ਨਿਊਜ਼ੀਲੈਂਡ ਸਿੱਖ ਖੇਡਾਂ
ਪ੍ਰਧਾਨ ਮੰਤਰੀ ਸ੍ਰੀ ਕਿ੍ਰਸ ਲਕਸਨ ਨੇ ਕੀਤਾ ਰਸਮੀ ਉਦਘਾਟਨ-ਅਰਦਾਸ, ਕਵੀਸ਼ਰੀ ਅਤੇ ਗਤਕੇ ਦੇ ਨਾਲ ਸ਼ੁਰੂ ਹੋਈਆਂ ਸਿੱਖ ਖੇਡਾਂ
-ਪਹਿਲੇ ਦਿਨ ਵੱਖ-ਵੱਖ ਖੇਡਾਂ ਦੇ ਹੋਏ ਮੁਕਾਬਲੇ
-ਏਅਰ ਬਬਲ ਨੇ ਲੰਬੇ ਬੈਨਰ ਨਾਲ ਵੰਡਿਆ ਆਕਾਸ਼ੀ ਸੁਨੇਹਾ
-ਹਰਜਿੰਦਰ ਸਿੰਘ ਬਸਿਆਲਾ-
ਔਕਲੈਂਡ, 29 ਨਵੰਬਰ 2025- ਨਿਊਜ਼ੀਲੈਂਡ ਵਸਦੇ ਪੰਜਾਬੀਆਂ ਦੀ ਸੰਘਣੀ ਆਬਾਦੀ ਵਾਲੇ ਖੇਤਰ ਟਾਕਾਨੀਨੀ ਵਿਖੇ 158 ਏਕੜਾਂ ਦੇ ਵਿਚ ਫੈਲੇ ਖੇਡ ਮੈਦਾਨਾਂ ਦੇ ਵਿਚ ਸੱਤਵੀਂਆਂ ਨਿਊਜ਼ੀਲੈਂਡ ਸਿੱਖ ਖੇਡਾਂ ਦਾ ਅੱਜ ਆਗਾਜ਼ ਹੋਇਆ। ਆਰੰਭਤਾ ਜਿੱਥੇ ਗੁਰਦੁਆਰਾ ਸਾਹਿਬ ਤੋਂ ਪਹੁੰਚੇ ਭਾਈ ਸਾਹਿਬ ਦੀ ਅਰਦਾਸ ਦੇ ਨਾਲ ਹੋਈ ਉਥੇ ਇਨ੍ਹਾਂ ਖੇਡਾਂ ਦੇ ਰਸਮੀ ਉਦਘਾਟਨ ਦੇ ਲਈ ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀ ਸ੍ਰੀ ਕ੍ਰਿਸ ਲਕਸਨ ਆਪਣੇ ਮੰਤਰੀ ਮੰਡਲ ਦੇ ਨਾਲ ਪਹੁੰਚੇ। ਉਨ੍ਹਾਂ ਨੂੰ ਫੁੱਲ੍ਹਾਂ ਦੇ ਗੁਲਦਸਤੇ ਦੇ ਕੇ ਜੀ ਆਇਆਂ ਆਖਿਆ ਗਿਆ। ਪ੍ਰਧਾਨ ਮੰਤਰੀ ਨੇ ਇਸ ਮੌਕੇ ਬੋਲਿਦਆਂ ਜਿੱਥੇ ਸਮੂਹ ਪ੍ਰਬੰਧਕਾਂ ਨੂੰ ਵਧਾਈ ਦਿੱਤੀ ਉਤੇ ਸਾਰੇ ਖਿਡਾਰੀਆਂ ਨੂੰ ਸ਼ੁੱਭ ਕਾਮਨਾਵਾਂ ਦਿੱਤੀਆਂ। ਦੇਸ਼ ਪ੍ਰਤੀ ਪੰਜਾਬੀਆਂ ਦੇ ਯੋਗਦਾਨ ਨੂੰ ਵੀ ਉਨ੍ਹਾਂ ਨੇ ਸਵੀਕਾਰ ਕੀਤਾ।
ਇਸਦੇ ਨਾਲ ਹੀ ਸਟੇਜ ਦਾ ਰੰਗਾ-ਰੰਗ ਪ੍ਰੋਗਰਾਮ ਵੀ ਜਾਰੀ ਰਿਹਾ। ਬੱਚਿਆਂ ਦੀ ਕਵੀਸ਼ਰੀ ਨੇ ਮਨ ਮੋਹਿਆ। ਰਿਵਰ ਸਿਟੀ ਪੰਜਾਬੀਜ਼, ਪੰਜਾਬੀ ਕਲਚਰਲ ਐਸੋਸੀਏਸ਼ਨ, ਪੰਜਾਬੀ ਹੈਰੀਟੇਜਰਜ਼ ਦੀ ਗਿੱਧਾ ਟੀਮ, ਵੋਮੈਨ ਕੇਅਰ ਟ੍ਰਸਟ ਦੇ ਬੱਚੇ, ਏ. ਪੀ. ਡੀ. ਜੂਨੀਅਰ ਕਿਡਜ਼, ਵਾਇਕਾਟੋ ਸ਼ਹੀਦ ਏ ਆਜ਼ਮ ਸ਼ਹੀਦ ਭਗਤ ਸਿੰਘ ਟ੍ਰਸਟ ਹਮਿਲਟਨ ਵੱਲੋਂ ਗਿੱਧਾ-ਭੰਗੜਾ, ਕੋਰੀਓਗ੍ਰਾਫੀ, ਸ਼ਾਨ ਪੰਜਾਬ ਦੀ, ਨੱਚਦਾ ਪੰਜਾਬ, ਫਰੈਂਕਲਿਨ ਇੰਡੀਅਨ ਕਲਚਰਲ ਕਲੱਬ, ਪੰਜਾਬੀ ਹੈਰੀਟੇਜ ਡਾਂਸ ਅਕੈਡਮੀ ਦੇ ਕਲਾਕਾਰਾਂ ਨੇ ਸਟੇਜ ਉਥੇ ਧਮਾਲ ਪਾਈ ਰੱਖੀ। ਅਕਾਲ ਖਾਲਸਾ ਸਿੱਖ ਮਾਰਸ਼ਲ ਆਰਟ ਨੇ ਮਾਰਚ ਪਾਸਟ ਤੋਂ ਪਹਿਲਾਂ ਖਿਡਾਰੀਆਂ ਦੇ ਵਿਚ ਜੋਸ਼ ਭਰ ਦਿੱਤਾ। ਸਿੱਖ ਖੇਡਾਂ ਦੀ ਐਡਮਿਨ ਟੀਮ ਵੱਲੋਂ ਪ੍ਰਧਾਨ ਮੰਤਰੀ ਨੂੰ ਸਨਮਾਨਿਤ ਕੀਤਾ ਗਿਆ। ਇੰਡੀਆ ਤੋਂ ਪਹੁੰਚੇ ਪ੍ਰਸਿੱਧ ਪੱਤਰਕਾਰ ਸ. ਸਿਮਰਨਜੀਤ ਸਿੰਘ ਮੱਕੜ ਹੋਰਾਂ ਨੂੰ ਵੀ ਪ੍ਰਧਾਨ ਮੰਤਰੀ ਦੇ ਹੱਥੋਂ ਮਾਨ-ਸਨਮਾਨ ਦਿਵਾਇਆ ਗਿਆ। ਇਸ ਤੋਂ ਇਲਾਵਾ ਪੁਲਿਸ ਮੰਤਰੀ, ਸਿਹਤ ਮੰਤਰੀ ਅਤੇ ਐਮ. ਪੀ. ਰੀਮਾ ਨਾਖਲੇ ਨੇ ਵਧਾਈ ਦਿੱਤੀ। ਸ. ਪਿ੍ਰਥੀਪਾਲ ਸਿੰਘ ਬਸਰਾ ਨੇ ਵੀ ਵਧਾਈ ਦਿੱਤੀ। ਸ. ਦਲਜੀਤ ਸਿੰਘ ਸਿੱਧੂ ੇਨੇ ਸਵਾਗਤੀ ਭਾਸ਼ਣ ਦਿੱਤਾ ਜਦ ਕਿ ਸ. ਤਾਰਾ ਸਿੰਘ ਬੈਂਸ ਨੇ ਸਭ ਦਾ ਧੰਨਵਾਦ ਕੀਤਾ। ਪ੍ਰਧਾਨ ਮੰਤਰੀ ਨੇ ਜਾਂਦੇ-ਜਾਂਦੇ ਖੇਡ ਮੈਦਾਨ ਅਤੇ ਸਟਾਲਾਂ ਵੱਲ ਜਦੋਂ ਗੇੜਾ ਦਿੱਤਾ ਤਾਂ ਉਨ੍ਹਾਂ ਜਲੇਬੀਆਂ ਵਾਲੇ ਸਟਾਲ ਉਤੇ ਜਲੇਬੀਆਂ ਦੀ ਕੱਢ ਦਿੱਤੀਆਂ ਅਤੇ ਲੰਗਰ ਅਸਥਾਨ ’ਤੇ ਜਾ ਕੇ ਜਲੇਬੀਆਂ ਵਰਤਾਈਆਂ।
ਜਿੱਥੇ ਵੱਖ-ਵੱਖ ਖੇਡਾਂ ਚਲਦੀਆਂ ਰਹੀਆਂ ਉਥੇ ਸ਼ਾਮ ਨੂੰ ਫਿਰ ਮਲਵਈ ਗਿੱਧਾ ਖਿੱਚ ਦਾ ਕੇਂਦਰ ਬਣਿਆ। ਸ਼ਾਨ ਪੰਜਾਬ ਦੀ ਸੀਨੀਅਰ ਟੀਮ ਨੇ ਪੂਰੀ ਅਤ ਮਚਾਈ। ਸਥਾਨਿਕ ਗਾਇਕ ਸੱਤਾ ਵੈਰੋਵਾਲੀਆ, ਮਲਕੀਤ ਸਿੰਘ, ਬੌਬੀ ਕਲੇਰ ਅਤੇ ਅਰਸ਼ ਲਾਲੀ ਨੇ ਆਪਣੇ ਸਾਰੇ ਪ੍ਰਚਿੱਲਤ ਗੀਤਾਂ ਦੇ ਨਾਲ ਰੌਣਕ ਲਾਈ ਰੱਖੀ। ਗਾਇਕ ਸੱਤਾ ਵੈਰੋਵਾਲੀਆ ਨੇ ਮੇਲੇ ਨੂੰ ਨਵੀਂ ਰੌਣਕ ਦਿੱਤੀ।
ਲੰਗਰ ਦਾ ਕਮਾਲ ਦਾ ਪ੍ਰਬੰਧ: ਇਨ੍ਹਾਂ ਸਿੱਖ ਖੇਡਾਂ ਦੇ ਵਿਚ ਹਰ ਸਾਲ ਦਰਸ਼ਕਾਂ ਦੇ ਲਈ ਲਾਇਆ ਲੰਗਰ ਹਮੇਸ਼ਾ ਬਹੁਤ ਹੀ ਮਹੱਤਵਪੂਰਨ ਰੋਲ ਅਦਾ ਕਰਦਾ ਹੈ। ਇਸ ਵਾਰ ਵੀ ਸ੍ਰੀ ਪਰਮਜੀਤ ਮਹਿਮੀ, ਸ. ਤਾਰਾ ਸਿੰਘ ਬੈਂਸ ਦੇ ਸਹਿਯੋਗ ਸਦਕਾ ਸ੍ਰੀ ਰਾਮ ਸਿੰਘ ਚੌਂਕੜੀਆਂ ਦੀ ਸਮੁੱਚੀ ਟੀਮ ਨੇ ਬਹੁਤ ਵਧੀਆ ਪ੍ਰਬੰਧ ਕੀਤਾ। ਲੋਕਾਂ ਦੀ ਸਹੂਲਤ ਲਈ ਲਾਈਨਾਂ ਸਿਰ ਰਹਿਣ ਦਾ ਪ੍ਰਬੰਧ ਸੀ, ਬੈਠ ਕੇ ਲੰਗਰ ਛਕਣ ਲਈ ਵੱਖਰਾ ਪੰਡਾਲ ਲਗਾਇਆ ਗਿਆ ਸੀ।
ਪ੍ਰਧਾਨ ਸ. ਦਲਜੀਤ ਸਿੰਘ ਸਿੱਧੂ ਦਾ ਭਾਸ਼ਣ: ਸੱਤਵੇਂ ਨਿਊਜ਼ੀਲੈਂਡ ਸਿੱਖ ਖੇਡਾਂ ਵਿੱਚ ਤੁਹਾਡਾ ਸਾਰਿਆਂ ਦਾ ਸਵਾਗਤ ਹੈ। ਇਹ ਦੇਖ ਕੇ ਬਹੁਤ ਚੰਗਾ ਲੱਗ ਰਿਹਾ ਹੈ ਕਿ ਸਾਡਾ ਭਾਈਚਾਰਾ ਦੇਸ਼ ਭਰ ਵਿੱਚੋਂ ਇਕੱਠਾ ਹੋਇਆ ਹੈ। ਮੈਂ ਅੱਜ ਸਾਡੇ ਨਾਲ ਜੁੜਨ ਲਈ ਸਾਡੇ ਸਾਰੇ ਐਥਲੀਟਾਂ, ਖਿਡਾਰੀਆਂ, ਪਰਿਵਾਰਾਂ, ਕਲੱਬਾਂ ਅਤੇ ਮਹਿਮਾਨਾਂ ਦਾ ਧੰਨਵਾਦ ਕਰਨਾ ਚਾਹੁੰਦਾ ਹਾਂ।
ਨਿਊਜ਼ੀਲੈਂਡ ਸਿੱਖ ਖੇਡਾਂ ਸਿਰਫ਼ ਜਿੱਤਾਂ ਜਿੱਤਣ ਬਾਰੇ ਨਹੀਂ ਹਨ। ਇਹ ਆਪਣੇ ਵੱਲੋਂ ਸਭ ਤੋਂ ਵਧੀਆ ਕੋਸ਼ਿਸ਼ ਕਰਨ, ਆਦਰ ਦਿਖਾਉਣ ਅਤੇ ਇੱਕ ਦੂਜੇ ਦਾ ਸਾਥ ਦੇਣ ਬਾਰੇ ਹਨ। ਇਹ ਸਾਨੂੰ ਯਾਦ ਦਿਵਾਉਂਦੇ ਹਨ ਕਿ ਖੇਡਾਂ ਲੋਕਾਂ ਨੂੰ ਇਕੱਠਾ ਕਰ ਸਕਦੀਆਂ ਹਨ, ਭਾਵੇਂ ਸਾਡੀ ਉਮਰ ਜਾਂ ਪਿਛੋਕੜ ਕੋਈ ਵੀ ਹੋਵੇ। ਜਦੋਂ ਤੁਸੀਂ ਅੱਜ ਖੇਡਦੇ ਹੋ, ਤਾਂ ਤੁਸੀਂ ਨਾ ਸਿਰਫ਼ ਆਪਣੀ ਟੀਮ ਦੀ ਨੁਮਾਇੰਦਗੀ ਕਰਦੇ ਹੋ, ਸਗੋਂ ਉਨ੍ਹਾਂ ਕਦਰਾਂ-ਕੀਮਤਾਂ ਦੀ ਵੀ ਨੁਮਾਇੰਦਗੀ ਕਰਦੇ ਹੋ ਜਿਨ੍ਹਾਂ ਲਈ ਅਸੀਂ ਇੱਕ ਭਾਈਚਾਰੇ ਵਜੋਂ ਖੜ੍ਹੇ ਹਾਂ।
ਮੈਂ ਆਪਣੇ ਪ੍ਰਧਾਨ ਮੰਤਰੀ, ਮਾਨਯੋਗ ਸ੍ਰੀ ਕ੍ਰਿਸਟੋਫਰ ਲਕਸਨ, ਮੰਤਰੀ ਮਾਨਯੋਗ ਮਾਰਕ ਮਿਸ਼ੇਲ, ਮੰਤਰੀ ਮਾਨਯੋਗ ਸਿਮਓਨ ਬ੍ਰਾਊਨ, ਸਾਡੇ ਸਥਾਨਕ ਐਮ.ਪੀ. ਰੀਮਾ ਨਾਖਲੇ, ਭਾਰਤ ਦੇ ਕੌਂਸਲ ਜਨਰਲ ਮਦਨ ਮੋਹਨ ਸੇਠੀ, ਮਨੁਰੇਵਾ-ਪਾਪਾਕੁਰਾ ਕਾਉਂਸਲਰ ਡੇਨੀਅਲ ਨਿਊਮੈਨ, ਸਥਾਨਕ ਬੋਰਡ ਮੈਂਬਰਾਂ ਅਤੇ ਸਾਡੇ ਭਾਈਚਾਰੇ ਦੇ ਆਗੂਆਂ ਦਾ ਧੰਨਵਾਦ ਕਰਨਾ ਚਾਹੁੰਦਾ ਹਾਂ।
ਮੈਂ ਸਾਡੇ ਸਪਾਂਸਰਾਂ, ਸਮਰਥਕਾਂ, ਭਾਈਵਾਲ ਸੰਸਥਾਵਾਂ (ਪਾਰਟਨਰ ਆਰਗੇਨਾਈਜ਼ੇਸ਼ਨਜ਼), ਮੀਡੀਆ ਭਾਈਵਾਲਾਂ ਅਤੇ ਵਾਲੰਟੀਅਰਾਂ ਦਾ ਵੀ ਉਹਨਾਂ ਦੇ ਸਹਿਯੋਗ ਅਤੇ ਹਰ ਸਾਲ ਇਸ ਸਮਾਗਮ ਨੂੰ ਹੋਰ ਬਿਹਤਰ ਬਣਾਉਣ ਵਿੱਚ ਮਦਦ ਕਰਨ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ। ਬੈਡਮਿੰਟਨ ਦੇ ਵਿਚ ਗੰਗਾ ਸਿੰਘ ਵਿਰਕ ਅਤੇ ਅਸ਼ੀਸ਼ ਡਾਂਗੀ ਦੀ ਟੀਮ ਜੇਤੂ ਰਹੀ।
ਧੰਨਵਾਦ: ਨਿਊਜ਼ੀਲੈਂਡ ਸਿੱਖ ਖੇਡਾਂ ਦੇ ਵਿਚ ਸਹਿਯੋਗ ਕਰਨ ਦੇ ਲਈ ਡਾਇਮੰਡ ਸਪਾਂਸਰਜ਼, ਪਲੈਟੀਨਮ, ਗੋਲਡ ਸਪਾਂਸਰਜ਼, ਸਿਲਵਰ ਅਤੇ ਬ੍ਰੋਨਜ਼ ਸਪਾਂਸਰਜ਼ ਦਾ ਧੰਨਵਾਦ ਕੀਤਾ ਗਿਆ