ਗਰਮ ਚਾਹ ਦੇ ਕੱਪ ਚ ਵਸੀ ਇਕ ਛੋਟੀ ਜਿਹੀ ਦੁਨੀਆਂ-ਅਮਰਜੀਤ ਟਾਂਡਾ 
ਕਈ ਵਾਰ ਜੀਵਨ ਦੀਆਂ ਵੱਡੀਆਂ ਸੱਚਾਈਆਂ ਵੱਡੀਆਂ ਕਿਤਾਬਾਂ ਵਿੱਚ ਨਹੀਂ, ਸਗੋਂ ਚਾਹ ਦੇ ਇਕ ਛੋਟੇ ਜਿਹੇ ਕੱਪ ਵਿੱਚ ਲੁਕੀਆਂ ਹੁੰਦੀਆਂ ਹਨ। ਚਾਹ ਦਾ ਕੱਪ ਸਿਰਫ਼ ਗਰਮ ਪਾਣੀ, ਪੱਤੀ ਤੇ ਦੁੱਧ ਦਾ ਸੁਮੇਲ ਨਹੀਂ ਹੁੰਦਾ — ਇਹ ਸਮੇਂ ਦਾ ਇਕ ਠਹਿਰਾਓ ਹੁੰਦਾ ਹੈ, ਮਨ ਦਾ ਇਕ ਵਿਸ਼ਰਾਮ ਹੁੰਦਾ ਹੈ, ਤੇ ਰੂਹ ਦਾ ਇਕ ਸੁਕੂਨ।
ਜਦੋਂ ਸਵੇਰ ਦੀ ਪਹਿਲੀ ਸੱਜਰੀ ਰਿਸ਼ਮ ਹੌਲੀ ਹੌਲੀ ਖਿੜਕੀ ਰਾਹੀਂ ਅੰਦਰ ਆਉਂਦੀ ਹੈ ਤੇ ਹੱਥ ਵਿੱਚ ਚਾਹ ਦਾ ਕੱਪ ਹੁੰਦਾ ਹੈ, ਤਾਂ ਲੱਗਦਾ ਹੈ ਜਿਵੇਂ ਦਿਨ ਨੇ ਹੌਲੀ ਜਿਹੀ ਮੁਸਕਾਨ ਨਾਲ ਸਾਡਾ ਸਵਾਗਤ ਕੀਤਾ ਹੋਵੇ।
ਮੈਂ ਚਾਹ ਪੀਂਦਿਆਂ ਬਹੁਤ ਹੀ ਆਨੰਦ ਲੈਂਦਾ ਹਾਂ। ਉਗਲਾਂ ਚ ਗਰਮ ਕੱਪ ਫ਼ੜ ਗਰਮ ਕਰ ਲੈਂਦਾ ਹਾਂ, ਅੱਖਾਂ ਨੂੰ ਵੀ ਸੇਕ ਦੇ ਲੈਂਦਾ ਹਾਂ। ਗਰਮ ਕੱਪ ਹੌਲੀ ਹੌਲੀ ਛੁਹਾਣ ਨਾਲ ਦੰਦ ਦਰਦ ਵੀ ਮਿਟਾ ਦਿੰਦਾ ਹੈ ਤੇ ਗੱਲ੍ਹ ਨੂੰ ਲਾਉਂਦਿਆਂ ਪਿਆਰ ਦਾ ਇਜ਼ਹਾਰ ਵੀ ਕਰਾਉਂਦਾ ਹੈ ਕਿਸੇ ਆਪਣੇ ਦਾ।
ਜੀਵਨ ਦੀ ਦੌੜ ਵਿੱਚ ਜਦੋਂ ਵੀ ਥਕਾਵਟ ਮਹਿਸੂਸ ਹੋਵੇ, ਚਾਹ ਦਾ ਕੱਪ ਹੱਥ ਵਿੱਚ ਫੜੋ —
ਸ਼ਾਇਦ ਤੁਹਾਨੂੰ ਆਪਣੇ ਆਪ ਨਾਲ ਮਿਲਣ ਦਾ ਮੌਕਾ ਮਿਲ ਜਾਵੇ ਕਿਉਂਕਿ ਕਈ ਵਾਰ ਪੂਰੀ ਦੁਨੀਆਂ ਦਾ ਸੁਕੂਨ ਇੱਕ ਛੋਟੇ ਜਿਹੇ ਚਾਹ ਦੇ ਕੱਪ ਵਿੱਚ ਸਮਾਇਆ ਹੁੰਦਾ ਹੈ।
ਚਾਹ ਦੀ ਭਾਪ ਉੱਪਰ ਵਧਦੀ ਹੈ — ਬਿਲਕੁਲ ਸਾਡੇ ਖ਼ਿਆਲਾਂ ਵਾਂਗ, ਜੋ ਹੌਲੀ ਹੌਲੀ ਅਸਮਾਨ ਵੱਲ ਚਲੇ ਜਾਂਦੇ ਹਨ। 
ਚਾਹ ਦਾ ਕੱਪ ਸਾਨੂੰ ਸਿਖਾਉਂਦਾ ਹੈ ਕਿ ਗਰਮੀ ਵਿੱਚ ਵੀ ਸੁਕੂਨ ਹੁੰਦਾ ਹੈ। ਜਿਵੇਂ ਚਾਹ ਗਰਮ ਹੁੰਦੀ ਹੈ ਪਰ ਮਨ ਨੂੰ ਠੰਢਕ ਦੇਂਦੀ ਹੈ, ਓਸੇ ਤਰ੍ਹਾਂ ਜੀਵਨ ਦੀਆਂ ਮੁਸ਼ਕਲਾਂ ਵੀ ਅੰਦਰੋਂ ਸਾਨੂੰ ਮਜ਼ਬੂਤ ਬਣਾਉਂਦੀਆਂ ਹਨ। ਚਾਹ ਦਾ ਹਰ ਘੁੱਟ ਇੱਕ ਛੋਟੀ ਜਿਹੀ ਧਿਆਨ ਦੀ ਅਵਸਥਾ ਬਣ ਜਾਂਦਾ ਹੈ ਜਿੱਥੇ ਨਾ ਭੂਤ ਹੁੰਦਾ ਹੈ ਨਾ ਭਵਿੱਖ, ਸਿਰਫ਼ ਵਰਤਮਾਨ ਹੁੰਦਾ ਹੈ।
ਕਈ ਵਾਰ ਚਾਹ ਦਾ ਕੱਪ ਦੋ ਬੰਦਿਆਂ ਵਿਚਕਾਰ ਬਿਨਾਂ ਬੋਲੇ ਵੀ ਗੱਲਾਂ ਕਰਵਾ ਦਿੰਦਾ ਹੈ। ਦੋ ਕੁਰਸੀਆਂ, ਇੱਕ ਮੇਜ਼ ਤੇ ਵਿਚਕਾਰ ਚਾਹ ਦਾ ਕੱਪ — ਇਹ ਦ੍ਰਿਸ਼ ਦੋ ਦਿਲਾਂ ਨੂੰ ਨੇੜੇ ਲਿਆਉਣ ਲਈ ਕਾਫ਼ੀ ਹੁੰਦਾ ਹੈ।
ਚਾਹ ਦਾ ਕੱਪ ਦੋਸਤੀ ਦਾ ਪੁਲ ਹੁੰਦਾ ਹੈ, ਪਿਆਰ ਦੀ ਸ਼ੁਰੂਆਤ ਹੁੰਦੀ ਹੈ, ਤੇ ਕਈ ਵਾਰ ਟੁੱਟੇ ਮਨ ਦਾ ਇਲਾਜ ਵੀ ਹੁੰਦਾ ਹੈ। 
ਅਧਿਆਤਮਿਕ ਤੌਰ ਤੇ ਵੇਖੀਏ ਤਾਂ ਚਾਹ ਦਾ ਕੱਪ ਸਾਨੂੰ ਹੌਲੀ ਜੀਣਾ ਸਿਖਾਉਂਦਾ ਹੈ। ਇਹ ਕਹਿੰਦਾ ਹੈ —
"ਰੁੱਕੋ… ਬੈਠੋ… ਸਾਹ ਲਵੋ… ਤੇ ਇਸ ਪਲ ਨੂੰ ਮਹਿਸੂਸ ਕਰੋ।"
ਚਾਹ ਦਾ ਕੱਪ ਸਾਨੂੰ ਦੱਸਦਾ ਹੈ ਕਿ ਖੁਸ਼ੀ ਵੱਡੀਆਂ ਚੀਜ਼ਾਂ ਵਿੱਚ ਨਹੀਂ, ਛੋਟੇ ਪਲਾਂ ਵਿੱਚ ਵੀ ਵਸਦੀ ਹੈ। ਖਿੜਕੀ ਕੋਲ ਬੈਠ ਕੇ ਮੀਂਹ ਵੇਖਣਾ, ਹੱਥ ਵਿੱਚ ਚਾਹ ਫੜਨਾ, ਤੇ ਮਨ ਨੂੰ ਖਾਮੋਸ਼ੀ ਨਾਲ ਭਰਨਾ — ਇਹੀ ਤਾਂ ਜੀਵਨ ਦਾ ਅਸਲ ਆਨੰਦ ਹੈ। 
ਚਾਹ ਦਾ ਕੱਪ ਸਿਰਫ਼ ਚਾਹ ਨਹੀਂ — ਇਹ ਇੱਕ ਅਹਿਸਾਸ ਵੀ ਹੈ, ਇੱਕ ਯਾਦ ਹੈ, ਇੱਕ ਸਾਥ ਹੈ ਮਹਿਬੂਬ ਵਰਗਾ। ਚਾਹ ਦਾ ਕੱਪ — ਮਹਿਬੂਬ ਦੇ ਬੁੱਲ੍ਹਾਂ ਵਰਗੀ ਗਰਮਾਹਟ ਹੁੰਦੀ ਹੈ।
ਚਾਹ ਦਾ ਕੱਪ ਹੱਥ ਵਿੱਚ ਆਵੇ ਤਾਂ ਲੱਗਦਾ ਹੈ ਜਿਵੇਂ ਕੋਈ ਮਹਿਬੂਬ ਹੌਲੀ ਜਿਹੀ ਮੁਸਕਾਨ ਨਾਲ ਸਾਹਮਣੇ ਆ ਕੇ ਬੈਠ ਗਈ ਹੋਵੇ। ਕੱਪ ਦਾ ਕੰਢਾ ਮਹਿਬੂਬ ਦੇ ਨਰਮ ਬੁੱਲ੍ਹਾਂ ਵਰਗਾ ਜਾਪਦਾ ਹੈ — ਜਦੋਂ ਘੁੱਟ ਭਰਦੇ ਹੋ ਤਾਂ ਅਹਿਸਾਸ ਹੁੰਦਾ ਹੈ ਜਿਵੇਂ ਕੋਈ ਪਿਆਰ ਦੀ ਚੁੱਪ ਚਾਪ ਚੁੰਮਣ ਦੇ ਗਿਆ ਹੋਵੇ।
ਚਾਹ ਦੀ ਭਾਪ ਉੱਪਰ ਚੜ੍ਹਦੀ ਹੈ — ਜਿਵੇਂ ਮਹਿਬੂਬ ਦੀ ਸਾਹ ਦੀ ਗਰਮੀ ਗੱਲਾਂ ਨੂੰ ਛੂਹ ਕੇ ਲੰਘਦੀ ਹੋਵੇ। ਕੱਪ ਨੂੰ ਗੱਲ੍ਹ ਨਾਲ ਛੁਹਾਓ ਤਾਂ ਇੰਝ ਜਾਪੇਗਾ ਜਿਵੇਂ ਕਿ ਤੁਸੀਂ ਉਸਦੀ ਗੱਲ੍ਹ ਨਾਲ ਗੱਲ੍ਹ ਲਾ ਰਹੇ ਹੋਵੋ। ਉਹ ਸੁਗੰਧ, ਉਹ ਗਰਮਾਹਟ — ਬਿਲਕੁਲ ਉਹਨਾਂ ਪਲਾਂ ਵਰਗੀ ਹੁੰਦੀ ਹੈ ਜਦੋਂ ਕੋਈ ਆਪਣੇ ਨੇੜੇ ਆ ਕੇ ਹੌਲੀ ਜਿਹੀ ਗੱਲ ਕਰਦਾ ਹੈ।
ਚਾਹ ਦਾ ਹਰ ਘੁੱਟ ਪਿਆਰ ਦਾ ਇਕ ਲਫ਼ਜ਼ ਹੁੰਦਾ ਹੈ, ਹਰ ਘੁੱਟ ਇੱਕ ਮਿੱਠੀ ਛੁਹ ਚੁੰਮਣ ਵਰਗਾ, ਤੇ ਕੱਪ ਦੇ ਤਲ ਵਿੱਚ ਬਚੀ ਚਾਹ —
ਬਿਲਕੁਲ ਉਹਨਾਂ ਯਾਦਾਂ ਵਰਗੀ ਹੁੰਦੀ ਹੈ ਜੋ ਦਿਲ ਵਿੱਚ ਥੋੜ੍ਹੀਆਂ ਥੋੜ੍ਹੀਆਂ ਰਹਿ ਜਾਂਦੀਆਂ ਹਨ।
ਕਈ ਵਾਰ ਚਾਹ ਦਾ ਕੱਪ ਹੋਠਾਂ ਨੂੰ ਇਸ ਤਰ੍ਹਾਂ ਛੂਹਦਾ ਹੈ ਜਿਵੇਂ ਕੋਈ ਸ਼ਰਮੀਲੀ ਮਹਿਬੂਬ ਪਹਿਲੀ ਵਾਰ ਹੱਥ ਫੜੇ,
ਤੇ ਹੌਲੀ ਜਿਹੀ ਕੰਬਣੀ ਛੇੜ ਜਾਵੇ ਦਿਲ ਵਿੱਚ ਅਤੇ ਸਮਾਂ ਓਥੇ ਹੀ ਠਹਿਰ ਜਾਂਦਾ ਹੈ।
ਚਾਹ ਦਾ ਰੰਗ ਵੀ ਕਿੰਨਾ ਰੋਮਾਂਟਿਕ ਹੁੰਦਾ ਹੈ —ਨਾ ਪੂਰਾ ਕਾਲਾ, ਨਾ ਪੂਰਾ ਚਿੱਟਾ ਬਿਲਕੁਲ ਦੋ ਦਿਲਾਂ ਦੇ ਮਿਲਣ ਵਰਗਾ ਜਿੱਥੇ ਦੋ ਰੰਗ ਮਿਲ ਕੇ ਇੱਕ ਨਵਾਂ ਅਹਿਸਾਸ ਬਣਾਉਂਦੇ ਹਨ।
ਕੱਪ ਨੂੰ ਦੋਹਾਂ ਹੱਥਾਂ ਨਾਲ ਫੜਨਾ
ਜਿਵੇਂ ਕਿਸੇ ਦੇ ਹੱਥਾਂ ਦੀ ਗਰਮਾਹਟ ਨੂੰ ਮਾਨਣਾ ਸੰਭਾਲਣਾ ਹੋਵੇ, ਅਤੇ ਘੁੱਟ ਭਰਨਾ ਜਿਵੇਂ ਪਿਆਰ ਨੂੰ ਹੌਲੀ ਹੌਲੀ ਆਪਣੇ ਅੰਦਰ ਉਤਾਰਨਾ ਹੋਵੇ।
ਚਾਹ ਦਾ ਕੱਪ ਕਹਿੰਦਾ ਹੈ —
ਪਿਆਰ ਹਮੇਸ਼ਾ ਸ਼ੋਰ ਵਿੱਚ ਨਹੀਂ ਹੁੰਦਾ,
ਕਈ ਵਾਰ ਇਹ ਭਾਪ ਵਾਂਗ ਹੁੰਦਾ ਹੈ,
ਜੋ ਦਿਸਦੀ ਘੱਟ ਹੈ ਪਰ ਮਹਿਸੂਸ ਬਹੁਤ ਹੁੰਦੀ ਹੈ।
ਚਾਹ ਦਾ ਕੱਪ ਖਾਲੀ ਹੋ ਜਾਂਦਾ ਹੈ,ਪਰ ਬੁੱਲ੍ਹਾਂ ਉੱਤੇ ਰਹਿ ਜਾਂਦੀ ਹੈ ਗਰਮਾਹਟ,
ਜਿਵੇਂ ਕੋਈ ਮਿਲ ਕੇ ਚਲਾ ਗਿਆ ਹੋਵੇ,
ਪਰ ਉਸਦੀ ਖੁਸ਼ਬੂ ਦਿਲ ਵਿੱਚ ਰਹਿ ਗਈ ਹੋਵੇ ਕਿਉਂਕਿ ਚਾਹ ਦਾ ਕੱਪ ਸਿਰਫ਼ ਚਾਹ ਨਹੀਂ ਹੁੰਦਾ,
ਇਹ ਮਹਿਬੂਬ ਨਾਲ ਬਿਤਾਇਆ
ਇੱਕ ਖਾਮੋਸ਼, ਨਰਮ, ਰੋਮਾਂਟਿਕ ਪਲ ਹੁੰਦਾ ਹੈ।
ਸੰਪਰਕ+61 412913021
ਅੰਤਰਰਾਸ਼ਟਰੀ ਪੱਧਰ ਦੇ ਪ੍ਰਸਿੱਧ ਕੀਟ ਵਿਗਿਆਨੀ ਦੇ ਖੇਤੀ ਮਾਹਰ
-1775038011940.jpg)
-
ਅਮਰਜੀਤ ਟਾਂਡਾ, writer
drtanda193@gmail.com
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.