ਬੇਭਰੋਸਗੀ ਮਤੇ ’ਤੇ ਸੱਦੀ ਮੀਟਿੰਗ ਤੋਂ ਬਠਿੰਡਾ ਦੀਆਂ ਕਾਂਗਰਸੀ ਸਫ਼ਾਂ ’ਚ ਭੁਚਾਲ ਪਿਆ
ਅਸ਼ੋਕ ਵਰਮਾ
ਬਠਿੰਡਾ, 14 ਫਰਵਰੀ 2025:ਨਗਰ ਨਿਗਮ ਬਠਿੰਡਾ ਦੇ ਡਿਪਟੀ ਮੇਅਰ ਖ਼ਿਲਾਫ਼ ਬੇਭਰੋਸਗੀ ਮਤੇ ’ਤੇ ਵਿਚਾਰ ਕਰਨ ਲਈ ਨਿਗਮ ਦੇ ਸੰਯੁਕਤ ਕਮਿਸ਼ਨਰ ਵੱਲੋਂ 17 ਫਰਵਰੀ ਨੂੰ ਸਵੇਰੇ 11 ਵਜੇ ਸੱਦੀ ਜਨਰਲ ਹਾਊਸ ਦੀ ਵਿਸ਼ੇਸ਼ ਮੀਟਿੰਗ ਤੋਂ ਬਾਅਦ ਬਠਿੰਡਾ ਦੇ ਕਾਂਗਰਸੀ ਹਲਕਿਆਂ ਵਿੱਚ ਇੱਕ ਤਰ੍ਹਾਂ ਨਾਲ ਭੁਚਾਲ ਜਿਹਾ ਆ ਗਿਆ ਹੈ। ਇਹ ਮੀਟਿੰਗ ਪਿਛਲੀ 5 ਫਰਵਰੀ ਨੂੰ ਡਿਪਟੀ ਮੇਅਰ ਮਾਸਟਰ ਹਰਿਮੰਦਰ ਸਿੰਘ ਖ਼ਿਲਾਫ਼ 24 ਕੌਂਸਲਰਾਂ ਵੱਲੋਂ ਬੇ-ਭਰੋਸਗੀ ਮਤਾ ਪਾਸ ਕਰਕੇ ਕਮਿਸ਼ਨਰ ਨੂੰ ਸੌਂਪਣ ਦੀ ਰੌਸ਼ਨੀ ਵਿੱਚ ਬੁਲਾਈ ਗਈ ਹੈ। ਸ਼ਹਿਰ ਦੀ ਕਾਂਗਰਸੀ ਰਾਜਨੀਤੀ ਵਿੱਚ ਇਸ ਮੀਟਿੰਗ ਨੂੰ ਕਾਫੀ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ। ਖਾਸ ਤੌਰ ਤੇ ਜਦੋਂ 50 ਕੌਂਸਲਰਾਂ ਵਾਲੇ ਹਾਊਸ ਅੰਦਰ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਪਦਮਜੀਤ ਮਹਿਤਾ 33 ਕੌਂਸਲਰਾਂ ਦੀ ਹਮਾਇਤ ਨਾਲ ਮੇਅਰ ਵਜੋਂ ਜੇਤੂ ਰਹੇ ਹਨ ਤਾਂ ਇਸ ਮੀਟਿੰਗ ਦੀ ਅਹਿਮੀਅਤ ਹੋਰ ਵੀ ਵਧ ਗਈ ਹੈ।
ਇਸ ਮੀਟਿੰਗ ਨੂੰ ਇਕੱਲੇ ਕਾਂਗਰਸੀ ਕੌਂਸਲਰਾਂ ਹੀ ਨਹੀਂ ਬਲਕਿ ਬਠਿੰਡਾ ਸ਼ਹਿਰੀ ਕਾਂਗਰਸ ਦੇ ਜ਼ਿਲ੍ਹਾ ਪ੍ਰਧਾਨ ਰਾਜਨ ਗਰਗ ਲਈ ਵੀ ਪਰਖ ਦੀ ਘੜੀ ਮੰਨਿਆ ਜਾ ਰਿਹਾ ਹੈ। ਜ਼ਿਲ੍ਹਾ ਪ੍ਰਧਾਨ ਰਾਜਨ ਗਰਗ ਦਾ ਕਹਿਣਾ ਸੀ ਕਿ ਕਾਂਗਰਸ ਵੱਲੋਂ ਪੂਰੀ ਤਿਆਰੀ ਹੈ। ਉਹਨਾਂ ਦੱਸਿਆ ਕਿ ਜਿੰਨਾ ਕਾਂਗਰਸੀ਼ ਕੌਂਸਲਰਾਂ ਨੇ ਪਰਮਜੀਤ ਮਹਿਤਾ ਨੂੰ ਵੋਟ ਪਾਈ ਸੀ ਉਹਨਾਂ ਤੋਂ ਜਿਆਦਾਤਰ ਵਾਪਸ ਆ ਗਏ ਹਨ। ਉਹਨਾਂ ਦਾਅਵਾ ਕੀਤਾ ਕਿ ਬੇਭਰੋਸਗੀ ਮਤੇ ਤੇ ਕਾਂਗਰਸ ਪਾਰਟੀ ਜਿੱਤ ਹਾਸਿਲ ਕਰੇਗੀ।ਗੌਰਤਲਬ ਹੈ ਕਿ ਮਨਪ੍ਰੀਤ ਸਿੰਘ ਬਾਦਲ ਅਸੰਬਲੀ ਹਲਕੇ ਬਠਿੰਡਾ (ਸ਼ਹਿਰੀ) ਤੋਂ ਫ਼ਤਿਹ ਹਾਸਿਲ ਕਰਨ ਬਾਅਦ ਕੈਪਟਨ ਸਰਕਾਰ ’ਚ ਵਿੱਤ ਮੰਤਰੀ ਬਣੇ ਸਨ। ਕੈਪਟਨ ਹਕੂਮਤ ਵਕਤ ਹੀ 50 ਕੌਂਸਲਰਾਂ ਦੇ ਹਾਊਸ ਵਾਲੇ ਨਗਰ ਨਿਗਮ ’ਚ ਕਾਂਗਰਸ ਦੇ 43 ਕੌਂਸਲਰ ਜੇਤੂ ਰਹੇ ਸਨ। ਮਨਪ੍ਰੀਤ ਬਾਦਲ ਦੀ ਨਜ਼ਰ-ਇ-ਅਨਾਇਤ ਸਦਕਾ ਮੈਡਮ ਰਮਨ ਗੋਇਲ ਨਿਗਮ ਨੂੰ ਮੇਅਰ ਬਣਨ ਦਾ ਮਾਣ ਹਾਸਿਲ ਹੋਇਆ ਸੀ। ਮਨਪ੍ਰੀਤ ਬਾਦਲ ਦੀ ਭਾਜਪਾ ’ਚ ਸ਼ਮੂਲੀਅਤ ਤੋਂ ਬਾਅਦ ਉਨ੍ਹਾਂ ਦੇ ਸਮਰਥਕ ਕੌਂਸਲਰਾਂ ਦੀ ਕਤਾਰਬੰਦੀ ਕਾਰਣ ਨਿਗਮ ’ਚ ਕਾਂਗਰਸ ਗੁੱਟਬੰਦੀ ਦਾ ਸ਼ਿਕਾਰ ਹੋ ਗਈ। ਨਤੀਜ਼ਨ ਕਰੀਬ ਸਵਾ ਸਾਲ ਪਹਿਲਾਂ ਰਮਨ ਗੋਇਲ ਨੂੰ ਇਸ ਦਾ ਖ਼ਮਿਆਜ਼ਾ ਆਪਣੀ ਕੁਰਸੀ ਗੁਆ ਕੇ ਚੁਕਾਉਣਾ ਪਿਆ।
ਤਕਰੀਬਨ ਸਵਾ ਸਾਲ ਬਾਅਦ ਲੰਘੀ 5 ਫਰਵਰੀ ਨੂੰ ਮੇਅਰ ਦੀ ਚੋਣ ਬੇਹੱਦ ਰੌਚਿਕ ਰਹੀ। ਕਾਂਗਰਸ ਦੀ ਫੁੱਟ ਸਦਕਾ ‘ਆਪ’ ਦੇ ਇਕਲੌਤੇ ਕੌਂਸਲਰ ਪਦਮਜੀਤ ਮਹਿਤਾ ਹਾਊਸ ’ਚ ਹਾਜ਼ਰ 48 ਵੋਟਰਾਂ ’ਚੋਂ 33 ਦੀਆਂ ਵੋਟਾਂ ਲੈ ਕੇ ਮੇਅਰ ਬਣਨ ਵਿੱਚ ਕਾਮਯਾਬ ਰਹੇ। ਉਸ ਸਮੇਂ 3 ਕੌਂਸਲਰ ਗ਼ੈਰ ਹਾਜ਼ਰ ਸਨ, ਜਦ ਕਿ ਹਾਊਸ ’ਚ ਵੋਟ ਫ਼ਤਵਾ ਦੇਣ ਦਾ ਅਧਿਕਾਰ ਰੱਖਦੇ ਬਠਿੰਡਾ (ਸ਼ਹਿਰੀ) ਹਲਕੇ ਤੋਂ ‘ਆਪ’ ਦੇ ਵਿਧਾਇਕ ਜਗਰੂਪ ਸਿੰਘ ਗਿੱਲ ਨੇ ਪਦਮਜੀਤ ਮਹਿਤਾ ਦੇ ਵਿਰੋਧ ’ਚ ਕਾਂਗਰਸੀ ਉਮੀਦਵਾਰ ਨੂੰ ਵੋਟ ਪਾਈ ਸੀ।ਉਧਰ ਮੇਅਰ ਦੀ ਚੋਣ ਵੇਲੇ ਤੋਂ ਨਮੋਸ਼ੀ ਦਾ ਸਾਹਮਣਾ ਕਰ ਰਹੀ ਕਾਂਗਰਸੀ ਲੀਡਰਸ਼ਿਪ ਅੱਗੇ ਡਿਪਟੀ ਮੇਅਰ ਖ਼ਿਲਾਫ਼ ਆਏ ਬੇਭਰੋਸਗੀ ਦੇ ਮਤੇ ਦਾ ਸਾਹਮਣਾ ਕਰਨ ਨੂੰ ਲੈ ਕੇ ਚਿੰਤਾ ਵਧਾ ਦਿੱਤੀ ਹੈ। ਐਨ ਸਿਰ ’ਤੇ ਆ ਕੇ ਸ਼ੂਕ ਰਹੇ ਭਵਸਾਗਰ ਨੂੰ ਕਾਂਗਰਸ ਕਿਵੇਂ ਪਾਰ ਕਰਦੀ ਹੈ, ਇਹ ਦੋ ਦਿਨਾਂ ਬਾਅਦ ਸਪਸ਼ਟ ਹੋ ਜਾਵੇਗਾ। ਇਹ ਵੀ ਵੇਖਣਾ ਹੋਵੇਗਾ ਕਿ ਵਿਧਾਇਕ ਜਗਰੂਪ ਸਿੰਘ ਗਿੱਲ ਇਸ ਵਾਰ ਕਿਸ ਤਰਫ਼ ਭੁਗਤਦੇ ਹਨ? ਖਾਸ ਗੱਲ ਇਹ ਵੀ ਹੈ ਕਿ ਕਾਂਗਰਸ ਦੇ ਸੀਨੀਅਰ ਡਿਪਟੀ ਮੇਅਰ ਅਸ਼ੋਕ ਪ੍ਰਧਾਨ ਲਈ ਹਾਲੇ ਤੱਕ ਕਿਸੇ ਪਾਸਿਓਂ ਅਜਿਹੀ ਚੁਣੌਤੀ ਦੀ ਕੋਈ ਕਨਸੋਅ ਨਹੀਂ।