ਯੋਗਰਾਜ ਦੀ ਵਿਵਾਦਪੂਰਨ ਕਲਿੱਪ ਨਾਲ ਚੱਲ ਰਹੇ ਗੀਤ ਦੇ ਸਿੰਗਰ ਵੀ ਭੜਕੇ- ਨਮਰ ਗਿੱਲ ਨੇ ਦਿੱਤੀ ਚੇਤਾਵਨੀ, ਕਿਹਾ ਮੇਰਾ ਗੀਤ ਹਟਾਓ...(ਵੇਖੋ ਵੀਡੀਓ)
ਔਰਤਾਂ ਪ੍ਰਤੀ ਘਟੀਆ ਸ਼ਬਦਾਵਲੀ ਵਰਤਣ ਦੇ ਮਾਮਲੇ 'ਚ ਅਦਾਕਾਰ ਯੋਗਰਾਜ ਸਿੰਘ 'ਤੇ ਚੰਡੀਗੜ੍ਹ 'ਚ ਕੇਸ ਦਰਜ
ਵਾਇਰਲ ਵੀਡੀਓ ਦੇ ਪਿੱਛੇ ਵੱਜ ਰਹੇ ਗਾਣੇ ਦੇ ਗਾਇਕ ਨਮਰ ਗਿੱਲ ਨੇ ਜਤਾਇਆ ਸਖ਼ਤ ਇਤਰਾਜ਼
"ਮੈਨੂੰ ਦਿਲੋਂ ਨਮੋਸ਼ੀ ਹੋ ਰਹੀ ਹੈ, ਮੇਰੇ ਗਾਣੇ ਨੂੰ ਇਸ ਘਟੀਆ ਡਾਇਲਾਗ ਤੋਂ ਤੁਰੰਤ ਹਟਾਇਆ ਜਾਵੇ" - ਨਮਰ ਗਿੱਲ
ਚੰਡੀਗੜ੍ਹ, 16 ਮਈ 2026: ਮਸ਼ਹੂਰ ਪੰਜਾਬੀ ਅਦਾਕਾਰ ਯੋਗਰਾਜ ਸਿੰਘ ਵੱਲੋਂ ਇੱਕ ਵੈੱਬ ਸੀਰੀਜ਼ ਵਿੱਚ ਔਰਤਾਂ ਪ੍ਰਤੀ ਵਰਤੀ ਗਈ ਘਟੀਆ ਅਤੇ ਇਤਰਾਜ਼ਯੋਗ ਸ਼ਬਦਾਵਲੀ ਦਾ ਮੁੱਦਾ ਲਗਾਤਾਰ ਭਖ਼ਦਾ ਜਾ ਰਿਹਾ ਹੈ। ਜਿੱਥੇ ਇਸ ਮਾਮਲੇ ਨੂੰ ਲੈ ਕੇ ਯੋਗਰਾਜ ਸਿੰਘ ਵਿਰੁੱਧ ਚੰਡੀਗੜ੍ਹ ਵਿੱਚ ਮੁਕੱਦਮਾ ਦਰਜ ਹੋ ਚੁੱਕਾ ਹੈ ਅਤੇ ਉਹ ਕਾਨੂੰਨੀ ਸ਼ਿਕੰਜੇ ਵਿੱਚ ਫਸਦੇ ਨਜ਼ਰ ਆ ਰਹੇ ਹਨ, ਉੱਥੇ ਹੀ ਹੁਣ ਇਸ ਵਿਵਾਦ ਵਿੱਚ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਦੀ ਵੀ ਐਂਟਰੀ ਹੋ ਗਈ ਹੈ।
ਦਰਅਸਲ, ਜਿਸ ਵਾਇਰਲ ਵੀਡੀਓ ਕਲਿੱਪ ਵਿੱਚ ਯੋਗਰਾਜ ਸਿੰਘ ਔਰਤਾਂ ਖਿਲਾਫ਼ ਇਹ ਵਿਵਾਦਤ ਡਾਇਲਾਗ ਬੋਲ ਰਹੇ ਹਨ, ਉਸ ਦੇ ਬੈਕਗ੍ਰਾਊਂਡ ਵਿੱਚ ਪੰਜਾਬੀ ਗਾਇਕ ਨਮਰ ਗਿੱਲ ਦਾ ਸੁਪਰਹਿੱਟ ਗਾਣਾ "ਉਹਦੀ ਅੱਖ ਵੀ ਕਮੀਨੀ, ਮੇਰਾ ਦਿਲ ਵੀ ਕਮੀਨਾ" ਵੱਜ ਰਿਹਾ ਹੈ। ਇਸ ਗੱਲ ਦਾ ਪਤਾ ਲੱਗਣ 'ਤੇ ਗਾਇਕ ਨਮਰ ਗਿੱਲ ਨੇ ਇੱਕ ਵੀਡੀਓ ਸਾਂਝੀ ਕਰਕੇ ਆਪਣਾ ਸਖ਼ਤ ਵਿਰੋਧ ਦਰਜ ਕਰਵਾਇਆ ਹੈ।
ਸੋਸ਼ਲ ਮੀਡੀਆ 'ਤੇ ਵੀਡੀਓ ਸਾਂਝੀ ਕਰਦਿਆਂ ਗਾਇਕ ਨਮਰ ਗਿੱਲ ਨੇ ਕਿਹਾ, "ਦੋਸਤੋ, ਤੁਸੀਂ ਮੇਰੇ ਇਸ ਗਾਣੇ ਨੂੰ ਬਹੁਤ ਪਿਆਰ ਦਿੱਤਾ ਹੈ। ਪੰਜਾਬ ਦੇ ਨਾਲ-ਨਾਲ ਇਹ ਪੂਰੇ ਇੰਡੀਆ ਵਿੱਚ ਵਾਇਰਲ ਹੋ ਰਿਹਾ ਹੈ ਅਤੇ ਇਸ 'ਤੇ ਲਗਭਗ 2 ਮਿਲੀਅਨ (20 ਲੱਖ) ਦੇ ਨੇੜੇ-ਤੇੜੇ ਰੀਲਾਂ ਬਣ ਚੁੱਕੀਆਂ ਹਨ, ਜਿਸ ਲਈ ਮੈਂ ਸਾਰਿਆਂ ਦਾ ਧੰਨਵਾਦੀ ਹਾਂ।"
"ਪਰ ਪਿਛਲੇ 2-3 ਦਿਨਾਂ ਤੋਂ ਕਿਸੇ ਘਟੀਆ ਜਿਹੇ ਡਾਇਲਾਗ ਦੇ ਉੱਤੇ ਮੇਰਾ ਇਹ ਗਾਣਾ ਵਰਤਿਆ ਜਾ ਰਿਹਾ ਹੈ। ਪੰਜਾਬ ਹੀ ਨਹੀਂ, ਬਲਕਿ ਵਿਦੇਸ਼ਾਂ (Abroad) ਤੋਂ ਵੀ ਮੈਨੂੰ ਲਗਾਤਾਰ ਫੋਨ ਆ ਰਹੇ ਹਨ ਕਿ ਟਿਕ-ਟਾਕ ਅਤੇ ਹੋਰ ਪਲੇਟਫਾਰਮਾਂ 'ਤੇ ਇਹ ਬਹੁਤ ਵਾਇਰਲ ਹੋ ਰਿਹਾ ਹੈ। ਪੰਜਾਬ ਦਾ ਇੱਕ ਜ਼ਿੰਮੇਵਾਰ ਨਾਗਰਿਕ ਅਤੇ ਸਿੰਗਰ ਹੋਣ ਦੇ ਨਾਤੇ ਮੈਨੂੰ ਇਸ 'ਤੇ ਸਖ਼ਤ ਇਤਰਾਜ਼ ਹੈ। ਯੋਗਰਾਜ ਸਿੰਘ ਨੇ ਜੋ ਔਰਤਾਂ ਖਿਲਾਫ਼ ਸ਼ਬਦ ਬੋਲੇ ਨੇ, ਉਹ ਬਿਲਕੁਲ ਵੀ ਬਰਦਾਸ਼ਤ ਕਰਨ ਯੋਗ ਨਹੀਂ ਹਨ।"
ਨਮਰ ਗਿੱਲ ਨੇ ਵੀਡੀਓ ਰਾਹੀਂ ਗੋਇਲ ਮਿਊਜ਼ਿਕ (Goyal Music) ਦੇ ਮਨੀਸ਼ ਨੂੰ ਨਿਮਰਤਾ ਸਹਿਤ ਬੇਨਤੀ ਕੀਤੀ ਹੈ ਕਿ ਇਸ ਵੀਡੀਓ 'ਤੇ ਸਖ਼ਤ ਐਕਸ਼ਨ ਲਿਆ ਜਾਵੇ। ਉਨ੍ਹਾਂ ਕਿਹਾ, "ਜਿਨ੍ਹਾਂ ਵੀ ਵੀਰਾਂ ਨੇ ਮੇਰਾ ਗਾਣਾ ਇਸ ਡਾਇਲਾਗ ਉੱਪਰ ਐਡਿਟ ਕੀਤਾ ਹੈ, ਉਹ ਇਸ ਨੂੰ ਤੁਰੰਤ ਹਟਾ ਦੇਣ। ਮੈਨੂੰ ਇਸ ਕਾਰਨ ਦਿਲੋਂ ਬਹੁਤ ਨਮੋਸ਼ੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਅਤੇ ਬਿਲਕੁਲ ਵੀ ਵਧੀਆ ਫੀਲ ਨਹੀਂ ਹੋ ਰਿਹਾ।"
ਦੱਸਣਯੋਗ ਹੈ ਕਿ ਇਸ ਬਿਆਨ ਤੋਂ ਬਾਅਦ ਸੋਸ਼ਲ ਮੀਡੀਆ 'ਤੇ ਨਮਰ ਗਿੱਲ ਦੇ ਸਟੈਂਡ ਦੀ ਕਾਫ਼ੀ ਸ਼ਲਾਘਾ ਕੀਤੀ ਜਾ ਰਹੀ ਹੈ, ਜਦਕਿ ਦੂਜੇ ਪਾਸੇ ਅਦਾਕਾਰ ਯੋਗਰਾਜ ਸਿੰਘ ਦੀਆਂ ਮੁਸ਼ਕਿਲਾਂ ਦਿਨ-ਬ-ਦਿਨ ਵਧਦੀਆਂ ਜਾ ਰਹੀਆਂ ਹਨ।
- Download Babushahi App
-
-
