ਨਾਂਹ ਪੱਖੀ ਸੋਚੋ,ਤੁਹਾਡੀ ਸ਼ਖਸ਼ੀਅਤ ਨੂੰ ਢਾਹ ਲਾਉਂਦੀ ਹੈ
—————————————
ਕੋਈ ਵੀ ਇਨਸਾਨ ਚੰਗੀ ਸੋਚ ਰੱਖੇ ਬਿਨਾ ਚੰਗੇ ਕਿਰਦਾਰ ਦਾ ਮਾਲਕ ਨਹੀਂ ਬਣ ਸਕਦਾ।ਇਸ ਲਈ ਚੰਗੇ ਕਿਰਦਾਰ ਦਾ ਮਨੁੱਖ ਬਣਨ ਵਾਸਤੇ ਚੰਗੀ ਸੋਚ ਰੱਖੋ।ਆਪਣੀ ਸੋਚ ਨੂੰ ਹਮੇਸ਼ਾਂ ਸਾਫ਼ ਸੁਥਰੀ,ਉੱਚੀ ਸੁੱਚੀ ਤੇ ਹਾਂ ਪੱਖੀ ਰੱਖੋ।ਨਾਂਹ ਪੱਖੀ ਸੋਚ ਇਨਸਾਨ ਨੂੰ ਮਾਨਸਿਕ ਤੌਰ ਤੇ ਕਮਜ਼ੋਰ ਬਣਾ ਦਿੰਦੀ ਹੈ।ਤੁਹਾਨੂੰ ਜਿੰਦਗੀ ਦੇ ਅਸਲ ਉਦੇਸ਼ ਤੋਂ ਭੜਕਾ ਦਿੰਦੀ ਹੈ ਤੇ ਇਹ ਵੀ ਹੋ ਸਕਦਾ ਹੈ ਤੁਸੀਂ ਜਿੰਦਗੀ ਦੇ ਮਕਸਦ ਤੋਂ ਖੁੰਝ ਜਾਵੋ।
ਜਦ ਕੇ ਉੱਚੀ ਸੋਚ ਤੁਹਾਨੂੰ ਜਿੰਦਗੀ ਚ ਸਫਲਤਾ ਵੱਲ ਲੈ ਕੇ ਜਾਵੇਗੀ।ਤੁਹਾਨੂੰ ਤੰਦਰੁਸਤੀ ਬਖ਼ਸ਼ੇਗੀ।ਸਮਾਜ ਚ ਤੁਹਾਡਾ ਦਾਇਰਾ ਵਧੇਗਾ।ਲੋਕ ਤੁਹਾਨੂੰ ਪਿਆਰ ਕਰਨਗੇ।ਤੁਹਾਡੀ ਗੱਲ ਦੀ ਕਦਰ ਕਰਨਗੇ।ਸੱਚੀ ਤੇ ਵਜ਼ਨਦਾਰ ਗੱਲ ਨਾਲ ਤੁਹਾਡੇ ਵਿਚਾਰਾਂ ਦਾ ਵਧੇਰੇ ਮੁੱਲ ਪਵੇਗਾ।ਤੁਹਾਡੀ ਵੱਖਰੀ ਪਛਾਣ ਬਣੇਗੀ।ਇਸ ਨਾਲ ਤੁਹਾਡੀ ਸ਼ਖਸ਼ੀਅਤ ਚ ਨਿਖਾਰ ਆਵੇਗਾ।ਸਮਾਜ ਚ ਤੁਹਾਡਾ ਰੁਤਬਾ ਵਧੇਗਾ।ਇਸ ਲਈ ਕਦੇ ਆਪਣੇ ਮਨ ਚ ਮਾੜੇ ਵਿਚਾਰ ਨਾ ਲਿਆਓ।ਸਦਾ ਉੱਚੇ ਵਿਚਾਰਾਂ ਦੇ ਧਾਰਨੀ ਬਣੋ।ਕਿਉਂਕਿ ਉੱਚੇ ਵਿਚਾਰ ਹੀ ਤੁਹਾਡੇ ਕਿਰਦਾਰ ਤੇ ਤੁਹਾਡੀ ਸਫਲਤਾ ਦੀ ਨਿਸ਼ਾਨੀ ਹੈ।
ਮਾੜੀ ਸੋਚ ਤੁਹਾਨੂੰ ਅੱਗੇ ਨਹੀਂ ਵਧਣ ਦੇਵੇਗੀ,ਸਗੋਂ ਪਿਛਾਂ ਖਿੱਚੇਗੀ।ਮਾੜਾ ਸੋਚਦੇ ਵਕਤ ਤੁਹਾਡਾ ਮਨ ਬੇਚੈਨ ਰਹਿੰਦਾ ਹੈ,ਜਦੋ ਕੇ ਚੰਗਾ ਸੋਚਦੇ ਸਮੇਂ ਤੁਸੀਂ ਖਿੜੇ ਰਹਿੰਦੇ ਹੋ।ਨਾਂਹ ਪੱਖੀ ਸੋਚ ਨਾਲ ਤੁਸੀਂ ਅੱਗੇ ਨਹੀਂ ਵਧ ਸਕਦੇ ਤੇ ਲੋਕਾਂ ਨਾਲੋਂ ਵੀ ਟੁੱਟ ਜਾਵੋਗੇ।ਲੋਕ ਤੁਹਾਡੇ ਤੋ ਪਾਸਾ ਵੱਟਣਗੇ।ਤੁਹਾਡੇ ਨਾਲ ਗੱਲ ਕਰਨ ਤੋ ਕੰਨੀ ਕਤਰਾਉਣਗੇ।ਜਿਸ ਨਾਲ ਤੁਸੀਂ ਮਾਨਸਕ ਤੌਰ ਤੇ ਦੁਖੀ ਹੋਵੇਗੇ।ਜਿਸ ਦਾ ਸਿੱਧਾ ਅਸਰ ਤੁਹਾਡੀ ਸਿਹਤ ਉੱਤੇ ਪਵੇਗਾ।ਤੁਸੀਂ ਇੱਕ ਵਧੀਆ ਜਿੰਦਗੀ ਨਹੀਂ ਜੀਅ ਸਕੋਗੇ।ਵਿਰੋਧੀਆਂ ਪੱਖੀ ਵੀ ਹਾਂ ਪੱਖੀ ਵਿਚਾਰ ਰੱਖਣ ਦੀ ਕੋਸ਼ਿਸ਼ ਕਰੋਗੇ ਤਾ ਤੁਹਾਡੇ ਮਨ ਨੂੰ ਸਕੂਨ ਮਿਲੇਗਾ।ਨਾਂਹ ਪੱਖੀ ਸੋਚ ਰੱਖ ਕੇ ਕੁੜਦੇ ਰਹਿਣ ਦਾ ਕੋਈ ਫਾਇਦਾ ਨਹੀਂ।ਇਸ ਨਾਲ ਤੁਹਾਡੇ ਰੋਜ਼ ਦੇ ਕਾਰ ਵਿਹਾਰ ਉੱਤੇ ਵੀ ਮਾੜਾ ਅਸਰ ਪੈਂਦਾ ਹੈ।ਤੁਹਾਡਾ ਕੋਈ ਵੀ ਕੰਮ ਕਰਨ ਨੂੰ ਮਨ ਨਹੀਂ ਕਰੇਗਾ।ਤੁਸੀਂ ਖਿਜੇ ਖਿਜੇ ਰਹੋਗੇ।ਜਿਸ ਦਾ ਅਸਰ ਤੁਹਾਡੇ ਪਰਵਾਰ ਉੱਤੇ ਵੀ ਪੈਣਾ ਸੁਭਾਵਕ ਹੈ।
ਇਸ ਲਈ ਕਦੇ ਵੀ ਆਪਣੇ ਮਨ ਅੰਦਰ ਖੁਦ ਬਾਰੇ ਜਾਂ ਦੂਸਰੇ ਬਾਰੇ ਮਾੜੇ ਵਿਚਾਰ ਨਾ ਆਉਣ ਦਿਓ ਤੇ ਨਾ ਰੱਖੋ। ਨਹੀਂ ਤਾਂ ਇਸ ਦਾ ਤੁਹਾਡੀ ਸਿਹਤ ਉੱਤੇ ਬੁਰਾ ਪ੍ਰਭਾਵ ਜਰੂਰ ਪਵੇਗਾ।ਖੁਦ ਖੁਸ਼ ਰਹੋ ਤੇ ਦੂਜਿਆਂ ਨੂੰ ਖੁਸ਼ ਰੱਖੋ।ਇਸ ਤਰਾਂ ਜਿੰਦਗੀ ਜਿਓਣ ਦਾ ਆਨੰਦ ਹੀ ਵੱਖਰਾ ਹੈ।ਜਿੰਦਗੀ ਦਾ ਫ਼ਲਸਫ਼ਾ ਇਹੀ ਦੱਸਦਾ ਹੈ ਕਿ ਖੁਸ਼ ਰਹਿ ਕੇ ਤੁਸੀਂ ਆਪਣੀ ਉਮਰ ਨੂੰ ਲਮੇਰਾ ਕਰ ਸਕਦੇ ਹੋ।ਕਿਉਂਕਿ ਟੈਂਸ਼ਨ ਜਾਂ ਨਾਂਹ ਪੱਖੀ ਤੇ ਮਾੜੀ ਸੋਚ ਤੁਹਾਡੇ ਨਰਵਿਸ ਸਿਸਟਮ ਨੂੰ ਕਮਜ਼ੋਰ ਹੀ ਨਹੀਂ ਕਰਦੀ ਸਗੋਂ ਤੁਹਾਨੂੰ ਸਾਮਾਜ ਤੋਂ ਵੀ ਦੂਰ ਕਰਦੀ ਹੈ।
ਬਹੁਤ ਵਾਰੀ ਹੁੰਦਾ ਹੈ ਕੇ ਤੁਹਾਡੇ ਸਰਕਲ ਚ ਇੱਕ ਨਾ ਅੱਧਾ ਅਜਿਹਾ ਇਨਸਾਨ ਹੁੰਦਾ ਹੈ ਜੋ ਬਿਨਾ ਵਜ੍ਹਾ ਹਰ ਗੱਲ ਨੂੰ ਲੈ ਕੇ ਨਾਂਹ ਪੱਖੀ ਸੋਚ ਰੱਖਦਾ ਹੈ।ਉਹ ਚੰਗੇ ਕੰਮ ਨੂੰ ਵੀ ਨਾਂਹ ਕਰਕੇ ਨਾ ਸਿਰਫ ਤੁਹਾਡਾ ਹੌਂਸਲਾ ਤੋੜਦਾ ਹੈ,ਸਗੋਂ ਤੁਹਾਡੇ ਚ ਨਿਰਾਸ਼ਤਾ ਵੀ ਪੈਦਾ ਕਰਦਾ ਹੈ।ਇਸ ਲਈ ਸਦਾ ਹਾਂ ਪੱਖੀ ਸੋਚ ਵਾਲੇ ਇਨਸਾਨਾਂ ਦਾ ਸੰਗ ਕਰੋ।ਨਾਂਹ ਪੱਖੀ ਸੋਚ ਵਾਲਿਆਂ ਤੋਂ ਵਕਫ਼ਾ ਬਣਾ ਕੇ ਰੱਖੋ।ਕਿਉਂਕਿ ਜੇ ਤੁਸੀਂ ਨਾਂਹ ਪੱਖੀ ਇਨਸਾਨਾਂ ਦਾ ਸੰਗ ਕਰੋਗੇ ਤਾਂ ਹਾਂ ਪੱਖੀ ਹੁੰਦੇ ਹੋਏ ਵੀ ਤੁਸੀਂ ਇੱਕ ਨਾ ਇੱਕ ਦਿਨ ਨਾਂਹ ਪੱਖੀ ਸੋਚ ਦੇ ਮਾਲਕ ਬਣ ਸਕਦੇ ਹੋ।ਸੋ ਚੰਗਿਆਂ ਦਾ ਸੰਗ ਤੇ ਮੰਦਿਆਂ ਤੋਂ ਵਕਫ਼ਾ ਰੱਖੋ। ਇਸ ਵਾਸਤੇ ਚੰਗਾ ਸੋਚੋ ਚੰਗੇ ਨਤੀਜੇ ਆਉਣਗੇ।ਤਾਂ ਹੀ ਕਿਸੇ ਨੇ ਸੱਚ ਆਖਿਆ ਹੈ ਕੇ ਹੱਸਦਿਆਂ ਦੇ ਘਰ ਵੱਸਦੇ।ਇਹ ਗੱਲ ਹੈ ਵੀ ਸੌ ਟਕੇ ਸੱਚ।ਸੋ ਹਮੇਸ਼ਾ ਉੱਚੇ ਸੁੱਚੇ ਵਿਚਾਰ ਰੱਖੋ।ਸੋਹਣੀ ਜਿੰਦਗੀ ਜਿਓਣੇ ਦਾ ਇਹ ਇੱਕ ਲੁਕਵਾਂ ਰਾਜ ਹੈ।ਜਿਸ ਨੂੰ ਅਪਨਾ ਕੇ ਤੁਸੀਂ ਇੱਕ ਸਫਲ ਤੇ ਵਧੀਆ ਇਨਸਾਨ ਬਣ ਸਕਦੇ ਹੋ ਤੇ ਸਮਾਜ ਲਈ ਮਿਸਾਲ ਵੀ ।
ਲੈਕਚਰਾਰ ਅਜੀਤ ਖੰਨਾ
( ਐਮਏ ਐਮਫਿਲ ਐਮਜੇਐਮਸੀ ਬੀ ਐਡ )
ਮੋਬਾਈਲ 76967-54669
-
ਅਜੀਤ ਖੰਨਾ , ਲੈਕਚਰਾਰ
khannaajitsingh@gmail.com
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.