੇ ਹੋਏ’ ਕਹਿ ਕੇ ਕਿਰਦਾਰਕੁਸ਼ੀ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਜੇ ਉਹ ਆਪ ਵਿੱਚ ਹੁੰਦੇ ਤਾਂ ਉਨ੍ਹਾਂ ’ਤੇ ਨਾ ਤਾਂ ਪਰਚੇ ਪਾਏ ਜਾਂਦੇ ਅਤੇ ਨਾ ਹੀ ਪਰਿਵਾਰ ਦੇ ਮਰਦ ਮੈਂਬਰਾਂ ਨੂੰ ਘਰ ਛੱਡ ਕੇ ਭੱਜਣਾ ਪੈਂਦਾ।
ਉਨ੍ਹਾਂ ਇਕ ਟੀ.ਵੀ. ਚੈਨਲ ਦੇ ਹਵਾਲਾ ਨਾਲ ਕਿਹਾ ਕਿ ਖੁਦ ਵਿਧਾਇਕ ਇੰਟਰਵਿਊ ’ਚ ਬਿਆਨ ਕਰ ਰਿਹਾ ਹੈ ਕਿ ਕੁਲਦੀਪ ਸਿੰਘ, ਉਸ ਦੀ ਪਾਰਟੀ ’ਚ ਹੈ। ਉਨ੍ਹਾਂ ਸਪਸ਼ਟ ਕੀਤਾ ਕਿ ਉਨ੍ਹਾਂ ਦਾ ਪਰਿਵਾਰ ਕਾਂਗਰਸ ਪਾਰਟੀ ਨਾਲ ਸਬੰਧਿਤ ਹੈ ਅਤੇ ਸਾਡਾ ‘ਆਪ’ ਦੇ ਵਿਧਾਇਕ ਅਮੋਲਕ ਸਿੰਘ ਨਾਲ ਕੋਈ ਸਬੰਧ ਨਹੀਂ ਹੈ।
ਪੱਤਰਕਾਰਾਂ ਵੱਲੋਂ ਸਵਾਲਾਂ ਦੇ ਜਵਾਬ ’ਚ ਉਨ੍ਹਾਂ ਦੱਸਿਆ ਕਿ 5 ਫਰਵਰੀ ਦੀ ਸ਼ਾਮ ਨੂੰ ਕੁਲਦੀਪ ਸਿੰਘ ਸਣੇ ਦੋ ਸੌ ਬੰਦਿਆਂ ਦੇ ਹਜ਼ੂਮ ਨੇ ਸਾਡੇ ਘਰ ਨੂੰ ਘੇਰਿਆ, ਤਾਂ ਮੌਕੇ ’ਤੇ ਹਾਜ਼ਰ ਪੁਲੀਸ ਨੇ ਚੌਕਸ ਕਰਦਿਆਂ ਕਿਹਾ ਕਿ ਤੁਹਾਡੇ ਘਰ ’ਤੇ ਹਮਲਾ ਹੋ ਸਕਦਾ ਹੈ। ਉਨ੍ਹਾਂ ਅੱਗੇ ਸਵਾਲ ਕੀਤਾ ਕਿ ਕੌਣ ਚਾਹੇਗਾ ਕਿ ਸਾਰਾ ਪਰਿਵਾਰ ਖਤਮ ਹੋ ਜਾਵੇ? ਇਸੇ ਲਈ ਪਰਿਵਾਰ ਦੇ ਮਰਦ ਮੈਂਬਰ ਨੇ ਲਾਇਸੰਸੀ ਹਥਿਆਰ ਨਾਲ ਇੱਕ ਫਾਇਰ ਕੀਤਾ ਸੀ।
ਕੁੱਝ ਜਥੇਬੰਦੀਆਂ ਦੇ ਆਗੂਆਂ ਵੱਲੋਂ ਪਰਿਵਾਰ ਨੂੰ ਨਿਸ਼ਾਨਾ ਬਣਾ ਕੇ ਬਿਆਨ ਦਾਗੇ ਜਾਣ ਦੇ ਸਵਾਲ ’ਤੇ ਉਨ੍ਹਾਂ ਨੂੰ ਅਪੀਲ ਕੀਤੀ ਕਿ ‘ਮੈਂ ਉਨ੍ਹਾਂ ਅੱਗੇ ਹੱਥ ਬੰਨ੍ਹ ਕੇ ਬੇਨਤੀ ਕਰਦੀ ਹਾਂ ਕਿ ਜਥੇਬੰਦੀਆਂ ਸਿਰਫ ਇਕ ਧਿਰ ਦੀ ਹੀ ਨਾ ਸੁਣਨ, ਉਹ ਆ ਕੇ ਸਾਡਾ ਪੱਖ ਵੀ ਜ਼ਰੂਰ ਸੁਣਨ।’
ਵਿਧਾਇਕ ਅਮੋਲਕ ਸਿੰਘ ਦਾ ਕਹਿਣਾ ਹੈ ਕਿ ਇਲਜ਼ਾਮ ਮੇਰੇ ਤੇ ਗਲਤ ਲਗਾਏ ਜਾ ਰਹੇ ਹਨ,‘ਜਦੋਂ ਦੋਵੇਂ ਧਿਰਾਂ ਹੀ ਮੇਰੇ ’ਤੇ ਦੋਸ਼ ਲਾ ਰਹੀਆਂ ਨੇ, ਤਾਂ ਹੁਣ ਤੁਸੀਂ ਦੇਖ ਲਓ ਕਿ ਮੈਂ ਕੀਹਦੇ ਨਾਲ ਖੜ੍ਹਾ ਹਾਂ ?’ ਉਨ੍ਹਾਂ ਨਾਲ ਹੀ ਕਿਹਾ ਕਿ ਪੁਲੀਸ ਵੱਲੋਂ ਜਾਰੀ ਜਾਂਚ ’ਚ ਦੁੱਧ ਦਾ ਦੁੱਧ ਤੇ ਪਾਣੀ ਦਾ ਪਾਣੀ ਹੋ ਜਾਵੇਗਾ। ਅਤੇ ਪੁਲਿਸ ਪ੍ਰਸ਼ਾਸਨ ਆਪਣੀ ਜਾਂਚ ਕਰ ਰਿਹਾ ਹੈ।